Leitung mihingte in a lian mahmah Pasian’ innkuanpih i hi hi. Khat leh khat i ki-it ding leh i kizahtak ding, hong Piangsakpa’ ngimna ahi hi. Hauhna leh nopsakna-ah a siangtho leh angsung khualna om lo lungsim kinei ding hi. Mi khempeuh in eimau angsung ding bek ngaihsut a, i neih dingin Satan in hong ukcip ahih manin leitung in buaina, kitot kiselna, kido nate tawh kidim ta hi. Khat leh khat kigal neih ta hi.
Ei nopsak nading bek et tentan-na in na hoih bawl lo sak hi. Mihingte in tua vangliatna nial uh ahih manin tuni in leitungah Pasian zahtakna, thumaanna cihte om nawn lo hi cih i mu thei hi. Leitung gamte, innkuan khempeuhte leh mimal in ei thubek kiultung sak hi. Mihing khat leh khat kiukcip ding bek kilunggulh in, kei cih kiliatsakna tawh ei leh ei Pasian kiang leh lawmte’ kiang pan paikhia-in, lunggulhna ii nung kizui ta hi.
Ei phattuam nading bek zonna in pawlpi sungah kikhenna piangsak in, sianthona om lo ahih manin kiliatsakna lungsim tawh kidim hi. Angsung ding bek ngaihsutna in Jesu tawh kibatna siasak a, ei le ei bek ki-itna khang sak hi. Thu maanna pan paikhia ta hi. “Vantung a om na Pa uh a siantho mah bangin note zong na siangtho un.” Jesu in ci hi. Ei leh ei ki-itna pan Pasian deih hoihna kimu lo hi.
Pasian in hong itna hong lak dingin Jesu hih leitungah hong sawl hi. Topa Jesu’ nungzuite in Topa’ hong pat khiat nasep kizom in sem uh hi. Eite khat leh khat hanciam takin kihuh in tha kipia ni. Mi dangte’ nopsak nading hanciamna in a maan nopsakna i muh khiatna lampi ahi hi. Pasian leh mi dangte i itna in, i lunggulh nate a kilangpan-na hi tuan lo hi. Angsung khualna a nei lo mi in lungnopna kicing ngah zaw ding hi. Banghang hiam cih leh Pasian in ama aading a gelna a kicing sak hi. Pasian’ itna taktak ama sungah lut ahih manin a maan lungnopna lianpi a ngah ahi hi. Pasian piak nuntakna in ama aadingin siangtho in manpha hi. Pasian in mi dang huh theih nading thupia hi.
A Kikim Lo Kidona
Angsung bek theihna in mihing lungsim a zo thei a thahatpen ahi hi. Lungsim galdona ii langkhatah thukhualna leh a langkhatah lunggulhna in a kikim lo kidona ahi hi. Ei aa ding bek zonna in lunggulhna-ah a thahatpen hi a, itna leh na hoih sepsaknopna lungsim in khat veivei a thanempen hi thei hi. Hoihlohna in a tawntungin gualzo thei hi. Tua ahih manin eite in Pasian’ gam aading na sem in piakkhiatna i neih ciangin lunggulhna in hong ukcip leh lauhuai mahmah ding hi.
Mi hehpih theihna lungsim i neih ciangin, piakkhiatna leh nasepna in hong zui hi. Lungsim thalawpna i neih loh ciangin piakkhiatna leh sepkhiatna kinei zo lo hi. Hih banga i gamtatna in lauhuai mahmah hi.
Piakkhiatna sepna-ah, mite i hehpihna thu a tellohzia leh a kipiakhia vante a mot zatna i muh ciangin deihsakna lungsim leh piakkhiatnopna lungsim bei thei hi. Ei Christiante in Gumpa’ hong kipiakna ei aadinga hong thuaknate limtak ngaihsun in a kilawm in gamta ni. (R&H, Dec. 7, 1886).
Zeisu Khrist Hong Hilh A Lamdangte
A nuntakna hong piakna in hong thuhilhna-ah a lamdang, a nasia penpen ahi hi. Khat veivei thu-um mite in hih thu aana bangin ngaihsun kha uh hi. Mi dangte’ suahtak nading, angsungkhual hoih lohna thu a teltheih nadingun Topa’ hong genzia mah a i gen ding ahi hi. Topa Jesu in hih leitungah a nuntak sungin piakkhiat nasep nasia takin sem hi. Topa in lungdamnathu ii vangliatna maantak in teci lak hi. Mawhna nialna hanga Topa tawh gim a thuak khawm kha khempeuh, Topa’ nasem khempeuh, mi dangte’ hamphat nadinga a kipia khia khempeuh, Topa in tawntung thumaan-na letsong piak dingin kam ciam hi. Topa’ nuntakzia leh nasepzia lak khia i hih manin Topa’ lungsim a silhte i hi hi. I nuntak sungin mi dangte’ aading Topa mah tawh kipumpiaka a sem i hih manin mai lam nuntakna-ah zong Topa mah tawh tawntung vangliatna sungah i lut ding hi. (R&H, Sept. 28, 1911).
Angsung Khualna ii A Gahte
Angsung khualna lungsim ii ukcipna a thuak khempeuhte’ tungah a lamdang gamtatna kimukhia ahih manin, vantung laibu sungah Pasian thei lote tawh a kibangin kiciamteh ding hi. Tuabang mite pen guta, mizahko, misimmawhte leh aana tawh a sut theite mah tawh kibang hi a, tuabang mite in Pasian gam luah lo ding uh hi, Topa in ci hi. “Thu maan lo mi in ama deih bangin kiphasak thei hi. A huaiham mi in Pasian hemkhia in thusim nawn lo hi.” Hazatna in a tawntung in na hoih bawlnopna Christian lungsim tawh kilehngat hi. Angsungbek zonna in tavuan awlmawh lohna in kilanga Pasian’ gam zai nadinga nasep nading a ki-ap silpiakte zat lohna ahi hi. (R&H, Dec. 1,1986).
Pasian Zahtak Nawnlohna
Topa Jesu pen i et-teh ding ahi hi. Topa in a nuntakna eite aadingin biakpiakna ganno in hong zanga, eite in zong mi dangte’ aadingin i zatding Topa’n hong ngen hi. I lungsim sunga Satan hongguan angsung khualnapen hih bangzia tawh kilakhia thei hi. Hih angsung khualna lungsimin i Pasian zahtakna khempeuh beisak hi. Pasian i itna leh mi dangte i itna i lahna bekin gualzawhna hongpia thei hi. Topa Zeisu in ang sung bek ngaihsunte kuamah vangam lutsak lo ding hi. Hazatna, enna lungsim a nei khempeuh kep kongkhak kann in pai thei lo ding hi. Hazatna khempeuh in upkhialhna ahi hi. (R&H, July 11,1899).
