LESSON 8 *NOV. 15 - 21
A KINIAMKHIAT THEI VANTUNG PILNA
SABBATH NITAK
TU KAAL SUNG SIM DING: James 3: 13 -4: 10; Thkna. 4: 6; Gal. 5: 17; Jer. 3: 6 10, 20;
Sawl. 19: 13 16; Late 24: 3 6.
KAMNGAH: Topa mai-ah kiniamkhiat un. Tua hileh amah in hong lian bawl ding hi
(James 4: 10).
Nasepna mun khat peuhpeuhah makai hi taleh, nasemte hi taleh, tungsiahte maipha ngah nuam lo kuamah om lo hi. Khasum khan ding, za khan ding ut lo kuamah om lo hi. Tua bang lungsim puak in khat le khat ki-elna, kihazatna, khat le khat
kidem nopna lungsim om hi. Biakna pawlpi sungah zong hih bang lungsim nei a tam ciangin, nasepna mazang zo lo hi.
SUNDAY NOV. 16
KINIAMKHIAT THEIHNA
Note lakah pilin thuthei a kisa a om leh kiniamkhiatin pilin, nuntak hoih le gamtat hoih tawh a
lahkhiat ding ahi hi (James 3: 13). Kiniamkhiat pilna i cih in bang hiam? Koi bangin na tel hiam?
______________________________________________________________________
______________________________________________________________________
Mi kim khat in James 3 sunga thute in makai dingte neih ding thu vive hi, ci uh hi. Makai khat ii neih ding thute hi mah taleh, thu-um mi, nungzuite neih ding a kilawm thute mah ahi hi. James gen ii pilna in leitung pilna a gennopna hi masa lo zaw-in, vantung pan hong pai pilna a hong hilh hi gige hi. I gamtatzia in pilna nei le nei lo pulaak hi. Khrih in zong tua mah hong hilh hi. Pilna man taktak nunzia panin kimu thei hi (Matt. 11: 19).
Pilna le thu theihtelna cih a kigenna thu Lai Siangtho Lui sung khempeuh lak pan mun khat bekbek om a, Pasian in Moses tungtawnin Israel mite zuih ding a thupiakte ah kimu thei hi: “Tuate zui unla, sem un. Bang hang hiam cih leh hih thukhamte khempeuh a zak uh ciangin, hih minam liante pen a pil thuthei taktak hi, a ci ding uh mite muhna ah hih thu pen nomau pilna le nomau theihna hi ding hi (Thkna. 4: 6).
Tui limlo in angsung ding bek ngaihsutna, huaihamna, hazatna cihte limcing hi (James 3: 11). Ama ading bekin a nungta mite thuhilhna kammal hi. Tua bang lungsim in Satan lungsim ahi hi. Khrih deihna bangin a nungta dingin khensatna neilo, a ki-ap lo mi nunzia lauhuai hi.
A kiniam khiatna pilna cih thu ngaihsun in. Tua bang pilna in phatthuamna hong pia
hi lo hiam?
MONDAY * NOV. 17
PILNA NAMNIH James PILNA NAMNIH
James 3: 15, 16 sim in. Bangte in teitung tawh kipawl pilna kici hiam? Koi bangin pawl
sungah tua bang pilna hong lut hiam?
___________________________________________________________
___________________________________________________________
Leitung tawh kipawl pilna in thuman lo, Satan deihna zui-in, Kha Siangtho kihel lo pilna hi. Solomon in, mihing in thuman hi, ci-in mihing a ngaihsut thute in sihna hong tunpih thei hi, ci-in hong hilh hi (Pau. 14: 12; 16: 25). Hazatna, angsung hamphatna ding bek na ngaihsut leh, siatna tawh na kipelh kei ding hi. (2Kor. 12: 20).
James3: 17, 18; Jn. 3: 3 -7; Kol. 3: 1,2 sim in. Pasian kiang pan hong pai pilna bangci
pulaak hiam?
______________________________________________________________
______________________________________________________________
James in Kha Siangtho cih kammal a zat loh hangin, Kha Siangtho nasep suah thak kikna thu pulaak hi. James in zong gah tampi a gahsak thei khaici, gentehna zangin, Lungdamna Thu in gah tampi gahsak thei hi. Vantung pilna in hehpihna, hoihna tawh kidim hi. Upna in gamtat hoih piangsak a, Pasian thupiakte zong hong zui nuamsak hi. Hehpihna in mawhna maisak hi (James 2: 13). Vantung pilna a nei mi in kiniamkhiat, lungnem banah, nopna, dikna, hehpih theihna, mawhmaisakna cihte a kipan mi khialhna mu lo-in, ama khialhna mu zaw ding hi.
Siatnalampi zuih khak ding baih mahmah hi lo hiam? Na nunzia kisittel pha in. Leitung
pilna maw vantung pilna, koi zaw in hong huzaap hiam?
THURSDAY* NOV. 18
KITOT KISEL A PIANGSAK THUTE
Note lakah a om kitotna le kilaina koi panin hong piang ahi hiam? Deihluatna lungsim na
neih manun note pumsung a kitoktok niloh ahi hi. James 4: 1; Gal. 5: 17. Bang in hih bang siatna piang sak hiam?
_____________________________________________________________
_____________________________________________________________
Thu-um mite sungah kikhenna a piangsak amaute sung pan ahi hi. Sung lam siatna panin pua lam siatna dong hong tun hi. Cilesa gualnopna lunggulh luatna hangin tua bang siatna piang hi. Tua bang lunggulhna in mihing susia hi. Leitung pilna in kitotna, kimuhdahna piangsak hi. Vantung pilna in hong makaih kei leh tua bang siatnate i zo kei ding hi (James 3: 17).
James 4: 2,3 sim in. Bang siatna pulaak hiam? Koi bangin tua siatnate in pawlpi susia hiam?
__________________________________________________________________
__________________________________________________________________
James in Thukham Sawm pulaak hi. “ Na na deih uh a, ahi zongin nei lo na hih manun mi na thatnuam uh hi. Nate deihna lungsim na nei uh a, ahi zongin ngah zo lo na hih manun kitawngin na kilai lawh uh hi” James 4: 2. Hih James gen thute in Jesuh Mualtung Thuhilhna hong phawksak kik hi. Jesuh in puatham kisiansuahna deih lo-in, lungsim kipuahphatna deih zaw hi. Tua hi-in, muhdahna pen mithahna mah tawh kibang siatna hi. Thu-um mite khat le khat kimudah uh ahih manun, khat le khat kithahna mah tawh kibang siatna hi, ci-in hong hilh hi.
Angsung huaihamna in siatna piangsak hi. Kha Siangtho tawh a suak mite in Jesuh lungsim nei-in, Jesuh kiniamkhiat bangin kiniam khiat ding uh hi. Kiniamkhiat mite in amau angsung ding bekin nungta lo uh hi. A kiniamkhiat mite in Jesuh khe phungah tu-in Ama thu lungngaingai ding uh hi. Ellen G. White, The Desire of Ages, 330.
WEDNESDAY* NOV. 19
LEITUNG TAWH KIPAWL
James 4: 2-4 sim in. Bang hangin James in alaikhak mite numei pasal mawhna
bawl mite ci hiam? Jer. 2: 2; 3: 6 10, 20; Isaiah 54: 5; Lk. 16: 13.
________________________________________________________________
________________________________________________________________
Kamsangte in Pasian mite mo tawh hong genteh hi. Leitung lungsim, cilesa pumpi deihna bangin a nungta mite pasian tuamtuamte biakna hi, ci-in James in hong hilh hi. Siatna ki-uk sak zaw dingin amau deihtel hi zaw hi. James 4: 5 pen telhak mahmah hi. Mi kim khat in Kha cih kammal in Kha Siangtho a cihna hi, ci-in ngaihsun uh hi. Thu-um mite in Kha Siangtho lunggulh uh hi, ci-in ngaihsun uh hi. Mi kim khat in mihing ngaihsutna a gennopna hi, ci uh hi. Pasian in mihingte tawh hong nungta khawm nuam hi, a cihna hi ding hi, ci uh hi. Ahi zongin James hong hilh nop thu ngaihsun lehang, khiatna neilo pi-in siatna nial ding hong hilh lo hi. Siatna a pel dingin Pasian in hong hehpih hi. Pasian in a kiphasak mite nial a, a kiniamkhiat mite hehpih hi (James 4: 5,6).
Mihing' deihna in siatna hi pah sam lo napi, ahi zongin siatna in hong ukcip ahih manin thuman lampi panin lam kiphial kha pahpah hi. Siatna, mawhna khempeuh a sian theih nading hehpihna lampi bek om hi. A kiphasak mite in tua hehpihna a sang dingin lungsim kongkhak hong lo uh hi. Hehpihna a sang dingin Topa tungah lungsim ap kul hi. A kiniamkhiat mite bek, a mawhna kiphawk a, Pasian hehpihna ngah ding amah le amah kilawm kisa lo napi, Topa tunga a kinga mite bekin Topa maipha mu thei bek ding uh hi. Eite kitangsap lian pipen in Pasian hehpihna ahi hi. Ellen G. White, The Desire of Ages, 317.
Ki entel pha in. Bang in hong hottaak cingsak hiam? Koi bangin hehpihna na kisap lam hong lak hiam? Bangci bangin Singlamteh bek in hong honkhia thei hiam?
THURSDAY *NOV. 20 PASIAN TUNGAH KI-AP
Tua ahih manin Pasianthu na mang un. Dawimangpa na nial un. Nial le-uhcin no kiang panin
taikhia ding hi. James 4: 6. Hih thu in a sawl zia ngaihsun in. Ei le ei tha-in Dawimangpa a nial ding hi lehang, i zozo diam? Paul nasep mu-in, dawi hawlkhia thei Jew mi sagih in Jesuh min tawh dawi hawlkhia ding a hanciam uh tak ciangin, dawivei mipa kitom gawp a, tua mite lau-in guaktangin taikek uh hi (Sawl. 19: 13 16). Tua ahih manin kha gilo khempeuh i nial zawh nadingin Pasian tungah ki-ap ding kisam mahmah hi. Topa kiangah i zuat nak leh, dawi a nial ihi pahpah hi. James in a laikhak mite in thuman a thei ngei nai lo mite hi lo-in thu-um mi hi khinsa vive hi. Eite zong thu-um ihih mah bangin nisimin Topa tungah i ki-ap nak leh, Topa in ze-etna khempeuh hong zawhpih ding hi
James 4: 8 10 sim in. James in bang thu hong pia hiam? Koi bangin tua thupiakte khat le
khat in kizopna nei hiam? Bangci bangin Pasian tungah ki-apna tawh kizopna nei hiam?
_______________________________________________________________
James 3: 13 sung a kipan leitung pilna panin vantung pilna tawh kikhel ding hong hilh hi. Isaiah in a gen bang mahin (Isa. 14: 12 14), leitung pilna in kiphatsakna piangsak a, vantung pilna in kiniamkhiatin, Pasian tungah ki-ap ding hong hilh hi. Topa tawh kizopna ah citak lo, a lungka mite, Topa thuciam om bangin, Topa tungah a citak ding hong hilh hi (James 4: 8 le 1:8 en kak in). Tua hi-in Topa tungah ki-apna in a kilawm kituak hi bek lo-in, i mawhna kisik ding a pulaak ihi hi ( Lk. 5: 32).
Koi bangin i khialhna khat kisik ding i hiam? Late 24: 3 -6 siksanin James in kisikna lampi hong lak hi. Khatna ah: Pasian zuan un. Tua hi leh, eite tawh hong om khawm ding hi. Nihna: gamtatna a kipan lungsim kisiansuah ding.Thumna ah: tua khialhna hangin dahin kapin Pasian hehpihna kitangsaplam phawk in.
“Topa mai-ah kiniamkhiat un. Tua hileh amah in hong lian bawl ding hi” (James 4: 10). Hih in bang a khiatna hiam? Koi bangin nang le nangin kiniamkhiat thei ding na hiam? Koi bangin Jesuh kiniamkhiatna mitsuanin nang zong kiniamkhiat thei ding na hiam
FRIDAY * NOV. 21
SIMBEH DING: Mi tampi in leitung ngeina bangin nungta uh ahih manun lunggimna namcin tawh kidim uh
hi. Leitung mite bangin a nungta ding, amau sep bangbang a sem dingin khensat mawk uh hi. Tua hangin, khuamial gamtat tawh kidimin hingimna tawh nungta khawm uh hi. Pumpi taksa deihna leitung lungsim cilesa lunggulhna bek mitsuanin nei uh ahih manun siatna khat khit khat in bawhhuan hi. Nisimin lunggimna tawh kidim den uh ahih manun lamet bei uh hi. Topa in tua bang mite tungah “vangik pua-in a gim mita aw, ka kiangah hong pai un. Tawldamna ka hong pia ding hi,”ci-in sam hi. Ama gam le Ama dikna zong masa un. Tua hi leh, hih leitung kitangsapna khempeuh kong pia ding hi, ci-in hong kamciam khin hi. Ellen G. White, The Desire of Ages, 330.
KIKUP DING DOTNATE:
1. Monday thusinna ah, pilna namnih thu i gen hi. Tua pilna namnihte in bang sem hiam? Tu kaal sungin na nunzia ah koi pilna na kimakaihsak hiam?
2. Israel mite Topa thupiak a zuih laiteng uh, nam dangte enhuai mi suak ding uh hi, ci-in kamciam kipia hi. Tua kamciam in amau kisialh nading hi lo hi. Ahi zongin amaute kiniamkhiat lo-in kiphasakpih uh hi.
Vantung pilna ahih leh hong kiniamkhiatsak ding hi. Israel mite khialhna panin bang thuman na mu thei hiam? Koi bangin amau khialhnate pelh thei ding na hiam? Koi bangin biakbuk in kiphatsak loh ding hong hilh hiam? Koi bangin Singlamteh in kiphasak loh ding hong hilh hiam?
3. Leitung ngeina bangin a nungta dingin bangzahin na hanciam hiam? Leitung ngeinate a sia hi khin pah hiam? Leitung ngeina tawh kizui-in hauhna, liatna, minthanna tawh kidim uh hi mah taleh, amau nunzia in siatna lam manawh mi tampi om hi lo hiam? Leitung nate in siatna hong tunpih ahih lam na phawk hiam? A thupi pen ah, leitung siatnate nial a, leitung nate tawh a siakhawm ahih loh nading un, leitung nate tungah lametna nei mite bangci huh thei ding na hiam?
4. Kiniamkhiatna tawh kisai ngaihsun in. Bang hangin thu-um mi in kiniamkhiat ding thupi hiam? Bang hangin kiphatsakna in hong siatsak hiam?
