LESSON 13* DEC. 20 - 26
A TAWNTUNG LUNGDAMNA THU
___________________________________
SABBATH NITAK
TU KAAL SUNG SIM DING: Heb. 4: 2; 10: 1-4; Late 130: 3, 4; Lk. 15: 11 23; Rom. 3: 24 26;
Mang. 14: 12
KAMNGAH: “Gamlapi pek panin Topa ka kilang hi. Keimah in nang kong it tawntung a, tua ahih manin nang' tungah kong thuman tawntung hi.” Jer. 31: 3.
James in Kamsangte le Sawltak dangte thute tawh kibangin Lungdamna Thu limgen mahmah hi. Mun khatkhatte ah James gen thute telhak hi. Lungdamna Thu in tu hun nunung adingin
a kisam mahmah thu ahi hi. Topa hong thupiak bang mahin mi nam khempeuh tung, pau namkim tung le mun khempeuh ah Lungdamna Thu tangko ding ahi hi (Mang. 14: 6).
SUNDAY *DEC. 21
THUCIAM LUI SUNGA LUNGDAMNA THU
“Bang hang hiam cih leh amaute in Lungdamna Thu a zak uh mah bangin eite in zong i za hi. Amaute in Lungdamna Thu a zak uh ciangin upna tawh na sang lo uh ahih manin a thuzak uh amaute a dingin a phattuamna om lo hi.” Heb. 4: 2.
Lungdamna Thu i cihin thu khat peuhpeuh hanga lungdamna thu hi lo-in Khrih hong itna hang a lungdamna thu hi zaw hi. Sawltakte bek in tua Lungdamna Thu tangko hi lo-in Kamsangte in zong na tangko uh hi. Thuciam Lui in agen le Thuciam Thak in agen kibang hi. Ahi zongin tua Lungdamna Thu kitangko zia, hun khat le hun khat, mun khat le mun khat kibang lo hi. Tu hunin i telzia zong kibang lo hi. Khrih hong tatkhiatna, upna tawh i ngah hi, cih thuman thutak telthei-in, thuman thutak tangko thei dingin, kiniamkhiat a Pasian tungah ki-ap kul hi.
A nuai-a Lai Siangtho munte in koi bangin Lungdamna Thu pulaak hiam? Pian. 3: 15 _____________________________________________
Pai. 19: 4, 5 ____________________________________________
Late 130: 3, 4; 32: 1 -5 ___________________________________
Isa. 53: 4 11 ___________________________________________
Jer. 31: 31 34 __________________________________________
Tawntung sihna ding panin a hong kitatkhiat nadingin Pasian mahmah in ma hong pan hi. I mawhna hong maisak hi. Mawhna do-in, Topa deihna zui-in Amathu mang dingin hong hilh hi (Isa. 1: 19). Jesuh in mi khempeuh adingin hong si hi. Leitung mawhna pua Pa hi. Kilawm lo pi mah, mawhnei mite dikna hong guan hi. Suangpek tungah kigelh Thukham hi lo-in lungtang tungah kigelh Thukham ahih manin nuntakna thak tawh hong nungta sak hi ( Heb. 8: 12). Mawhmaina le mi thak a tonkhawm ahi hi. Dikna le siantho-na in mawhmai theihna lampi ahi hi. Lai Siangtho' hong hilh thu in hih thu mah ahi hi. Mimawhpi mah, Topa Pasian in hong it a, mawhna pan a hong tatkhiat nading bang mah sit lo-in hong pia khia hi.
Koi bangin Thukham zuihna tawh Pasian mai ah dikna kingah lo hi, cih phawk tawntung thei ding hiam?
Bang hangin tua bangin i tel ding hamsa kisa kha zel hiam?
MONDAY * DEC. 22
LUNGDAMNA THU IN MIHINGIN HONG PIANG
Mi kimkhat in Lungdamna Thu pen lungdamna taktak hi dingin ngaihsun zo lo uh hi. Jesuh tangko thu a theitel lo mite in thukham zuihna tawh hotkhiatna kingah hi, ci-in ngaihsun kha uh hi. Jesuh hun lai-a Israel mite in thukham zuihna tawh Pasian mai-ah midik-in kingaihsun uh hi. Biakinn siahpiakna a kipan biakpiakna tuamtuam pia uh hi. Sa sianglo khempeuh ne lo pah uh hi. Vun-at uh a, pawi ni tuamtuamte a kipan Sabbath Ni hoih takin zang uh hi. Tua bang laitakin Tuiphum John in “ na mawhna uh kisik unla tui kiphum un,” ci-in tangko hi. Tua banah Khrih in zong khat vei suahkikna kisam hi, ci-in thuhilh hi (Jn. 3: 3, 5). “ Note gamtatna in Pharisees le Laitheite, Thukham Hilhsiate sangin a hoih zawk kei leh, vantung gam sung na tum kei ding uh hi, ci hi ( Matt. 5: 20). Khrih gen thu in: Amaute neihloh dikna kisam hi, ci-in hilh hi. Thukham zuihna, gamtat hoih cihte kicing lo hi, cih hong hilh hi.
Lk. 15: 11 32; 18: 9 17 sim in. Koi bangin thugentehnate in Lungdamna Thu hong telsak hiam?
_______________________________________________________
Tapa tangmai in amah le amah mangthang ahih lam kiphawk lo hi. Ahi zongin a' pa itna phawk thei ahih manin, a pa kiang ciak ding lunggulh hi. A kiphatsaknate khempeuh tu-in bei ta hi. A pa sila khat bangin om ding hong ngaihsun hi. A pa tawh kizopna thak nei hi banah, a kikhel mi hong suak hi. Pasian in Pharisee mite' dikna santhamcingsa lo hi. Ahi zongin siahdong mipa in mawhmai-na, dikna ngah hi. Hih thugentehna in Pasian pen pa bangin hong theisak a, mimawhte midikin hong koih hi, cih hong hilh hi. Eite adingin Ama sisan hong bua-a, tua sisan in mi khempeuh mawhna mai nadingin vangliatna nei hi; mawhmai na dingin kicing hi. Mawhneite a si tawntung ding hi zaw napi, Paisan Pawi tuuno a kigawh bang mahin eite tang dingin Khrih in hong thuaksak hi (Matt. 26: 28; Mark 10: 45). Tua hi-in manpiak kul lo-in hong kitan khin zo hi. Bang hang hiam cih leh, Khrih in mawhna thaman hong piaksak khin hi.
Khrih thu gentehnate tungtawnin bang thu na mu hiam? Koi bangin hong puahpha thei ding hiam? Na kikhel ding hong hilh uh hiam?
TUESDAY* DEC. 23
PAUL NUNTAKPIH LUNGDAMNA THU
Pharisee mite bang mahin Paul in zong ama gamtatna pha tawh amah le amahin Pasian mai ah mihoih khatin kingaihsun hi. A nungciangin “Jesuh Khrih in Pasian Tapa, kei hong it pa le kei a dingin a nuntakna a hong piakhia tawm hi,”cih thu thei hi (Gal. 2: 20). Ahi zongin hotkhiatna a ngah lo, mangthang ahihlam, Pasian sila hi lo-in, Pasian langpa pa, mi hoih hi lo, mawhnei khempeuh lak pan a mawh pen ci-in amah le amah hong kitel hi. A gamtat hoih a kisakna khempeuh tu-in bangmahin sim nawn lo hi. Kamsangte gelh thute a simna tungtawnin thuman mukhia hi. Pasian in Ama kammalte tungtawnin Paul tungah kilang a, a lungsim ngaihsutzia kikhelin, nuntakna thak tawh nungta hi.Hih thu i theih mateng Paul laikhakte i tel kei ding hi.
2Kor. 3: 14 16 sim in. Paul in bang thu pulaak hiam?
____________________________________________________
Mi khatin Topa um-in ama kiang a zuat tak ciang, Pasian le a mite kikal thuciam lui ii a deihna tel thei hi. Jesuh in hotkhiatna lampi hi. Amah in hotkhiatna pankhia Pa hi-in, Amah mah in hong tankhia hi. Paul bang mahin Israel mite in zong amau Thukham zuihna a siksan laisiah uh Topa tawh thuciamna in amaute adingin sihna hi. Bang hang? Mi khempeuh mawh hi ven! (Rom. 3: 23). Thukham in mawhna pulaak hi (2Kor. 3: 7). Ahi zongin a lang khat amah, thu-um mite sungah Khrih kammalte laikung tawh kigelh hi lo, Kha Siangtho in hong gelh hi. Suangpek tungah kigelh hi lo-in lungtang tungah kigelh thute hong suak hi (2Kor. 3: 3).
Rom. 1: 16, 17; 3: 24 26 sim in. Koi bangin Paul in Lungdamna Thu hilhcian hiam? Khrih tungtawnin upna tawh bang i ngah hiam?
______________________________________________________
Amah a um mi khempeuh a hong tatkhiatna in Pasian vangliatna hi. Gamtatna siksan hi lo-in, eite ading Khrih hong sihna upna tawh i san ciangin Pasian in Ama midik-in hong mu pan hi. A kipat a kipan a tawp dong, upna mah siksan ahi hi (Rom. 1: 17). Rom. 3 sungah tatkhiatna tawh kisai Paulgen thute kimu thei hi. Khrih sihna hangin eite tatkhiat ngah ihi hi. Pasian in mawhna thaman piakhia-in, Amah mah in Ama kiang hong tunpih kik hi. Kisuanna khempeuh bei-in Ama hehpihna in hong siangthosak hi. I mawhna khempeuh hong maisiangsak hi. Khrih sihna hangin mawhneipi mah Jesuh a um mi khempeuh Pasian in midikin hong mu hi.
WEDNESDAY* DEC. 24
A THAK THUCIAMNA
Hebrew sungah a lui thuciamna sangin a thak thuciamna in hoih zaw hi, ci-in hong hilh hi (Heb. 8: 1, 2, 6). Hih tungtawnin a kidong mun mahmah khat, a lui thuciamna kicing lo ahih leh, bang hangin Pasian in a lui thuciamna pia hiam? Ahi zongin i theih ding in ah, a lui thuciamna khialhna hi lo-in, mite khialhna, a lui thuciam tungah mite lungsim puak in khial hi zaw hi.
Heb. 7: 19; 8: 9; 10: 1- 4 sim in. A lui thuciam tawh kisai-in bang kisam hiam?
__________________________________________________________
Mite in thuciam tungah citak lo, (Heb. 8: 9), thuciam langdo, thuciam cih bang mang nuam lo uh hi. Ganhing sisan in mawhmai sak thei lo hi (Heb. 10: 4). Khrih sisan bek in mawhmaisak hi. Ganhing tawh biakna piate mawhna zong Khrih sisan hangin mawhmai pan hi ( Heb.9: 15; 10: 10). Bang hang hiam cih leh thukham in mawhmai sak thei lo, hong kicingsak thei lo hi. Ahi zongin Thuciam Thak muangin Pasian kiang i zuat ciang bekin mawhmai-na i ngah thei bek hi (Heb. 7: 19). Tua hi-in a thak thuciam in a om ngei nai lo hong om tawm hi lo hi. Bang hang hiam cih leh Adam le Eve tungah kipia kamciam a om a kipan Pasian in a thak thuciamna lak khin hi. Leitung pianma pek a kigo Tuuno ci-in tatkhiatna thu na om khin zo hi. Hehpihna thuciam in tu le tu-a hong om tawm hi lo-in, a tawntung-a a om den ahi hi. Tua hangin tawntung thuciamna kici hi. Ellen G. White, The Faith I Live By, 77.
Topa kiang i zuat tak ciang, Pasian kamciam om bangin, i sungah Topa zahtakna hong om ding a, Topa taisan nawn lo ding hi ( Jer. 32: 40). Upna lo-in ganhing tawh biakpiakna in sepna siksanin dikna ngah ding hanciam cihna hi. Khrih sisan in mawhna lianpi, maizumna, Pasian tawh hong kigamlasak mawhna hong hepkhiatsak hi (Heb. 12: 2, 3). A thak thuciam in i nunzia thaksuaksak, thukham hong itsak, mite hong itsak hi. Ei le ei i ki-it bang midangte it ding (Siam. 19: 18) banah, Khrih hong it bangin i it ding ahi hi (Jn. 13:34).
Khrih hong it bangin midangte zong koi bangin it thei ding na hiam?
THURSDAY * DEC. 25
LUNGDAMNA THU' MUNGTUP
“A sagihna vantungmi in a pengkul a tum ciangin Ama nasem kamsangte' tungah a gensa bangin Pasian in Ama thuthuk a geelte hong semkhia ding hi,” aci hi (Mang. 10: 7).
Mangmuhna sungah Mang. 10: 7 bekah Lungdamna Thu tangko cih kammal (euangelizo) kigelh hi. Lungdam huai thu tangko dingin sapna ngah ihi hi. I pawlpi masuan zong tua thu tangko ding ahi hi. Lungdamna Thu in Piancil pan Mangmuhna dong a kibang ahi hi. Tua mah bangin Thukham zong kibang hi. Thuciam zong kibang hi. Abraham' pulaak Lungdamna Thu mah, Khrih akipan Paul, James cihte in zong tangko uh hi ( Jn. 8: 56; Rom. 4: 13; James 2: 21 23). Mi kim khat in Lungdamna Thu pen Singlamteh tung pan hong kipan hi ci-in ngaihsun uh hi. Khrih a sih ding Abraham in mukhol hi.
A hong kitatkhiat theih nadingin, upna bek kicing kei in, thukham zuihna tawh behlap kul hi, cih pen Lai Siangtho tawh kituak lo hi. Khrih na up takpi leh, a hong hotkhiatna dingin kicing hi. Ahi zongin dawite upna bang hi lo ding hi. Upna bangin nungta ding ihi zaw hi.
Bang hangin Pasian Thukham a letkipna le Jesuh Khrih Teci panna in Lungdamna Thu tawh kizom hiam? Mang. 14: 12; 12: 17
__________________________________________________________
___________________________________________________________
Hun nunungah i tuah ding thu in: kua bia ding, kua thu mang zaw ding? Vantung, leitung le na khempeuh Piangsak Pa maw, ahih kei leh, Sapi le ama lim bia zaw ding maw? Pasian Thukham a lenkip mite in a tawp dongin Topa tungah a citak mite ahi uh hi. Biakna man in upna le thumanna hong kal hi. Bawlsiatna, langpannate thuak mahta leh, Topa Thukham le Ama Sabbath in kip lai hi, cih kilangkhia sak hi. Hih thuman le Lungdamna Thu a tonkhawm thu hi-in, biakna man le man lo, hih thu in hong khen ding hi (Mang. 14).
FRIDAYDEC. 26
SIMBEH DING: Ellen G. White, The Loud Cry, 198 202.
“I dinmun sangkhaan ding kisam hi. I mainawt kul hi. I hamphatna pulaak kul hi. Pasian mai-ah kiniamkhiat kul hi. Gamtat hoih, gamtat phate kisialhpih, kiphatsak pih ding hi lo hi. Topa' hong kamciamte muan ding kisam hi. Kha Siangtho' hong hilh bangin nungta-in kiliatsakna cihte hepkhiat kul hi. Upna tawh hotkhiatna i ngah hi. Tua upna in a kimu thei lo upna hi lo hi. Tua upna in itna tawh hong gamtangsak a, i nunzia hong hahsiang hi. Mi khat in bang zahin siatna tawh kidiah mah taleh, Khrih in Ama thumang dingin it veve hi. Ahi zongin kuamah in Pasian' Thukham asianthona hemkhia thei lo hi. Khrih in Ama Thukham a nial mi puahpha thei lo hi. Khrih mahmah in a Pa itna sungah nungta-in Ama Thukham lenkip hi. Ama nungzui mi khempeuh in zong Pasian' Thukham lenkip ding uh hi.” Ellen G. White, Signs of the Times, March 31, 1890.
KIKUP DING DOTNATE:
1. Khrih, Paul le James in bang thubulpi gen uh hiam? Bang thute kibang a, bang thute kibang lo hiam? Amau gen thute a huampi-in en lehang, Thukham in Pasian mai-ah midikin hong bawl thei hi, ci-in pulaak uh hiam?
2. Na thuzuihzia ngaihsun kik lecin na lungkia hiam? Lungdamna Thu in na upna hong khauhsak hiam? Kilawm lo pimah Khrih in Ama dikna hong piak manin Amah na up tinten ding bang hangin kisam hiam?
2. Vantung Mi Thumte' thupuak in nate kipatcilna le hotkhiatna tawh kizopna nei hi. Jn. 1: 1 14; Bang hangin kizom hiam? Tua bangin a kizop manin Pasian Thukham sungah Sabbath tawlngak thupiak bang hangin thupi pha mahmah hiam? Koi bangin, hong pai ding hun ah Sabbath thupiak thupi semsem ding hiam?
