LESSON 7 * NOV. 8 – 14 KAMPAU KEP SIAMNA
_______________________
SABBATH NITAK
TU KAAL SUNG SIM DING: James 3: 1 12; Thkna. 6: 6, 7; Lk. 9: 51 56; Pau. 16: 27; Matt. 7: 16 18.
KAMNGAH: Bang hang hiam cih leh, nomau kampauna tawh kizui-in thu hong kikhen
ding a, dik hi, cihna ahi a, mawh hi, cihna ahi zongin na ngah nadingun nomau kampau mah hong kibulphuh ding hi, a ci hi (Matt. 12: 37).
A hun tawh kizui-in muk le kampau vanglian hi (Pau. 25: 11). I pau khiat kammal, beimang pakpak lo hi. Naupangte bang kampau hoih lo a theih khak uhleh, mangngilh nawn lo uh hi.
Tua hi-in a zak kammalte tungtawnin amau mai lam ading siatna piangsak thei, na hoih piangsak thei hi. A sia hi taleh, a pha hi taleh, naupangte in a nu le pa ettehin kampau uh hi.
A kigelh laimalte zong vanglian hi. Kampau' sangin sawt veipi kip zaw hi. Pasian kammal sangin a kip zaw bang mah om lo hi. “Nangma thu pen lam hong lak ding meivak hi a, ka paina lampi-ah khuavak ahi hi,” ci-in David in pulaak hi (Late 119: 105). Tua banah, “nangma tungah kong khialh loh nadingin ka lungsim sungah nangma thu ka khol hi,” ci hi (Late 119: 11). Jesuh in zong a Nungzuite kiangah tawmvei sung bek kimang dingte sangin a kip tawntung thute ngaihsut zawk ding hilh hi. “ Nuntakna a pia thei pen PasianKha hi a, mihingte hih theih bang mah om lo hi.” John 6: 63. Kampau in zatui bangin damna piangsak thei a, gu bangin natna hong guan thei hi.
Na kampau pawl khat na lakkik nop a om ngei hiam.
SUNDAY * NOV. 9
I VAWH BANGIN AT KIK DING
James 3: 1 sim in. I kampau tawh kizui-in thukhenna thuak ding hi lo i hiam?
__________________________________________________________
__________________________________________________________
Sanginn, biakinn ah laihilh siate in masuan lianpi nei uh hi. Bang hang hiam cih leh, sawtpi kimang ding mite' lungsim puahpha-in nasem ahi uh hi. I theihna tungtawnin vaipuak zong i nei hi. Theihna a tam leh, vaipuak lian hipah hi. Cambridge, England gamah Tyndale House laibu sal lutna kongkhakpi-ah bang kigelh hiam cihleh, “Topa zahtakna in pilna kipatna hi,” ci-in kigelh hi (Pau. 9: 10). Mihing in hoih a sak khempeuh a hoih hi khin pah lo hi. Pilna, siamna a kipan a hoih na khempeuh, a manpha na khempeuh Pasian kiang pan hong pai hi.
A dah huai mahmah thu in, theihna khang tektek, Pasian upna kiam tektek hi. Theihna khang semsemin, Pasian thuthuk kan mipil tampi upna panin lampial uh hi. Ahi zongin tawntung nuntakna dingin thuman thutak kan beh tawntung ding ahi hi. Paul in zong pawlpi upa, pawlpi makaite hilh tawntung hi (Sawl. 14: 23; Titus 1: 5). Timothy in upna cingtaak zo nai lo Pasian tuunote kemcing dingin Paul in vaikhak hi (2Tim. 3:7).
Nu le pa in tate hilh ding, a makaih ding uh vaipuak lianpi nei uh hi. Tate in midangte' tungah huzaap lianpi nei uh hi. Tua bang mahin thu-um mimal khat ciat in zong mite' tungah huzaap lianpi nei thei uh hi. Tua hi-in Pasian' deihna bangin nungta thei-in midangte a dingin a etteh thamcing i suah nading Ama makaihna kisam mahmah hi lo i hiam? A hoihlam hi taleh, a sia lamin hi taleh, i kiim i paam huzaap nadingin vantung pilna i kisam a, Topa kiang a ngen khempeuh, Ama kamciam om bangin hong pia ding hi (James 1: 5).
Nanunzia hong huzaap mite ngaihsun in. Bangci gamtat uh hiam? Koi bangin hong huzaap hiam? A thupi mahmah ah, koi bangin midangte huzaap thei ding na hiam?
MONDAY * NOV. 10
A HOIH, A SIA PIANGSAK THEI KAMPAU
Eite khempeuh i khial khin hi (James 3: 2). James ii gen gamtat zia le tong, a pulaak thute in,
kipuahphat nadingin thangah huai mahmah hi. Khialna tawh kidim ihih hang, Pasianmin i thangsak thei veve hi. A kampau kidawm thei mite, a kicing mi hi-a, a pumpi khempeuh ki-uk zo mi ahi hi (James 3: 2). Hih thu pen a piang thei takpi thu ahi hi. Ngaihsutna in hong paukhiasak a, i pauna tungtawnin i gamtat in zui hi. I theihsa thu khat, kampau in hong phawksak kik thei hi. Tua hi-a, kampau in i gamtat hong huzaap bek tham lo-in, mi dangte zong huzaap thei hi.
Kampau tawh kuamah kipelh thei lo hi. Kampau in a sia zong piangsak thei, a hoih zong piangsak thei hi. Mei-ek neu no khat in na tampi a suksiat zawh mah bangin, pumpi nate lakah a neu mahmah lei in na lianpipi sem hi.
Koi bangin a hoih a piangsak kampau kimu thei hiam? Thkna. 6: 6, 7; Late 40: 3; Pau. 10: 20, 21; 12: 25; Mal. 2: 6, 7; Lk. 4:22; Rom. 10: 6- 8.
_________________________________________________________________
_________________________________________________________________
Singkung no khat khang semsemin a khauh tektek mah bangin naupangte zong hong gol semsem le-uh thahat semsemin, na khat peuhpeuh do zo thei uh hi. Tua hi-in naupa' tung a kipan mahin Topa kammal tawh kidim ding,thupi mahmah hi. I kampaute i ngaihsutna pan hong kipan ahih manin, Topa thu nungta tawh i kidim ding thupi mahmah hi. Topa' thu nungta in na tampi kikhel sak thei ahihlam phawk tawntung ding thupi mahmah hi (Late 33: 6; 2Kor. 4: 6).
Kammal khat mal nih bek nangawn in siatna hi taleh, a hoih hi taleh, piangsak thei hi. A hoih thu khat susia sak, a hoih lo zong thu hoihin piangsak thei hi
.
Na khut sungah a lauhuai puakkham thei na khat tawi lecin, kidawm lo-in om ding na hiam? Tua sangin a lauhuai zaw kampau kidop huai zaw hi lo hiam?
TUESDAY* NOV. 11
A NEU HANGIN A LIAN MAHMAH
James 3: 3 5 sim in. Bang thugentehna kizang hiam? Koi bangin i leii tawh kizopna nei hiam?
__________________________________________________
Tembaw lian mahmah napi, a neu mahmah na khat in uk hi. Sakol kamkaih zong neu mahmah napi, sakol uk hi. Tua bang mahin leii zong a neu mahmah hang, khat le khat ki-it kimlai kimuhdahsak thei, kimudah kimlai zong ki-it sak thei hi. Aw neem tawh dawnkikna in hehna damsak hi ( Pau. 15: 1). Lampial sakol khat, sakol kamkaih tawh, lampi man tawnkik thei hi. Lamkhial tembaw khat, a neu mahmah, a hawlna khat tawh, lampi man tawnkik thei hi. Gamlapi tungin gammann ma-in kilehkik thei uh hi. Mite tawh kihona ah zong a hoih lo lam hong tunpih ding kihona ahih leh, siatna hong tunpihma-in khawl ding kisam hi.
Lk. 9: 51 56 sim in. Khrih in Nungzuite dotna bangci dawn kik hiam? Bang hong hilh hiam?
__________________________________________________
Nungzuite in kamsangte hun lai-a thupiang khat siksan-a a gen uh hi mah taleh, Khrih in Nungzuite pulaak thu nial hi. Tua bang up khialhnate Khrih in hilh hi. Tua thu khit ciangin Nungzuite (Lk. 9: 56) Samaritan khua khat ah hong pai uh a, hih khua mite tungtawnin Khrih in a Nungzuite thu na hilh hi. I gim i tawl, hehsuah baih theih ding kampau khawng i zak ciangin, Khrih bangin, kihepkhiat zawk ding thupi hi.
Guah mal khat mal nih a kigawm ciangin gun lianpi khat suak zo hi. I nuntakna ah zong na neu nono a kigawm ciangin thulian pipi hong suak thei hi. Kampau kidawm thei leng, nunna nuam hi-a, kidawm thei kei lehang, hingimna hipah hi. Ellen G. White, That I May Know Him, 209.
Thupi khollo, cihtak thamcing khollo nasak, a nung ciang, thupi mahmah, kinloh phamawh thu hong suak, cihte na tuak kha ngei hiam?
WEDNESDAY* NOV. 12
SIATNA A KHANLOH NADING
Mei-am khat in na lianpi susia thei hi (James 3:5). Tua mah bangin thu neuno khat in siatna lianpi piangsak thei hi.
James 3:6 sim in. Koi bangin kampau, leii, cihte kidop loh manin siatna piangsak
hiam? I paukhiatma-in ngaihsut phot ding bang hangin thupi hiam?
__________________________________________________
Mei in na tampi a suksiat theih mah bangin, (Joshua 6: 24; 11:9; 11; 1; 1Sam. 30:3), niin tuamtuamte siangsak thei hi (Isa. 4:4; Zech. 13:9). A kipatna a neu mahmah hangin, na tampi siasak zo hi. Tua bang mah hi i leii zong: nupa kitawngsak, kikhensak hi. A kikhen kitawngte zong kilem kiksak thei veve hi. Hoihlohna khat siasak semsem thei, hoih na khat khang semsemsak thei hi. Naupang no khat ading lawpna piangsak thei, thadahna khat zong hi thei hi.
Lucifer le Eve kihona ngaihsun lehang, thusia hi lo tawh kibang napi, ahi zongin tua tungtawnin leitungah siatna hong kipan khia hi (Pian. 3:1). Vantungah zong tua bang mahin siatna kipan hi. Lucifer in a hoih lo khat hong ngaihsun kha ahih manin, siatna lianpi piang pah hi. Ellen G. White, Patriarch and Prophets, 371.
Leii in hell piangsak hi, cileng, a kici thei ding zahin leii in siatna piangsak hi. I pau khiatte maimangin, la kik thei nawn lo mah taleng, a piansak siatnate a suk semsem loh nadingin, i dal thei hi. I khialhna khat, i thum thei hi. Tua bang kampau hoihlo, i zat kik loh dingin hong hilh thei hi. Gentehna-in kamsang Nathan in David kiangah a gen thu, man lo ahih manin, Nathan in a khialhna va gen kik hi (2Sam. 7: 1- 17). Peter in Jesuh nial kha ahih manin, dahin, a nungsangah kisik thei hi (Jn. 21: 15 17). Leii uk zo kuamah om lo hi (James 3: 8). Ahi zongin zuau genna pan i kihem thei hi (Late 34: 13). Kha Siangtho bek in hong huh thei ding hi (Eph. 4: 29).
James 3: 6 -8 sim in. Bang hangin kampau kidop ding kisam mahmah hiam? Siatna
bawl thei, a hoih bawl thei, i leii bang zahin it huai hiam?
THURSDAY *NOV. 13
THUPHA LE THUSIA
James 3: 9 12 sim in. Koi bangin thugentehna tuinak, theikung, lengkung cihte in
bang hong hilh uh hiam?
________________________________________________________________
________________________________________________________________
I leii in thupha, thusia gen thei hi. Nisimin ut bangin gamta-in, Sabbath ni ciangin Pasian bia mi khat ii nunzia ngaihsun in. Jesuh thu gengen in, a tawpna ah a hi lo khat tawh a thugen khawl cihte siatna hong tunpih thei hi. A sia le a pha, etkakna in bang hong hilh hiam?
Tui siangtho ngah nadingin tuinak thupi mahmah hi. Singkung gah hoih nading, a zung thupi hi ( Matt. 7:16 18). Tua bang mahin, Topa kammal tawh a kidim mi in, gah hoih a gah hipah hi. Upna man nei mi khat ii nunzia in hih thu hong kilangsak hi. Pasian deih biakna in upna siksan hi. Tua upna in tuinak siangtho panin tuisiang tho tawh kibang hi. Ahi zongin khat veivei tua bang mite, siatna tawh kipelh lo uh hi. Moses in Egypt mi khat that sim kha hi. David in Bethseba mawhpih kha hi. Ahi zongin a upna khahsuah lo uh hi.
Pasian deihna ahih leh, siatna pel ding ihi hi (1Jn. 2:1). Ahi zongin Adam le Eve a kipan, siatna i bawl khak leh, mawhmai nading hong hilh khin hi (Late 32: 1, 2). Mawhmai mah taleh, siatna in gu nei a, tua gu kipelh thei lo hi. Langpanna in siatna piangsak a, thumanna in thupha piangsak hi. Mose in kum 40 tawntung sehnel gamah a sin ngeiloh thute sin dingin tuucingin om hi. David in Bethsheba tawh a mawhna hangin a kumpi gam kip lo, khennih kisuah hi. I khialhna khat peuh hangin mawhmai-na i ngah hangin sepna thaman kipelh thei lo hi.
Siatna bawlin, mawhmai ding nget sangin, siatna bawl lo ding hoih zaw mahmah hi lo hiam?
FRIDAY * NOV. 14
SIMBEH DING: Ellen G. White, Christs Object Lessons, 335 339. Kampau kidawm lo mite
tawh na kiho khak ciangin, siatna bek a gen leh, thudang tawh na hopih thei hi. Pasian' huhna tawh kimanna nei lo kampau lo-in thu hoih thute na gen thei ding hi.
Pasian' hehpihna, hong itnate gengen ding kisam hi. Na kampaute in Ama minphatna le pahtawina vive hi sak in. Pasian a it taktak mite' kampau in Pasian hong itna kilangsak uh hi. Thuman thutak, ngaihsut hoih, itna, sianthona le citakna cihte in man kiseh thei lo vantung thute a pulaak hi gige hi. I kampau' in Jesuh kilangsak ding a, tua in, mite Jesuh kiang tunpih ding hi. Ellen G. White, Christs Objection Lessons, 337 338.
KIKUP DING DOTNATE:
1. Pau khiat ding hamsa lo hi. I ngaihsutma nangawnin i kam in gen khia pahpah hi. Tua hi-in i pau ma-in, i gen nop thute kituak hiam, khial hiam cih sittel kul hi.
2. Kampau' khat in bangteng piangsak thei cih ngaihsun in. Pasian' hong ompihna, Ama thuphate, hamsatna panin a hong hotkhiatna cihte pulaak in. Tua bangin pulaak lecin, koi bangin upna kip hong neisak thei hiam?
3. Na kampau' in na lungsim pulaak hi lo hiam? Na upna sangin na lungsim a pulaakkhia thei hi. Na kampaute cassette khat tawh khumin a ngai kik lecin, na kampau' in na nunzia bang pulaak ding hiam?
