Kap leh laisim Zomi a kua ma ciat:
Dear Kap,
Nung sung teng ka manlah luat manin ih thu kikup zomh pah manlo kahihmanin tu’n a hong thuk thei pan suak ingh. Nong tel siam ding lamen ingh. Nong gen suk diudeu thu te kikum pah ni.
1. "logo"vaitawh ong mawhkawk theih na uh thupen,hih te ongkipat cil lai a kipan, a ngimna a omsa khat a hihi.Bang hang hiam cihleh C a kidin
ding ciang in tampi kikupna om a,a hih hang in tualai in ki khen khia nailo hi. C te tuamom nuamthu a ki theih ciang in UNION pan in section,local ah a meng (decree) ong khah khia uh a,tua sung ah,pawl pi sung sumpi khialo te leh,hih C vai a makai te pawlpi pan in ni 90 sung a ki sikna a omkei leh a mauleha mau a lulu tawh a ki hawlkhia ding hi cih lai ongki hawm hi.Tua ciang in section metting pan in C lam amakai ding a a upmawh uh,mi pawl khat EC meeting vote tawh pawlpi pan ong hawl khia in a meng (decree) ong thoh leuleu uh hi.Tua khit a kipan in C lam a deih peuh mah biak inn ah pawlpi mi in ki ciamteh lo in ki khawm maimai in ong kibawl a,ko tonzang bang tua munpan a buai na ong kipan hi a,hihpen i pawl pi manuel ah mihon disband piak theih na ding power pen UNION leh section ah power a ki pia mah a hi tam?Ipawl pi tawnzia mah a hitam? cih nong dot thu tawh kisai iin “C te tuamom nuamthu a ki theih ciang in” ci Conference pen tuam om nop himhim peen ei SDA pawlpi ngeina hi lo iin Conference a deih makai te ii a khialhna masa peenpeen ahi hi. Conference ih deih aa hong kipiak kei leh ei leh ei aa ding ding cih peuhmah policy ah om lo hi. Division President Pr. Albert Gulfan tawh ka lai kikhak te uh sung ah a thu a kicing in om ahihmanin ama hong gen bang lian iin hong khak ingh.
Pr. Albert Gulfan to Mungno, September 28, 2005 RE: To solve the problem of Mission/Conference misunderstanding cih thu lu tawh ka lai khak a hong thuhna ah “Conference a deih a kici te in MYUM leh UMM makai te ii policy zuih loh genbel iin nei uh hi. Ahizongh’n policy tawh a kituak vet lo iin Conference min paulam iin pawl tuam a phuat uh peen saang nuam lo uh hi. Pawlpi mi te pawl sung pan zau hawl khiat ding cih peen hi sa lo hi’ng. Ahihhangin GC leh Division ii phalna om lo pi aa amau tung aa om kipawlna saang nuam lo iin pawl tuam phut cih peen policy palsatna dang khat hi aa hi bang peen Church Manual in thumanlohna (insubordination) iin seh hi. Hi bang thumanlohna peen policy tungtawn iin khalna piak theih hi.” “—amau kiang ah ih kipawlna pawlpi maan hong zom kik un ci aa a ki thuumthuum peen hong nial teitei uh ahihmanin ka cih theih nading uh om nawn lo aa pawlpi pan paihkhiatna kinei aa Seventh-Day Adventist kipawlna ah a kihel nawn lo ta ahi hi. Hih peen ka deih het loh, naa kasak mahmah ahihhangin ih pawlpi a kinawngkai sak ding phal thei lo hi hangh.” ci hi. Hih peen ih pawlpi kalsuan zia hi.
“The conference advocates keep on repeating about the MYUM and UMM leadership not following the provisions of the policy. But they refuse to admit the fact that their organizing
themselves into a separate organization under the guise of a Conference is neither in accordance to policy.” “I do not agree with disfellowshipping church members indiscriminately. But refusal to recognize duly recognized authority by the higher organization and establishing another organization without sanction of the Division and the GC is another violation of the policy and the Church Manual and is considered insubordination. Insubordination according to policy is a ground for discipline.” “----plead with them to join the truly recognized one and they continue to refuse to do that, we cannot help but declare them disbanded and declare them as not belonging to the Seventh-day Adventist organization. That is very painful to me, but we cannot allow the church to be intimidated.”
2. “Logo tawh ong mat theih na pen hibang a, a mau in decree a piak a kipan a,C tepen SDA a hilo a ciam teh uh in tua hang a logo ong sut cih na tawh thu ong khia thei hi uh hi.C te ii lungsim leuleu pen,ko SDA upnapan pial lo in,C tawnzia deih hi ung cih na tawh a ki ding khia mah na hihi.Hih pen na genbang mah in khawlpak lo ding leh ki nung kiklo kha zaw ding hi.Tham lo hihbang a buai napen leitung bup gamtam pi ah na tam mahmah a hihmanin kawlgam a bek veng thei tuanlo ding hi.GC pan in zong gamdang a buai te zong enkhol lo a hihban ah,kawlgam ong pai uh hang in,M lamte tawh ki mu lel in C lamte tawh ki mu lo a hihman, i bang cih buai na bei thei mah ding hiam?Kumpi hoih gam ah mipi in lung phona a neih leh paliman ten mipi a ding a hoih theipen in na naksep mahmah uh a,mipi a lungkim na ding lampi zong in khan tohna ding vai hawm uh hi.Ei pasian paliman ten mipi lungpho na a omleh gawl mek pahpah cih pen Pasian deih na tawh a ki tuak tam?”
Kap aw, Conference te ii “lungsim leuleu pen,ko SDA upnapan pial lo in,C tawnzia deih hi ung cih na tawh a ki ding khia mah na hihi.” ci aa na gen peen kei zongh telsiam mahmah ingh. Conference a deih te lak ah SDA pawlpi pan pusuak iin pawl tuam phut ni a ci hi peuhmah lo cih peen ka thei hi. Kei zongh nang zah mah iin Conference a deih peenpeen khat ka hi hi. 1987 kum aa Conference ngetna ah zongh kihel iin ngetna lai a khen khia tektek peen Dr. Dallian leh kei mah ka hi hi. Ahizongh’n leitung ah kipawl na khat ciatciat ah bylaw, manual, policy, cih te om aa tua te ih palsat ciang iin buaina piiang hi. Ih palsatna pan ih kihei kik ciang iin buaina veng hi. Kihei kik nuam lo iin mai ih nawt teitei ciang in buaina pung semsem hi. Conference deih te kihawl khia ding hi leh kei zongh hong kihawl khia khin ding hi. Tu dong hong kihawl khia nai lo hi. Southeastern California Conference ah ih pawlpi te leh ih sang te ah sum leh paai lam hi ta leh kalsuan zia te Working Policy tawh kituak maw kituak lo (policy compliance) cih ni sim iin a sem den ka hi hi. Pa Thuk Kim te, Pa Cin Ngaih Mung te zongh Conference deih mahmah uh ahihhangin Union leh Division pan lampi maan kalsuan zia ding a kigen ciang iin tu aa ih Conference ii kalsuan zia peen SDA pawlpi ii Working Policy tawh kituak lo ahihmanin khawl kik uh aa ih pawlpi pan ki disfellowship lo hi. Conference deih man iin kua mah ih pawlpi pan kihem khia ngei lo aa Working Policy zuih ding ki hanthawnthawn ta leh a mang nuam lo teitei te bel kihem khia thei hi.
Kap aw, “Ei pasian paliman ten mipi lungpho na a omleh gawl mek pahpah cih pen Pasian deih na tawh a ki tuak tam?”cih dotna tawh kisai iin tu’n Conference deih uh cih a kigen ciang iin Conference huat man tawh a mawk hawl khiat pah dan iin ken mu lo hi’ng. 2002 pan 2005 dong kum 3 or 4 sung bang kipum khat theih ding ut iin kihanciam mahmah aa thu leh la a tuamtuam hang iin piiang thei ngiat lo ahihmanin 2005 ciang aa Division leh Union ii makaihna tawh
khentatna a kibawl ahi hi. Tua sepna te ah kei kihel kha lo kahihmanin a neng a tawng iin tel lo hi’ng. Ahihhangin pawlpi mi peuhmah SDA pawlpi pan kipai khia nuam ngei lo hi. Division, Union, leh Mission in piiang thei nawn sa lo uh ahihman aa a sep uh hi ding hi. Pr. Gulfan in“Hih peen ka deih het loh, naa kasak mahmah ahihhangin ih pawlpi a kinawngkai sak ding phal thei lo hi hangh.” a cih ngiat mah bang iin pawlpi mi hi zah kihem khia cih peen a dah lo khat zong om lo ding hi. Pawlpi mi te deihna lungphona (pulaakna) hang iin gawl mek pahpah hi leh bel Pasian in deih iin ka um kei hi. Thu khat ah leitung bup ih pawlpi kipawlna ngeina bang iin kum 3 or 4 bang kipawl kik theih nading ngakngak aa a pian theih loh ciang aa Division makaihna tawh a kisem peen ka mawh sak luat nading mu kei mai ingh. Division President pa ngiat Kawlpi ah hong pai ban aa hong vaan den napi kum 3 or 4 sung dong aa kilemna a deih tuan lo, working policy palsat aa a pial teitei te Pasian in a lungkim pih ding peen seh hak ka sa mahmah hi. Conference te in “SDA upna pan pial lo iin C tawnzia deih hi ung cih na tawh” ahih tei hang iin Conference ii kalsuan zia ah ih ut leh Mission ih ut leh Conference tawnzia ci aa ei ut bangbang aa kimawk hei theih hi lo aa kalsuan zia (steps and procedures) zuih ding leh a ngah thei ding (eligible) ihih kisam hi. Tu’n ih kammal te ah “back gear nei lo”, “Conference ah kigawm ding leh thu khat Mission ah ciah kik ngei lo ding” cih mawk peen nang mahmah zongh Division makai ulian ding iin kiseh le cin Conference ngah maa nangawn iin Union leh Division makai te thu mang kei leh ngah khin le uh tung siah thu mang ding iin na um diam? Tua bang thumang lo te Conference na pia ngam diam? Division te’n zongh a bang pau lam iin pia ngam mawk ding hiam?
3. Ih Tonzang pawlpi sung aa na buaina taktak uh peen ken tel lian lo hi’ng. Bangbang ahizongh’n a tom iin gen lengg Conference ih deih theih peen teina khat hi. Conference ih ngah nop peen khan tohna khat hi. Union leh Division in a hong piak mateng lungduai tak aa Pasian tate zia leh tong tatak bang aa ih ngak ding peen ciimna hi aa tua ciimna nei lo kha ihihmanin buaina hong tung ahi hi. Conference ih ngah theih nading a dawldawl te ih picin dong ngak hi lengh tu ni tu hun iin ih Tonzang SDA pawlpi sung ah ki itna dim iin khangto mahmah ding aa buaina a cih om lo ding hi. Working policy zui nuam lo iin ei cih bek ih cih man iin a ki it mahmah ding Zomi SDA laizom teng kimuh khialhna a hong tun peen khasiat huai mahmah hi.
4. “Hihbuai napen khat lam ah lutkik cihbnag leh khat lam pum mawhkawk tawh kilem na omlo kha zaw in mu ing,” na cih thu tawh kisai iin tu aa ih conference gengen peen GC, Division, leh Union pan ih ngah hi lo ahihmanin SDA pawlpi taktak ihih leh leitung bup SDA pawlpi tawh akizom pawlpi leh kipawlna ah ih lut kik ding kisam hi. Tua bang aa pawlpi ngeina zuih nop masiah kilemna om lo ding hi. SDA pawlpi a it takpi te ading in a haksatna khat zongh ka mu kei hi. Tua bang khit ciang iin SDA Conference maan ngah zo ding iin Topa’n thupha a hong piakna tawh kizui iin SDA Conference maan ih nget ih laak ding peen SDA pawlpi mi taktak te ii kalsuan zia ding ahi hi.
Pr. Albert Gulfan tawh ka lai kikhat te uh tawm hong khak sawn ning.
Albert/Mungno October 3, 2005, 11:15:15 a.m. “If the people leading the conference movement are really honest and sincere, then they should come back.” “Conference a makaih te in a cihtakpi uh ahih leh hong kihei kik uh hen.”
Albert/Mungno, October 3, 2005, 11:33:41 a.m. “As leaders of the Division, our desire is that all our organizations will reach the Conference status, both the Unions and the local fields. If our unions and local missions/sections/field become conferences – in the true sense of the word-, that would be very good ---” “Division makai te ii ka deihna uh ah ih Union te leh mission te (local fields) in Conference dinmun a hong bat (tun) ding uh ka lunggulh uh hi. A khiatna maan/dik tak bang iin ih Union te leh ih mission/section/field/ te conference maan suak zo ciat uh hi leh nak lungdam huai mahmah ding hi.
Maymyo aa session a kineih maa aa Division President Pr. Gulfan kiang aa mission a ci pawl leh conference a ci pawlpi sim pan delegate hong piak ciat ding ka ngetna tawh kizui aa Division President pa in October 5, 2005 ni aa a hong thuhna lai sung ah “With the Mission’s constituency session, all organized churches are supposed to send delegates to the Mission Session according to the provisions of the operating policy of the Mission. At least one delegate should come from every organized church. Even if there may be some conference movement sympathizers in some organized churches, as long as they have not yet been disbanded, they are entitled to a delegate. I will make sure that this instruction is given clearly to the Pastors so that no one will be left out and be given another opportunity to criticize the leadership. I hope that there are not too many churches that have been disbanded as yet. I would like to believe that this is the case in Upper Myanmar.” “Mission ii session kikhoppi ah Mission ii zat policy dung zui iin a kiphut kipsa pawlpi khempeuh pan delegate te hong puak ding uh hi. A tawm peen iin a kiphut kipsa pawlpi khat sim pan a tawm peen delegate khat a hong pai ding uh ahi hi. Conference te kalsuan zia a lainat pih a kiphut kipsa pawlpi te pan mahmah zongh a kipai khia khinsa (disbanded) ahih kei nak leh delegate khat ngah khuan nei hi. Pawlpi makai te mawhsakna a om behbeh loh nading leh delegate ding khat peuh a ki nusiat khak loh nading iin hoih tak iin ka na pia ding hi. Pawlpi tampi tak a kipai khia nai lo ding iin lamen ingh. Upper Myanmar Mission sung ah hi bang ding iin a ngaihsun ka hi hi.” Kawlgam aa ih mission leh conference tang aa ka nget na hong dawng hi. Kei om kha lo kahihmanin Division President tawh ka kikup bang un Upper Myanmar Mission aa te in sem/bawl uh hiam cih bel ken thei kei ingh.
Seventh-day Adventist Church Manual, Revised 2005, 17th Edition, pp. 212 & 213:
Thu hoih khat ah pawlpi te peen tatkhialhna hang aa thuhilhna ding iin hawl khiat tawm pha mahmah hi. Banghang cih leh pawlpi ii tupna leh masuan in a mangte zong aa gupkhiat ding ahihi. Upna pan pialna thu hang, Church Manual bang aa zuih nop lohna hang, ahih kei leh conference/mission/field ki ukna langdona hang aa buaina lianpi a om leh, paihkhiatna a om loh theihtheih nading in nakpi in hanciamna neih ding a hi hi.
Occasions for expelling churches for disciplinary reasons are fortunately rare, for the mission of the church is to seek and to save. Where serious problems such as apostasy, refusal to operate in harmony with the Church Manual, or rebellion against the conference/mission/field persist, earnest efforts should be made to avert the need for expulsion.
North American Working Policy 2005-2006, laimai 69, B 80 05 Conference te, Mission te, leh Union te Beisakna: Pawlpi ki ukna ah a saang zaw kipawlna in conference, mission, field, union, leh pawlpi honkhat kipawlnate khat peuh ah pawlpi mi a tam zaw te in upna pan pial, or pawlpi
thukhunte leh kipawlna zungpi a om bang iin kihual tak aa sep ding a nial aa, langdona a om iin a muh leh tua kipawlna ah a saang zaw kipawlna in a citak pawlpi mi te leh pawlpi min a huut nading sepkhiat ding mawhpuakna nei hi.
North American Working Policy 2005-2006, page 69, B 80 05 Discontinuation of Conferences, Missions, and Unions by Dissolution: If a situation arises where it is determined by the higher organization that the majority of members of a conference, a mission, a field, union, or a union of churches are in apostasy, or that the organization refuses to operate in harmony with denominational policies and constitutional requirements, and is in rebellion, the higher organization has a responsibility to act for the protection of its loyal members, and the good name of the Church.
A telnop ding leh a tom iin Church Manual leh Working Policy ii genna te a nuai aa bang ahi hi:
(a) Church Manual p. 53 ah “conference/mission/field makaipi te leh departmental director te tawh kithuhual iin sem khawm ding”
(b) Church Manual p. 61 ah “Pawlpi sumkempi in siit nei lo iin a vekpi iin tua kha sung aa conference/mission/field sumpi a ngah khempeuh conference/mission/field sumkempi kiang ah puak ding hi. Ngimna tupna khat peuh hang iin pawlpi khat in conference/mission/field sumpi te leitawi, zangh, leh lencip thei lo ding”
(c) North American Working Policy, B 80 05, p. 69: “pawlpi thukhunte leh kipawlna zungpi a om bang iin kihual tak aa sep ding a nial aa, langdona a om iin a muh leh tua kipawlna ah a saang zaw kipawlna in a citak pawlpi mi te leh pawlpi min a huut nading sepkhiat ding mawhpuakna nei hi.” (Theih ding: Laimai leh section number te a kibat loh hang in SSD policy leh NAD policy te a thu kibang hi.)
Tua hi in Kap aw, SDA pawlpi ih cih peen leitung bup kipawlna pawlpi hi aa ei mimal or mi pawl khat or honkhat in ei ii muh leh ngaihsut dan aa kipai ziazua pawlpi hi lo hi. AG te, EBC te, or pawlpi dangdang te dan aa mi tei, mi pil khat peuh in pawlpi a phuan tawm ziauziau ihih lo lam thei pi pi iin mi pawl khat te in pawl dang te eng uh ahihmanin hi ci bang buaina a nei zenzen kha ihi hi. Mi pawl khat te in amau deihna bang a pian loh ciang iin Union, Division, leh GC te dong iin mawh sak pong iin a ma khialhna hum teitei mawk uh hi. Christian dik tak, SDA pawlpi mi dik tak ihih leh “kei cih bek” ci teltal pong lo iin leitung bup ih pawlpi in a na khun dimdiam sa te ih zuih ding mimal ii mawhpuakna a hi hi. Kawlgam, Zogam pan Leitung bup ih pawlpi ii Working Policy ei deih bang aa ih kheel nop mawk leh tangtung ngei lo ding hi.
Hi lai sim SDA pawlpi mi a kua ma peuh in leitung bup SDA pawlpi tawh a kizom kipawlna tawh kizom iin ih pawlpi kikepdan ngeina te zuih ih sawm ciat ding kong hanthawn hi. Tua hi leh ih gengen pawl sung buaina te lum mei bang iin hong theng pah ding hi. Topa’ Khasiangtho in a kua mapeuh hong om pih ciat ta hen.
Itna tawh,
Mungno Gualnam
Riverside, California
Kong it Lian leh net member laisim a kua maciat:
Dear Lian aw na email tun hong thuk zo pan ingh. Pasian thu leh pawlpi thu hoih tak aa ih muhna ciang tawh ki itna leh Christian lungsim bul phuh aa ih kikup theih peen Topa’ thupha lian peen hi. A nuai aa kong dawnna te nang mimal tung ah a hong gen hi tuan lo iin Zomi SDA leh laisim mi khempeuh tung ah a gen kahihmanin personal iin na la kei in. Na dotna te tawh kisai iin:
1. Pasian in banghangin SAMSON hatna guan hiam? a innkuan te hutna'ng maw, ama aituam ading maw, A minam leh a Pawlpi ading?
Pasian tate ahi Israel te (Christian te or Adventist te) vun at lo namdang te (thu um lo mite) in a sim ciang iin gaal do ding kikhawm tawm uh hi. Samson te hun laai iin Israel buppi Pasian pawlpi mi te cih ding hi mai hi. Kumpi gaal kap cih bang nei lo uh hi. Samson peen priest, or prophet zongh hi lo iin judge (thu khen) or tua hun laai a ding iin kumpipa hi. Gamdang mi te (Pasian thu um lo te) a do ding aa Pasian in hatna thupha a piak hi.
2. Banghangin Pasian in Isreal te ahon khia dingin a Sathau nilh David na zangin Goliath na that sak mawk ahihiam, minam ading agam ading asem kumpi galkap omna pi a?
Samson mah bang iin David zongh siampi or kamsaang hi lo hi. A neu akipat Pasian thu a um, Pasian thu a mang khangno khat ahihmanin Pasian in kumpi ding aa sathau a nilh hi aa vun at lo, thu um lo, Pasian tate a nawng kaai sak, Philistine te ii gaal haangpi pa Goliath peen Pasian in David zangh iin va that sak hi. Kumpi ding David in a gam mi te a kepna hi.
3. Pasian in akamsangte akhut zatte aminam hu dingin adeihna thu na phawk kha maw?
Pasian in a kipat tung akipan gam makai leh Kha lam makai na khen den hi. Moses in ki ukna makaih aa Aaron in Kha lam makaih hi. Kamsang te in gaal do ngei lo uh hi. Minam dang te zongh mudah lo uh hi. Kamsang te in a pai khial mawh nei mi namdang te hi ta leh khialhna tawh a dim Israel te mahmah hi ta leh mawhna leh khialhna pan a kisik kik nading un hilh iin itna gaal hiam zangh zaw uh hi. Gentehna iin Nineveh kisik kik nading gen iin kisik kik sak hi. Israel te Kha lam ah a tha kiam ciang iin Pasian kiang pan aa hilhna thu te ut ta leh ut ta kei leh va gen aa a mipih te ngiat in muh dah lawh zawzen uh hi. Nathan kamsang pa in David kumpipa khialhna tai iin hilh hi. Elisha bang zongh kumpi pa aa kipan Israel tampi te in mu dah iin thah sawm liang uh aa gaal taai zezen hi. Syria gaal kap maang, Namaan bang a phaak natna pan a cidam nading panpih zaw hi. Syria te in Samaria khua um cih iin Elisha te khua sung ah om uh hi. Elisha
thungetna tawh Syria te khempeuh Pasian in a mit uh taw sak iin khua pi sung ah a vek un a lut sak khit teh Elisha in a mit uh a kihon kik nading Topa kiang ah thungen iin kihong kik sak hi. Pawl khat te in that nuam uh hinapi Elisha in an a kham tak uh pia sak iin ciah kik sak hi. Pasian zat kamsang leh siampi te in leitung hiam leh tei tawh gaal do lo iin itna gaalhiam tawh a do uh ciang iin sawt vei khom zaw uh hi. Zomi te leh Karen gaal kido ngei lo iin gaal iin ih kinei kei hi. Kachin te, Shan te, Kawl te zongh tawh gaal iin ih kinei ngei kei hi. Tu laai tak iin Zomi SDA sung ah Karen te gaal bang iin ih gen mawkmawk peen Pasian tate ahi Seventh-day Adventist te ii kam pan aa ging khia ding in kilawm ka sa kei hi. Mipi lungsim lak nop man iin Conference makai te in minam thu tawh hong gawm uh ciang iin mimal ciat iin a tuamtuam ih thuak khak te tawh gawm iin Karen te muh dah pi iin a mudah bang iin ih pau zia zua hi. Christian vai het lo hi. Minam lungsim cih peen mi khempeuh in a vom a nei ciat mah hi. Zomi ih cih sung ah zongh ih khua ih tui kibang lo, ih pau ih ham kibang lo, ih beh ih phung kibang lo, ih sungh ih pu kibang lo, ih pawlpi ih upna kibang lo ahihmanin Zomi sung mahmah ah a mun mun a mualmual ah a hunhun iin kideina leh kipaampaihna, kituam bawlna cih peen a om lua veve hi aa ei ii pawl sung vai, tutpah kituhna te, za kiat za khanna te, thugeelna ah deihna kibat lohna te hang aa ih pawlpi ngeina palsat liang iin kalsuan peen khialhna lian mahmah khat hi. SDA pawl sung ih lut ciangin upna tawh a kilut hi aa SDA pawlpi a uk gawp nuam aa kilut hi lo ahihmanin thu nengneng te peen †nupi gaal gen†cih bang iin a sia lam pehtawi lo zaw iin Pasian leh a pawlpi sung ah ih upna kipsak aa ih pawlpi ih langpan loh ding ih buaisak loh ding, ih pawlpi ih domsaang zawk ding kisam sa peen ingh.
4. Zomi ading leh gam ading na asem Pu Cin Sian Thang tha apia ding, lam alak ding, ama mai ah apang ding nahihlam na kiphawk kha maw? LST sunga kamsangte nasep athu bek in thei na hitam ci'n dah mahmah ing.
Pu Cin Sian Thang in Pasian a it mi khat ahihhangin Pasian na sem hi lo ahihmanin ama pawlpi sung hi ta leh tuiphum, AG, EBC, SDA, pawlpi sung leh biakna vai vaan lo iin Zomi te khempeuh, gam thu ah hong makaih iin a nuntakna a kipia hi. A it huai, a zahtak huai mahmah makai khat hi. Ei SDA pawlpi sung ah politician cih ding khat zong ih om loh hang iin ih mipih Zomi a it lo ih om kei hi. Ih minam ading sep zia a tuamtuam om hi. Ih beh ih phung, ih khua ih tui, ih pawlpi ih vaan zawh zah aa ih vaan ciat zongh ih minam ih itna leh ih minam ih laphsaangna mah ahi hi. Pasian pawlpi ading sum leh paai tawh huh iin biakinn lam nading, effort bawl nading, gospel pai nading leh sum nei lo sangnaupang te huh aa Pasian thu leh leitung pilna a ngah zawh nading uh ih huh ih panpihna te zongh Kha lam nasepna leh ih minam laptohna na sep lian mahmah ahi hi. Tua hi aa ih minam ading sepna ah politician hih kul tuan lo hi. Midang te muhdah zongh kul tuan lo hi. Pu Cin Sian Thang dan aa gam it nam it tatak te ihih leh amah tawh kithuah aa politics ih sep khawm ding hi. Politician ih suah sawm kei leh zongh ih pawlpi leh ih minam ih laptoh nading lam dang tampi te ah ei mun ciat pan ih sep ding thupi mahmah hi. Â
5. Minam ahu ding akem ding pawlpi makai (Kamsang/ Pasian khutzat) te ahihlam aphawk siam dingin Topa'n thupha hong pia hen.
Minam hu cih thu ah muh dan kibang het lo iin mu ingh. Nu leh pa pawl khat te in a tate uh it lua mahmah uh ahihmanin a ta te uh mi tawh kitawng kikam khial le uh a tate a khial pi mah gup cih tak iin gum uh hi. A tanu a tapa te guta khut thak iin a om ciang in midang te’n zongh a gen
pah ngam het lo, a tam vei mahmah khit ciang aa a kigen khawng peen a sim tham iin bang ci hilh bang ci tai diam bel thei kei sam hangh in †mit aa muh, tetti van, koi ah om hiam, hi bang aa nong ngawh zenzen uh thu hong bawl thei ingh†ci iin hehnuam zawsop thei uh hi. A siatna te hilh iin tai iin kikheel sak ning cih gen loh gum den mawk ahihmanin a tanu a tapa te sia suak thei zaw uh hi.
Kei ka minam it dan tua bang hi lo hi. Ka zi, ka ta, ka u ka nau te akipan ka it mahmah ka pawlpi mi te dong iin khial ka sak a om leh a kikheel ding uh deihlua kahihmanin itna tawh a khialhna te uh gen zaw ingh. Ih Zomi SDA pawlpi mi te ka it luat man leh ka huutna iin tu ni ciang dong a nuai aa bang iin a gengen laai kahi hi:
(a) Ih pawlpi ngeina lammaan zui lo pi iin Conference deih ta hang ci in mawk kalsuan kei ni. Hi bang dan tawh Conference ngah ngei loh lawh zaw ding hi hangh a ci den ka hi hi.
(b) Hih ka gen den keei hong kimang nuam lo iin Conference makai te in back gear nei lo ci iin hong phut pih teitei man un a it huai a pammaih mahmah pawlpi mi tampi kidisfellowship iin pawlpi tampi kidisband hi. Mission leh Conference te ii khialhna te hang iin tu’n Zomi SDA bup iin kithuak lawh mahmah hi.
(c) A ki it mahmah Zomi SDA te kitelkhialhna hong tun hi. Hi bang ziazua Pasian pawlpi sung ih buaina peen Dawimang pa in Pasian pawlpi a suksiat nading iin Conference status a hoih a pha zaw, ih deih mahmah zangh iin Pasian pawlpi hong susia ahi hi.
(d) Logo vai mah zom pak zel lengg pawl khat te in Karen te’n hong thangsiahna uh hi ci iin email sung ah a gelh zongh om hi. Thaang ahih lam thei ihih leh bang hang aa tua thaang sung ah va lut se ihiam?  Thaang ih ci aa policy ih ci zongh iin Conference te in SDA logo ih zat ding hi lo hi. Hih peen SDA upna neih leh neih loh tawh kisai lo iin organizational law tawh kisai hi. SDA upna ih neih man aa logo zangh thei ding cihna om lo hi. Tua hang iin deihsakna tawh SDA logo zat sak kei leng hoih zaw ding hi ci aa muh dah thuak liang aa kamsang te bang aa a gen ka hi hi. Mission lam te sang iin Conference te in thumaan deih zaw ci iin ih gen ding om leh ih deih mahmah kawmkaal ah ethically and professionally aa a khial a kisep kalh tang peen dah huai mahmah kasa hi. Sep loh ding pi leitung kalsuan ngeina maan te enkaak lo iin ei ii ngaihsut bek tawh ih kalsuan man iin sum leh paai bei, tha leh ngal gim, ih sia te geel in gim lawh, Pawlpi Mission leh Conference in sum tampi bei lawh khin. Ki justify thapai nawn lo iin a maan lo te a maan ah kikheel hun/huai a sa mahmah ta ingh.
SDA pawlpi a it takpi te ihih leh (1) lammaan lo pi tawh ih lak tawm Conference in SDA logo ih zat nawn loh ding, (2) kiniamkhiatna tawh leitung bup SDA pawlpi kipawlna maan sung ah kipawl kik mengmeng ding bek thupi kasa peen hi. Tua hi leh ih pawlpi sung ah ki itna ki lemna hong khang hong dim ding hi. Tua khit ciang iin Pasian thu leh Kha thu ah lawp iin hanciam iin Zomi SDA te kipum khat iin Kawlgam bup SDA khempeuh kipum khat iin Pasian thupha saang iin sawm aa khat leh sum pi hat iin khangto khawm le hangh ih deihdeih Conference peen kua mah iin hong kham zo vet lo iin a kingah thei pan ding hi. Hi bang iin GC, Division leh Union te thu nial iin Conference ih tuam din laai teng Conference maan a cih cik mah hun iin ih ngah ngei kei ding hi.
Itna takpi tawh,
Sia Mungno Gualnam
Riverside, California
Kong it Lian,
Ih pawlpi a it mahmah, na muh naciang tawh maantak aa a kalsuan nuam khat, nahih lam ih kizop ngeina sa tungtawn iin kong muh ka paaktath mahmah khat nahihmanin February 10, 2010 ni aa dotna tomno nong bawl peen zongh na lungsim takpi tawh nagelh khiat hi ding cih lametna tawh a tom iin hong kuppih ingh.
1. Topa Zeisu in mawhna a nei het lopi siampi te in nabawlsia in ih Topa in singlamteh tung ah ei te khempeuh tang ding in hong sihna hong thuak hi. Tu laai tak aa a kigen pi peen thong kiatna peen kei muhna ah Pasian thumaan ih taangko man aa thong kiatna hi lo hi. Upna kibat man leh kibat loh man aa buaina zongh hi lo hi. Tua hi aa Topa Zeisu sihna leh Paul te thongkiatna, thuaksiatna te tawh kigen kaak thei lo hi.
Paul te peen Pasian thumaan a tangko man vua thong sung a tung uh ahi hi. Tu laai aa a hong piang thongkiat vai peen Logo vai hi aa kua in hih logo nei aa kua teng tung ah zat ding phalna pia hiam cih ih kan tel ding thupi hi. Inn kuan khat sung ah motor ih neih zenzen hang in nu leh pa te in a tano te uh tua motor hawl khuan a piak ciang bek iin a hawl thei uh hi aa kei zongh na ta khat hi lo kahiam cia nu leh pa’ phal loh pi aa motor hawl gawp theih hi lo hi. Zat theih lo ding pi ih va zat man aa thubuai ahih leh va zat loh ziau lel ding peen mature Christian te ii zia leh tong ding hi zaw hi. Zat theih ding pipi a hong kiphal lo ahih leh a nei ngei te kiang ah zat khuan ih nget ding, a nei ngiat te’n phalna hong pia peuh leh kua man hong nawng kaai sak thei lo ding ahihmanin hih logo a nei General Conference kiang ah nget ding hoih hi. Ih ngah leh zangh ding, ih ngah kei leh zang lo ding cih hi leh thu hoih peen iin ka um hi. Hih peen intellectual property khat hi aa a nei te phalna om lo aa a zangte in leitung thukham a palsat ahihmanin infringement of trademark ii legal provision tungtawn aa a thuak ding a hi hi. Ei neihsa lo pi ih zat man aa buaina ih tuak te Pasian nasepna ih sak khak ding lauhuai hi.
2. 2002 Session laai aa Sia Memory Tun ii kammal na gen thu tawh kisai iin nang gelhna pan leh a kigen ka zak om ngei mah hi. Kawl gam bup ih pawlpi makai khat ahihmanin mi khempeuh iin ama kam gen te a sia ahi aa a pha ahizongh'n ciam teh mahmah ahihmanin a kam pau ding pepeuh kammal kidawm leh bel ahoih mahmah ding hi. Tua hang iin tua bang kammal lian a pau takpi ahih leh SDA Pawlpi ii makai pi khat in tua bang a a geen peen kilawm ka sa het kei hi. Ahizongh'n pawlpi makai te peen mihing mah ahihmanin a pau a gen ding vua a kilawm lo thu
tampi a gen hun uh zongh om thei hi. Tu mahmah iin Union makai te ii makaihna a deihzah uh bang a sa lo, Zomi a hi lo, tampi om ding hi. Kuakua makai iin om ta leh pauban a om lo (perfect) cih peuhmah khat zongh om lo ding hi. UMM leh MYUM President or officer a sem ngei te khempeuh zongh khat zong perfect om lo uh hi. Pawlpi mi te zongh perfect ingh a ci ngam ding ih om tuan kei hi.
3. Ulian makai te in a sep khialh uh a sep dan uh a maan lo a om ciang iin itna tawh ih gen ih theihsak ding leh pawlpi' ngeina dung zui iin puahphatna a om theih nading ih hanciam ding hi aa makai te khialhna hang aa ih lungkim lohna paulam iin a khawk zaw or a sia zaw aa ih gamtat ding peen Christian nuntak zia leh Adventist te ii kalsuan zia ding hi lo hi. Makai te in khialhna a neih leh pawlpi paizia ngeina dung zui aa a thuapthuap ki ukna ngeina bang iin thu ih zaksak ding a kilawm ahi hi. November 19, 2006 ni aa Myanmar Union Adventist Seminary ah khangno te ii gual nop peen hun ding leh nopsak peen hun ding iin khangno pawl khat te ii gamtat khialhna hang iin buaina khat hong kipat ciang iin tua buaina kipeh tawi toto iin thu neu khat thu lian pi hong suah uh hi. MUAS aa sangsia pawl khat te ii makaihna leh sepna te maan het lo hi. Zomi sangnaupang khat leh nih ii khialhna peen Zomi te khempeuh nil khiat nading zangh uh aa thusia lasia tampi vaihawm beh uh hi.
Tua thutawh kisai Myanmar Union Mission Executive Committee in January 31, 2007 ni iin special meeting nei ding cih thu ka zak ciang iin Myanmar Union Mission Executive Committee kiang ah a nuai aa lai gelh iin Division makai te zongh copy ka pia hi. Kei ii muhna tungtawn aa ka gelh hi aa amau in bel amau muhna bang iin khensat uh hi. Tua hun laai in Zomi it a kisa pawl khat te in Karen te muh dahna khawng email sung ah gelhgelh pong uh aa itna leh deihsakna tak tawh septheihna a nei Union Officer te or Division ulian te kiang ahi aa Committee Member te kiang ah ahizongh'n ngetna leh zaksakna (appeal letter) cih nangawn a gelh ka mu kei hi. Kei muh dan ah email sung zangh iin Zomi kipum khat nading ci in minam dang te muhdah na thu leh muhdah ding ei Zomi sung ah ih ki taw sawn aa kihanthot tawntung sang iin thumaan a deih a it takpi te in khial ih sak thu peen thunei te kiang ah hoih tak zak sakh theih sakh ding thupi ka sa zaw hi. Thumaan sung ah ih kipum khat ding thupi ka sa hi.
Myanmar Adventist Conference makai pi teng kiang ah General Conference ii logo va zat sak se loh ding ka itna hang iin ka gen hang iin a hong man loh mah bang iin Myanmar Union Adventist Seminary aa thu buai vai ah zongh a hoih peen ding deihna leh Myanmar Union Mission EC member te in a sep khialh loh ding uh ka deihsakna tawh hoih tak iin lai tawh ka gen hang iin hong mang peuh mah lo iin khialhna a nei lo sia te a theh keek mang uh hi. Hi bang thu te ah "pasan sial neek" a bang kei zongh iin a hun a tun ciang iin Topa in a kilawm a kituak thukhenna pia ngeingei ding hi ci in tu ni dong mah ka upna ahi hi. Na khat pepeuh ei deih bang iin a hong piiang pah lo tampi om tham hi. Saul kumpi pa in Samuel a ngak zawh loh bang iin ih deihna a tangtun loh teh ih heh man leh ih lungkim loh man iin a veet zaw a sia zaw aa ih sep ih gamtatna in thusia hong tun zaw ahihmanin vantung Topa Pasian khut ngak lel lengg hoih zaw gah thei zaw hi.
Myanmar Union Mission Executive Committee tung aa ka lai gelh a mu kha a sim kha nai lo te ading deihsakna tawh a nuai ah hong guang kik ingh.
Itna leh deihsakna tawh,
Sia Mungno Gualnam
