LESSON 12 *DEC. 13 - 19
THUNGETNA, DAMNA LE KIPUAHPHATNA
______________________________________________
SABBATH NITAK
TU KAAL SUNG SIM DING: James 5: 13 20; 1Jn. 5: 14; 1Kor. 15: 54; Heb. 12: 12, 13; Jn. 8: 43 45; Pau. 10: 12
KAMNGAH: “ Tua ahih manin na ci uh a dam nading khat le khat tungah na mawhna uh kipulaakin thu na
kingetsak ta un.” James 5: 16.
Na lamdang i mu ciat hi. A mu nuam bek hi lel-in na lamdang muhna hangin bangmah kilamdanna a nei om tuan lo hi. Tua hangin mihonpi in Jesuh kiangah Messiah takpi ahihna
kitheih nading na lamdang bawl ding a nget uh ciangin, Khrih in nial hi (Lk. 23: 8, 9; Matt. 12: 38 41). Ei deih bangin Kha Siangtho kizang thei ding hi lo hi. Kha Siangtho in hong zang ding hi zaw hi. Amah i kizatsak ding ahi hi. Pasian in cina khempeuh dam ding deih hi. Tawmvei sung dam ding sangin a tawntung damna, nuntak tawntungna dingin nasem zaw hi.
Koi bangin James gen damsakna tawh kisai tel thei ding i hiam? Damna le mawhmaina in kizopna a nei hiam? Pasian langpanna lakah Elijah in, etteh takcing Pasian muang, thungen tawntung hi. Israel mite tung panin Pasian kiang zuan kikin, thungetna le biakpiaknate in bang hong hilh hiam?
SUNDAY * DEC. 14
THU-UM MITE KITANGSAP BULPI
James 5: 13 sim in. Bang thu nih hong hilh hiam? Koi bangin hong hilh hiam?
________________________________________________________
________________________________________________________
James in hamsatna i tuah ciangin thungenin, i nuam ciangin Pasian min phat ding hong hilh hi. Thungetna le phatna in a tuamtuak hi lo hi. Pasian' minphatnate zong thungetna vive hi. James in a thupatna ah ze-et hamsatna na tuah uh ciangin nuamna dingin ngaihsun un, ci-in hong vaikhak hi. Tua bangin upna hong kize-et i thuak zawh ciangin upna kip hong kilang thei pan hi (James 1: 2, 3).
“Lungkhamna” (James 5: 13) cih kammal in kamsangte thuak gimna tawh a kibang kammal kizang hi (James 5: 10). Hih kammal in gal, a lauhuai na khat peuhpeuh hangin pumpi taksa gimna le lungsim gimna pulaak kammal hi. Tham lo-in thasanin nasepna le nuntak bei lawh dong mainawtna a pulaak kammal hi. Hih kammal pen 2Tim. 2:9; 4:5 ah zong kizang hi. Sawltakte in bangbang gimna, hamsatna thuak ta le uh kalsuan veve uh hi. Hamsatna khat peuh i tuahkhak ciang, Pasian kiang i zuan hi. Thungetna in tua bang hamsatnate hong kantansak zo hi. Tua bang hun i tuah khak ciangin tum theih tuamtuamte tumin Pasian min phatna in vanglian hi.
Pasian minphat a lasakna in biakpiakna le thungetna mah ahi hi. La tampi in thungetna vive hi. Ellen G. White, Education, 168. Lunggim hamsatna thuak mi tampi in thapiak ding kisam uh hi. Amaute kiangah vahawhin lasa-a thungetsak ding kisam uh hi. A nuam mite tawh nuam khawm ding, a dah mite tawh dah khawm ding cih pen Pasian deihna hi (Rom. 12: 5). Tua bangin i om manin ei mahmah thangahna zong suak thei hi. Lamet bei-in i om ciangin, Late sunga thute in hong makaih thei hi. Late sung panin Topa minphatna le thungetna, hanthotna, thapiakna le hong makaih thei thu tampi kigelh hi.
Hamsatna le thungetna in Pasian tawh hong kinaisak zaw thei hi. Nop i sak hun ciangin a kipai khial thei zel hiam? Bang hangin hamsat hun ciang Topa phat ding kisam mahmah hiam? Bang i mangngilh loh ding hong hilh hiam?
MONDAY DEC. 15
A DAM LOTE A DING THUNGEN
James 5: 14, 15 sim in. Cinate sathau nilhna tawh kizui-in bang thu hong hilh hiam? Bang
thuman hong hilh hiam?
___________________________________________________________
__________________________________________________________
A dam lo khat in upate samin sathau nilhin Topa min tawh thungetsakna in damna ngah thei hi (Mark 6: 13). Mawhmai ding lunggulh lo mi pumpi taksa in damna ngah lo ding hi. Natna pan damna ngah nadingin mawhna hangin cinatna hi ta keileh, Pasian kiangah mawhmaina a nget kul hi. Kisik kul hi. Ellen G. White The Ministry of Healing, 228.
Cina khat in upate samin thungen sak leh damna ngah ding hi, cih tawh kisai-in, biakna le damna kizom mahmah hi, cih hong lak hi. James in cinatna tawh kisai-in nam nih pulaak hi. Dorca numei nu in cina-in si hi (Sawl. 9: 14) Hih lai-ah “astheneo” cih kammal kizang hi. A khiatna in cina-in a si ( Sawl. 9: 14) le lamet bei cinate (kamno, aneu 15) cih khiatna nei hi. Pasian deihna bangin thu i nget ciangin cinate in damna ngah ding hi (1Jn. 5: 14). Dorca in damna ngahin sihna pan thawhkik bang mahin Khrih hong pai ciangin Thawhkikna Masa ah a thokik mite in a si nawnlo dingin hong thokik ding uh hi, cih hong hilh khol hi. Tua hun ciangin damna taktak hi ding hi. A si thei pumpi panin a si nawnlo ding pumpi ah kikhel ding hi (1Kor. 15: 54).
Sathau nilhna tawh kisai i muh ngei om kha ding hi. Dam lo-in a si zong om hi. Bang hangin thawhkikna in eite lametna takpi hi hiam?
TUESDAY DEC. 16
KHAMUANNA
Pumpi taksa cidamna sangin khamuanna thupi zaw hi. Siatna sungah a nungta dingin damna ngen ding hi lo a, tawntung nuntakna sungah a om thei ding deihna hi zaw hi. Damna (iaomai) cih kammal in pumpi taksa cidamna sangin zai zaw hi (Matt. 13: 15). Tawntung nuntakna pulaak kammal ahi hi. James in natna le mawhna kizoplam pulaak hi. Mawhna hangin na khempeuh kisia hi. Natna banah sihna hong tunpih hi. Mimawh ihih manin i cina-in sihna tawh i kipelh kei hi.
Mark 2: 1 12 le Heb 12: 12, 13; 1Pet. 2: 24, 25 cihte enkak in. Bang damna pulaak uh hiam? Bang in tua damna piangsak hiam?
_________________________________________________________________
_________________________________________________________________
Khazih a um mi khempeuh in damna taktak - kicinna le mawhmaina ngah ding hi. Khrih in cina a damsak ciangin pumpi taksa bek damsak hi lo-in nuntak tawntungna zong guanpah hi. Pumzawt natna pan damna ngah mipa in (Mark 2) pumpi damna sangin mawhmai damna a ngah ding kitangsam zaw ahih manin Khrih in damsak hi. Ahi zongin tua mipa in pumpi taksa dam ding a lunggulh zahin mawhmai damna ngah ding lunggulh zo lo hi. Khrih theitel hi leh, a dam a, a si zongin, mawhmai-na, tawntung nopna ngah ding hi. Ellen G. White, The Desir of Ages, 267.
Zatui namcin zangin pumpi taksa damna ding thupi mah taleh, upna cidam, nuntakna cidam ding mannei zaw pek a, hih leitung cidamna ciang bek hi lo-in a tawntung nuntakna sungah damna ngah ding thupi zawkan hi. Pumpi cidam i cih ciangin khat le khat kizopna hoih zong kihel hi. Tua hangin khat le khat tungah mawhna kimaisak ding hong hilh hi (James 5: 16; Matt. 18: 15, 21, 22). Cihnopna ah mi khat tungah na khialh khak leh, mawhmai ding thuum in. Tua hi leh Topa in thupha hong pia ding hi. Tua bangin na thuum ciangin a kiniamkhiat na hi hi. Tua bangin na kiniamkhiat ciangin Khrih, na sungah hong om ding hi.
WEDNESDAY DEC. 17
THUNGETZIA TUAMTUAMTE
James 5: 17, 18 sim in. Elijah thunget in thungetzia ding bang hong hilh hiam?Koi bangin
thungetna le damna, mawhmai-na, kipuahphatna kizom hiam?
__________________________________________________
Thungetna in khamuanna hong guan hi. “Mi hoihte' thungetna in vang nei a, na lianpi sem zo hi” James 5:16. Elijah pen mi hoih, mi dik khat hi-in, vantung ah kilato hi. Ahi zongin mihing mah hi veve hi ( Superman hi lo). Cilesa lungsim, deihna nei hi. Tua hi napi, Pasian in a thungetna bangin tangtungsak hi. Eite thungetna zong Pasian in hong za ding ahih manin thungen ding lawp mahmah ding hong hanthawn hi. A kipulaak lo “Elijah in lungsim takpi tawh thungen hi,” cih thu James in pulaak hi. Baal pasian biakna, huih pasian, guah pasian biaknate in a tangtunsak zawh loh uh, Elijah in thu a nget ciang, Thuhilhkikna 11: 13 17 bangin tangtung takpi hi (James 5: 18). Elijah in bang tanvei thungen cih i theih loh hangin, Pasian kammal thunungta siksanin thungen hi, cih pen i thei hi. Daniel in Jerusalem thuak ding a genkholh bang mahin, (Dan. 9: 2, 3), Thuhilhkikna sunga genkholhna pen Elijah in ama thungetna hi sak hi. Topa kammal siksanin thu i nget ciang bekin, tua thungetna in vanglian hi.
Kum thum le a lang tawntung guahzu lo thu in thu mawkmawk hi lo hi. Kum thum le a lang cih kammal kizatnate Lk. 4: 25, Dan. 7: 25; 9: 27; Mang. 12: 14 cihte zong kimu thei hi. Hih hunte in Pasian langpanna thu pulaak uh hi. Kum thum le lang khit ciangin Israel mite a khanglosak dingin, Pasian in Elijah tungtawnin kipuahphatna le kilamthakna thu tangko hi. Amaute langpanna panin kihei-in Pasian a zuat kik theih nading uh deihna ahi hi.
Khrih hong pai nading mite lungsim puahpha dingin tuiphum John in zong kisikna thu tangko hi. Tua bang mahin Khrih nihvei a hong paikik nading kipuahphatna thu tangko dingin a beibaang pawlpi” hong sawl hi ( Mal. 4: 5; Matt. 11: 13, 14).
Pawlpi in kipuahphatna le kilamthakna kisam hi. Tua ma-in mimal khat ciat nisimin kipuahphatna le kilamthakna kisam masa hi. Tua bang kipuahphatna a om nadingin, bang sem ding na hiam?
THURSDAY DEC. 18
KIPUAHPHATNA LE MAWHMAI-NA
Kha Siangtho in Elijah tungtawning Israel mite puahpha hi; Pasian tawh a thak kizopna nei uh hi. Carmel mualtung panin tua kipuahphatna kipan hi. Khua tuamtuam, a pai pai-na ah Elijah in tua kipuahphatna thu tangko hi.
James 5: 19, 20 sim in. Koi bangin Elijah, Tuiphum John le a dangte nasep tawh kizopna
nei hiam? Lk. 1: 16, 17; Sawl. 3: 19 zong sim in.
__________________________________________________
Elijah, Tuiphum John cihte tangko thu mawhna kisik ding le Khrih tungah ki-apna, tuiphumna, cihte kiphawk kha lo zel hi. Amah a um mi khempeuh in thuman thutak tawh nungta, mawhna nusia dingin leitungah Khrih hong nungta hi (Jn. 8: 43 45). James 5: 19 ah zong thuman langpanna om thei ahih zia hong hilh hi. Upna pan lampial mi in, a nunzia mahmah in siatna manawh ahi hi. Muanlahna, thuman taktak hi khol kei in teh” cih lungsim om masa-a, tua panin gamtat in zong siatna lam manawh hipah hi. A kisik mi ahih leh sihna tawh kipelh ding hi ( James 5: 20). James in thu-um mite kiangah Elijah bang mahin Pasian a thei nailo mite in Pasian a theih nadingun a nungta dingin hong hilh hi. Hihci bang nasep sep zawh nadingin lungduaina, hehpihna, lungneemna, kiniamkhiatna cihte kisam hi. “Sanggamte aw, mi khat peuh a gamta khial a om ciangin, Kha Siangtho deihna bangin a nungta note in tua a khial pa a manin a gamtat kik theih nadingin thunem zangin na huh un. Note in zong amah bangin ze-etna na tuah khak loh nadingun na kikem un.” Gal. 6: 1.
Elijah in mite kisik a Pasian kiang a zuat nadingun nasem hi. Mi khat in a khialh leh, a khialhlam amah le amah kipawk thei hi. Eite kitangsap lian bel in mawhna kisik ding ahi hi. Mawhmai-na lo-in nuntak tawntungna hong kipia lo ding hi. Lungdamna Thu om bangin a nungta mi in hehpihna ngah ding hi (Pau. 10:12).
Khial kha-in a khialhlam zong a kiphawk mi na thei hiam? Bangci bangin Topa kiang zuan thei ding hiam?
FRIDAY DEC. 19
SIMBEH DING
Ellen G. White, Prayer for the Sick,” in The Ministry of Healing, 225 233. Khrih in amah tawh nasem dingin eite hong sam hi. Manpiak lohin na ngah uh bangin man ngen lo-in na pia un. Matt. 10:8. Mawhna in siatna lian pen hi. Siatna bawl khat a om leh, hehpihin a mawhna kisik ding huh kul hi. Mi tampi in mawhna tawh kidiahin Pasian tawh kigamla tektek uh hi. Tua bang mite in thapiakna kisam uh hi. Amau khialhna bekbek ngaihsun uh a, lungkia, lamet bei kisa-in siatna behlap den uh hi. Tua bang mite nawl khin huai lo hi. Upna thu le thapiakna in tua bang mite adingin damna zatui taktak hi. Ellen G. White, The Desire of Ages, 504.
KIKUP DING DOTNATE
1. Sep khialh khat nei-in na lung a kham ngei hiam? Hong kimawhsak lo-in, lungkia lo-a mawhna kisik ding hong huhte tungah na lungdam hiam? Koi bangin tua bang ciangin na lungsim puak na nei hiam? Tua bang na tuahna tungtawnin mi dang a khial khat bangci huh ding na hiam?
2. James 5: 16 sim in. Bang thumanpha om hiam? Bangci bangin thungetna in vanglianin thupi mahmah hiam? Na thungetna bangin a pian loh hangin, Topa na muang veve hiam? Bang hangin lungkia lo-in thungen tawntung ding thupi hiam?
