Pasian in tawmvei sung hong koppak i nuntak kumte tu-in tawntung beina lam manawh ta hi. Pasian’ ni lianpi ni in, eite’ tungah hong tungta hi. Mawhna sung’ a kidiahcip mite Topa’ hong piak thahatna khempeuh tawh i photkhiat hun ahi hi.
Tu hunin Pasian hong hilh thumaante i thudon ding hun hi ta hi. I Topa’ hong thupiak khempeuhin eite’ thupha san nading ahi hi. A nungta Emmanuel’ sisan a baang dialkhai (a laan) nuai a, a om khempeuh in Pasian bek muangin Topa’ tung bekah kinga ding hi. Topa’ piak neihsate sungpan pawlkhat Topa’ aadingin piakik ding uh hi. Topa Jesu in a nungzuite’ tunga, a piak nasep a khantoh nadingin i sum i paaite i zang ding hi.
Ki-ap a sep ding a kisam hih nasep i sep ding leh i sum i paaite piak khiat dingin Pasian in a mite sam hi. Eite’ tunga hong kisuan nasep khempeuh i tha neihzah siit lo-in i sep ding, eite mawhpuak ahi hi. Lungsim, kha, pumpi kikhen lo-in, kipumkhat a, a sem dingin Topa’n eite hongsam hi.
Leitung vantungah i neihsa i kep theih nading mun nih bek om hi. Pasian sumkholna sungah na kholnop kei leh, Satan sumkholna sungah na khol kul lel ding hi. Pasian nasep nadingin na ap sinsen kei a leh Satan lamah a kihel in hong kingaihsun dinga, Satan nasep a kipsak na hi ding hi. Muanna takpi tawh hong ki-ap i sumpite in, Ama gam a phut dingin Pasian in ngimna nei hi. Topa’ neihsakemte (stewards) in kidawm taka a zek dingin Pasian in hongap ahi hi. Kha gupkhiatna tawh lungdam thukkik ding hi. Hih a nungta khate in muanna tawh hong ki-ap (steward) hi a, Topa’ nasep a mainawt nadingin Topa tawh semkhawm ni.
Piakkhiat Ding Mah Hi
Pawlpi sungah sepkhiatna khatpeuh a om ciangin kikhangto hamtang hi. A tawntungin piakna leh ngahna kikop den hi. Pasian kiangpan ngahna a om simin piakkhiat na om hamtang hi. Upna maan a nei thu-um pawlpi mite’ tungah Pasian in a khuavak leh thupha a tuamtuam hawmsak hi. Thu-um mite in a thupha ngahte uh Pasian na a sep kawm un mi dangte’ tungah zong hawmsawn uh hi. A piakhiate’ tungah khantohna nasia semsem hi. Hehpihna leh thumaan a thak ngah dingin kigingsa in om uh hi. A siangzaw khuavak leh theihbeh-behna in, ama aa ahi hi. Pawlpi’ khantohna leh nuntakna in, Pasian kiang pan ngahna leh piakkhiatna-ah kinga hi. Pasian kiangpan ngah napi’n a piakkhiat kei aa leh cikmah hunin ngahkik nawn lo ding hi. Athu maan neih, mi dangte’ tungah a luan kei a leh ama ngahsate zong beikik ding hi. Eite in thupha a thakthak i ngah nop leh vantunggam pan hong pai thumaan letsong i hawm khia ding hi.
Pasian in hih leitungah hongpai-in Topa’ nasepna a khantoh nadingin, kham leh nguun a lom in hong ap lo ding hi. Topa in mihingte sum zon siamna pilna hongpia a, mihingte’ piak sumpite tawh Topa’ nasepna khangto sakthei hi. Pasian’ kiangpan i ngah sumte’ sung pan i piakkhiat sumpite a kizat nading munin, lo lai a buh at nasemte cial nading ahi hi. Vantung gampan a kingah thuphate mi dangte’ tungah a luankhiat nadinga a zat mi hingte Topa’n huh den ding hi. Piakkhiatna hanga a kizawng hi peuhmah lo hi. Piakkhiat lohna in hong zawngsak zaw hi.
Ciiltat Kawm Leh Piakkhiatna:
Pasian in a mite a nasepna sungah a khanghlo dingin sam hi. Pasian kammal LaiSiangtho pan khuavak hong tang khia hi. I sep dingte i sep khiat lohna in ei mawhpuak ahi hi. Tua bangin i nasep ding tavuan thei-in Topa’ neih sawmah khat i piak ciangin leitung mun khempeuhah lungdamna thu kizak nading lampi kihong ding hi. Eite in i lungsim tawngpan Pasian it in, pawlpimi khempeuhin piakkhiatnopna lungsim nei tek hi lehang i omna gamsung leh gamdang tuamtuamah Pasian nasep nading sum kitasam cih bang om lo ding hi. I neih i lam zong hong khangto ding hi. Aki zangthei nasepzia a tullom in hong piangkhia dinga, a sem dingin eite hongsam ding hi. Pasian gelsa a om mah bangin leitungah Pasian hong hehpihna lungdamna thu kigen hi leh, Jesu a nihveina hong paita dinga, misiangthote Pasian’ khamkhuapi sungah lut dingin sapna i ngah ding hi.
Thuak ding hun omlai hi i cih leh tua hunin tuhun ahi hi. Kongit ute naute aw, na innkuan sungah na ciiltat un. Na deih mahmah nate Pasian maipan hemkhia ta in. Na lunggulh mahmah zongsat hoih lo leitung nopsaknate nusia ta in. Na innzep nadingin nasum tampi beisak kei-in, ci-in kong thuum hi. Na sum na neihsa khempeuh Pasian aa vive hi. Pasian neihsa i sum i paai zatna khempeuh Pasian kiangah sazian lah kik ding ahi hi. Pasian sum tawh na tate deih peuhpeuh leisak pahpah kei in. Amau neihsa hi a cih khempeuh Pasian’aa hi-a, kuamahin nial thei lo ding uh hi.
Sum pen a kisam mahmah ahi hi. A kisap lohna munah sum mawk beisak kha kei in. Mi pawlkhatte in phalna tawh napiak deih hi. Leitungah nek ding nei lo a hehpihhuai mi tam mahmah hi. Tua mite khempeuh ke’n pia zo ding ka hiam cikha ding hi teh. Ahi zongin Topa Jesu’ zek thiamthiamzia et-teh leteh khat teitei navak zo veve ding hi. “I khamval teng kaikhawm kik un, mangthang sak kei-un” hih kammalin gilkial dangtak mi honpite na lamdang bawlna tawh a vakkham Topa’ kammal ahi hi.
Sumzat hangsan khat na hih khak zenzen leh tu mahmah in kikhel pah in. Na kikhel kei leh a tawntung bangmah nei lo mi, na hikhading hi. Na tate’ aading van manpha nono napiak sangin, sumzek siamna, hanciamna, lungkipna cihte piazaw in, tuate letsong hoihpen ahi hi.
Eite in hih leitungah khualzin mi i hi hi. Pasian deih loh zat loh dingte lunggulhna tawh na sum na paaite zang kei in. I lunggulh hoih lote paai-in, upna kician lakkhia dih ni. Pawlpi mite aw, mihing khat hihna tawh semkhia ni. Hun nunung sungah khuavak tate mahbangin khauhtakin sem ni.
A bei thei lo neih leh lamte a manpha mahmah inn leh lo leina leh sumkholna sunga koihcipna in bang manphatna nei ahi hiam? Pasian tapa Jesu Christ in ei mihingte’ aadingin a nuntakna hong piakhia hi. Mihing’ nuntakna gupkhiat nadingin hih sum leh paai leh vante tawikhai tawh i teh bangin teh hi lehang bangzah khai zo ding ahi hiam? (R&H, Dec. 24, 1903).
Hamphatna Leh Mawhpuak
A thupi penpen Topa’ kammal LaiSiangtho hih leitungah tangko dingin mawhpuak i nei hi. Hih nasepin eite nasep ahi hi. Leitungin vauhilhna thuak ding hi. Pasian tate in a kipia tavuante thumaanna leh cihtakna tawh sem ding uh hi. Vanman kah ding lametna tawh vanlei vanzuak nasep sem lo ding hi. Thu-um lo mite tawh kipawl in sumzuak sumlei nasep sem khakei in. Tua bang hi leh hong kipia nasep, nasep nadingin tua nate in hong ziakai sak ding hi.
“Note in leitung khuavak na hi uh hi” Topa in ci hi. Pasian hilh thute, a ngimna leh zuih ding limte kiteltak-a hong hilhna in thuneu hi lo hi. A thumaan kamsangte’ genkholh Topa’ deih bang zuihna in a lamdang mahmah hamphatna ahi hi. Hih in i sep ding a lian mahmah mawhpuak ahi hi. Topa’ hongpiak i theih thute mi dangte’ tungah i hop sawn dingin Pasian in hong lamen hi. Vauhilhna kammalte i tangkona-ah Pasian le mihingte in i sepkhop ding Pasian’ gelsa ahi hi. (R&H, July 28, 1904).
Gamdang A Pasian’ Nasepna Munte-ah Huhna
Pasian mite in thukhualna i neih ding pawlpi sungah thakipia-in Pasian nasep nading mun khempeuhah a kisapna thute ei angsung bek ngaihsun lo a sepna tawh i mu thei ding hi. Pasian nasepna-ah mihingte in a neihsate uh piakkhiatna tawh a lunglutna uh teci pang ding uh hi. Hih bangin a lunglutna uh hong lak uh hi leh Christian sungah unau ki-itna hong om dinga, Chrsitian innkuan sungah innkuan thahatna hong khangto ding hi.
Pasian innsungah neek ding a om theih nadingin sawmah khat puakna in gamsung leh gampua a, Pasian’ nasemte panpihna ahi hi. Tu hun tawh kituak LaiSiangtho kammal a kihel laibu leh laihawmte in pilna hong khang sakin leitung mun tuamtuamah Pasian nasep nading mun kiphut ding hi. A nungta Pasian nasemte in a nungta Pasian kammal leh gupkhiatna thu tangko ding uh hi. Pasian nasemte mun citengah kisam hi. Buhte min zo ta hi ci-a Macedonian gampan sapna aw, tu-in leitung mun khempeuh pan kiza ta hi. (R&H, Feb. 19, 1889).
Pasian Nasep Khawl Ngei Lo Ding
Hun nunung aading thumaan om takpi a hih leh leitung gam khempeuh minam khempeuh aading puak khia ni. A sawt lo-in tu-a, a nungta laite leh, a sisa khempeuh in amau mawhna tawh kituakin thukhenna thuak ciat ding uh hi. Pasian thukham tawh kisit tel ding hi. Tu mahmah in i theihsak kul ding hi. Pasian thukham siangtho pen a kip mahmah hi-a, liimlang banga i zat ding ahi hi. Hih nasep i zawh nadingin sumtha tampi kisam hi. Sum leh paai haksathun ahih ka thei hi. Nidang sangin sum leh paai ngah nading haksa zaw hi. Ahi ta zongin thumaan LaiSiangtho thu hawm khiat ding ahi hi. A kisam sumte sum kholna-ah koih ding hi.
Eite in Pasian Nasep Nusia Ding I Hi Hiam?
I thupuak in leitung bup aading ahi hi. Hi mahtaleh mitampite in bangmah sem lo-in om uh hi. Pawlkhat-te in tawmcik beksem a, mitampite’ upna kiamin upna a nei nawn lo zahin om uh hi. Gamdang mun tuamtuama Pasian nasepnate nusia ta ding i hi hiam? I omna gamsung Pasian nasep nate zong sem nawn lo ding i hi hiam? Dollar sum a tul lom a leiba i hih manin kimaimial sakding i hi hiam? Leitung hun nunung pen tangthu mit muhah hi bialbual hi niangnuang ding i hi hiam? Hi lo ding hi. I lungsim sungah Pasian gam khantoh nading vei-in meibangin a kuang hi. Eite in i upna thuguipite nial zo lo ding hi hang. Topa Jesu zong nial lo ding hi hang. Ahi zongin Pasian hong gelsak bangin i mai nawt theih nading i sep kei leh a langpang i hi hi.
Sum leh paai kicin loh manin Pasian in a nasep khawl sak lo ding hi. Sum leh paai piakkhiat semsem kul hi. America gam sung a om u leh naute aw Topa’ min suanga kong gennop thu in, khanglo un, note in na sumte uh lei sungah na phum khinuh hi. Inn lamin naneihsa ban uhah leitangte nalei behbeh uh hi. “Na neihsate uh zuak in, Pasian nasep nading piakhia un” ci-in Pasianin thu hongpia hi. Pasian thukham a zui mite’ aadingin sumzuak theihloh,lei theihloh hun hongtung dekta hi. Tua ahih manin leisung naphum sumte manlang takin thohkhia ta in. Pasian in nangkhut sungah sum hongap leh na cihtakna lak in. Na zat loh na phumcip sumte lakhia inla, a pungsak theite’ tungah ap in. Topa hong kumkik ni ciangin Topa in na sumte a mettawh nangah sakkik ding hi.
Leitung Beikuan Phaltaka Piakkhiat A Nopna
A nunung pen Pasian nasep a kizawh ma-in biakpiakna tautungah lungkim takin kipia ziahziah ding hi. Topa’ ni aading khate kigin kholhsakna in a manpha hamphatna ahihna thu mitampi in hong thei ding uh hi. Piakkhiatna nasia mahmah ding hi.
Jesu Christ ii itna thu-um mite lungsim sungah meibangin kuang hileh tuni in zong tuabang piakkhiatna i muthei ding hi. Kha gupkhiat nasep a tawpnalam naita a hihna mite in thei uh hileh tanglai thu-um mite in a neihsate uh a piakkhiat ziahziah mah bangin amau zong piakhia ziahziah ding uh hi. Leitung mite in sum ngah nadingin veitak in sum a khol mah bangin amau zong Pasian nasepna a khantoh nadingin hanciam in sem ding uh hi. A pilna, asiamna khempeuhuh zang ding uh hi. Sum deih luatna leh angsung khualna a neih nawn loh na uh lak ding uh hi. Phumcip ding hi lo, Pasian sumkholna-ah khol ding ahi hi.
Mi pawlkhatte’n a sum uh nasep lianpipite-ah zang uh-a, ahi zongin zawn lawh uh hi. Banghang hi ding hiam? Christ aadingin mizawng hong suak hi. Nang hauh nading bek zongin vantungah na khol loh hangin vantung sumkholna-ah sum om veve ding hi. Leitung sumkholna ahi inn leh leitang na lei sangin vantungah khol leteh muanhuai zaw lungnop huaizaw hi. “Kekseu thei lo, nget in ne thei lo, gutate in gu thei lo, mei in zong kang thei lo” hi.
Gumpa’ thumanga gamtatna in, kampau sangin muibun zaw ding hi. Thu-um mite in a upna uh gamtatna tawh a lah uh ciangin LaiSiangtho’ vangliatna kilang sak hi. Hih a thupi mahmah LaiSiangtho kammal a umte khempeuh in amau hamphat nading nialnopna lungsim hongnei dinga, leitung mite banga sum deihluatna siahuaite mudah ta ding hi. (Historical Sketches of the Foreign Mission of the Seventh-day Adventist. pp. 291-293)
