- Misiangthote huh nading leh Pasian gamzai nadingin i thuakkhak lungdamna thute i hilh ding hi. Tua bang lungdamna thu a hilhte in Pasian’ hehpihna kimawkngah lo hi cih teci a pang ahi hi. Angsung ngaihsut lohna in, khalam nuntakna hi a, Jesu’ lim leh mel zong lak ahih manin mi dangte’ tungah vangnei mahmah hi. Angsung khualna a nei nawnlo mi in ama deih bek leina in a neihkhempeuh zangmang nawn lo ding hi. Amaute in Jesu nungzuite hi uh, ahih manun anneek ding nei lo, puansilh ding nei lo mitampi om hi cih phawk gige uh hi.
Neek leh dawn bek lunggulh a, ama gilvah ding bek ngaihsun a, a nungta mite in Pasian hehpihna ngah lo ding uh a, vantung letsongte zong taan ding uh hi. Amaute’ sungah upna maan om lo ahih manin, mite’ tungah LaiSiangtho thumaan a gen uh ciangin mite in amau’ kammal “a ging thei daltuah” tawh kibang sa lel ding uh hi. Mi khempeuhin a upna uh a gamtatna uh tawh lak ta uh hen. “Gamtatna om lo upna in a si ahi hi.” “Khat bek om ahih manin na itna ahi zongin, note aading ka kipakna uh ahi zongin mite’ tung leh pawlpi tungah lak in.” (R&H, Aug. 21, 1894).
A Haksa Pen Sermon (Thu Hilhna)
A haksa pen thuhilhna leh gamtatna in i pumpi nialna ahi hi. Lunggulhna a lian mahmah mawhnei mikhat ii lungsim in na hoih bawl ding kongvang khak a, mi dang aading na hoih bawl lo hi. A hangin amau aading bekin sum khol uh hi. Jesu sungah nuntakna nei lo ahih manin kha mangthangte vei lo hi. Kha vei lo mi peuhmahin Pasian hehpihna leh Honpa tawh nopsakna ngah lo ding hi. Topa Jesu in eite aading a lamdang mahmah piakkhiatna limpha hong koih sak hi.
I pumpi nialna tawh Topa nungzui in singlamteh i puak khit ciangin, Pa Pasian innpi-ah paikawmin i nuntakna sungah Jesu nuntak hoihna i lang sak ding hi. Pasian leh a nungta khate a kimuh namun, pumpi nialna biakna taau-ah eite in Pasian kiangpan khuavak i ngah a, a tawntungin Jesu i neih ding a kisapna hong lak hi. (R&H, Jan.31, 1907).
Na Lungsim Zaisakin Jesu Tawh Kipawl In
Gupna hongpia a manpha mahmah thumaan thutak khuavak i zai sakna ah ei hamphat nadingte nialin mizawng huh nading sumpi i piakte in, Pasian mai-ah a namtui mahmah paknamtui bangin hong sang hi. Piakkhiat nasepin a piakhiate lungsim nuam sak a, leitung buppi Gumpa tawh kipawl sak hi. Topa in a kicing Pasian ahi hi. Ahi zongin eite’ aadingin Topa in zawnna, haksatna khempeuh thuak hi. Topa’ zawnna hangin eite in hauhna a ngah i hi hi. Nuntak haksa penpente in phaltaka a piak a tawm penpen sumpi zong Pasian in thupi takin na sang hi. Angsung khualna a nial lo a hau mahmah khat ii sumpi tampipi a piak sangin neih sunsun pan a kipiakhia sumpi tawmno in Pasian mai-ah man pha zawtham hi. (R&H,Oct.31,1878).
Lungdam Takpi-a Piakkhiatna
Christian lungsim tak tawh piakkhiat a kipan khempeuh, hat semsem ding uh hi. Christ’ lungsim bang a nei khempeuhin lungsim takpi tawh lungdam takin a sumpite sumkholna-ah hong puak ding hi. Christ’ itna in a tawsawn a thapiakna tawh, Topa’ tatkhiat khate aadingin amaute’ sep ding tavuante citak-takin hong sem khia ding uh hi. (R&H,May 16, 1893).
