Dear Zomi SDA laisim mimal,
Zomi SDA sungah I buaipih Mission leh Conference ki ukzia mah bulphuh in kei sanzia tawm hong at ing. I mel I sa ki sutna a omloh mah bangin I lungsim puak zia, thu piang khat tung I lak zia, I san zia, leh I veizia pen kibang thei hetlo pah lian hi. Nang zong na tha hat na nong at mah bang in, kei zong ka tha hat na hong at hing.
CONFERENCE LEH MISSION NASEM MASATE
A beisa kum 10 lai pan en toto leng conference deih te I hihi. Tua hunlai a kipan conference ki ukzia tawh ana kalsuan thei hi leng Zomi SDA mipil misiam tampi te in Topa’ na ei mun ei mual ah asem ding ki tam mahmah tuam dingin ka um hi. Asem nuam tampi te zong Karen te thu tuamtuam vai hawm na hangin asem lo kitam zaw a, ana ki pan ma sasa te zong aciangciang in lungkim lohna tampi I’ zak zong om tham hi. Laitan sang nei a nasem lutkha sunte zong hong pah tawi sak loh ban ah akiu ah zepin akoih det uh zong zadah mahmah ing. Sang kahkah a laitan sangpi I hanciam na pen mite nuai ah I om nop loh na zong kihel hi. Dinmun leh na lianpi sep nopna, sum lut zong akhom a atam zawk nang mah hi pi pen lel hiven. I deih laitan sang I ngah khit tehh tua tawh kituak dinmun ingah loh na in nasep loh na tawh kizom paisuak hi lel hi ve hang. A thulu tuam (pau lap) dang I’ bulh nuam zongin tua mun mah I tung veve ding hi.
CONFERENCE LEH MISSION NASEMTE
Pan mun deihluatna tawh conference ana pan kha ten panmun sang angah uhteh hong lungkim ngei uh a athu mit ngei cih I net sunga lai kikhah te lak pan I sim khin zo hi. Conference cih limlim adeih taktak ten I ngah ma teng kuakua in makai in, ei hong ki thudot (hong ki thudot kei leh pil I kisa phial zong tua pilna kizang theilo maw, kisam lo maw hikha ding hi, or tua pilna sangin a sangzaw na om man zong hi) kei phial zongin panpih kha ding hi. A panpih zong tampi om hi hang. Tu laitak a mission sunga Pasian na sem atam zaw in conference deih hi. Amau mun pan a ngah uh ahi mission sungah akhasum uh leh hamphatna tuamtuam te( benefits) MAC in apiak zawh leh bek ki hei ding cih thu hin, tua zong ahamsa mahmah khat hi sa ing. MAC dinmun pen amau ngaih sut dan hilo, atuam vilvel a kikhen suak sawm lah ki hi sam lo, makai hoih Section , Union, Division ah panmun hong let ding uh a ki ngak hi zel in kalsuan zia ding bel a baih lo phot ding mah hi. Deih na pi hong panpih ngamlo na khat ah zong abeisa conference hanciam na abat ding adah uh hi. Kipan ding ci in nung tawlh ngei mawk ihih man zong hi. Tua lai hun in makai te lungsim tawh kita (nungzui) hi in makai te hong bing khawlcip tehh mipi in agu teng pua in ek nusiat in hong ki nusia ngei hi.
CONFERENCE DEIHTE
MAC te conference deihzia bel tulai tak a MUM makaite lungsim puak zia tawh kalsuan nuam lo cih hi phot hi. Policy leh Manual nei ihih tehh tua tawh kalsuan ding mah thupi aki sa tentan hi. MUM ten policy leh manual bang in na sem leh MAC cih aom nai lo thei ding hi. Zomi laitan sang tampi te hong zatsak loh man, college hong piak loh man, panmun deih man hi masa lo zaw in, MUM in alungsim thusuak bangin asep nopna khutnuai ah , pingpei bang a hong pei mang na vuah sialpi guah thuak a kithuak nuam lo, om nuam lo cih hi. Gulfan tektek kawlpi hong pai lai in sabuai bem ah gawm khawm het lo ban ah ama vai khak dan lian in zong UMM in na hong sem lian lo mawk ahih manin tulai makai te um zo non lo, muang zo non lo cih hi mawk in tua kikal ah uptheih kik nang, muan theih kik nang pen hun la tadih phot ding mah hi.
Tua tehh MAC pen alangpang atam zaw ngaihsutna tawh kileh bulh in makai tawh kiding hi lo zaw in mipi deihna, ngaihsutna, kalsuan nopna tawh hong tunpih ding, aphul khia ding in makai kiguan ki hi zaw hi. Hih thu hangin MAC Chairman leh Vice-Chairman pa bekbek bulphuh in laidal hawm thawh bawl het lo in zumkong ah hong phah uh hi. MAC mipi pen “ngaihsutnalungsim pua tuuhon” ahih lam mission ten theibaih le uh cin I buai nang thu om zenzen lo in, tutan vei zong theithei lo lai na hih uh leh hih lai tawh hong theisak phapha ing.
CONFERENCE LEH ALANGPANGTE
MAC abei nang avai hawm mitawm no bek om in, tua teng lah tulian in adeih uh panmun te len in nuam asak pen hun uh cih ding hi. Panmun sang ut a tua tawh kituak ding khalam picinna leh laitan kician mel anei lo Penglam’ suangtat sat ngam te ading hun hoih laitak cih ding hi, MAC gen siat pi in gen sia ding hanciam mahmah ding cih ataw phah (aim, motto,pledge) hi nong aive. MAC om zenzen kei leh amau te tua tutphah ngah lo ding cih telcian henla, MAC abei na ding cih thadah, a tha hat semsem nang in a panpih sim ding kim lai. Conference ngah leng puanlom zial a ciahpah sawm mawk uh hiam?
CONFERENCE LEH LEMTUAH PUTE
Conference leh Mission ki telkhialhna lemtuah ding deihsak na tawh hong hanciam om-a amau deihna uh tawh hong kuan uh ahih mah bangin adeih na uh atun loh tehh gen sia nuam leuleu cih zong thukhat hisa ing. Pinlone, Kawlpi biakinn dong pawlpi buaina vai hong lunghihmawh a kinei Division lutang pi Gulfan na ngawnn in sabuai bem (thuman bulphuha kideihdan na aom theilo) ah thu kikupna hong neih pih loh nungsang thumanna tawh thu aluang thei loh ding mah ahi hi.
CONFERENCEN LEH I’MAKAI PITE
Hih thu teng zia zua kawmkal ah pawlpi mi te hong it takpi a, i muan na tawh I kut MAC makai kician I neih zong alungdam huai mahmah Topa hong vaihawm sak na hi. Innvai lovai tampi te nusia in, a kipiak na vuah apumpi, alungsim bek tham lo a neih sa uh tawh hong huai, hong van, hong makaih uh ahih manin zong eite deih conference ngah zoding hi hang. Makaite thong kiat theih theih nang laidal tampi aki phah te zong Topa in dik sa lo ahih manin amau te deihna tangtung lo hi. Topa min leh a it uh I minam ading in a zat khiat na khempeuh te I biak Pasian mah in hong dip sak kik henla, Topa minthan na kilat khiat nang hong hi taa hen. Amen.
CONFERENCE LEH MINAM
Minam itna gen ding hi leng Moses mah phawk masa ciat tek ding in hong um ing. Sila dinmun tawh Egypt gam ah aki theh thang Israel suan leh khak te,ami pih te lainat na tawh gawm tuah a hotkhiat theih nang in amite navil hi. Minam it luatna hangin Egypt te bang va that kha liang hi.Lai Siangtho sungah Moses mithah khak na ah kua khial zaw cih at lo in Moses in ami pih pa a kibawl siat ensan cih ciang bek kigelh hi. MAC te hong langpan Zomi ka it aci te lungsim tawh ki leh bulh sitset sa mawk ing. Moses khan lai in Egypt gam pen leitung bup ah atha hatpen gam (tu lai hun hileh America dan mah ) hi in, tua gam lianbel ah kumpi suak theih ding kimlai ami nam itna lian lua mahmah ahih manin tua tokhom nusia in aminam hotkhiat na ding tawh hong laih hiau hi. Pasian leh na mipih na itna hang in thong kiat theih nang dinmun na tung ngei hiam sanggam? Minam na itna hangin bang tak suplawh ngei na hiam? Minam vai neu sek leng ei Zomi sung pan zong SDA ki tawm mahmah a, tua sung pan conference adeih te utna, deihna na I panpih zawh kei leh akhak tan ding in na hong sem mawk na hiam? Na topa leh na minam ki kelkit na om phial ahiam? Gen ding in pan leng thu sau mahmah huam ding hi.
Adiakdiak in gamdang apaikhia ten innlam kingai in ki lunghih mawh ciata, I mi pih leh I gam itna om/khang sansan hi. Hih mun ah asung ah(innlam ) a aom, apua pial lo te sangin I itna liangzaw thei lo in, pusuak khin cihteh nusiatna hi khin zo hi. Pusuah na bel ahang tek tawh ahi phial zong in tua te I paulap hi lel hi. Minam it mahmah dan in iki neih khem hang in Karen te ulian/makai sep tawntung ding ngim na vuah tha vapiak ke ding hi zenzen lo in, ami nam itna, kep cingna te uh et tehh huai bek hi. Kawlgam a ding in Karen te pen SDA pawlpi sungah na suak(lut) masa/na bul zaw uh ahih manin amau cih bang bang pen zuih ding hanciam sawmna pen hai na hi. Tu laitak ei Christian aki ci te Topa Zeisu pen Israel minam in leitung ah hong khankhiat na siksan in Israel te I pi et lai hiam? I zah tak lai hiam? Amau cih bang bang I zui hiam? Karen’ taw iliah ding kul na sa lai hiam(being first converted)?
CONFERENCE LEH GUPNA
Pasian min tawh nasep na khempeuh, na thuakna khempeuh Pasian ading in santham cing hi. Zeisu I san khit nak leh I sepding tavuan, I maban leh I thaman cih te pen zingsang tunga lokuan
pa, sun a lokuanpa, leh nitak a lokuan pa thu hilh na tung tawn in zong hilh cian na aom khin hi. Topa sung ah I om khit nak leh Topa thu tawh thu piang te I sit tel dinga, aki tuak lo aom leh akua akua ci lo in I zuih loh bek lo, amawhna uh I pulak khiat ding hi. Hotkhiatna in Topa’a hi. SDA theology ah SDA te bek mah in gupna ngah ding cih ka sin kha ngei kei a, zong ka sim kha ngei kei hi. M leh C kilung tuak loh na siksan in Gupna vai dong akam pau mission te thu ka ngaih sut khak the Gupna ticket a zuak ngei Pope I sawltak Tetzel bang hong phawk sak uh e.
SDA LEH GOSPEL THU
Kawlgam SDA tangthu sungah Lungdamna thu ulian te tung pulak theihna tutung bek mah in atangko pan hi hang. MAC abei theihtheih nang laidal te kumpi tung hong phah uh tehh alang alang in thusun hong kul a, ulian tampi te tung thupha puak ki hi gige hi. Thusia kawmkal ah thupha a hong laih sak I Topa tung lungdam hang. Buai na om zenzen kei leh agen ngam ngei lo, gending a zong angaih sun ngei bek lo mission sia te lungsim siatna, hoih lohna pulak kimlai. Pr Kip pen a et tehh huai na khat ah Ygn a om/teng eimi ulian khempeuh tung lungdamna thu apuak lam zangei ing, tua lo teng bel ahi cipi(mikhiatnang in zum lai at zia dingthudong in apai bel om tuak ven).
Lai at ding pen hamsa ka sak na ah Zolai gualh zia siam lo ka hih manin asim mimal a ding in zong ka deihna takpi nong telsak loh ding uh ka dah hi. At ding cih tehh zong aki tel khial eiteng pen citawm mahmah ihih kawmkal ah I ki cih gamgam ding zong hamsa sim tham hi. No zong tua te awlmawh lo a at na hih uh tehh ken zong bang at loh na tuan ding ci in kei leh kei zong tha kipia kawm sa in kong at hi. Hun ngah na leh veina tawh kizui in zong hong at zelzel ding hing.
Lai at,
Khup Sian Muang
