EITE’ THAKHAUHNA IN THUNGETNA
Hun nunung siatna tawh a kidimna kawmkaal ah khangnote khamuana pen tawntung kikepsiam ding leh thungetna bekmah kisam hi.PASIAN’ kammal simna leh thungetna hun a nuamsa khangnote pen nuntakna tuinak in a tawntung-in thaksuak sak den ding hi.Midang kuamah in a ngahloh gamtatna siangtho leh ngaihsutna picing dinmun a ngah ding uh hi.PASIAN tawh kithuahkhopna in a hoih ngaihsutna,a pha lungsim mungtupna,thuman thutak a siangtho aa teltheihna leh a manpha sepkhiatnate ong neithei sak hi.PASIAN tawh kizopna a nei kheempeuh a tate ci-in ong ciamteh hi.Tua bang mite TOPA in hih leitung ii ciimna leh khuavaak zungpi-in a piansak dong amaute in PASIAN leh Ama ii a tawntung hihna a siangzaw in tel semsem ding uh aa a sanna lam ah kahto to ding uh hi.
KOICI BANGIN THUNGEN DING
Thungetna pen ama hihna taktak zah kitello hi.Thu ih nget ciangin bangmah a theilo PASIAN tungah thupulaakna a nei ih hi kei hi.Mihing kheempeuh ii thusim PASIAN in theikhin hi.Thungetna pen a sau deda leh a ginngaih veva kisamlo hi.A kiseel ngaihsutnate PASIAN in tel mahmah hi.A simtham-in ih thungetna a simtham-in a za TOPA in ong dawng dinga,a kilangtang in thupha ong pia ding hi.Thu ih nget ciangin bangmah ih hihlohna,ih hihzawh lohna pulaak ding hi-a tua bang aa kipulaak lohna pen a kineihkhem thungetna ahi hi.PASIAN’ santheih thungetna pen kisikna tawh thungetna ahi hi.
Thungetna ih cih pen PASIAN’ nasep kikhelsak nading hilo-a PASIAN tawh kithuhualna a om nading deihna ahi hi.Thungetna pen mawhpuak,vaipuak zawh nading peuh lel aa ngaihsut ding hilo hi….Thungetna in PASIAN tungah i leibat ong lohsak theilo hi.
THUNGETNA IN VANGLIATNA ONG PIA
PASIAN tungah thungetna panin ih ngah thahatna in nisim ih vai ding ong mapi hi.Nisim ih tuah ze-etna in thunget a kitangsapna ong kilangsak hi.Upna tungtawn in PASIAN vangliatna in ong keptheih nading lungsim ngaihsutnate tunglam tawh a tawntung a simtham thungetna tawh kizop ding ahi hi.PASIAN kiang panin kigamlat theih nading huzaapna a tuamtuam in ong tuamcip ciangin huhna leh thahatnate nget ding thadah loh ding ahi hi.Tua bang hun ciangin huhna leh thahatna ih nget kei leh kiphatsakna ih zozo kei ding aa Honpa tawh ong gamla sak thei mawhna zongsatnate ih nang zo kei ding hi….The Youth’s Instructor,August 18,1898.
