LESSON 6 *NOV. 1 - 7
GAMTATNA' ZUIH UPNA
______________________
SABBATH NITAK
TU KAAL SUNG SIM DING: James 2: 14 26; Rom. 3: 27, 28; 4: 1 5;Titus 2: 14; 2Kor. 4: 2; Joshua 2: 1 21.
KAMNGAH: Tua ahih manin hu a diik lo, hu sang lo pumpi pen a si ahih mah bangin sepna tawh a kizom lo upna zong a si ahi hi. James 2: 26.
Siavuan siam mahmah khat in a pawlpi ah upa zong sem hi. Thugen zong siam zong hi. Pastor om loh ciangin, siavuanpa in pawlpi makaih hi. Piakkhiatna ah zong mite etteh tak cing
mahmah hi. Hun awng ngah neih sialin thungetsak in innvak, mi huh cihte semden hi. Tua leh Sabbath ni khat, siavuanpa kikhawm lo ahih manin, pawlpi mite in khuazin hi dingin ngaihsun uh hi. Khuazin hi lo-in, a inn ah a sisa-in kimu hi. Khamtheih ihmut zatui tam ne lua hi. A lupna a et uh leh, numei pasal phengtatna video, laibu tampi mukhia uh hi. Mite' muhna ah makai, mi thupi mahmah khatin mite ngaihsut khat, hih bang thute hangin, lamdang kisa ciat hi. Pasian le siavuanpa kizopna i theihpih kei a, ahi zongin, a upna in upna man takpi mah hi, a kici thei diam? Upna tawh hotkhiatna ngah hi mah taleng, thu-um mi nuntakna ah upna le gamtatna kikhen lo hi.
SUNDAY * NOV. 2
A SI UPNA
Upna ka nei, a cih hangin a sepna in a zuih kei leh bang phattuamna om ding ahi hiam? James 2: 14. Koi bangin upna bek tawh hotkhiatna kingah cih thu siksanin, James 2: 14,na tel hiam? Upna in hong honkhia zo diam? James 2: 15 17 le Rom. 3: 27, 28; Eph. 2: 8, 9 en kak in.
_________________________________________________________________
__________________________________________________________________
Gamtatna om lo upna tawh kisai James in limtakin hong hilh hi (James 2: 15 16). I sinkhitsa bang mahin James in gamtatna, thumang, cih pen Pasian tawh kizopna hi, ci-in hong hilh hi. Koi bangin mite tawh kizopna i nei hiam? Huhna kisam mite a kipan midangte tawh koi bang kizopna na nei hiam? Kampau-na bek kicing zo lo hi. Huhna hong ngen mi khat, a huh thei ding kimlai huh lo-in, Pasian in hong huh ding hi, ci ziau lecin, khiatna nei lo hi. Mi kitangsap khempeuh huh zo lo mah ding ihi hi. Kisapna in bei hun nei lo hi. Ahi zongin mi a huh thei ding, Jesuh khut zat theih dingte ihi hi. Khrih in mite tungtawnin nasem hi (Mark 5: 22 34). Galkapmang khat ii ta cina damsak dingin Jesuh a pai laitak, numei khat in Jesuh puanmong lawng kha leng, ka dam ding hi, cih upna tawh a lawn ciangin damna ngah takpi hi. Pumpi taksa damna banah, numei in a pulaak ding thu nei ahih lam theisak nuam ahih manin, Khrih in thu dong hi. James ii gen mah bangin, numei in a upna pulaak dingin kisawl hi. (Mark 5: 34).
Upna pulaak ding hunpha ngah napi, a pulaak lo mi in a hamsia hi a, tua bang upna zawngkhal semsem ding a, a si upna suak ding hi. A si khin hi zaw lai hi. A hing hi leh, gamtang ding hi. Tua bang upna in bang man nei hiam?
Gamtat hoih neihna hangin mi dikin hong kiciamteh hi, cih zuau thu phawkkawmin, na gamtatna in na upna bangci pulaak siam ding na hiam?
MONDAY * NOV. 3 DIKNA HONG TUNPIH UPNA
James 2: 18 sim in. Bang thulaigil pulaak hiam? Koi banginna gamtatna tungtawnin na upna pulaak hiam?
__________________________________________________________________
__________________________________________________________________
James in, gamtatna ahih kei leh upna, khat peuhpeuh nei lehang, dikna kingah hi, cih thu nial hi. A upna tawh kituak gamtatna a om kei leh, tua upna in lamet bei hi. Gamtatna tawh upna kilang hi. Upna khat peuhpeuh hi ziau lo hi. Upna man, a nungta upna pen gamtat hoihna tawh kilang hi. Tua bang mahin upna pan a hong pai gamtatna bek in kimanna nei hi. Upna le gamtatna kikhen thei lo hi. Upna om kei leh gamtatna om lo, gamtatna om lo upna zong om lo hi. Upna masa-in, gamtatna in nungzui hamtang hi.
Gamtatna tawh kisai Paul genzia sim in. Eph. 2: 10; 1Thess. 1: 3; 1Tim. 5: 25; Titus 2: 14. Bang hangin gamtatna thupi mahmah hiam?
___________________________________________________________________
___________________________________________________________________
Paul in gamtatna a nial hi lo hi. Gamtatna tawh dikna ngah ding a hanciam mite a nial hi zaw hi (Gal. 2: 16). Thukham zuihna siksanin dikna ngah ding a lamen mite in hamsiatna ngah ding uh hi, ci hi. Tua hi-in thu-um mi in gamtatna tawh dikna ngah ding hanciam lo hi (Gal. 3:10). Gamtat hoih, Pasian thu mang i cihte Kha Siangtho piak vive hi.
Mihing in ama gamtat hoihna tawh dikna ngah zo lo ahih leh, Jesuh um ahih manin mawhnei hi mah taleh, hotkhiatna in Pasianhehpihna bekin dikna hong ngahsak hi, cih simloh lampi dang om lo hi. Hotkhiatna, dikna ngahna in Pasian hong piakkhong taktak hi. Upna tawh dikna kingah hi, cih pen kuama nial theihloh thuman hi. Mihing gamtat hoihna khempeuh in nuntak tawntungna hong ngahsak thei lo hi. Ellen G. White, Faith and Works, 20.
Topa Pasian itna nei-in Ama thupiakte hoihtak zuihna siksanin tawntung vantung hong tun thei lo ahih leh, eite lungdamna lianpen in bang hi ding hiam?
TUESDAY * NOV. 4
DAWITE' UPNA
Thuman thutak a um mi in, upna a neih kul hi.
2Kor. 4: 2; 1Tim. 2: 4; James 5: 19, 20; 1Pet. 1: 22; 1Jn. 3: 18, 19 sim in. Thuman theihtelna a thupitzia bang pulaak hiam?
_____________________________________________________________
_____________________________________________________________
Mihingte' thutheihna a kisapna mun om a, upna man neih nadingin theihna bek kicing lo hi. Upna man tawh kisai theihkhialhna a lauhuai zia James 2: 19 in bang hong hilh hiam? Thuciam Lui sungah Topa Pasian khat bek hi, ci-in upna kisam mahmah hi (Thkna. 6:4). Hih pen shema kici-in, upna khempeuh ii bulphuh lian bel ahi hi. Lai Siangtho thute khempeuh hih tungah kinga hi. Dawite nangawn in zong hih thu um uh hi. Thei lua uh hi. Hi mah taleh, bang phattuam pih uh hiam? Pasian mai-ah lau-in ling uh hi (Mark 3: 11; 5: 7).
A thu-in theihna in gamtat hong puahphat kei leh, tua theihna in man nei lo hi. Hong khem, zuau puak Dawite in zong thei uh hi. Dawite in amau hong khemna i up nadingin nasem tawntung uh hi. A upna panun mi pawl khat pialin, zuau thu gente le dawi thu a kigente a zuih nading uh Kha Siangtho in teltakin a gen hi ( 1Tim. 4: 1).
I nunzia in i upna pulaak lo thei lo hi. Tua ahih kei leh, upna man hi lo hi. Upna man lo pen dawite' neih upna tawh kibang hipah hi. Tua bang upna tungtawnin hong kihon khia thei lo ding hi.
WEDNESDAY * NOV. 5 ABRAHAM UPNA
James 2: 21 24 le Rom. 4: 1 5, 22 - 24 enkak in. Koi bangin Abraham upna hong hilh hiam? Bang
siksanin mi dik ci-in kiciamteh hiam?
_______________________________________________________
James le Paul in Pian. 15: 6 siksanin a hong hilh uh thu in: James' genna-ah Abraham in ama gamtatna tungtawnin mi dik ci-in ciamtehna ngah hi, ci hi. Paul in, Rom. 4:2, 24, Gentile mi khat in Jews mi a suah nading, dikna ngah nadingin vunat kul mah hiam cih thu hi ahi hi (Rom. 3: 28 30). Paul gen thu in, Abraham upna siksan-in dikna ngah hi, ci hi. Ama gamtatna, vunatna siksan hi lo hi. Bang hang hiam cihleh, Abraham in a vunat ma-in zong upna tawh nungta hi. A up khit ciangin vunat pan hi. Sunglam kikhelna, upna man a pulaak dingin vunat hi zaw hi (Rom. 4: 9-11). Ahi zongin vunatna gamtatna bek tawh dikna cih ciamtehna ngah hi lo hi. Abraham bangin a um mite bek midik cih ciamtehna ngah ding hi (Rom. 4: 12).
Paulgen thu le James gen thu a kilamdang hiam? Paul ii gen upna thu mah James in zong pulaak hi (Rom. 4: 17 21). A om nai lo panin a piangsak thei, nuntakna phungpi, nuntakna Pasian kiang pan hi, ci-in Abraham in upna nei ahih manin, Pasian in Isaac thokiksak thei hi, ci-in upna tawh piakhia hi (Heb. 11: 17 19). Paul in a nungta upna a cih ciangin, Pasian in Ama kamciam bangin tangtung sak takpi ding hi, cih lungsim khempeuh tawh muanngamna, Ama kammal, a thupiak bangin zuihngamna hi, ci hi (Rom. 4: 21). Tua bang nunzia in thukham bangin gamtatna hi lo-in, upna bangin gamtatna ahi hi. “ Upna le sepna kizom khawm a, sepna in upna a kicinsakna thu na thei uh hi, ci hi (James 2: 22).
Thu-um mi tampi in upna le gamtatna thupi mah hi, ci uh hi napi, ahi zongin khentuam veve uh hi. Upna man i cih pen itna tawh a upna bangin sepkhiatna ahi hi (Gal. 5:6). Gamtat hoihna in upna man hi, cih akilatsak banah, upna man hangin gamtat hoih nei hi zaw hi.
Abraham in na khempeuh a piangsak Pasian a upna in Pasian ngetna bangin a tapa neihsun Isacc piakhia ngam hi. Abraham in Pasian thupiak mang ahih manin a upna kicing hi, ci-in James in hong hilh hi.
Upna in thuzuihna a khangsak hiam? Ahih kei leh, uplohna in thuzuihna a kiamsak hiam?
THURSDAY* NOV. 6. RAHAB UPNA
Numei paktat Rahab zong tua bang mah ahi hi. Israel mi thukante hoihtakin zin na do-in,
lampi dangah ciahsakin na suaktasak a, ama nasepna hangin Pasian tawh kipawl theihna a ngah ahi hi (James 2: 25).
Joshua 2: 1 -21 sung sim in. Upna tungtawnin hotkhiatna i ngah hi, cih thu, koi bangin Rahab in hong hilh hiam?
___________________________________________________
Jericho khua mite up loh thu, Rahab in um hi (Heb. 11: 31). Lai Siangtho pawl khatah thumang lo uh ci-in kigelh hi. Jericho khua mite in Midian mite le Amorite mite' tungah Israel mite' gualzawhna thu za uh hi. Pasian in Baalpeor munah milim biakna le siat gamtatnate hangin Israel mite thu a khenna thu zong Jericho khua mite in thei uh hi. Hih bang thute thei uh hi napi, Rahab bangin um nuam lo-in, nial hamtang uh hi. Ellen G.White, Patriach and Prophets, 492.
Rahab pen mawhna tawh a kidimpi mah, hotkhiatna ngah hi. Rahab in a man Pasian um hi. A upna tawh kizui-in Joshua thukante kemcingin hu hi. Tua bek hi lo, a kivaikhakna uh bangin, kongkhakah puansan khai takpipah hi. Tua puansan in Israel mite, Eypgt gam saltanna panin a kihotkhiatna sisan limcing hi (Pai. 12: 21 24). Kicinna a neih het loh hangin Pasian a muang, a um mi khempeuh in, mawhmaisakna le hehpihna kipia ding hi, cih thu, Rahab in um ngam ahih manin, etteh takcing upna ahi hi.
James 2: 26 sim in. Koi bangin upna le gamtatna kizopzia a tomin pulaak hiam?
___________________________________________________
Huihdik lo pumpi in a si pumpi hi a, tua bang mahin gamtatna, thuzuihna kihel lo upna in upna si ahi hi. Tua bek thamlo, upna man nei lo thuzuihna in bangzahin gamtat hoih ahi phial zongin kimanna nei lo, gamtatna si ahi hi (Heb. 6: 1; 9: 14).
Numei kizuak, upna tawh hotkhiatna ngah thei takpi mah maw? Upna tawh kisai-in eite
etteh ding Rahab tangthu bek om hi leh, upna man lo bang thute ki-um kha thei ding hiam? Bang bang hi taleh, Rahab nunzia panin bang thu na ngah hiam?
FRIDAY * NOV. 7
SIMBEH DING: Cilesa lungsim ngaihsutna khempeuh i hepkhiat hun ciang, nuntakna thak tawh na
nungta thei ding hi. Na kicinlohnate khempeuh Khrih kiang na tunpih ding a, Khrih kicinna na mu zaw semsem ding a, na lungsim hoih lo khempeuh bei mang ding hi. Thuman thei nuamin a kan mite' tungah Topa Pasian in thuman theitelsak a, Ama nunzia a nei dingin lungsim pumpi ngaihsutna khempeuh Ama deihna tawh kituakin hong zuun ding hi. Na kitangsap hunin Jesuh zuan inla, upna tawh thungenin, Ama vangliatna lenkip tawntung inla, um in. Tua hi leh, Pasian' hotkhiatna na mu ding hi. Ama hilh ding na ki-ap nak leh, Topa in hong hilh ding hi. Na kimakaihsak leh, Topa in nuntak tawntungna tuinakah hong makaih ding hi. Ellen G. White, Testimonies to Southern Africa, 26.
KIKUP DING DOTNATE:
1. James 2 sung sim in. Khrih dikna bek a muang mite adingin bang thupuak kigelh hiam?
2. Mi kim khat in, James gen upna le gamtatna tawh kisai-in, Paul gente tawh kizopna neilo hi, ci-in ngaihsun uh hi. Tua bang ngaihsunna, a khial kici thei diam? Lai Siangtho mundangte ah upna le gamtatna koi bangin kipulaak hiam, cihte zong thupi hi lo hiam? Catholic pawlpi in Protestant pawlpi a nial nadingin James siksan uh hi. Thuzuihna, upna cihte Lai Siangtho siksan ding bang hangin thupi hiam?
3. Upna le gamtatna kikim khai ding hi, kici hi. Tu ciang i sinnate tungtawnin, hi mah hi, na ci hiam?
4. Bang hangin James in Abraham upna lah, Ishamael tungtang ah) le Rahab zuau, pulaak lo hi ding hiam? Hih thu in Khrih dikna in a hong tuamzia bang hong theisak hiam?
