Letsi Kan thu

Dawimangpa in hong suh ziahziah Pasian mite zong Topa tung ah kiko ziahziah,  Kha lam galdona nakpi tak in ki nei masa ahih manin Topa in a mi siangtho te tung ah gualzawh na pia tak pi ahih lam camp apai mimal in tel mahmah in ka um hi. 

Pastor Daniel Nangno in State tung pan a ki ap nuam mi a sap lai tak in mi 300 val hong ki ap a, guih theih kham theih zongsat nate  pan akikhel leh pumpi cidamna a ngah mi 50 val a phak ban ah tui leh khasiangtho tawh a suakkik kha manpha  58 te hang in ki lung dam mahmah a, vantung ah lungdam na lian zaw kan lai ding in ka um hi.   

Nidang galkap sung a om lai galkap tampi nek ding baihno tak a ahuan thei, anhuan siam Pa Pau (Pinlong Baptist ) leh a lawm te in tatsat lo a ahun uh ahih hang in an khamlo cih pau lap tawh a ciah sim zong om cih thu ki za hi.  Ahi zong tua anletui te sang in kha an a lunggulh zaw mi 1300 val te in Kha an gilvah tak mah in ne ahih lam apai mi mal in thei pen ding hi. 

Pr.  Kham Khen leh B.Min kah sia te zong hong ki hel thei ahih manin UMM a sia te a tam zaw phail ki hel ding in ka um hi. Nitak hun leh zing hunte ah Mizo pau leh Tedim pau namnih ki zang/kam kiphen hi.

Kawlpi pan khutsiam te sum tawh cial in aki   at/gelh   Mualsuang golpi phuh na ki nei hi.  Hun kipat ma in Pr. Kham Khen tawh ka nih un mipai zah mualsuang tung ah ka behlap uh a tua khit ciang in, khut siam Cin Suan Mung (Mungtoh) leh a lawm ten kiptak in lei sung ah hong phuh sak masa hi.

 Mipite a group in ki gual a tua mualsuang phuh na ah Kalay Adventist Seminary (KAS) a laan (flag) leh Evelasting Gospel Team (EGT)  alaan te  ki paipih in mualsung phuhna la VCMang makaih na tawh solemn tak in aki sak khit ciang in zatak piak na ki nei hi.  Tua lai tak in khuasik mul hong tho in lungdam kipak na khi tui te hong luang kik hi.   Pr. Kham Khen Pau thupha piak na tawh tua Mualsuang nuamtak in  ki phut  hi.  Tua ni pen Camp man ni zingsang hi ta hi.  Tua mualsung tuni dong om lai in ka um hi, bang hanghiam cih leh tua bualtui gei ah Kawl biakna Tattung  kiphut a, tua a cing te (kawlte) tawh zong makai te maan hioh tak ki la khawm in tua mual suang hoih tak hong kep sak na ding lim tak in ka ki vai khak uh hi.

Camp hong pian na

Hi bang a Adventist Camp meeting hong pian theih na ding in EGT pan VCMang, Sia Sawmsang, Dalboih, KAS pan Sia Suanno leh Sia Mangpu te tawh  ka sunmang uh ahi hi.  Ngaihsutna a om hang in sumlepai om lo ahih manin apian theih na ding khat ka kikum uh hi.  Tua ka kikup na uh tawh kizui in:  U Pau Mang kiang ah ka pai uh a, EGT leh KAS kipawl in camp khat bawl nuam ve hang in nang leh U Kuk in nong huh zo uh diam ci a hong pai hi ung.   U Nangkuk  in bel  lawm Mang a ut nak leh kei lam pan pha mawh kei ci hi ven ka cih uh leh, tua bang ahih leh vai hawm leng ai ve hong ci hi. 

Ka phuah tawm uh (zuau namtui/white lie) hi mawk ahih manin amau gel a ki thu zak ma in U Nangkuk kiang ah ka tai uh a U Pau Mang kiang ka gen dan lian mah un U Pau Mang in Kuk a ut nak leh pha mawh kei ci hi ka cih uh leh tua bang ahih leh no hong gel le uh teh ai ve hong ci ahih manin Topan hong lungkim pih ahih lam ko apai mimal in ka lung sim vuah theihna khat tek ka nei uh hi.

 Ko teng mah simbeng zong kim citciat tangzang kiguan  acih dan in hih anuai a bang in panmun ka ki guan tawm uh hi.  VCMang in zong Camp lapi ding hong phuak pah hi.  Khutte lamto in huihpi guah pi nuai ah tua Lapi a sa mi khem peuh in mangngilh ni a nei diam ci in ka ngaih sun kha hi. 

Sponsors :  Pa Pau Khan Mang (Paumang), leh Pa Nang Khan Cin  (Nangkuk)

Camp Director:  Sia Dongh Za Hau (Dongbawi)

Camp Secretary:  Sia Nang Suan Tang (Suanno)

Camp Treasurer:  Tg Dal Cin Lina (Dalboih)

Camp Pastor:  Sia Suan Sawm Sang (Sawmsang)

Food in charge:  Sia Hang Khen Mang (Mangpu)

Music:  Pa Vungh Cin Mang  (VCMang)

Security:  Pa Ngo Khen Zam (Ngokhen) leh Pa Tun Khan Lian (Lian Pu)

Khamtung lam pan hong pai te hong vaan sak Sia Thang Gen Mung leh Sia Than Khan Mang (Mangpi)

Camp Bawlnadign Mun Zonna

Camp kibawl takpi ding hi ta, amun ding hong kisam ta hi.  Amasa in Natchaung khua khen a Meitei gun dung ki en in deih bang lo hi.  Pyidawtha khua gal Mainuai khua lu tuizeu om na ki en leuleu in mihonpi a ding lem ki sa lo hi.   

Hausapi akici na hoih mahmah cih thu kiza ahih manin  Sia Suanno  leh Sangnaupang pawl khat (Sawmtawng te Lianneu te ki hel hi ci ngel ing?) tawh Sialthawzang, Dimzang lam tawn in Tonzang township sung a om Hausapi ki ci  na mun ka va en uh hi. 

Tua Hausapi kici na mun pen Suang mual/keen  veva  pi khat  ahihi.  Tua sungpek pi agam la pan I muh ciang Gunkuangpi/tembaw nung a hei na (peh) sikpek dekda  abungbu lam a aki phut thawh kibang ka cih leh lawm te khat in innsang pi a tung kum om lo a adawl tungnung pen a kongkhak lang khat bek a ki hong tawh ki bang hong ci hi.  Tua a sang mahmah suang pek pi I gal muh phet in a phual tun ding ki ngaklah  ahih manin I lampi a sau pha diak tawh ki bang ka sa hi.

Tonzang lam pan hong luang suk damtui cim kilkel, tua Suang mual pi sung ah lut in alang lam ah hong luang khia hi. Tua hong luan khiat na mun lam ah tuilii neu in hong cing a tui pek na ding nop tuak mahmah hi.  Lui pang keen tung kah to in tua suangmual bul kheng to leng lui naak lam ki pai thei hi.  Amun te kamtawh gen theih loh in hoih in nopci a, kawng tantan apha lui tui cim kilkel sung ah zung nih ciacia khap khat pan tong khat tantan a pha ngasa hon vak hialhial etlawm mahmah hi.  Sia Suanno in hong genna ah hih ngasa te a nungzangbek aki mu hi a, atatak in gol mahmah ding hi acih leh sangnaupang pawl khat in takpi maw sia ci in dong kik uh hi.

Amun ahoih mahmah hang in Mihonpi tawh pai na ding lem mel lo ahih manin March 1997 kum a Sia Lianpau (UMM Youth director) makaih na tawh Adventist nungak tangval teng bek apai na mun Letsiikan pai ding in a ki khensat  ta hi.

Giahphual kisat khol

Sia Suanno makai in Pangpi  leh Pinlong khangno pawl khat mi 30 kiim ( apha zah lian thei nawn lo) giah phual sat ding in ki pai khol sak a giah buk leh State te na lam khol uh hi.  Mi pi khem peuh giah theih na ding a alam uh ahih hang, mi hong tam lua mahmah ahih manin  numei  naupang te a ding bek hong suak ta hi.   

Mipi hong tung

Sia Mangpi leh Sia Genmung makaih na tawh Tedim leh Tonzang town ship pan Condor pi 4 dim mitmet in Kawlpi hong tung pet mah ta uh hi.  Nungak tangval bek hi lo nupi papi naupang avek un mawtaw tung pan hong tuak khia  phangh phangh ka mu a lungdam na leh patauh na ka awm sung dim in hon lut  hi.  Pawlkhat te biakinn nung lam va tai in tu suk uh a, lam kal tawntung, a ippcip uh anking te a kam dimdim un siakhia ziahziah ta uh hi (Lua).   Pa Sian Cin Zam (Zamno) leh ulian pawlkhat ka muh ciang, den a ka patauh na teng paih khiat hong bang zo mawk hi.

Kawlpi leh a kiim pan hong pai te zong hong tung damdam ta a, KAS huang dim in mi ki leh matmat hi.  Mi khempeuh kham ding in, akihuan Buhcim a ki nek khit ciang in mawtaw tung ki kah sak kik hi.  Yangon  leh Maymyo zum pi pan thugen ding a akicial  Pr. Daniel Nangno, Pr. Do Thang, Pr. K.K. Khual te a ki pan Tahan Puia, Pa Zamno cih te in mawtaw khat tek hong makaih sak hi.   AY alaan (flag), KAS alaan, EGT alaan cih te mawtaw tung a kikhai khit ciang Letsiikan lam zuan in ki nawn ziahziah ta hi.

Nitak lam nai 4 bang hong sat petmah ta ahih manin hong pai ding a dangte ki ngak zo nawn lo in Pr. Khamkhen leh sia pawlkhat tawh Diana dim in anunung pen Kawlpi pan ka ding khia ta uh hi.  Aphual ka tun ma un ni in mual hong liap san a khua hong mial ta hi.  A sawtlo in mual zaang khat ah ka suak to uh a, mei taang zihziah ka gal muh hi.  Tua ataang zihziah mei leh ko suaktoh na ki kal ah tuilii pi khat in hong hal a, tua meitaang te tuiliipi tungpan in hong leng in nopci mahmah hi.  Limsuai siam te in vantung gam dan ding a suaih uh ka phawk a Vantunggam bang zah in nopci ding cih ka lung ngai kha hi.

Ka tuan uh mawtaw in tua Limlang tuipi gei ah hong taiphei pih zetzet  hi.  Tua ka galmuh a tang zihziah leh limlang tuipi pan hong leng kik khua vak in ka lungtang hong tan a aki gen thei lo lungnopna khat ka ngah hi.  Ka awm sung ah alom pi khat hong lut in ki hual vanvan ahih manin kapum pi sung a tui pawl khat ka mit pan sawn khia hi. Lungdam kipak na hang a aluang mittui te khuamial sung pan ka khutbom tawh nual hiathiat ka hih lam ka gei a tu ten hong thei in ka um se kei hi.  Mihonpi husa te hong gin ngaih tetek a, a sawtlo in mipi om na ka tung taktak ta uh hi.

Hih camp thu ka ngaih sut kik sim in  mual hong liapsan sa ahi Pr. Do Za Thang leh Security  kician taka hong let sak (U Lianpu) ka phawk mahmah hi.

Keima phawk kik teng ka at hi in ka theih khialh aom leh athei te in deihsak na tawh nong puah sak na ding un ka hong thum hi.  Lai hong simsak mimal tung ah Topa in thupha hong pia ta hen.

Hih Letsiikan Camp kibawl hun April 1998 ahihi.  Kawlpi pan a ki suai time table tawh activities te ka pai uh ciang in bang mah buai na om lo hi.  Camp sung ah Khasiangtho hong ki buak na ding thu aki nget a kipan Dawimangpa ziaetna nasia tak in hong lut pah hi. 

Tua ziaetnate nung ah Topa Khasiangtho in na hong sem takpi hi.   

Union ah Pr. Daniel Nangno, Dr. Dal Khan Mang Edu. Director in a om lai tak hi a, UMM ah Pr. Kham Khan Pau President, Pr. Gin Lian Pau Edu. Director, Pa Pum Za Lian  leh Sia Kai Za Dal te Lay representative pai zel in administration lam ahoih mahmah lai tak ahihi.   

Independent Ministry (supportive) lam pan in ei Tedim kam pau sung ah Everlasting Gospel Team te Pa Nagnkuk, Pa Ngokhen, Tg Cinpu, Pa VCMang, Tg Dalboih, Sia Sawmsang te a kipan thugen/lasa siam honkhat ki thauh in ma a nawt mahmah lai tak ahihi.  Tua baan ah Remnant Band (RB) ci in Kham RB leh Zaang RB zong ama mun tek ah thahat mahmah tuak uh hi.  Mizo lam pan zong thugen siam Sia Puia te pasian nasep na ah alawh cin mahmah lai tak ahihi.

Hun khat lai in Pr. Thang Siangh kal suan zia (khekhap) ki zui ahih manin Sang lam leh Mission nasep na khantoh na ding na sia tak in hong sem uh hi.  Pr. Thang Siangh sep lai mah bang in Pawlpi mi te lawp in kha lam khanlawh na nasia mahmah hi ci leng khial in ka ki um kei hi. Sanglam ah ci leng Mission support full tak a angah lo Kawlpi sang KAS zong Khasiangtho ompih na tawh amai nawt lai tak hi in ka um hi. 

Tua hun laitak in Union committee sung ah I muan mahmah ahi Pr. Daniel Nangno, Dr. Dal Khan Mang, Pr. Kham Khen Pau, Sia Kai Za Dal te a ki hel laitak ahih ban ah, comettee sung a aki hel lo Pa Pum Za Lian in zong Union Ulian te tung ah thu a neih mahmah lai tak ahih man in a phut nop khat pepeuh uh phu lah het lo uh hi.

Nidang in Sia Lian Pau in hong gen ngei khat ka mangngilh thei kei hi.  Ei SDA te leh RC te pen pawl nih om ngei lo in pawl khat bek hi den hi hong ci hi.  Sia Lianpau hong cih mah bang in ei Adventist pawlpi in thu khun kip mahmah ki nei in  Conference la ding hi leng zong tua thu khun tung tawn bek in ki la thei ahih lam akua mapeuh in I tel sa ahihi.   UMM in Conference maan tak a ngah na ding in Union phal na kul a tua phalna apia ding te pen Union committee a tu den teng hi lel hi.  Division ah bangbang I gen a GC ah bangbang I ko zong amau Union te dong kik in Union te thu bek tawh na ki sem ahih lam laisim mimal in I tel sa ahihi.

Hi bang a mipi lam pan hi taleh makai lam pan hi taleh Khasiangtho panpih na tawh thahat in kipum khat a, khut khat tawi khe khat khai a I om lai tak pawlpi khangto in nuam mahmah hi.  Azenzen in hih a tung a teng Union zumpi sung ah committee member ahih lai tak un tua I deih mahmah Conference status phawk kha hi tapeuh leng bang zah in hoih in nuam ding hiam cih ka lung ngai kha zel hi.  Tun lah a sung pan hong phut sak ding mipil mitei om nawn lo, a om phial mah zong, a nung pan a support ding mipi te ki tawng tawng ki petpet ta ahih man in kha siat huai ka sa mahmah hi. 

Alang pan en kik leng tu laitak a khangthak te in lawm MuangMuang gen bang in kilem ding ngaihsun in ki pumkhat ding han ciam in thu ngen leng hih buai na te nung ah Topa in a Khasiangtho ong buak in thupha hong pia takpi ding hi cih keima upna ahihi.   Sanggam te aw mimal tung ah na I sak na zong om kha mah ding hi, ahi zong Pr. Thang Siangh in “Ei SDA thu-umte pen phula nam hitheilo ding hi. Mawhmaisak dingte ihi hi.”  acih bang in mawh mai sak ding kisin ciat ni.  Sia Mungno hong cian piak bang in I deih thu khat lampi maan tawh ngah sawm ni, lampi maan lo tawh ki ngah lo ding ahih man hi zaw in ka um hi. 

Tuni in momno tuailai teng itna tawh  khut kilen in nasem khawm hi le hang Pa Thang Za Pau sunmang ahi Zomi te tawh Kawlgam sung Pasian nasep na ki zo tak pi ding in ka um hi.

Kei mah muhna ciangciang tawh kei ma feeling ka gelh a hih manin gen khialh a om leh itna tawh nong maisak na ding in Zeisu min tawh ka hong thum hi.

Tuma kum 12 lai hi in  a hun a sawt hang in I lungsim ngaihsut na hong no suak thei zel hi.  VCMang in,  “Letseekaan ah kong muak uh hi” cih la a puak laitak in, Adventist mipi 1300 val te in khitui naptui tawh vantung lam ah khutte lamto sa in tua la sa ziahziah ding ahih lam thei in ka um kei hi. 

Pastor Chawna in,  “ Sia Dongbawi aw hih camp na gel dan un na hih zawh takpi uh leh bel……….” ci in hong ciam nuaih laitak  in hong muang hetlo ahih lam ka tel mahmah hi.

Pastor Daniel Nangno in,  “Adventist camp pai zia hong  gen tei hangin ama hong cian piak dan in ka gel thei tuan kei uh a, tha nem ka ki sa mahmah uh hi.

Pastor  David Lian Pau in Zomi Adventist sung ah hi ban apiang nawn tam maw ci a commend hong piak na kammal in tha hong ngah sak mahmah hi.

Sawbwa Yeshian pan tai 8  a gamla Mawlike township sung a om “Letseekaan”  Bualtuipi gei mual zaang teng ah mihon pi in giah phual ki sat a nuam ki sa mahmah hi.  Camp kipat khit ni khat hong bei ta in nitak an nek khit nitak hun ki pan ta hi. 

Tha khat thu in mihon laizang pan “Gul” ci in hong ki awng ahih manin mi khempeuh ki patau mahmah hi.  Tua laitak mah in khuapi guah hong zu a, huih hong khauh tektek hi.  Mipi te zong  tu thei nawn lo ahih manin ding sa in thu ngen zel la sa zel in Topa tung kiko ziahziah ta hi.  Luzang pan hong tak suk guahtui leh mittui te ki gawm in nak gei ah hong luang suk in kamsung hong tung a al pian zipzep sa in ki valh kha hi. 

Makai zaw deuh ahi Pa PauMang, Pa Nang Kuk, Pa Ngo Khen , Pa VCMang, Sia Sawm Sawng leh Sia Suanno  tawh ko teng  ka ki zawn uh a mihon pi nusia in apam lam mun khat ah khutkilen in Topa tung ah ka kiko ta uh hi.  Ka thu nget laitak un huihpi in akhauh zaw deuh in khat vei hong nawk hi.  “Bukh” cih aging khat ka zak lian leh “Na ei” cih aw hong ki gawm ahih man in ka thu nget uh ka zom thei kei uh hi.  Bunglebeng in ka thunget uh ka khawl uh a sing hiang I khak ahi VC Mang khuamial sung ah ka zawt ngei ngai ta  uh hi.  Topa in hong kem lai ahih man in bang mah ci lo sam hi. 

Tua khit huihpi hong dai in guah te hong theu pian ta, mipi kikhop na lam ah ka ki hei phei uh hi.  State tung ah Sia Khen Go leh Sia Kai Dal te in mipi makaih in khitui naptui tawh thu kin gen ziah ziah lai hi.   Thu nget na sung ah huihpi guahpi a daih na ding leh Khasiangtho guah hong zuk na ding ki nak nget mahmah hi. 

Dawimang pa nuam dek lo ahih man in huihpi guahpi tawh hong vat khit ciang natna tawh hong vat a Ciangpi hong dam lo in Dalboih makaih natawh khanno hon khat in va ciah pih hi.  Tua tawh man nai lo a, Kimpu pa in Heilei pan hong nusia cih thu kiza leuleu ahih man in makai I muan mahmah Dalboih campman dong hong om thei tuan lo in Heilei lam hong zuat santa hi. 

Mipi zong thunget na ki khiam tuan lo in sun hun sung groups tuamtuam thusin na a om ban ah Camp a ding leh Pawlpi a ding ngiat a antang a thungen ding in mi hon khat hong kipia khia ta hi.

Itna tawh

Dongbawi

Tawmvei London