Pasian in A gam zai nading mihingte’ tung bekah ngase lo-in, vantung mite thumaan tangko dingin zang nuam leh zang thei hi. Topa in Sinai mual tungah Ama aw tektek tawh Thukham apiak mah bangin leitungah a ut peuh sem nuam leh sem thei hi. Ahi zongin mihingte’ lungsim sungah na hoih bawlnopna lungsim a om ding deih ahih manin hih gupkhiatna nasem dingin leitung mihingte teekmah hong teel ahi hi.
Mi dang te’ phattuam nadingin ei leh ei kipumpiakna in, piakkhiatna aneite’ lungsim hat sak semsem hi. Amah leitung Gumpa tawh a kinaisak ahi hi. “A hau mahmah Topa in ei hauh nadingin a zawng pen dinmunah hong ding hi.” Ei hong bawlna-ah Topa’ ngimna i picinsak ciang bekin thupha tawh anungta i hi pan hi. Pasian in ei mihingte hong piak letsongte pen ei mihingte khat leh khat thupha i kibawl theih nading leh Pasian lungdamna thu leitung bup a kizelh nading hi a, a zang lote in haamsiatna thuak ding uh hi. (R&H,Dec. 7, 1886).
A Met Ngah Nading Zonna:
Sum ngah nading bek zonna in, angsung khualna bek hi a, a met ding bek ngaihsun hi. Tua in kha nuntakna sisak a, Pasian’ hong itna pawlpi sung pan a hawl khia tawh kibang hi. Lutang leh khutin a hun neih khempeuh tawh sum zon ding, neihsa khan toh ding bek ngaihsun in a sep uh leh Pasian leh mihingte’ ii lunggulh nunzia mangthang ding hi.
Pasian in eite leitung hauhna thupha hongpiak a leh, i hun leh i siamnate Topa kiang pan hemkhia-in hong kop, nate tungah i zat ding ahi kei hi. Letsong hong pia Pa in hongpiak letsong sangin lianzaw hi. Eite man tawh honglei khinzo ahih manin i pumpi ei aa hinawn lo hi. Eite in gupna i ngah nadingin a kiteh thei lo man tawh hong kilei khin hi lo ahi hiam? Angsung khualna leh thadah a om hithiatna in Jesu singlamteh thuakna zum huai suak sak hi lo hiam? Eite in a kiteh thei lo itna tawh na khempeuh nusia a hong tatkhiatna thupha gah i at thei hi. Ahi zongin nasep gualzawh nading hun a hong tun ciangin, kha gupkhiat nadingin Gumpa’ nasep i sem hi. I sum tawh huh ding a kisap hun ciangin, i tavuan sem nawn lo-in hehpih ding i ngen hi. I thadahna, thudon lohna leh angsung khualna in Pasian’ hong nget nasep tawh hong kipelh sak hi.
Vantunggam ii a sangpen, a vanglian pen Kumpipa Jesu Krist in a gik mahmah singkhuam pua-in, ling lukhu khu-in, tuikha a dawn laitak eite nuamtak om in, ei leh ei kipahtawi ding i hi hiam? Topa Jesu in a sisan tawh a tatkhiatsa kha manphate eite in thudon lo-in om ding i hi hiam? Tua bang ding kilawm lo hi. Piakkhiat ding i neih laitak in piakhia ni. Thatang i neih lai-in sem khia ni. Ni a omlai tengin sem ni. Eite in Pasian kiang pan sum leh letsong i ngah theih nadingin i hun leh i neihsa sumte Pasian nasep nadingin a tuam vilvel in koih ni. (R&H, Oct. 17,1882).
A Lianpen Sunglam Galdona
Hih i leitung nuntakna-ah i neih i lam in ciangtan nei hi. Ahi zongin Pasian in hih leitung aadinga hong piak letsongin ciangtan nei lo hi. A nunung pen thukhenna ni ciangin mi khempeuh i gamtat bangin thu hong kikhen ding hi. Kei mi hoih hi ing a cite’ aw kiza nawn lo ding hi. Pasian in mihingte thupha a piak ciangin a kicing takin pia takpi ahihna i mu ding hi. Hih zah a kicing piakkhiatna thu a nial te’ aadingin bangmah paulap theih om nawn lo ding hi.
Eite in i lau ding gal lauhuai a pualam pan hong pai lo hi. I do ding a kisam i gal lianpen in Topa’tung a ki-ap lo ei mahmah i hi hi. Ei leh ei i kizawh leh eite hong it Topa’ hangin gualzawhna i ngah sem ding hi. Jesu upna tawh hoih takin do ni. I zat ding i hun pen hong pai ding hunte hi lo a, tu mahmah i neih i hun ahi hi. “Pasian’ gam leh Ama dikna zong masa un, tua hi leh tua nate hong piathuah ding hi.” Tua nate in tulaitak a Satan’ ngimna a hi khialkhemna thangkam sungah hong tun ding hi. (R&H, March 5, 1908).
A Nin Bang
Tawntung nuntakna ngah ding kilawm leh kilawm lo cih thu, hih i leitung nuntakzia-ah hong sittel hi, cih eite in cik mah hunin mangngilh huai lo hi. Angsung khualluatna gamtat kihhuai tawh a kidim mi peuhmah vantunggam sungah lut lo ding hi.Tua hi a, Pasian in hih leitungah tawm vei i nuntak sungin hong kepsak neih leh lamte i zat i zekzia hong en a, hong sittel ahi hi.
I Neih I Lam Khempeuh Pasian In Muanna Tawh Hong Ap Ahi Hi
Mikhat peuh ii neihsa in bang zahin tama, bang zahin tawm ta leh Pasian in muanna tawh hong kep sak ahih thu thei ta uh hen. Thatang, pilna, hun, siamna, neihsa sum leh paai tawh kisai khempeuh ni khat ni ciangin Pasian tungah sazian i lak kik ding hi. Hih in mi mal kim ii mawhpuak ahi hi. Topa tawh i kibat theih nadingin mi dangte’ tungah piakkhiatna, citna, hoihna leh hehpih theihna neih ding ahi hi. Pasian in eite hong pia hi.
Mi tampite in, a hoih nasepte mangngilh in amau aadinga khol ding bek ngaihsun uh hi. Ei deihna bek zui a kiphasak (ahih kei leh) ei nopsakna-ah zat ding bek a, a zong mite in hih leitung nopsakna bek ngah ding uh hi. Ahi zongin, Pasian mai-ah amaute khalam dinmun i et ciangin zawngkhalna, a kizang thei lo, mittaw, lungmuan om lo dinmunah om uh hi.
Man takin zang thei hi lehang, neih leh lam in mi khat leh khat kikalah kiheh pihna, ki-itna hong khangsak a, itna khau hong suakin tua itna in Gumpa tawh kip takin hong hen khawm ding hi. A kiteh thei lo Pasian letsong a Tapa a ngah khempeuh in Pasian kiangpan hehpihna a ngahna khauh taka lah khiat ding kisam hi. Topa Jesu itna khuavak a ngah mi peuhmah in khuamial sunga om laite’ tungah khuavak puak ding mawhpuak i nei hi. (R&H, May 16,1882).
Khrist Gamtatzia-ah Khanlawhna
Angsung bek a khual, i hoih loh gamtatna pan khanglo in, Khrist gamtatzia a hi, mi hehpihna, itna i neih theih nadingin, Pasian in mihing tampite’ tungah haksatna leh gimthuaknate a pian ding phal hi.
Jesu Khrist hong lah khiat mi hehpih theihzia, eite in zong mite’ tungah i lah theih nadingin sapna i ngah ciangin tua itna in khauhtakin hong hanthawn hi. Topa in haksatna a thuak pa ahih manin lunggimna ngah ding hi. Eite in bawlsiatna i thuak laitak in Topa inzong bawlsiatna thuak hi. A sisan tawh a lei sa mihing khempeuh it mahmah hi. Topa in eite tungah hong cih in-ah,”Note thukham thak kong pia hi, Kei mah in note kong it mah bangin note khat leh khat na ki-it un. Khat leh khat na ki-it theih nadingun hih thukham kong pia hi.” (R&H, Sept. 13,1906).
A Sangpen Hoihna Leh A Lianpen Nopsakna
Pasian in leitung vantung na khempeuh ii nuntakna, khuavak leh nopsakna kipatna bulpi ahi hi. Ni pan hong pai khuavak tang bangin a bawlsa nuntakna nei khempeuhte’ tungah thupha luang khia hi. A lian mahmah Topa’ itna tawh mihingte a manpha lungsim hoih silh sak hi. Tua a manpha mahmah lungsim hoih a ngah khempeuhte in mi dangte tungah hawmsawn ding uh hi. Hih in a sangpen hoihna leh a lianpen nopsakna hi a, Pasian in mihingte’ tungah hong pia thei hi. Tua bang mite in a bawlpa Pasian kiangah a naipen in om thei a, itna tawh nasem suak thei uh hi. Pasian tawh nasep khop ding a nial mi in, ama angsung ding bek a semnuamte ahih manin a lawmte’ haksatnate kimuh mawh bawl uh hi. A cil mi in ama neihsa sum leh paaite kem tentan in Pasian piak hauhna thuphate ama aading bekin zang hi. (Dec. 6, 1887).
