A PILTE’ KINIAMKHIATNA
SABBATH NITAK
TU KAAL SUNG SIM DING: Pau. 30; Luke 18: 9 – 14; Job 38 – 40: 2; 1Jn. 1:9; Mang. 3: 14 – 18; Late 104: 24.
KAMNGAH: Lungsim niamkhiatte in thupha a ngah ding uh hi. Bang hang hiam cih leh, vantung gam in amau gam ahi ding hi. (Matt. 5: 3).
Lai Siangtho in kiniamkhiatna pen gamtat zia le tong hoih mahmah khat hi, ci-in hong hilh hi. Mihing sung pan a piang mi khempeuh lak pan kamsang lianpenpen Moses mah
kiniamkhiat pen hi (Gam. 12: 3). Kamsang Micah in, Pasian in mite tung pan a hong lamet lianpi pen in Ama mai-ah kiniamkhiatna ahi hi (Micah 6:8). Khrih mahmah in zong kiniamkhiat ding limtakin hong hilh hi. Naupangte bangin a kiniamkhiat lo mi-in vantung gam sungah lut thei lo ding hi, ci hi (Matt. 18: 4). A taktakin ngaihsun lehang mihing in kisaktheihpih ding bang nei mawk hiam? Huihdik, lungtangkisai, siamna, hihtheihna tuamtuamte, i nunna mahmah Pasian kiang pan i ngah hi lo hiam (Sawl. 17: 28). Singlamteh siksan hi lehang mihing’ hoihna khempeuh niin hi lel hi (Isa. 64: 6). Tua hi mawk leh, bang kisialhpih ding nei i hiam?
SUNDAY MARCH 15
NANG LE NANG KUA HI, KICI NA HIAM?
Pau. 30: 1- 3, 32, 33. Bang hong hilh hiam?
_________________________________________________________
_________________________________________________________
Nidanglai kumpite in galzo-in, vangliatna kisaktheihpih uh hi. Ahi zongin Lai Siangtho in tua bang kihihsakna hemkhia-in kiniamkhiat ding hong hilh hi. Solomon kumpipa sangin vanglian zaw, minthang zaw kumpi om lo hi. Theihna, siamna le pilna tawh kidim kumpi hi. Nebuchadnezzar kumpipa zong Babylon khua bangzah takin lian ahi hiam? Kumpi khuapi ding le ka vangliatna ka thahatna a kilat nadingin ka lam ahi hi, ci hi (Dan. 4: 30).
Pilna tawh kidim Solomon nangawnin a theihloh thu, bangmah thei lo a kisaklam zong kiphawk hi. Kiphatsakna pen hai-na hi, ci-in gen hi. Mihai cih kammal Hebrew laimalin Nabal kizang hi. Nabal’ gamtatzia in hai gamtatna hi (1Sam. 25). Kisialhna in kiphatsakna piangsak hi. A kiphasakte a kiniamkoih uh ciang, hehin thangpaai uh hi. Sawltak Paul in zong, thu-um mite kiangah, amau le amau pil kisa, a kiphasak mite mihai ciziau hi (2Kor. 11: 18, 19).
Luke 18: 9 – 14 sung sim in. Bang hangin Pharisee bangin nungta kha zel i hiam? Koi bangin tua bang khialhna tawh kipelh thei ding na hiam? A kiphasak mite hehpihhuai hi lo hiam? Tua bang mite amau le amau a kikhem, a hai-na uh kiphawk lo mite hi lo hiam?
MONDAY MARCH 16
PASIAN THEIHTELNA?
Topa a thei nai lo mi in kisaktheihna nei uh hi. Ahi zongin mihingte sang a vanglian zaw, a siangtho zaw Pasian tawh kizopna nei tawntungte ahih leh kiniamkhiat uh hi. Hih leitung le vantung liatna ngaihsun lecin, i biak Pasian vangliatna na mu ding hi. Tua a vanglian Pasian in mihingin hong nungta-in singlamteh tungah sihna hong thuak cih thuthuk ngaihsun lehang mihing in kiphatsakpih ding, kisialh ding bang mah nei het lo hi.
Pau. 30: 3- 6 sung sim in. Pasian’ vangliatna thuthuk bang pulaak hiam?
____________________________________________________________
____________________________________________________________
Pasian theihtelna i gen ciangin Pasian’ ii zia le tong a gen ihi hi. Pasian i theihlohzia hi. Pau. 30: 4 sim in. Bang thu hong kito hiam?
______________________________________________________________
_____________________________________________________________
Pasian in na khempeuh Piangsakpa ahih manin, mihing in a telzawh ding hi lo hi. Job sungah Pasian in Job kiangah ‘ ka bawlsa nate tel zo ding na hiam? ci-in dong hi (Job 38 – 40: 2). Piangsak Pasian ahih manin Pasian ahihna zahzah mihing in telzo peuhmah lo ding ahih manin, koi bangin Ama hong pulaak Lai Siangtho thute na pom ding hiam?
Piansak thu a lamdanzia ngaihsun in. Kuama telzawh loh Piangsak Pasian thu bang na mu hiam? Bang hangin hih thu in lametna le khamuanna hong nei thei sak hiam?
TUESDAY MARCH 17
UANG LUA ( KHENGVAL ) KEN
Pau. 30: 3 – 7 in thungetna hi-in Paunak sungah hih mun bek mah thungetna hi. A vanglian Pasian, na khempeuh Piangsakpa in A kamciamte pel ngeilo cih hong hilh hi (Pau. 30: 4, 5).
Pau. 30: 7 – 9 sim in. Bang hangin Agur in tua bangin ngen hi ding hiam?
____________________________________________________
_________________________________________________________
Pasian kiangah i ngetma-in Amah tawh kizopna masak kul hi. Pasian mai-ah zuau gen lehang, Pasian om kei a ci hi veve hi. Tua hi-in mawhmai nadingin mawhthumna kisam hi ( 1Jn. 1:9). Pasian i khem zo kei ding hi. Pasian in i hihna bangbang hong tel mahmah hi. Khukdinin thu i nget ciang, Ama mai-ah leivui a bang ihihna, zahtakna le kiniamkhiatna limcing hi (Kahla 3: 29). Tham lo-in Ama mai-ah bangmah i hihlohna, guaktangin i omna limcing hi.
Paunak 30: 8 ah, Agur in Pasian kiangah hauhna lah hong pia kei in. Zawnna lah hong pia kei in, ci-in thungen hi. “Pia” cih kammal in Pasian in mihingte a hong piak annek tuidawn a pulaak kammal hi (Pian. 1:29).Tua hangin annek le thunget pen kithuahham hamtang hi. Hih in Pasian tungah i kingakzia hong hilh hi. I nuntakna ah thunget pen a kisam mahmah khat ahi hi. Hauhna hi lo, zawnna zong ngen tuan lo, Pasian’ min a than nading thunget ding hi zaw hi. Zawnglua lehang, mi’ neihsa deihgawhin guta kha-in Pasian mindai ding hi.Hauh lenglah, Pasian i kitangsaplam phawk lo zel ding, Pasian mahmah nial kha thei cih thu hi. Neih le lamh in Pasian tawh hong kikhensak zaw thei-a, zawnna in Pasian tawh hong kinaisak zaw thei hi. Topa in thunget zia ding hong hilh a, (1) nisim nekkhop ding, a kitangsam zahsangin tamzaw lo ngen ding, (2). Ze-etna tawh hong kipelh nading cih thu hi ( Matt. 6: 11).
Koi bangin Pasian tungah a kinga mi na hi hiam? Koi bangin upna thu ah khangcing thei ding na hiam? Pasian tungah kinga lo hi lehang, lauhuai bang thute tuak kha thei ding i hiam?
WEDNESDAY MARCH 18
A NGONGTATTE’ GAMTATNA
Kiniamkhiatna in thuhoih, thupha hong ngahsak hi. A kiniamkhiat lo mi in lauhuai nate tuak ding hi. Pau. 30 in kiniamkhiatna hangin thuphate a pulaak khit teh, kiphatsakna lauhuai zia hong hilh hi.
(1) Nu le pa samsiatna (Pau. 30: 11, 17). I pianna nu le pa simmawhna in hai gamtat, ngongtatna taktak hi. A lang khat ah, nu le pa pahtawi, a zahtak mite’ ngah ding kamciam om hi (Pai. 20: 12; Eph. 6: 2, 3). Tua bangin nu le pa a simmawhte in sihna thuak ding uh hi (Pai. 21: 15, 17).
(2) Ei le ei dikkisakna: Pau. 30: 12, 20. Migilote amau le amaudikkisa uh a, siatna ahih lam phawk lo uh hi. Siatna sungah kidiahin tuapi mah, midik mah kisasa uh ahih manun, mawhmai ding kisamsa lo uh hi. Tua hi-in mawhmai nadingin mawhthumna kisam pelmawh hi (1Jn. 1: 9). Laodiceans pawlpi in amah le amah hau, pil, puanhoih nono hilhin kingaihsun hi. A zawnna, a khuamuhlohna, guaktangin a omna phawk lo hi. Tua bang dinmun pan Pasian zuan dingin kihilh hi (Mang. 3:14 –18). Kiphatsakna tawh kidim tua bang mite in hauhna, khuamuhna a ngah nadingun Pasian in thupha pia den hi. Pasian’ piak thuphate hangin lungdam tuan lo uh hi. Pasian langpang veve uh hi. Ama hehpihna nial den uh hi. A kipia hamphatnate thusim lo, thaangzat uh hi. Amau siatna mah tawh lungkim lel uh hi. Kineihkhem, kingeina neihden, lungdam thei lo cihte tawh kidim uh hi. Ellen G. White, Faith and Works, 83.
(3) Topa Zahtaklohna: (Pau. 30: 13, 14). Migilote’ omziagentehna tawh a pulaak thute deihhuai lo hi. A maipuak un kiphatsakna limla-in, kuamah a zahtak lohzia uh, amau gamtat zia le tong tungtawnin kimu thei hi.
Mi tawh na kizopzia ngaihsun in. A diakdiakin na neumuh mite tungah na lungsimpuak kingaihsun in. Koi bangin kipuahpha thei ding na hiam? Koi bangin kiniamkhiatna in hong puah thei ding hiam?
THURSDAY MARCH 19
NATE TUNG PAN PILNA
Lai Siangtho in nate tungtawnin a hong thuhilhna tampi om hi. Paunak in zong nate tung panin kiniamkhiatna thu hong hilh hi.
Pau. 30: 18, 19 sim in. Mihingte’ theihna in ciangtan a neihzia bang pulaak hiam?
__________________________________________________________
____________________________________________________
Agur in nate tung panin thuthuk a muhzia pulaak hi. Ganhing tuamtuamte: muvanlai in vanlaizang ah a lenzia, gul in leitang tungah a paizia cihte a lamdang mahmah thu hi. Ganhingte’ lamdanna a pulaak khit ciang, mihing thu tawh kisai a gen: tuipi tungah tembaw paitheihzia, nungak le tangval kingaihzia cihte pulaak hi. Tuhun pilna khang mahmah hi taleh, hih bang thute tel khia zo nai lo hi. Nunzia a lamdang ahihna mangngilh loh ding thupi hi lo hiam? Tua bang lungsim in hong kiniamkhiatsak thei bek hi.
Pau. 30: 24 – 28 sung sim in. Piansak nate in a lamdang nate bang pulaak hiam?
____________________________________________________
_____________________________________________________________
Mihing’ haina, kiphatsaknate le nate lamdangzia enkak dingin hong hilh hi. Ganhingte zong kiniamkhiat thei uh ahihzia hong hilh hi. A pil mite in a theihna uh tawm mahmah ahihzia telsemsem uh hi. Nate’ thu i tel tawmno khat bek om a, i muhloh thu i telloh tampi om hi.
Nate thu, singtehkia beek ahi zong, tuitak khat’ nasep a kipan mihing in nate in bang mah i theihlohzia hong hilh uh hi. Tua in hong kiniamkhiatsak hi lo hiam?
FRIDAY MARCH 20
SIMBEH DING: Topa’ kammal le a laibu mahmah zahtak kul hi. Thaangzat, lopthawh bawl kha kei in. Nang deih bangin kammal khat nangawn zang kei in. Mei sungah kihal suangmanpha bangmahin Topa’ kammal in siangtho hi (Pau. 30:5; Late 12: 6) Ellen G. White, Education, 244.
Topa in mualtung pan a thuhilhnate lakah a masa penin thupha tawh kisai thute hilh masa hi. Kha thu ah zawngkhal kisa-in hotkhiatna kisam ahihlam kiphawk mite in thupha ngah ding uh hi. Mizawngte tungah Lungdamna Thu kipuak ding hi. Amau le amau dik kisa mite in hau kisa khin uh ahih manin tua Lungdamna Thu amaute tungah kipuak lo ding hi. Ahi zongin a kiniamkhiat mite tung le lungsim kitamzan mite tungah kitangko ding hi. A thanemna kiphawk a, amah le amah dik kisakna a hemkhia-in, Topa tungah a ki-ap mateng Topa in tua mi sungah bang mah sem thei lo hi. Tua bang ciang bekin Topa in a piak dingin a koih thuphate pia thei pan hi. Topa kitangsapzia a phawk mi tungah a piak dingin Topa in bangmah itsiik lo hi.Tua bang mite in ciangtan omlo Topa tawh kizopna nei ahi hi. Ellen G. White, The Desire of Ages, 299, 300.
KIKUP DING DOTNATE:
1. Hotkhiatna thu le eite a hong kihotkhiatna zia ngaihsun. Puatham thaksuakna in mawhna pan hong suaktasak zo peuhmah loding hi. Bangci bangin i kikhel zongin tua kikhelna in sihna pan hong honkhia zo ngei peuhmah lo ding hi. Eite hong honkhia ding, eite aitangin a ding ding, Pasian tawh kilem kiksak zo ding dikna nei KHAT i kisam hi. Hih thu in kiphatsakna, kiliatsakna cihte in mawhna lianpi ahihzia hong hilh hi lo hiam?
2. Pasian tungah kinga ihihzia koi bangin kimu thei hiam? Koi bangin piansak nate in Pasian tungah kinga ihihzia hong hilh uh hiam?
3. Pau. 30: 7 – 9 sunga thungetna ngaihsun kik in. Koi bangin hauh lua lo, zawng lua lo-in om thei ding i hiam? Bang hangin tua in thupi hiam?
