EITE'N I MAISAK MAH BANGIN
Sia Gin Khen Kham
Mawhmaisakna tawh kisai-a, Pastor E.H Roy (Greatwood, Kentucky) gelh hih thului pen Nupa kikal, Innkuan sungah, Pawlpi sung leh khua le tui-ah a thupi mahmah leitung nopna, daihna ding bek hilo, vantung gamnuam i tun' theih nading dong taka, a kisam a thupi ahih manin kong suaksakkik hi.Khatna: Ei' tungah hong khialhna bang zahta-in lian tase leh midangte' mawhna i maisak ding ahi hi. Dum sungah tangval Joseph kikhia-in, Ishmael mite kiang kizuakin, sila-in kipaai-a, thong sung dong kidenna hi. Tua bang teng a thuak hangin amah in a lung sungah muhdahna bangmah nei lo hi. Egypt gam ukpi a hong suah ciangin, a u-te an taw dinga a hong pai ciangin Joseph in, "Tun'n ka khut sungah na om ta uh hi. Note' hangin kei thong hong kidenna hi. Tu'n no zong va sin dih un," ci nuam leh ci thei hi. Joseph in tua bangin thukkik lo hi.
"Ama mai-a a ding khempeuhte' mai-ah Joseph ki-ip zo lo ahih manin, Joseph in mi khempeuh paikhia sak un, a ci hi. A u-te' kiangah Joseph a kipulaak laitakin, a kiangah kuamah a om kei hi. Tua khitteh a naupa Benjamin a ngawngah kawi-in a kap hi. Benjamin zong a u' ngawng kawi-in a kap hi. Tua tham lo-in a u-te khempeuh namin a tung-uah a kap hi. Tua khit ciangin a u-te in amah a hopih uh hi," kici zaw hi. (Piancilna 45:1-15)
A u-te' bawlna teng pen Joseph in a lung sungah veii-in nei tuan lo hi. Muhdahna-in nei lo hi.
Stephen suang tawh a kiden ciangin, van lamen to-in thungen a, "Topa aw, hih mawhna amaute' tung na tusak kei in," ci hi. (Sawltak 7:60)
Khauteep tawh kisatin, kicil phihin, ling lukhu a kikhuk sak khit ciangin, singlamteh tungah a kikhai Jesu in, "Pa aw,
amaute na maisak in. Amaute in bang hih uh ahih lam a thei kei uh hi," ci hi. (Luka 23:34). Ei hong khel bawlte, kam sia hong paute, hong gensia-te in bang hih uh ahih lam thei lo kha ding uh hi.
Nihna: Mawhmaisakna a ngen masa ding ei i hi zaw hi.Zeisu in, "Tua ahih ciangin biakna tau-ah biakna paipih a, tua laitakin na sanggam khat in na tungah hehna nei ahih lam na phawk leh, biakna tau-ah na biakna nusia in la pai in. Na sanggam tawh kilemna bawl masa in la, tua khit ciangin pai-in na biakna pia in," ci hi. (Mate 5:23, 24)
Amah a zong dingin Ama tungah a khial eite Pasian in hong ngak lo hi. Ei tawh kilemna a bawl dingin Amah hong pai zaw hi. "Nidang lai-a Pasian tawh khualmi hi-in, gitloh nasepnate tawh na lungsim sung uha gal ahi note, sihna tawh Ama satak pumpi sungah Amah in hong kilemsak hi." (Kolosa 1:21, 22) "Hih khempeuh in, Jesus Christ pana Amah tawh eite a hong kilemsak Pasian' aa ahi hi. Amah in kilemna nasep eite a hong pia hi."
(2 Korin. 5:18)
Thumna: A hong thum ua, a hong thum kei uh zong ei' tunga hong mawh mite' mawhna i maisak ding hi. A galte a thum ding Stephen in ngak tuan lo hi. Maisak lel mawk hi. Joseph' u-te'n zong mawhmaisakna ngen tuan lo uh hi. "Ei tunga hong khialte in, a hong thum matenga a mawhna uh ka maisak loh ding pen kei a thutang hi'ng ci-a i ngaihsut ding hi lo hi. A khialhna uh a hong pulaka a hong pulak kei uh ahi zongin, ei' tunga hong khialte' tungah hehpihna lungsim i neih ding ahi hi."
Thoughts From the Mount of Blessing, laimai 113,114.
Lina: Mawhna a maisak pahpah nuam ih hih kul hi. I theihsa mah bangin, "Tua ciangin Peter hong pai-in, Topa aw, ka sanggam khat in ka tungah hong khial themthum leh bangzah
vei maisak ding ka hiam? Sagih vei dong maisak ding ka hiam? a ci hi. Zeisu in ama kiangah, sagih vei dongin maisak in, kong ci kei hi. Sawm sagih mun sagih vei dongin maisak in, kong ci hi, a ci hi," cih thu om hi. (Mate 18:21, 22)
Sawmsagih Mun sagih: A veizah ciangtan omlo
Thum vei dong maisak ding, ci-in Rabbi-te'n hilh hi. Pe-ter in tua zah a khengval a ci-a kinei ahih hangin Jesu in 490 vei, na ci hi. Midangte in i lungsim hong nasak mahmah kam hong pau a, hong nasak mahmah nate a hong bawl uh ciangin, bangtan vei, bangzah vei maisak ding i hiam?
Na sanggamte a hong khialh leh na maisak ding ahi hi. A hong thum uh ciangin, a kisik taktak hi ken teh, na ci kei ding hi. A lungsim takpi uh tawh hong thum hi kei, na ci kei ding hi. Mi' lungsim a theithei bang keekin, amaute' tungah thu na khen theih nading koi-ah thu ngah na hiam? Pasian' kammal in, "Amah a kisik leh maisak in. Ni khatin sagih vei na tungah a hong khial leh, ni khatin sagih vei mah na kiangah hong pai-in, kisik ing, a hong cih leh na maisak ding ahi hi." ci hi. Luka 17:3, 4Sagih vei bek hi lo-in, Pasian in nang' mawhna a hong maisak zelzel mah bangin, 490 vei acih pen ciangtan nei lo-in maisak ding cihna hi.
Christ Object Lessons, laimai 249, 250.
Ngana: Midangte' mawhna i maisak mah bangin eite' mawhna hong kimaisak hi. "Ko' tungah hong mawhte ka maisak uh bangin, kote' mawhna zong hong maisak in," (Matt. 6:12) ci-a thu a ngen dingin Jesu in hong hilh hi. Topa' thungetna i nget tak ciangin mawhmai sakna omzia a bulh i hi hi.
Zeisu in, "Mite' khialhnate na maisak uh leh vana om na Pa un note' khialhnate a hong maisak ding hi. Ahih hangin mite' khialhnate na maisak kei uh leh na Pa un note' khialhnate a hong maisak kei ding hi," ci lai hi. (tang 14, 15). Tua ahih manin thangpaihna leh muhdahnate i lung sungah i kep giugiau ding
Mate 18:23-25 sunga a kigen hehpihna a nei lo silapa' thu-ah, a lawmpa'n ama a pek 100 a bat a maisak leh a silapa in ama tunga talen 10,000 a bat kumpipa in maisak ding ahihna kigen hi. Midangte in ei' tunga hong khialhna nengno khat pen Pasian' tunga ei' mawhna tawh teh lehang dangka pek 100 leh talen 10,000 a kikhaih bang hi ding hi. (seh 500,000 suah seh 1 cihna hi). Pasian' tunga ei' mawhna a tampi tawh teh le'ng, ei' tunga mite hong khialhna pen thu neu nono hi lel a, tuate i maisak leh Pasian in zong eite' mawhna a tampi hong maisak ding hi.
"Thukhen kei un, tua hileh thukhenna na thuak kei ding uh hi. Mawhsak kei un, tua hileh mawhsakna na thuak kei ding uh hi. Mawhna maisak un, tua hileh na mawhna uh hong kimaisak ding hi." (Luka 6:37)
Sawltak Paul in zong, "Lungnemna tawh khat leh khat na kihehpih unla, Pasian in Christ hangin note' mawhna a hong maisak mah bangin, khat leh khat na mawhna uh kimaisak un," ci hi. (Ephet 4:32) Mawh pahpah ding; thum pahpah ding; mai pahpah ding cih hi zaw lo-in, Pianthakna (Col. 3:5-9) dikna tawh nuntakna-ah Kha Siangtho gah kilanghsak, a gahsak nuntakna (Gal. 5:22) nei-in nisim mawhphelna, mawhmaina nei tawntung ding cih pen Pasian deihna hi.
Puahphatna:
1. Quater masa sunga Jubilee late’ min kigelhna-ah Nu Lun Lam Cing-te in zong Tonzang biakinn hon’ pawi-ah kum
(30) cin’na Jubilee la hi.
2. MGT te’ Reportna lungdam kohna sungah nambat 6 na ah Siapi Kam Khan Mung-te innkuan in datsi man ding 15000/-hong piakhia hi.
