LESSON 10 | FEB. 28 – MARCH 6
SATAN’ HONG KHEMZIA
SABBATH NITAK
TU KAAL SUNG SIM DING: Pau. 25: 2, 3; 26: 11, 12 - 16; 27: 5, 6; 1Kor. 1:20, 21.
KAMNGAH: “ Kumpipa mai-ah na om ciangin milian kineih kei inla, miliante’ tutna ding munah tukha kei in.” Pau. 25: 6.
Khuavak bangin vang nei gulpi’ kamsung pan Eve lungnopna ding kammal vive gingkhia hi. Tua kammalte in Eve sihna ding thu hong suak hi (Pian. 3: 1-6). Vantung mi kineihin
Satan in a lauhuai penpen dinmun ah mi khempeuh hong tunpih hi (2Kor. 11: 14). Mihing in ama dinmun kimangngilhin, ama hihlohpi khat ahi kisa-in, amah le amah kikhem ahih banah, midangte zong hong khem hi.
Kikhemzia nam tuamtuam om hi. Zuau genna, kiphatsakna, ngaihsut hoihlohna kici khempeuh kampau hoihlohna pan hi. Mi tungah i gen thute a thupi mah bangin, koi bangin gen, gensiamna zong kisam mahmah hi. Mite’ hong gen thute koi bangin za thei cihte kisam thu ahi hi.
Tu kaal sung thusin ding thu in ”Ngiahon lakah tuu kikhah bangin note hong sawlkhia ka hih manin gul bangin pilvang unla, vakhu bangin migi un” Matt. 10: 16, cih thu siksan hi.
SUNDAY MARCH 1
I TEL ZAWHLOH PASIAN’ OMZIA
I telzawhloh thu tampi om hi. Scientist David Deutsch in, molecule’ nasepzia, nisim thupiangte, nate’ omzia, beel sungah tui a so theihna cihte a kipan a lamdang na tampi om hi, ci-in pulaak hi. Nisim i muh nate, ahi ding mah bang khatin ngaihsun lehang, bangci bangin a lamdang Pasian’ zia tel thei ding ihi hiam?
Pau. 25: 2, 3 sim in. Solomon in bang pulaakin, a tangzai zaw-in bang pulaak hiam?
__________________________________________________________________
__________________________________________________________________
Pasian’vangliatna le leitung kumpite’ vangliatna tampi kilamdang hi. “ A kisel thusim” cih kammal in Pasian’ omzia pulaak hi-in, a nungta Pasian ahihna hong hilh kammal ahi hi (Isa. 45: 14, 15). Pasian tawh kisai thu i telloh tampi om hi. Leitung kumpite in amau vangliatna a kimuh nadingin amau’ thu pulaak khiat ding phamawhsa lo uh hi. Kumpi ahihna uh, makai ahih na uh pulaak khia thei uh hi. A piang thute, a sep nate bang hi hiam, cih a kantel ding uh amau nasep ahi hi (Thkna. 17: 14 – 20).
I telzawhloh i tuahkhak thu tampi om hi. Mitphiat khat sung a thupiangte nangawn i tel zo kei hi. Hih in bang hong hilh hiam cihleh, upna tawh nuntak ding a kitangsapzia hong hilh hi. Koi bangin Pasian muanna le upna tawh i nuntak ding na tuak thute in hong hilh hiam?
MONDAY MARCH 2
MIHAI KHAT MIPIL BANGIN
Nitumna gamte ah thuman thutak in mun le mual, hun le ni tawh kizui-in kikhel khel hi, cih thu limpom mahmah uh hi. Thuman hi, i cih thu khat pen midang khat a dingin thuman hi lo thei hi, cihna ahi hi. Ahihna mun a om tei hangin (gentehna-in: lampi ah, gam khat khatte ah vei lam kizui-in, gam khat khatte ah taklam kizui hi) thuman in kip tawntung lo-in kikhel hi, cih upna in a lauhuai upna ahi hi.A tawpkhakna ah Lai Siangtho siksan ding simloh muanhuai om lo hi. A sia le a pha, thuman le zuau khentel theih nadingin Pasian’ kammal in eite’ khentel theihna piciang muanhuai ahi hi.
Pau. 26: 11, 12; Thukhente 21: 25; 1Kor. 1: 20, 21; 2:6, 7; 2Kor. 1: 12 sim in. Pello pelh ding bang thute hong hilh hiam?
_________________________________________________________________
____________________________________________________
Mihing in eima theihna khat tawh thuman kisakna khat nei ciat hi hang. Thuman i sak mahmah khat a khial hi kha thei hi. Tua bang mahin khial i sak mahmah khat, mite’muhna ah khial lo kha thei hi. Na khempeuh i theitel zo kei hi. A taktakin bangmah i thei kei hi. I kitangsap in bang hiam cih kantel a, ei le ei kipuahphat ding hi. I telloh thu tampi om hi,cih mangngilh ding hi lo hi.
Paunak in a hong hilh bang mahin mihaite in a hai gamtat ngeina uh hi-in, amau le amau pil kisa uh hi. Kithuhilhna mang nuam lo uh ahih manun siatna lianpi thuak ding uh hi (Pau. 26:8). Amau’hai-na a pil mah kisa uh-a, amau hai-na in mun khempeuh zel hi. A siahuai penpen ah hai gamtat napi, mi hai ahihlam kiphawk lo uh hi.
Thuman lampi pan lampial dingin siatna na zui kha zel hiam? Na nuntakpi thuhoih a khaksuak na hiam? Thuman thutak a helzau na hiam? Bangci bangin thuman in siatna tungah gualzo hi, cih na theitel hiam?
TUESDAYMARCH 3 A THADAH MI
“A thadahpa in a khutin ankuang sawksuk a, a kamah a bahtoh kik ding nangawn gim zungzung kisa hi (Pau. 26: 15). Sangnaupang pawl khat thadahin lai en nuam kei le-uh, guk etna tawh laizawhsawm om hi. Thadahte in paulap khat zong hamtang uh hi.
Pau. 26: 13 – 16 sim in. I khialh khak loh nading, bang thu hong kihilh hiam?
____________________________________________________
____________________________________________________________
Thadahte in paulap tuamtuam zong uh hi. Lampi ah humpi om, ci-in inn ah om leng hoih zaw ding ci-in bang mah sem nuam lo uh hi ( Pau. 26: 13). Lauhuainate kantan nuam lo uh hi. Thadahna in i ngah ding thuphate tawh hong kipelhsak hi. Lingkung tungah paak hoih i ngah nadingin lingin hong sut kha thei mah ding hi. Tua lo-in paak hoih kingah thei lo hi. Hamsatnate kihta lehang masot thei lo ding hi. Hanciamna nei lo mite khuasuak ngei lo hi.
Kongkhak in kawmtungah kinga-in kiveivei lel hi-in, koi mahmah tung thei lo hi. Thadah mite zong lupna tungah kileklek lelin, koimahmah mahial cih om lo hi. Thadah mite in a kam sung a om an nangawn hai thadah hi. Pumpi taksa thadahna sangin a siahuai zaw thadahna in lungsim thadahna hi. Tua bang mite in amau ngaihsutna khat tawh om bekbak mawkin, ka ngaihsutna khial hiam, man hiam cih sittel ding peuhmah ngaihsun ngei lo uh hi. Amau le amau pil kisa, thei kisa-in, kuamahmah thu-in sim lo uh hi (Pau. 26: 16). Midang sagih sangin pil kisa zaw uh hi. Tua bang mite, a taktakin, bang mah thei lo, pilna nei lo mite hi zaw hi.
Mi tampi in zuau thu a up manun siatna thuak ding uh hi lo-in, thuman thutak a up loh man, thuman theihna ding lampi kihon napi thu donlo uh ahih manun tawntung siatna thuak ding uh hi. Ellen G. White, Patriach and Prophets, 55.
Koi bangin mite in thuman a theihtel nadingun lamlak thei na hiam? Koi pan kipanin koi ciang huam ding hiam?
WEDNESDAY MARCH 4
GAL A BANG I LAWMTE
I kilangneih mite sangin kikholhpih i lawmte in hong khasia sak zaw thei hi. Tua pen bang hang hiam cih leh, i galte tung pan sangin i lawmte tung pan lametna lian i neihna hang ahi hi. Hih thu hangin, i lawmte pen i gal hong suak thei hi, ci-in Paunak in hong hilh hi.
Pau. 27: 5, 6 sim in. Koi bang kithuhilh tai-na in itna siksan hiam?
____________________________________________________
________________________________________________________________
Itna i cih ciangin puatham, kampau bek tawh ki-itna hi lo, i hoihna teng bek pulaak hi lo hi. Itna in a hoihlo nate i sep khak ciangin hong thuhilh hi. Itna in ahi bang bang hong gen ngam, hong tai ngam hi. Kithuhilhna hangin kilawmtatna a nawngkai sak ding phamawhsa lo hi. I lawmte gamtat hoih lohna khat hilh ngam kei lehang, lawmta hihna bang man nei ding hiam? Kitai ngamna, khialhna pulaak ngamna cihte in itna man hi zaw hi. Tua bang ki-itna in kineih cihte om lo-in muanna le thuman siksan itna hi.
Pau. 27: 17 sim in. I lawmte khialhna khat i pulaak ciangin, koi bangin kilawmtatna huzaap thei hiam?
____________________________________________________
____________________________________________________________
Sik in sik mah hiamsak thei hi, cih paunak in kithuhilhna hangin phattuamna pulaak hi. Tua bangin i lawmte khialhna khat i hilh manin kilawmtatna siasak lo-in, lawmta hihna kipsak zaw hi. Khat le khat muanna khangsak zaw hi. Hih bangin i lawmte khialhna khat genngam lo, hilh ngamlo-in om sangin, thuman hilhna in itna kipsak zaw a, gamtat zia le tong zong puahpha zaw hi.
Bang mah thei lo-in na khialhkhak manin tai-na, a hong kihapna na thuak ngei hiam? A mawhna, hoihlohna polaak nop man hi lo-in, a khial mi in a kipuahphat theih nadingin, a khial mi khat koi bangin na hilh ding hiam?
THURSDAY MARCH 5
I GALTE LAWM BANGIN
Pau. 26: 17 – 23 sung sim in. Bang deihna lianbel pulaak hiam?
________________________________________________________
________________________________________________________
Kitot kiselna hangin siatna tampi piang hi. Kampau in hehna, thangpaihna cihte mei bangin kuangsak thei hi. Tua bangin siatna khat khit khat kibehlap hi.
Kampau hoih in siatna tampi selcip thei hi. Vanzuakte in vankhong siamna dingin kampau hoih kisam mahmah hi. Gam makai kiteelna ah kampau siamte in mipi’ lungsim zo thei uh hi. Numei ginalote’ kampau siamna hangin siatna sung tung tangval tampi om hi. Kampau hoih khempeuh kidop ding thupi hi. Aw neel mahmah hong kihopihnate kidop huai hi. Mikim khat, pau siam mahmahin, amau deihdeih ngah thei uh hi. Ahi zongin a lungsim un siatna bek ngaihsun hi. Kampau a tuam, lungsim a tuam nei mi om hi. Nang zong na tuaci kha ngei hiam?
Paunak sungah zuaukhemna, kineihkhemna lauhuaizia hong hilh tampi om hi. Thumanna in Pasian kiang pan hi-in, zuaukhemna ahih leh Satan kiang pan hong pai ahi hi. Thuman thei kei lehang, thuman i gen thei kei ding hi. Thuman theihtel nadingin ama ngaihsunna suang ahih manin thuman khaktan zel hi. Mihing ngaihsutna kicing lo hi. Thuman thutak Khris in hong makaih kei leh thuman i thei thei kei ding hi. Ellen G. White, Reflecting Christ, 71.
Na pulaak thu khat peuhpeuh thuman mah ahi hiam? Na ngaihsut le na kampau kituak hiam? Na ngaihsut lohpi thu khat a gen na hiam? Matt. 10: 26, 27.
FRIDAY MARCH 6
SIMBEH DING: Pasian in Kha Siangtho hong guan hi. Tua in, ngaihsut theihna khuakte zat ding hong peengsak tuan lo hi. Kha Siangtho in i ngaihsutna le siamna tuamtuamte zatsiamna hong guan hi. Tua bangin Kha Siangtho in hong makaihna sangin hoih zaw om lo hi; hih leitungah a deihuai pen hi pah hi. Khris nungzui mi khempeuh in thuman thutak deihhuaisa lo-in a om kei ding uh hi. Pilvang tak leh, ngaihsut hoih cihte tawh Khrih nasemte in Ama vangliatna kilangsak semsem uh hi. Vantung tawh kituak pilna in Pasian minthangsak-in, siamna khempeuh le theihna khempeuh Ama a’dingin a zang ding uh hi. Nuntakna hong kawm, siamna, nate hong pia Pasian tungah lungdam leiba nei ihi hi. Muanna tawh Pasian’ hong kepsak siamna tuamtuamte pungsak-in, met bawl ding tavuan nei ihi hi. Ellen G. White, Counsels to Parents, 361, 362.
KIKUP DING DOTNATE:
1. Kiim le paam nate hi taleh, hotkhiatna, Pasian’ om zia cihte a kipan i nuntakna sungah i tel zawhloh thute ngaihsun in. I muhna, theihna tam semsem leh, bang mah i theih het lohzia kiphawk pha semsem ding hi hang. Upna thu ah zong tua bang mah hi. Bang hang hi ding hiam?
2. Bang thuman thute in ngeina, mun le mual tawh kizui-in kikhel hiam? Koi bangin tua thute le a kikhel ngei lo vantung thute khentel thei ding i hiam? Bang hangin tua bang khentel theih ding thupi hiam? Bang hangin a kikhel ngei lo thuman thute le a kikhel thuman thute helzau-in kitelkhial kha thei hiam?
3. Mitei kim khatin a lawmte nusia lo, a galte zong gal bawl tuan lo hi, ci uh hi. Hih thu panin bang na mu hiam? Thu-um mi khat in koi bangin hih thute pom thei ding i hiam? Koi bangin Matt. 10:16 in hong huh hiam?
