UPNA TAWH NUNGTA
SABBATH NITAK
TU KAAL SUNG SIM DING: Pau. 28:4, 7, 9; 28: 5; 29: 13; Rom. 1: 16, 17; Gal. 3: 24; 1Jn. 2: 15 – 17.
KAMNGAH: “Midangte kihtakna in hong lunghimawhsak a, Topa muanna in hong lungmuangsak hi.” Pau. 29: 25.
Koici bangin kiim le paam pan thu tampi lak pan thuman le zuau thu na khentel hiam? Lai Siangtho, Topa’ kammal siksanin bang in thuman hi-in, bang in zuau hi, cih i theithei hi. Pasian tungah kinga-in Ama kammal siksan ding simloh lampi dang om lo hi. Tua tungtawnin Pasian in hong makaih ding hi. Jesuh in, “Pasian gam le Ama dikna zong masa un. Tua hi leh, note kitangsap khempeuh hong kipia ding hi,” ci-in hong kamciam hi (Matt. 6:33). Pasian mah muan masak ding, zuih masak ding kisam penpen hi. Tua lo-in thudang, na dangte masak hi lehang, milim biakna suak pah hi. Upna tawh nuntakna in Pasian muangin a nungta cihna ahi hi. Topa’ in hong sawl thute sem dingin nang mahmah in na khensat kul hi. Tua bang nunzia in Thu-um mite’nunzia ding ahi hi. Tua bangin i nuntak manin kitangsapna khempeuh Aman hong sik ding hi.
SUNDAY MARCH 8
THUKHAM NUNTAKPIH
Paunak sungah ‘thukham’ ‘thuhilhna’ cih kammal 13 vei bang kimu thei a, tuate lak pan Pau. 28 sungah 4 vei bang kimu thei hi. (aneu 4 ah nih vei, 7, 9). Paunak sungah tua kammalte in mipilte’ thuhilhna, ci-in a kipulaak hangin, a taktakin, tua kammalte in Pasian in amah le amahin a hong pulaak thute hi (Pau. 29:18).
Pau. 28: 4, 7 sim in. Thukham in, koi bangin gamtat theih nadingin, thupi hiam?
_____________________________________________________________
_____________________________________________________________
Israel mite le namdang mite kilamdanna bulpi pen in lungsim ngaihsut puak zia hi masa lo hi. Bang in kilamdangsak hiam cih leh, nek le dawn, mi tawh a kizopzia, gamtat zia le tong cihte in kilamdangsak hi. Hih bangin a gamtatna hang uh a bulpi pen in thukham mah hipi pen hi. Mihing in ei le ei-in pil gamtat zo kei hi; a sia le a pha i khentel thei kei hi ( 1Kum. 3:9). Tua hi-in vantung lamlahna, Thukham i kisam hi.
Pil gamtatna pen thuak pilna, thutheihnate’ hang bek hi lo hi. Thukham bangin gamtatna tawh kituak pupa’ ngeina, mihing lungsim puakzia le deihtheihna cihte a kigawm tak ciangin pilna kingah thei pan hi.
Pasian’ thukham in tawntung a kipden thukham hi. Pasian’ thukham zuihna pen upna tawh nuntakna hi. Paul in Lungdamna Thu ka maizumpih kei hi. Tua Lungdamna Thu in Jew mi, Greek mi le minam khempeuh hotkhiatna ding Pasian’ vangliatna ahi hi. Tua thu in mi khempeuh in Pasian’ dikna a ngah theih nading ahi hi. Lai Siangtho sungah kigelh bang mahin ‘ka midik in upna tawh a nungta ding hi,” ci hi (Rom. 1:16, 17).
Pasian’ thukham na zuih manin bang siatna, buainate tawh na kipelh hiam? Pasian’ thukham zui kei lecin, tu-a na nunzia sangin koi bangin sia zaw thei hiam?
MONDAY MARCH 9
TOPA ZONG UN
Bang zahin Thukham in thupi mahmah taleh, Thukham in nuntakna’ nak hi lo hi; nunna hong pia lo hi. Ahi zongin Thukham in siatna, mawhna hong theitelsak a, tua mawhna in sihna hong tun hi (Rom. 7: 7 – 13). Thukham (Torah) in Pasian kiang pan hong pai ahih manin kisapna bang mah nei lo hi. Pasian kiang pan hong pai lo hi leh, Thukham’ deihna in Pasian’ ngimna tawh kituak lo ding hi. Pasian’ Thukham a zui mite in Pasian kiang hong tunpih ding nunzia tawh a nungta ahi uh hi. Torah in Pasian nawlkhin lo hi; Pasian kiang tun theih nading lampi hong hilh hi; Topa i kitangsaplam hong theisak hi (Gal. 3: 24).
Galati sunga kigen thute siksanin Gal. 3: 24 sim in. Koi bangin upna tawh diktanna ngah theiih nadingin Thukham in Khris kiang hong tunpih hiam?
_________________________________________________________
__________________________________________________________
Paunak Lai Siangtho in pilna mawkmawk hi lo hi. Pasian i cih in a bangci dan Pasian hiam cih hong laak pilna hi. Pilna a zong mi khempeuh in thukham nuntakpih uh hi leh, thukham in Topa tawh hong kinaisak zaw semsem ding a, Khris in a khawnkhong a hong piak hotkhiatna upna tawh ngah thei ding uh hi.
Pau. 28:5 sim in. Theihtelna dingin bang kisam penpen hiam?
___________________________________________________________
___________________________________________________________
‘Theitel’ cih kammal aneu 5 sungah nihvei kigelh hi. Thukham cih kammal, aneu 4 sungah nihvei kigelh hi. Hih thu nihte in kizopna nei hi. “ Thukham bangin nuntakna’ le Topa a zong nuntakna” in a tuamtuak hi lo hi. A hoihnate sepna bek hi lo hi. Nuntakna buppi huamkhin hi. Israel mite hun lai-in leitung thu theihna le vantung thu theihna tuamkhen lo uh hi. Ngaihsutna om upna tawh nungta cih bang om thei lo hi. Bang hang hiam cih leh, thu theihtelna, i theihzawh loh thute upna cih thu in Pasian mah bulphuh hi.
Bang hangin Pasian upna nei cih thu in thu theihtelna kisamsak hiam? Bang hangin Pasian up sangin uplohna in thu ngaihsut theihloh vai, thu haivai suak zaw hiam?
TUESDAY MARCH 10
A HAUTE TUNGAH THUHILHNA
1Jn. 2: 15 – 17 sim in. A hong kihilh thu in bang thu hi-in, koi bangin tua a lauhuai thute tawh kipelh thei ding i hiam?
_____________________________________________________________
_____________________________________________________________
“Hau” cih tawh kisai-in muhzia tuamtuam om hi. Paunak sungah a manlo neih le lamh hauhna a kipan tua bang hauhna muhzia ding hong hilh thute in, mizawngte’ neihsa sutin, thuman lopi-in hauhna cihte pulaak hi (Pau. 28:8). Lai Siangtho in cimawh, meigong le mite’ neihsa thuman lopi-in ngahna langpan hi.
Mizawngte huhna (Pau. 28: 27): Duhhop huaiham lo-in (Pau. 28:25), mite tungah cinghin cimawh gentheite huhna in thupha bawlna hi.
Nasep hahkat (Pau. 28:19). Guktatna, olno takin hauhna in hauhna man hi lo hi. Hauhna in nasep citak, hahkatna pan kingah hi. Hanciamna tawh nasemin i ngah bangbang hauhna in thuman tawh hauhna hi.
Baihtakin hauh ding ngaihsun kei in (Pau. 28: 20, 22 in thunih hong hilh hi. (1) Thumanlo nasepna khat awlmawh lo-in a mulo kineihna in a sem mite mah tawh kibang hi. (2) Nu le pa’ neihsa noptakin zatsakna in guta bangin buluh gamtatna ahi hi. Tua bang a gamta mite in a hoihlo gamtatna ahihlam ngaihsun lo-in, bangmah siatna hi kei ci-in ngaihsut leh, tua in siahuai mahmah hi. Tua hangin bangmah khialhna om kei ci uh hi.
Leitungah sum in na tampi sem hi. Tua hangin Lai Siangtho in sum tawh kisai thu tampi hong hilh hi. Sum deih lo kuamah omlo a, koi bangin sum’ hangin siatnate tawh kipelh ding na hiam?
WEDNESDAY|MARCH 11
MIZAWNGTE’ SIKSAN DING
Pau. 29: 13 sim in. Bang thu pulaak hiam?
_________________________________________________________
____________________________________________________________
Pasian’ bawlsa vive ihih manin, Ama mai-ah a hau, a zawng kikim ciat hi (Pau. 22: 2; 29:13). Khuavak in limciinna hi-in, nate kipiansakna pulaak hi. A hau, a zawng kuamah deidan lo-in nuntakna i ngah ciat a, guahtui, nitang kingah ciat hi. A hau mite in mizawngte nengniam lo-in, mizawngte in zong amau a uk mite it ding kisam hi (Matt. 5: 44, 45).
Pau. 28: 3 in bang thupuak nei hiam?
__________________________________________________________
______________________________________________________________
Mizawngte in mihaute mah bangin tavuan puak nei hi (Pau. 28: 3). Mawhna hangin kizawng hi, ci-in ngawh ding hi lo hi. Nengniamna a thuak mi khat in, ‘ nengniamna thuak a hih manin midangte nengniam ding ngaihsun lo ding hi. Ama mawhna kimaisak napi, mite mawhna maisaklo nasempa bang lo-in, mite hehpihin mawhmaisak ding hong hilh hi (Matt. 18: 22 – 35). Pau. 28: 3 ah, guahtui in vantung thupha limciinna hi-in, tua thuphate amau kisiatna-in a zang mi om hi.
Pau. 28: 6 in bang thupuak nei hiam?
_________________________________________________________
___________________________________________________________
A hoihlo nasepna tawh hauhna sangin thumanna tawh bangmah neihloh hoih zaw hi (Pau. 28:6). A thuman mi in a zawng mi hi lo ding hi, cih mi tampi ii lamet ahi hi. Bangang hiam cih leh, zawnna pen thadahna ii gah hi, ci-in kingaihsun hi (Pau. 24: 34). Ahi zong tua bang hi khin lo hi. Mi khat ii thumanlohna hangin zawnna ngah zong om kha ding hi. Ei khut sung a kinga lo thute hangin zawnna zong om kha ding hi. Bang bang hi mah taleh, Lai Siangtho’ hong hilh thu in: Hauhna, tuahphatna cihte a hoih lo nate tung panin zong hong piang thei hi. Thumanna in hauhna sangin manpha zaw hi.
Hauhnopna lungsim tawh thu hoih thumante i khek khak hiam? Koi bangin tua bang siatna na zozo ding hiam?
THURSDAY MARCH 12
THUMAN ITNA NEI
Tate, khangnote in nu le pa tung pan a ngah theih uh a manpha mahmah thu in: thuman itna hi. Mi tampi in kisiatna sungah nungta uh hi. Bang hang hiam cihleh amaute in thuman itna nei lo uh hi (2Thes. 2: 10). Jesuh in Thuman ahih manin thuman it, cih kammal in Jesuh it cihna hi pah hi. Jesuh itna sangin kitangsam zaw bang om hiam?
Mit tawh kimu thei lo vangliatna nei Pa Pasian in theihnopna lungsim tawh thuman a zong mite tawh om khawm ding hi. Tua mi in ciangtan nei lo Pasian tawh kizom hi a, Ama deihna tawh kituakin nungta ding uh hi. Tua bang kizopna in kuamah ngaihsut zawhloh nopna ngah ding hi. Ellen G. White, Education, 14.
Pau. 29: 15, 19 sim in. Nuntakna dingin a thupi mahmah bang thupaipi pulaak hiam?
________________________________________________________________
________________________________________________________________
Mite’ hong etteh theih dingin nuntakna in manpha mahmah hi; vanglian hi. A diakdiakin nu le pa in tate’ etteh ding nuntak kisam hi. Siatna pen pianpih hi. Tate in a hoih lo na khat peuh a sep khak ciang, lampi man a zuih nadingun thuhilh kisam hi. Tate in bang in siatna hi-in, bang in hoihna hi, cih a khentel theih ding uh kisam hi. Nu le pa in tate’ ut bangbangin gamtatsak ding hi lo hi. Tua bangin amau ut bangbangin khakzau lehang, nu le pa maizumna hong suak ding hi. A gol tak ciangun amau siatna nu le pa mah hong ngawh ding uh hi.
Na neutung a kipan hong kihilh tu ciang dong na nuntakpih thu hoihte ngaihsun in. Koi bangin tua thute hangin tu-a na dinmun tung na hiam?
FRIDAY MARCH 13
SIMBEH DING: Pasian’ thukham in a kip tawntung thuman thutakte tungah kinga hi. Tua thu a zui khempeuh ii nopsakna ding ahi hi. Biakna in Pasian tawh hong kinaisak thei lampi hi-in, vantung thupiak bangin a nungta mi a dingin thupha le nopna a ngah nading ahi hi. Ellen G. White, Sons and Daughters of God, 267.
Khrih tawh nasemkhawm dingin tate Pasian thu tawh pantah kha kei lehang, khuamial sungah kidiah ding uh hi. Ngaihsutna man lo, hai gamtatnate tawh khangkhia ding uh hi. Khang khat khit khang khatah siatna tawh nungta uh hi. Tate’ ut bangbangin gamtatsakna in Pasian’ min daisak, nu le pa’ maizumna piangsak hi. Nu le pa in tate hilh ding tavuan nei hi. Tua thu phawk lo-in, amau ut bang gamtatsakna in vantung kongkhak a khak uh ahi hi. Ellen G. White, 5Vol., 325, 326.
KIKUP DING DOTNATE:
1. Russian mi laigelh minthang Leo Tolstoy pen Khristian innkuan sung pan khangkhia ahih hangin, a upna nusia hi. A khangham khit ciang hamsatna tuak a, ‘ nuntakna i cih in bang khiatna nei hiam? cih hong ngaihsun hi. Nuntak manneihna in bang hi ding hiam, ci-in kan kawikawi-a, mu zo tuan lo hi. A tawp khakna ah vantung thute bek mahin nuntakna man nei sak hi, cih mukhia hi. Bang hangin Khris upna in nuntak manneisak hiam?
2. Bangci bangin “Thuman thutak it” cih thu na tel thei hiam? Koi bangin thuman na it hiam? Thuman i it theih nadingin thuman in bang hiam cih i theih masak phot ding kisam hi. Koi bangin thuman thutak na thei hiam? Thuman itna pan bang mah in hong khenkhap loh nading bangin hong kem thei diam?
