NU LEH TA KI ZOPNA

Nu leh ta ki zopna  nam tampi om hi. Tua te sung panin pilna siamna a khanna hangin Nu leh ta ki zopna a peeng sakdingin maan inn sungah naungeek ki bawl thei a, tano adeih tei hangin midang naubu kawmin ta a nei Nu zong ki om ta hi. Tu in ahih leh i ki hop sawn nop thu in Nu gil sung pan a piang khia ta te leh Nu te ki zop na a pha deuh in I gen zaw ding hi. Israel mite’ pupi sung pan Jacob, amah leh a nu Rebecah, apha leh asia ah aki zop na hangin a innkuan sung leh a tapa Jacob tungah, apiang thu hoih leh thusia ih thei hi. Galhang Napolean in Nu te huzap tel theih ahih manin “Nau luai avei khutin leitung uk hi” na cihi.

Pasian thugen minthang D.L.Moody in “ Kei Nu bang Nu om hi leh leitung ah thong ki sam lo ding” hi. na ci hi.  Mawsi in Israel te kum tampi sung, a makaih zawhna ahang teng ah, a Nu tawh aki zop na hoih masa ngiat ahih na ih mangilh loh ding thupi hi. Tua ahih manin hih a nuai a laibu teng siksan in “ Nu leh Ta ki zopna” cih kong gelhkhia hi.“Pawlpi thu lamlak” bu khatna, laimai 179-190 “Fundamentals of christian Education” laimai340,419 “The Desire of Ages” laimai 117. “ Step to Christ “ laimai 290. “Child Guidance” laimai 127.

A.      Numei(Nungak) leh Nu leh Pa vai puak

Nu leh  Ta ki zopna  api cin theih na dingin Pa te peng tuan lo a, tua mah bangin  numei (nungak) te tung ah zong vaipuak om hi. Numei khempeuh in a kim apaam bangbang hi taleh , lungdam, maitai, lungkim in a om den zawh nang in hanciam ding uh hi. Nu leh ta ki zop hoih neih nadingin, nungak hun aki pan ki sa kholh ding ahihi. Hi bang a, a hanciam na khempeuh , a tano te thatang leh zia leh tong ah azah sawm in ki thukkik ding hi.

Ki zop na ah Tano te in Nu leh Pa tatzia a tamzaw hong et teh uh hi. Nu leh Pa tha tang puak zia, lungsim ngaihsut zia leh duh leh deih dan te a kipan ta note tung a tawm atam in ki lang khia kik hi. Tua ahih manin a manpha ngiimna te nei in ikhua suak zia, lungsim pumpi leh khalam nuntak na ah ih ki lapsan tak ciangin, Ta note a dingin nuntak na bucing hong suak a na hihi. Nu leh Pa te’n ahoih thei pen in ih hanciam nate hangin kiim leh paam hong huzaap zo pah a, tua in ta note mailam kalsuan na ah aman pha khan tohna tampi hong suak ding hi. Nu leh Pa in i vaipuak te tel ding hi hang. Leitung ah khangno te’ awkna ding  adim in om hi. Mi tampi te huaiham naleh noptat  na in zol hi.Lungnopna lampi ahi ding a, a ngaihsut uh a tawpna ah  a kihtak huai khat  a om khinkhian ahih lam thei lo uh hi. A duh peuh uh ne in a ut bangin gamta uh a,a thatang uh bei in mak tampi si uh a,  hih leitung leh hong tung ding leitung taan uh hi. Hih mawhzolna te mah ta te in zong phukha ding ahih lam Nu te leh Pa te in a phawk ding uh ki sam hi.Tua ahih manin Naungeek a suah ma in siatna gal  a do zawh na dingin ki sa khol sak un.”

B.      Bang ci pantah ding  i hiam?

Nu khempeuh Pasian biakna tau ah ki ap hen la a ta te uh zong a suah ma leh a suah khit ciangin Pasian tungah ap le uh hi leitung bang aci tam! Nu ii nuntak na ah lungsim puakzia hoih neihna ding a thupit zia Lai siangtho in hong hilh hi. Israel minam te a gumkhia ding Samson Pasian in a teel laitak in Topa vantung mikhat in a nu kiang ah a gen thu in “Kidawm inla, leenggah zu ahi a, kham theih zu (Gam6:3) a hi zongin ne lo in a nin (Siam.11:1-47) bangmah ne kei in ci hi. Naungek a suahma a pattah ding a thupit na mi tampi in neuseh uh hi.

Vantung mi in tua ci seh lo hi. Nu zongsatna te in naungek  mailam ding sukha  a hih manin i duh ideih te  ki khal ding ki sam hi. Ta no te a suahma in a nu te utut in om in huaiham in a lungtom in genhak leh a ta tungah zong tua te ki mupah hi.Hoih lohna te ta te in gamh bang in hong luah hi. A hizong  in nu in them khat zong hoi lo in hoih tak in gamta a kideek kidaam in a  ma deih na a nial leh mi gi  in lungneem in a huaiham kei leh tua zia leh tong hoih te a tano in luah hi.Nu gil sung mahamah pan a hoih a ki zopna a thupit zia vantungmi in nagen phapha hi.(Thukhente 13:14) Tuiphum pa Zawhang  tawh ki sai in vantungmi in a pa kiang ah a gen thu in “A mah hong suah ciangin nang na lungdam ,mahmah ding a, midang tampi te in zong hong lungdampih ding hi. Amah in leenggah zu a hi a, khamtheih zu ahi zongin nelo dinghi.Asuah phet a kipan Kha Siangtho tawh ki dim dinghi.”(Luke1:14,15) Topa Zeisu in vantunggam min ciaptehna  sungah tuiphumpa Zawhang sangin alian zaw kuamah omlo hi cihi.Topa nasepna dingin pumpi thahatna a thupit zia tuiphumpa Zawhang Nu leh Pa  tungah vantungmi in hilh hi.Banghang hiam cih leh pumpi cidamna a susia thei khempeuh pen kha lam nuntakna zong a susia ahihi. Tua a hih manin “ Naupang bangci makaih in bangci bawl ding ka hi uh hiam? Hong hilh in , ci in thunget na tawh Nu khempeuh in Honpa beel in Lai siangtho sunga  Pasian hilhna awlmawh peuh leh a kisapna bangin pilna ki pia ding hi.

C.Neek leh dawn ah

Naungek  a ding a an hoih pen in pianpih an hi a, a ki sam lo pi in tua an ngolh loh ding hi. A ki zawldawh nop man a,  a ta no nawi a pia lo nupi pen lungsim neilo a hihi. Midang nawizu ateep leh naungek  in tua nu lungsim puak zia ahi ciang khat neipah hi. Naungek  te a Nu’ nawizu tawh ki vaak hun sung thupi mahmah a naungek’  zia leh tong zong a nu tung pan a  a ngah an tawh a tawm a tam  ki sai lai hi. Tua ahih manin nupi te in nau nawi a piak laiteng a lung uh nuamsak den a, a lungsim’puak zia uh zong a ki dop mahmah uh ki sam hi. Tua hi leh naungek an zong gu suak lo ding a lungnuam hithiat a,  a tano a bawl dan tawh ki zui in naungek lungsim hong hoih to ding hi. Tano te pen nauluai pan mahmah in a duhduh a ne ding leh a ne ding bek  anung ta ding bang khatin ki pantah lo ding thupi hi. Neutung a ki pan in  ta no te zia leh tong, nu in tampi puahpha theihi.. Neek leh dawn ki dawm ding in hilh theih a ki dawm lo a a uisan dingin zong hilh theih  hi. An a neek theih hun,khua theih hun ciangin Gentehna: (Be iik duh lo tano in bang ci duh thei ding…) Be ik ahoih n agenpih ding Pasian piansak te sungpan ni thumni  a piansakhi…….etc.Topa’n anin a cih te atel ding in Lai siangtho  sung Gam.6:3, Siam11:1-47 te Nu in hilh in anbek ah zat loh ding hi pah hi. Nu in nikhat sung a sep ding tampi nei thei hi. Nau in a nawngkai sak ciangin khem in cingh sak phot zaw lo in a daih na dingin neek ding khat peuh pia uh hi. Tawl khat  a daih hang in hong suuk zaw dinghi. A gil kial nailo ahih manin a gilpi sung ah an hongdim ding hi.Tawmvei sung don pak ding a kisam hi bek hi.

Cidam na tawh a kituak lo nek leh dawn ah sum tawh aduh adeih a lei nate ngaihsun in naupangno te in a manpha pen leh nopsak na a pia thei pen bang khat in hong mu uh a,  hong uang nek uhhi.Tua te hangin natna tampi ngah uh hi. A mau duh leh deih hong gen uh ciangin cidam na tawh a kituak te a hih leh Nu in thukim pih ding, hun manman a an neek ding zong hilh dinghi.An nek  a man loh ciang in gilpi an gawina nusia susia ahih manin cidam na leh lungsim puak zia zong susia hi. Tua bek tham lo in annek dawkan (Sabuai) ah cidam na tawh aki tuak an te ne nuamlo in thahat na a piangsak lo nek theih nengneng duh zawsop theihi. Nu  in hilh lo in tano utna azuih leh tano tawh tuate hong khang khia khawm a pumpi leh ki lap sanna te hong sukha tahi.Tano deihna bek zuihna in ni khat ni ciang in  Ni  in avawh bangin athin hong tung ding hi. An ahi lo na te lei na ding in bang hang in na sum uh zang a hong gilvah sak theilo na te ngah na ding in bang hangin nasem nahi uh hiam? keima thu lim tak in ngai  in a limci an te ne un la, na anlim te ah nuamsa in om un.Isaiah 55: 2.Neek leh dawn leh tano te  tawh ki zopna ah Topa hongpiak thupha te ngaihsun khawm in pumpi lungsim, a cidamsak nek leh dawn hang in, a piang sak Topa ih phat kik ding deih hang.

Eden huan ah a siangtho nupa kop te nek leh dawn tawh satan in na ze-et hi. Tua in ze –et na tampi tak sungpan in a nasia pen ze-et na bulpi hi pah hi. Adam ngongtat na hangin  Eden huan tan lawh a neel leh dawn kidek kidaam zawh na hangin Topa Zeisu in ze-et na zo hi.

Mawhna hong tut masa penpen in duh theihna, kamlimna , ahih manin Topa lam atawn lo ngongtat na Nu in thei tel ding a duhduh nek na in khuk ngaihsut theih na ding hong dalpi pen ahih nathei in, apilvang ngaihsut naleh  lampi tot ding limtak  a ngaihsut na in duh theihna, in, kamlim sakna te uk ding hi. Ze-et na pen i ut penpen tawh hong ki zol ding hi. Hi ne leng ka lung a dam tam? cih ngaihsut na tawh khensat ding hi.Gentehna. mehza? Mikim in ki zang lo maw zasan, ci, cikhum cih  te bel mimal lungsim khen tat dan.

D.Silh leh Teen Nu

in ta no te a dingin limlang ahih mah bangin nek leh dawn a kipan silh leh teen ah zong hong et teh toto ding uh hi. Tano , te adding apuan silh anik ten zong ngaihsut Kul a khua sik asak loh na dingin puan lum zong guat kul hi. Ngaihsut ding i cih tak ciang in  aki samlo pi apuan sil niik ten bek ngaihsut ding hilo leuleu hi.

“Nu in inn ah puan gina a silh kei uh leh a tate zong tua bang a a

silh ding ahilh  a suak hi. Nupi tampi in, sia niapnuap taleh inn a

silh ding puan khat peuh phamawh zenzen kei, ci thei uh hi. Innkuan sungah Nu te’ huzap hong kiam pah hi. Ta te in  a Nu’ puansilh leh midang te ii hi linlian na a silh uh hong saikaak in, amah a zah tak na uh hong kiam hi. Silh leh teen a hoih lua i nei kei phial zong in a siangtho ding hoih zaw hi.Puan nin in cidamna leh lungsim ading in hoih lohi. Nu in ta no te’ puan ding bawl na ah ahoih leh phat ngah ding sang in cidamna tawh ki tuak a silh nuam ngaihsun ding hizawhi.  Nupi te in a tate uh’ puan ding zem in, et hoih  ding  a bawlna tawh a hun uh bei sak ding hilohi. Tua in aki sam lo nasep hi a, Nu cidamna aleh  ta cidamna sukha hi. Cihnop na in tawlngak na leh ahoih bek thasaan na a ki sapo

lai tak in,mit leh sazang , nak, zat a kul puan khui na tawh nitum

keei lo ding ahihi. Siatna tawh a khangkhia khawm tano te leitung khuahun luanzia tawh akhang khia khawm pah uh hi a, amau in honpa gumpa sangin niik leh puan lam hong tam sak zaw in Nu in Lai siangtho sim sang sik in puan a paw nono(popular) te silh le ten dan a uuk zawh lamtk tano ten mu in thei gige hi.Hong tung ding ki gin kholhna ah ih piak zawk ding Nu’ vai puak a hihi. Silh leh teen design ah lungsim a la, ahoih nono silh ding teen ding

a deih pha deuh a a phuan khia(founder) pa in Satan hi.Tano  te’n silh leh teen deihluat nate hang in lungkiatna, Topa Pasian ih biakpiak na a kipelh theih na dingin Dawimangpa lunggulh pi pen khat ahihi. Hi bang hang in lungsim leh pumpi tha zawm in khalam hong nungtolh sak ding leitung kizep na pan a etlawm aki lawm a siangtho sawtpi ahoih denden ding cidamna tawh ki tuak silh leh teen tawh Nuleh ta ki zopna laamsaang ni.

E. Nasepna tawh

“Innsung ah sep ding aki sam te,  ama khut mahmah tawh sep hong kul ciang in, Zi leh Nu hoih in, za neu na bang in tuat lo in a sep ding peuh maitai tak a sep ding hi. Ih nuntakna –ah na tawmno bek sep ding leh ei nopsak na bek tawh hun bei sak ding hi lohi.Mikim in I dinmun ciat pan khantoh na ih neih theih na ding Topa Pasian in thahatna hong guan hi. Nasep na in samsiat na hi lo a, Pasian kiangpan hongpai thupha hi zawhi. Toopa in ahoih mahmah Eden huan akem acing dingin  Adam leh Eve nasep guan hi. Topa Pasian mahmah in zong ni khat pan ni guk dong na

asep khit ciangin tawlnga hi. Topa patkhiat nasep na ah a thupit zia tano te hilh ding ahihi.A mangthang dekdek ding te a dingin man anei mi ih hih natawh Pasian vang a tang sawn sak ding in vantung pan ei te nasem dingin  hong ki sawl hi.Tua ahih manin Nu in tano te atha leh akhut te uh a tangzang lai hong huh theih dingin hilh ki sam hi.Nasep ii manphatna te leh nasep a pii muh theih na ding, lunglut sakin, tha san in na i sep teh a gen bang lo lungnopna pen cikmah hun in kicinglo ngeilo ahih lam a mau te tungah hil ding hi hang. Naupang te hun awng tam aneih uh leh ze-et na tam pah hi a,Na tawm bek sep nopna leh thadah na te in siathuai na hong puak ahih na Nu in tano te theisakni.Tua ban ah guh leh taang a thahatna dingin naupang te nasep theih ding thupi hi. Nu te in tano te gimlua kha ding ci in nakpi a tha tang saan ding te ki sem sak lo hi.Tano te puak ding uh a ki lawm vangik te Nute Pate in pua uh hi. Nak sep luat pen hoih lo mah

a, a hi zongin, semlo a omna lauhuai zaw laihi. Nute in tano te

cidamna dingin a sahui, sazang te ,a khauh na ding pumpi kilok nalh na nasep guan ding hi.

F. Aw neem tawh ki zopna

Khristian nupi in a tate’ kiim alauhuai na te phawkbaihding a amahmah asiangtho tak in kikem dinghi. Pasian kammal tawh a lungsimleh a gamtat kikem in a tavuan zo ding a, amah a sual tawntung ze-et na nengneng te zo dinghi. Naupangte in thu phawk baihmahmah uh a, lungduaina,itna, awging leh, amau’ lungsung a itna leh ngaihna a halkeu lungtom naleh hehna kammal te khen theimahmah uh hi.Khristian taktak nupi te in hehna leh muhdah na tawh  amau’kiangpanin a ta te uh hawlkhia lo dinghi.Han na leh phun na tawh ana ki dawnden keei na a inn uh ngai lo ahih manin tano tampi tak in zusai khawngleh a dang gualnop bawlna khawng te ah hehnep naleh lungnopna in zang zaw uhhi.Nu leh tano te ki zopna, pattah na ah ahamsa a thu kho sa nupi te’ deihna tawh aki tuak lo, ahoih lo deihna te tano te in nei thei hi. Tua bang hun ah Nut e a pil mahmah ding ki sam hi. Don siam loh naleh hansan gawpna tawh tano te sia zaw tham

thei hi. Nu zong a mah leh amah limtak a kikem dinga, tano in a do(kawk) kik theih na ding bangmah ahih loh ding ahihi. Hanglualua sa in bang mah sawl lo dinghi.Aw neem leh aw khum zatna tawh  meetna  tam zawhi. Zeisu’ kiang a tun theih na ding lampi ah a tano a pattah ding ahihi.

Khristian pil khat a hih leh Nu in a tano ukcip lo dinghy.Galpa in a

zawh loh na dingin deihtak in thungen dinghi. Thu a nget kawm in

khalam  ki puahphat na om ahih lam phawk ding hi. A ma sung a na a sem vangliatn amah in a tano sungah zong nasem ahihlam mu dinghi. Hong migi zaw in thu hong mang zawhi..Gal ki zo tahi. A lungduaina, a migitna leh a kampau kidop na te in a nasep uh hong zohi. Guah zuk khit ciangin ni hong taan mah bang in,huih hong kap ciangin daihnahong omhi. A vil gige vantungmi te zong lungdam in lasa uh hi.

G. Cidamna tawh Nu leh Ta ki zopna

Ta te pen Nute Pa te kep dingin a kipia hi a, nikhat ni ciangin

Pasian in amau te ikhut pan in ngen kik ding hi. Amau te pattah na ah ahun  tamzaw, thungetna a tam zaw ih zat kulhi. Hilhna maan a tam zaw ki sam hi. “A hang om lo in natna om lo hi.”Naupang te  anat na uh atampen kepdan maan loh na hang ahihi. Annek hun maan lo,khuadam hun ciang a puanlum zolo, sisan hoih tak a  apai theih na’ng thasanna omlo, sisan siangtho sak ding huih tampi ngah lo cih te hang hi thei hi. Nu te Pa te in natna  apiang sakpen kan khia in a manlang theithei in bawl pha ding ahihi. Natna kidal kholhna ,natna koici bawl hoih ding cih Nu leh Pa’n ki sin thei hi. A diakdiak in Nu in Innkuan sung adam lo hong om ciang in bangci bawl ding cih theihhuai phadiak hi. Innkuan ki uk na ah siangtho na ding thu, nate ahi sitset akoih na ding thu cih te a om kei leh ki cinglo hi. Tano te pumpi a khan na ding, lungsim  puakzia a hoih nading leh gamtat hoih, agamtat  na ding in Nu in lam  a lak kei leh a dahhuai mahmah khialhna ahihi.Bang te ,Mihing ading in a hoih pen an, ahihlam, ih theih nang in Pasian in, hong gel sak. Amasa pen , an thu te, ih kankul hi. Mihing te bawl in, Mihing lungsim a thei Pasian in Adam a ding in a an ding gel sak hi. A cidam dinmun ah ih om den na dingin tha a piangsak anteh a ki cing in ih neek ding ki sam hi.

Ei pen ih geel theih nak leh cidam nading in a ki tuak an pen mun

khempeuh ah a ki ngah thei a hi, buh,mangbuh, vaimim cih te nam tuamtuam in ki bawl in,mun khempeuh ah ki zuak khia hi.Tua mah bang in be cii te zong ki bawlhi. Tua te tawh a ki bang in ah, singgah te zong gamlak pan hong zuak uh in bek tham lo in ih omna mun tek ah aki cing meh teh meh gah tuamtuam te pen sa  ki hel lo in a hoih leh tha apiangsak thei neek leh dawn te a k icing in deih deih in teel in huan thei hi hang.Leitung a mi te’n a zat pahpah theih van te pen an gawina haksa sak hi. Tu lai tak in lungsim amaan lo in atei tang sak tehi ten a atwm sak zaw nekleh  dawn te pen hoih zaw hi.Meh a namtui sak thei te pen ih pumpi zawng khal sak thei hi.

H. Na dang, na dang khempeuh thupi lo zaw

Hi leitung a apiang naupang khempeuh Topa Zeisu neih, a ma aa hi a, ama kammal te um in thukham leh thuhoih tawh pantah ding ahihi. Nu in naupang te thungaihsut theihna  a neih aki pan Honpa thei a a it theih na ding in hilh ding zia Pasian hong piak vaipuak phawk kha lo theihi. Tano te hoih tak in makaih a, vantung mite  tawh ki khawl thei ding in a tano te a pattah na ah Nu in a siam n ate azat theih na ding in ngaihsut siam a  anuntak ding uh  Topa’n deih hi.Hih theih bangmah neihloh bebek paulap aom ding zong hilohi. Pawlpi sia,Nipi sangsia, leh siamsin na sang te peuh ah puma p khit zong hoihlo hi. Nu leh Tano ki zopna  a masa pen ding hi a, a zom ah a sang te tawh ki zop ding

hoih zaw hi. Nu in sang sia masa penpen ahihi.Naupang te pawl deih mah uh hi.

Amau te tung itna a lak dendin gmi lunggulh den uh hi. Amau paktak theih te Nu in zong pak ta ding sa uh a, ama ii dahna leh nopna te Nu kiang ah ko thei uh hi. Tua bang hun ciang in Nut e in a tate ii awlmawh te awlmawh sak lo in iim ding hilo hi. Awlmawh lo in om kha zenzen le uh amau te hong khasia ding uh hi.TAno te a ding in Nu te ii kin na pen manpha mahmah hi. Nute kiangah a gamlum ta te gamlapi ah amau te lungnop sa  in na a

sep theihna ding khat gel sak ding hoih hi. Ta te pen guak suak in a om loh dingin Nu te’n akin kul hi.A mau pen athupi pen hi a, midang te a mau kiang hongpai uh teh a mau nuai ah a om ding te hi ci in hilh ngei kei in.Nu pawlkhat ten a tate nop asak theih nang in hun tampi pia uh hi. A hih hangin tate ii ciim(pil) na te i zat theih ding zongkul hi. Gamtat na ciau lel khawng tawh amau ten nopsakna a zon theih ding kul hi. Ih nuntak sungah lungkiat naleh haksatna te anawk thei ding ih hilh ding kisam hi. Acih tham lo haksatna lel te tungah ih lungkham ding sang in tua te ih gualzawh theih nang in  amau te hilh ding hihang. Ih ta te’n ei hong vei theih nang in koi ci hilh ding ka hiam cih kanin. A hih hangin ih tate’n Nu te khah khong thei in Nu te pen agim luat man in khat veivei the a tate uh thu hilh ding leh itna lak dingin hun

a neilo dan in ki sak kha thei hi. A hih hangin ih ki dop ding thu pen ih te ten a inn sung vya Nut e kiang pan itna le ki thuah khop nate a ngah kei uh leh  tua along gulh te uh a pua lam pan hong zong ding a, anuntak naleh akha hong sukha thei hi. Nu pawl khat te’n mel hoih nang leh za neih nang in a hun, a mit , akhut te a zat man un a tate lungsim sungah ki sialh na leh uangtat nop n ate paii sakhi. A hih hang in a tano te tawh hun tomno sung a ki mawl khawm dingin awng thei lo uh hi. Tua bang atat man un a tano te

hong khan teh ki phatsak naleh a hong           paktat lam uh ki mu

thei hi. Tua dang  amuh pat uh the khitui hongluang thei uh hi. Ahih hangin a zawh bangin a at lam uh ahih lam ki mu theituan lo uh hi. Nu pawl khat te leuleu the tano te tawh a kizopna uh ah khua heek dan tuamtuam hong zang uh hi. Khat veivei teh tano te a      siat theih zawh zah ciang ding un a deihna uh zuih pih in, khat veivei te lah amau te lungnop theih nate a nawngkai sak thei zel hi. Tua dan gamtat na pen khris limlak na hilohi. Topa in naupang te it hi. Topa in a mau lungsim puak te uh thei in  amau te ii nopsak n ate leh  ze et na athuak khawng uh the a mau tawh ki bang  in hehpih in na thuakpih hi.

Tano te pen Topa Pasian  aa hi a ama neihsa ih kepsak na ah thudot na ih thuak ding hi. Topa in Hih tapa hih tanu khoi in kem in, kei a dingin hong pantah sak in. kumpi inn lim sun in anun tak zia hong zep sak in Topa inn sungah “a tang” theihna dingun” Nu a ki ci khempeuh in Pasian kiangpan sawlna siangtho i nei hi.

Tua ni ciangin “Topa nong kepsak tano te leh kei hiah om ung,” ci a ih ap kik hun dong hi lei ah “Nu leh ta ki zopna” ii tha man in tawntung gam hong tun Topa maipha ngah a lungdam ki paak na “Nu leh Ta ki zopna”hong hisak ta hen .Amen.Con amore,

NaaMung

Anlangh pan