Leitang leh inn a neite in, tuate zuak in tuasumte tawh Pasian nasepna a kisam mahmah na munah huhna piazo ding hi Topa in ci hi.Hih banga a sep manun lungnopna a ngah uh ciangin Pasian in muanna tawh amau tunga, a ap sumte kha gupkhiat nadingin vantung sumkholna sungah aguan ding uh hong om tawntung lel ding hi. Gupkhiatsa khate inzong a banah Christ aadingin amau angsung ding nialna, kidek kidaamna, thumaan-na leh cihtakna hong nei ding uha, Pasian kiangah a sumpite uh hong paipih ding uh hi. Hih pilna leh siamnate hangin a dang khate zong hong kikhel ding uh hi. Hi bangin nasep hong khang toto dinga, Pasian silpiakte deihna hong kilang ding hi. Topa’ hong piak hi cih thei-in Topa’ neihsakem citakte’ tungtawnin Topa’ tungah vangliatna hong tung kik hi.
Pasian nasep nadingin hih veina tawh thuum nate nei-in pawlpi sunga sum kisap nate i pulaak ciangin veina nei Pasian thu LaiSiangtho a umte in thupi takin hong gamtang uh hi. A neihsun dangka san pianih a piak khiat man-a pahtawina a ngah mizawng meigongnu mah bangin amaute in zawng ta leh ahih zawhzah uh a piakhia uh hi. Tua bang mite in, amau kisapte nangawn lei lo-in mi dangte’ aadingin piakhia uh hi. Ahi zongin mi tampitak mahin a inn a lote uh amau nopsak nading bek mahin zangin, a sumte uh Pasian nasep nading a zatkhiat zah dingin LaiSiangtho zong um lo, Pasian zong um lo uh hi. Hih bang mihingte’ aading Topa honggen thu in kawkpha mahmah hi. “Naneih nalamte zuakin mi dangte hawm sak in.”
Mimal Kimakaihna Lamen
Mizawng pawlkhatte in keikiangah lai hongkhak uh a, ka inn ka lote uh zuakin a kingah sum tengtawh Pasian’ na sem le ung a kilawm diam hongci uh hi. Pasian’ na, sep nading sum kisam cih thu a zakuh ciangin a lungsim uh sukhalua ahih manin amau aading nakhempeuh a bawlsak Honpa’ aadingin nakhatpeuh kasem nuam uh hi ci uh hi. Tuabang mite’ tungah ka gennop thu in na inn neu nonote zuakkhiat ding no nasep hi lo hi. Ahi zongin Pasian kiangah nang mahmah pai-in, pilna hong piak ding na thungetna pen Pasian in hong dawng taktak ding hi. (5T-733,734).
Neih leh Lam Khantoh Ding Sangin Kiamsuk Zawkna
I sanggamte in a neihsate uh behlap-lap lo dinga khiam tading uh hi. Eite in a hoihzaw gamah a pemding i hi ta hi. Tua mun pen vantung gam ahi hi.Tua ahih manin leitungah a om ding i hi kei hi. Tua ahih manin na khempeuh hisak sitset ni.
I neih i lamte bangmah a matloh hun hong tung ta ding hi. Sahang ciaptehna a nei lote vanzuak theih loh nading leh lei theih loh ding hun hong tungta hi. (5T-152).
Haksat Hun Aading Kigin Kholhna
Haksat hun ciangin innte leh leitangte mi siangthote’ aadingin kimanna nei nawn lo hi. Banghang hiam cih leh amaute a heh mahmah mite’ mai-ah tai ding uh hi. Tua hun ciangin Pasian gam aadingin a neih a lamte uh kizuak thei nawn lo ding hi. Tuabang haksat hun a tun ma in mi siangthote in hong nawngkai sak theina khempeuhte phiatkhia sianga suplawh liangmahin Pasian tawh kiciamna bawl ding kei hong lak hi. Amaute in a neih a lamte uh Topa’ biakpiakna tau tungah ap uh henla, lunglut tak leh veitak in Pasian’ kiangah bang mawhpuak nei kahi hiam ci uh hi leh, Topa in bang hunin a vante uh zuak khia ding cih hilh ding hi. Tua hileh haksat hun ciangin amaute a nawngkaai sak khat zong om nawn lo ding uh a, tangzang mahmah ding uh hi.
A zenzen in amaute in a vante uh it in, bangsem ding ka hiam ci-in Pasian a dot kei-uh leh Pasian in zong hilh tuan lo dinga, a neih a lamte uh kem tentan ding uh hi. Haksathun ciangin a neih a lamte in amau mai-ah mual pumpi bang dinga, amau mah delh pekin kisiacip ding uh hi. A zuaknop uh hangin zuakthei nawn lo ding uh hi. Pawl khatte bang a nuai aabangin a thuum a taauna ka za hi. Pasian nasep in thanem in zekai mahmah hi. Pasian’ mihingte’ tungah Pasian’ thu duhna kial tung hi. Akisamte piakkhiat ding ka hanciam kha kei uh hi. Tu-in kavante uh bangmahin kimang nawn lo hi. A zenzen in kizuak baih thei hi leh vantungah sum tampi kikhol thei ding hi.
Suplawhna khat ahi, khangto lo zaw in kiamsukzaw a, mei in a kattum lam kamuh khat a om hi. Pasian’ mite’n a neih a lamte uh thakhat in a zuakkhiat dinguh Pasian in phal lo hi cih kamu leuleu hi. Ahi zongin amaute in thuhilhna mangnuam uh hi leh Topa in banghunin bangsemding cih hilh lel ding hi. Topa’ hong paikik ding tawh kisai-in nidang lai-in mipawl khatte in a neih sate zuak khiat ding ngaihsun uh hi. Pawlkhat-te in a kisap hun dong kep lai ding khuan ngah uh hi. Athu ala hong om takciangin a zuak khiat ding uh ahi hi. (EW-56, 57).
Leitung Tawh Hencip Nading Khau Om Lo
Pasian nasepna zaisemsem ding hi.Topa’ mite in Topa’ cianpiak nathu mang uh hi leh a nunung mei tawh kihal hunciangin a kaangtum dingin amau khut sungah van tampi om lo ding hi. Ngetin a nek theih lohna, gutate in a guk theih lohna munah khol khin uh hi. A lungsim sungah leitung tawh a kihenkhop nading khau khat zong om nawn lo hi. (1T-197).
