Ellen G White Nungah Kamsang ii Lamen Diam?
Pr Kham Khen Pau
Hih tawh kisai-in,
EGWhite in "ong kilak kei" a cih kammal pen "om nawn kenteh" cihna in la lehang, EGW lo adang omlo ding dan ahi hi. Ahizongin, amah akidot lai-a adawnna ah amah kilaklo cih thu bek hi-a, om kenteh cihna-in lak ding haksa hi. Bang hang hiam cihleh,:
1. Joel sungah "Hun ninung ciangin ka kha ka bua dinga, na putekte uh in mang man ding hi. Khangnote in mangmu ding(vison) hi, cihkammalte in eihun zong huam hi. Mitampi ding dan kammal zang hi. 1 Cor 12 le 14ah Pasian Pawlpi kepcing nading akisam letsongte lakah, Kamsanna(prophecy) zong khatin kihel hi.
Tua ahihmanin, Khasiangtho in Pawlpi le thu-umte tungah na aseplaiteng kamsanna(prophecy) zong om den ding hi. Kamsanna a omleh Kamsang zong om ding cihna ahi hi. Matt 24 context ah "zuauthei kamsang tampi ong pai dinguh hi" ci hi. Tua in kamsang taktak zong om ding ahihmanin, kamsang mante amelh dingin zuauthei kamsang tampi apaikhia cileng zong kici thei hi.
2. Tua banah , kamsang cihpen bang tawh tukteh ihiam cih tungah kinga zaw ding hi. SDA sung bekah om ding hiam? ahihkei leh Khristian dangte lakah om theilo ding hiam? cihte atunga No 1 na tawh ngaisutkak ding thupi hi. Lampialna aomnana ah kamsang kisam zaw lai dinghi. Akiciamtehkamsang a om bang mahin akiciamtehlo kamsang zong om hi. Sawltak sungah, "Agaba tanute" zong kamsang hi-uha, leitungbup kialpi tun ding a genkhol uh hi. Amau genkholh kialpi pen Claudius amanlaitakin tunga, Pawlte sumkhon in kitaklah mahmah uh hi. Hih kamsangte in laibu gelh neituanlo uh hi.
Thukhupna
Kamsang tawh kisai-in ei SDA in EGW bekin iciangtan ciangin atoi mahmah khat ong suak hi. Lai Siangtho sunga kamsang nasep le Pasian ngimna bulphuh leng, kamsang zanga Pasian in na asep zia pen azaipi ahi hi. Mikhempeuh in ong sanpih leh cih ideih manin EGW lo adang omlo bangin igen ciangin SDA sung bek aen tawh ikibang hi. Tua manin kamsang bang hia, anasep bang, le Pasian in zat dan mun koi ciang cihte thutampi sai ding hi.
