LESSON 9 * NOV. 22- 28
THUKHAM A PIA PA LE THUKHEN PA
__________________________________________________
SABBATH NITAK
TU KAAL SUNG DING: James 4: 11 17; Sawl. 17: 11; Heb. 4: 15, 16; Lk. 12: 13 21; Thna. 2: 15 19; Titus 2: 14.
KAMNGAH: “Thukham a piapa le thu a khenpa pen Pasian bek hi
Amah bek in hong honkhia zo a, hong susia zo hi. Tua ahih manin bang hangin na mipihte uh gensia-in thu a khenthei dingin kingaihsun zenzen na hi uh hiam? James 4: 12.
Leitung thukhun hi taleh, Pasian' Thukham in i lungsim puakzia hong huzaapin, tua tungtawnin Pasian hi
taleh mite tawh i kizopzia kilamdang hi. A hau, u lian kim khat, thukham sangin a lian zaw bangin nungta na mu kha ngei hiam? Thukhun a bawl
mite in, amau angsung phattuam nading ngimna tawh thukhuh a bawl zong om hi. Thukham zahtak lote in mi zong zahtak lo uh hi. Bang hang hiam cih leh, thukham in khat le khat i kizopzia ding hong hilh hi. Thukham a thusimlo mi in, midangte zong a thusim lohna suak pah hi. Tua banah thukham a muhzia man kei leh, mi tawh kizopna hoih thei lo hi. Pasian a zahtakte in Ama thupiakte zahtak pah hi. Pasian zahtak lote in Ama thupiakte zong zahtak lo pah hi.
I phawk khak loh siatnate le gamtat hoih siksanin Pasian maipha ngah ding kilametnate in Pasian thukham palsatna ahi hi.
SUNDAY * NOV. 23
THUKHENA LE THEIHTELNA
Sanggamte aw, khat le khat kigensia kei un. A mipihte gensia-in thu a khente in Thukham gensia-
in thu a khen ahi hi. Thukham na gensiat uhleh Thukham a zui hi lo-in thu a khen na hi uh hi. James 4: 11. Koi bangin mi tung thukhente in thukham sangin a lian zaw-in kingaihsun kha thei uh hiam?
________________________________________________________
________________________________________________________
“Gensia” cih kammal in khiatna tuamtuam nei hi. Mi hoihlohna pulaak, a man lo thu genna, hehna cihte huamkha hi (Siam. 19: 15 -18). Mi gensiatna khat thukham gensia banah thukham mahmah a langpang suak hi. Ama deih bangin thukham a hei nopna lungsim nei cihna hi. Tua bang lungsim in, ama mawhna mu thei lo-in mite mawhna bek mu hi (Matt. 7: 1-3). Tua bang lungsim puak in ei le ei ki-it bangin midangte hong it sak thei lo hi (Siam. 19: 18). Tua bang mi in thukham zui hi lo hi. Mite tung thukhen lo ding cih thu in mawhna thusimlohna hi tuan lo hi.
A man le a man lo theihtelna tawh kisai a nuai thute in bang pulaak uh hiam? Sawl. 17: 11; 1Kor. 6: 1-5; 2Kor. 13:5; Phil. 1:9; 1Jn. 4: 1; Gal. 6:1.
_________________________________________________________________
_________________________________________________________________
I zak thute a man le man lo theihtel nadingin Lai Siangtho tawh sittel kul hi. Thu-um mite khat le khat kithutuah lohnate, Pasian thu tawh kituak le kituak lo kantel lo, thukhente mai-ah zum kitun sangin, thu-um mite tawh kilem tuah ding hoih zaw hi. A thupi penah, thuman thutak ka up bangin ka nungta hiam ci-in ei le ei kisittel ding kisam hi.
Mite' hoihlohna mu-in gensiat cih i zongsat ngeina khat hi mawk hi. Pasian' dinmunah a tubangin mite' thu i khen khak loh nadingin kidop huai hi lo hiam?
MONDAY * NOV. 24
THUKHAM PIAPA IN THUKHENPA MAH
Thuciam Lui Thukham khempeuh in Jesuh kiang pan hong pai thukham vive hi. Moses Thukham a ci zong om hi. Tuate Moses tungtawnin hong kipia hi (2Khang. 33:8; Neh. 10: 29). Sehnel gam sungah Israel mite a makaih Jesuh mah hi. Sinai Mual tungah Thukham Sawm a pia zong Jesuh mah hi (1Kor. 10: 1-4). Tua thute Jesuh in hilhcian kik a, Mualtung Thuhilhna kici hi. Amah in THU hi-in tua THU in mihingin hong piang hi. Tua THU mah in eite thu hong khen ding hi ( Jn. 1: 14; 12: 48). Thukham a piapa le thu a khenpa pen Pasian bek hi a, Amah bek in hong honkhia zo a, hong susia zo hi. Tua ahih manin bang hangin na mipihte uh gensia-in thu a khenthei dingin kingaihsun zenzen na hi uh hiam? James 4: 12.
Koi bangin tua Thukhen Pa na thei hiam? Isa. 33: 22; 11: 1-5; Heb. 4: 15, 16; Mang. 19: 11 16.
_____________________________________________________
Sitni sem dingte in thukhenna tawh kisai kum tampi sung sin uh hi. Jesuh hun lai-in laithei kici mite in zong Mose Thukham banah thukhenna tawh kisai amau ngeina tuamtuamte hoih takin a sin mite ahi uh hi. Jesuh in tua bang Thukham Hilh siate tawh kinial den uh hi. Thukham a pia amah mah ahih manin Amah sangin tel zaw lo uh hi. Tua hi-in Jesuh a hong pai kik ciangin i sepna bang thaman hong pia ding hi (Mang. 22: 12).
Khrih in mihingin hong piangin, ahi zongin mawhna nei lo hi. Eite tang dingin hong si a, sihna le mawhna zo-in han sung pan a tho Khrih in, eite zong tua sihna le mawhna panin hong honkhia hi. Pa Pasian in thuneihna khempeuh Tapa Pasian tungah ap hi. Amah in Pasian hi-in napi mihingin hong piang hi. Pa Pasian in sihna thuak Ama Tapa in leitung thukhen dingin thupia hi. Mawhnei mite honkhia dingin Amah in vantung Tokhom panin hong pai hi. Tapa Pasian in singlamteh tung sihna a thuak dongin gimna hong thuak mah taleh, Amah mah in mi khempeuh thu hong khen ding hi.
Thukham a pia pa le Honpa Khrih in eite Thukhen Mangpi hi dingin kilawm kituak pen hi. Tawntung sihna maw
tawntung nunna, khat teitei i ngah ding hi. Tawntung nunna ngah dingin bang lametna siksan ding na hiam?
TUESDAY * NOV. 25
GEELKHOLHNA
James 4: 13 le Lk. 12: 13 21 sim in. Khrih hong pai ding nai mahmah taleh, mailam nuntakzia tampi
ngaihsut ding kisam hi, cih hih thunih koi bangin lenkhawm thei ding i hiam? A hau mihaipa bang hi lo-in, koi bangin ansaal golpipi pelh thei ding i hiam?
________________________________________________________
Mima le innkuan in mailam kum nih kum thum bang geel kholhin kikhual kul hi, kisam hi. Theih kholh loh kitangsapna khat kituak kha thei hi. Tua hi mah taleh, Khrih hong pai ciangin na khempeuh kisia mangmai ding hi, cih thu phawk tawntung ding kisam hi. Hihte gel a kilehbulh, kituak lo hi lo hi. “Kum tampi nungta dingin nasem inla, zing le thai ah Khrih hong pai ding bangin nisimin nungta in,” cih thu i phawk ding kisam hi. Kum tampi ai ding a geel khol mi in, khat ai ding bek ngaihsun in cih thu telhaksa mai thei hi. Khrih thugen a za mite in, mailam khualna-in anhau pa in a ansaal behlap ding cih pen Pasian thupha sang hi, ci-in ngaihsun kha ding uh hi. Mihaupa' lungsim in mi khempeuh ngaihsutna kilangsak hi. “ Mi hampha mahmah ka hi hi. Kum tampi sung ka khom ding annek tuidawn le na hoih tampi ka nei hi. An ne, zu ne-in, a nuam theithei-in ka om hithiat ding hi,” ci hi (Lk. 12: 19). Ama hauhna pen ama ading bek mahin zang nuam hi.
Bang bang i geel zongin, a taktakin, “Topa in hong thukimpih nak leh, nungta-in tua sem ding, tua bawl ding ci zaw lehang, Topa deihna tawh kituak zaw ding hi (James 4: 15).Sepnopteng khempeuh geelgeelin, a tawp khakna ah Pasian in hong thukimpih hen, cihna hi lo zaw-in na geelna khempeuh Topa ap ding hi zaw hi. “Topa aw na deihna hong theisak in. Na deihna bangin hong nungtasak in,” ci-in thunget ding ahi hi. Siatna hong tun ding na khat peuh a geel kha ihih leh, Topa Pasian in lampi man hong lak ding hi.
James 4: 13 sim in. Hi ci ngaihsut pakin, a sia hi pah kei leh, kilawm hi. I sepnop nate a sia hi pah lo zaw-in tua
nate tungah i lungsim puakzia hoihlohna pulaak hi. Koi bangin tua bang a hoihlote pelh thei ding i hiam?
WEDNESDAY*NOV. 26
MEIILUM
James 4: 14 sim in. Bang thulaigil hong hilh hiam?
__________________________________________________
__________________________________________________
Nunna pen a hong kipia khong ahi hi. Meiilum, tuikhu in tomkal sungin beimang ziau thei hi. Mihing nunna zong tua bang mah hi. Sihna tawh kigamla kuamah om lo hi. Lungtang kisai kei ziau leh, nunna a bei hi pah hi. Bang hun bang hun cih om lo, a kisi thei cihna hi. Zingciang bang piang ding, sih ding, hing ding, i thei kei hi (James 4: 14). Hun tomno khat i neih sungin, Pasian' hong hopihna, hong sapna za lo-in, mawhna sungah i nungtai hiam? Nuntak hun tom mahmahin, i nun sung nangawnin i lungkim zo kei hi.
Thna. 2: 15 19; 4:4 ; 5: 10; 9: 11, 12 sim in. Koi bangin James gen thute Solomon in pulaak hiam?
_______________________________________________________________
_______________________________________________________________
Thuman lohna, siatna cihte a mawknapi hi. Bang bang piang taleh, a hong kikamciam, Khrih tungtawnin i ngah ding tawntung nunna bek i lunggulh hi. Tua kamciam lo-in a tawntung mangthang ding ihi hi.
Leitung nate in hong lencip hiam? Bangci bangin leitung nate in mitphiat kaalin beimang thei hi, ci-in phawk den ding na hiam?
THURSDAY * NOV. 27
A HOIH NATE THEI-IN SEM
I sin khit thute siksanin James 4: 15 17 sim in. Bang thu hong hilh hiam?
_________________________________________________
James ii gen thu in: ei le ei kimuanna, gamtat hoih kisialhpih cihte in hai-na hi, ci hi. Tua hi-in a siangtho ngaihsutna, a hoih lungsim kisam hi, cih hong lak hi. Aneu 17 na ah: mawhna nam nih pulaak hi. Khatna ah, a sia-in gamtatna. Nihna ah, a hoih nate sep lohna. A sia-in gamtatna tawh kisai John in zong gen hi: mawhna i cih in thukham palsatna hi (1Jn. 3:4). Thukham neihlohna in mawhna hi. Hih kammalah Greek laimai-in mawhna namnih pulaak hi. Khatna ah zongsatna hoihlo mawhna le Thukham lak pan khat peuhpeuh palsatna pulaak hi (Rom. 4:7; Titus 2: 14; Heb. 10: 17). “ A hoih ahih manin gamta ding thei napi-in a gamta lote a khial ahi hi” James 4: 17.Khuavakta eite in mawhna a nial ding hi bek lo-in a hoih nate a sem dingin sawlna ngah ihi hi (Eph. 5:8). I khuavak tangsakin, mite in ei gamtat a hoih muh ciangin Pasian min phat ding uh hi.
A hoih nate sem ding thei napi hangin, lungkia-in i sep thadah hun zong om hi. Nisimin na hoih sep zawh tawntung ding hamsa hi. Tawlngak hun zong kisam hi. Khrih mahmah zong a nasep khawl-in tawlnga hi. Amah kia, gamdaihna munah thunget hun nei zelzel hi (Lk. 5: 16; Mark 6: 31). A thupi belin, a sepna khempeuh Pa Pasian' deihna bangin a sep nadingin thungen hi (Jn. 5: 30). Pa Pasian' deihna bangin a gamtatzia, annek tuidawn bangin ngaihsun hi. “ Kei hong sawlpa' deihna bangin na semin, sep dingin hong piak nasep zawhna pen ka nuntakna an ahi hi,” ci hi (Jn. 4: 34). An i nek ciangin i nek zawh zah ciangtan a om bang mahin, i sepzawhna zong ciangtan nei hi. Tua thu hangin Khrih in “ khat in khai tuhin, a dang khat in a an la hi. Anih un lungdam khawm thei uh hi (Jn. 4: 36 38). Topa a' ding i sepna khat peuhah lawptakin sep tawntung zawh nading le Topa' hong zat mi ahi thei dingin kipiak kul hi.
Koi bangin thungetna in angsung zonna hong nial zosak thei-in Topa' deihna bangin a nungta ding, hong ki-ap zo sak thei hiam? Na geelna khempeuh Topa na ap thei hiam?
FRIDAY * NOV. 28
SIMBEH DING: Ellen G. White, “ Talents” in Christs Object Lessons, 342 346. Bang thu in hong lawngkha hiam?
Thuman a thei mi khat in ama theihna kisak theihpihin mite khialhna pholaak laak kei hen. Tua bang thuman theihna deihhuai napi, lauhuai-in hong khialsak thei hi. Tua bang pilna pen vantung pan hong pai pilna hi lo hi. Nunna thak nei nai lo mite kiang pan hong pai pilna hi zaw hi. Satan kiang pan hong pai pilna hi. Mi tung thu a khen mite in pilna nei-in kingaihsun kei uh hen. Dikna ngah kineih Satan puansilh mite in tua bangin gamta uh hi. Ellen G. White, The SDA Bible Commentary, Vol. 7, pp. 936, 937.
Mi' khialhna bek a mu thei mi pen amah mah zong tua bang khialhna nei mipa ahi hi. Tua bang mi in, ama khialhna a selcip nop manin, mite khialhna pulaak laak hi. Mawhna in a hoih na khempeuh theihna hong guan hi. Adam le Eve a hong khialh tak ciangun, kei khialhna hi, a ci zaw sang nuam om lo uh ahih manin ngawh nei se uh hi. Hih in Khrih dikna nei lo mite pianzia hong lak hi. Ellen G. White, Thoughts from the Mount of Blessing, 126.
KIKUP DING DOTNATE:
1. Koi bangin Adam le Eve bang lo-in, nang le nang dik kisa tawm lo-in, mi ngawh lo-in om thei ding na hiam?
2. Nuntak huntom zia ngaihsun dih in. Hih thu in i nuntakna ah i masak zawk ding hong hilh hi lo ahi hiam? Hun i cih pen mihing ngaihsutna tawh kizopna nei hi lo hiam? Nop i sakna ah hun bei lam kiphawk kha lo, hamsa i saknate ah hun bei hakin kingaihsun hi. Hun tom,hun sau cih thu, i lungsim ngaihsutna tungah kinga hi lo hiam? Bang bang hi taleh a beisa hun kila kik thei nawn lo, a tawntung a beimang hipah hi. Koi bangin hun zang siam ding na hiam?
3. Koi bangin siatna tawh kidim mite tawh kizomin, ahi zongin amau siatna tawh vasia khawm lo thei ding na hiam?
