Adventist thupuak pen Afro-Americante khut sung ah a ki-ap
matengin khangto lo hi. North American Negro Department a kiphuh khit kum 9 cinna
1918 ciangin mivom W. H. Green secretary masa pen ahi hi. Tua lai-in North
America bup ah Negro SDA 3,500 bang bek om hi. Kum 3 khit ciangin azah nih
phato hi.
Negro Department aphuat uh
hangin mikang conference presidentte mah in chair makaih hi. Mivomte pen ahuh
apanpih ciang bek ah pang hi. Oakwood College nangawn-ah, mivomte
adinga kihong hinapi, 1930 dongin sia atamzaw mikang mah kiguang uh hi. 1932
kum-in mikang College boardte meeting aneih laitak-un, mikangte bek makaihna a
lungkimlo mivom sangnaupangte in strike a neih ciangin president dingin mivom J
L Moran koih sak pan uh hi.
1929 Spring Council ah
mivom makai siate atamzaw in mivom lak nasep pen mivom(Afro-American) mah in
makaih le khangto zaw ding hi, amau a mau sumtha tawh nasem cial ding, sangte
hongin amau ngeina dan zui-in na sem ding uh hi, ci-in pulaak uh hi.
Negro Commission
GC in mivomte amau le
amau kimakaih-a nasep sak ding phalzo nailo uh hi. Ahihhangin a thu kantel
dingin mikang 11 le mivom 5 committee guan uh hi. Tua ciangin Negrote ong kinlo
hi, ci-in Elder J K Humphrey le a pawlpi in pawlpi tai san u hi.
1929 in GC Autumn Council
ah, Negro Commision-te pulakna zui-in GC Committee in Negro Department ciang
bek koih-in, tua sungah mivomte kihel sak dingin khensat uh hi. Ahang pen
mikaang makaite in mivomte maikai theidingin muang lo uh hi—tua in nasep
khantoh nading tampi khaktan hi.
Message Magazine
1928 in W H Green a sih
ciangin kum khat phial ama mun awng sak uh hi. Tua khit-in Evagelism asiam
mahmah George E Retus guang uh napi, asawtlo in New York ah khin uh hi. Ama mun
ah Frank L. Petersons koih leuleu uh hi. Petersons makaih sungin Negro
Department pen Colored Department ci-in 1942 in kheel uh hi. Mivomte lak nasep
panpih dingin Message Magazine hawm kipan uh hi. Editor masa pen mikang mah
koih uh hi. Kum 10 khit ciangin mivom editor Louis B. Reynold koih uh hi. Tua
hunin khasim magazine bu 150,000 pan in bu 260,000 dong khangto pah hi.
Riverside Sanitarium
1922 in motor accident
pan a dam ciangin, kum 78 apha khin, Nell Druillard in khanglam mivomte adingin
nasep kipan hi. Atupa E. A. Sutherland huh-in Emmanuel Missionary and Madison
College honguh hi. Nashvillee pan tai 5 na Cumberland gun geih ah Riverside
Sanitarium zato hong hi. Nurse training zong honga, kum simin nungakno 8 pan 10
kikaal pantah hi. A sihma in Nell Druillard in tua zato GC ah ap hi.
Washington a Ephesus SDA
pawlpi pen mivomte ahi hi. Atamzaw sumbawl mi, kumpi sangsia, kumpi nasem , le Howard
University buaih ngah sangnaupang vive ahi uh hi. Tua lak ah Alma J. Scott pen
Afro-Americante mun le mual zonsak nasep pankhia pa ahi hi. Joseph Dodson zong
laibu sai nei khat ahi hi. Amautegel pen SDA leitungbup Zumpi bikhalap gei
cihphial ding mun-ah om uh ahihmanin, pawlpi sunga minam kideidanna , atate uh
Washington Missionary College ah sang akah theihlohna, le SDA Review and Herald
ansai ah (mivom ahih-uh manin) an anek theihlohnate uh pulaak den uh hi.
1943 in a pasal in Lucy
Byard pen Washington Sanitarium zato ah puak hi. Amau nupa pen New York City
SDA pawlpi ah kum sawtpi member-in a om uh ahi hi. Amau pen a vom lualo (lighly
colored) ahih uh hi. Zato in Mrs Byard zato lutna laite pan mivom
ahihna mukhia hi. Tua ciangin SDA zato pan Freedman’s Hospital ah puak uh hi.
Asawtlo in Mrs Byard pen pneumonia tawh si hi. Tua ciangin mivom khempeuh phial
in na sa uh hi. Tua buaina hehnep nadingin North America Vice-president W. G.
Turner in a Sabbath sermon ah 1Peter 4:12 “Ka itte aw, haksatna le ze-etna na
thuak pen uh lamdang sa kei un. . .” cih bulphuh hi. Tua in miomte lungsim so
sak zaw hi.
October 16, 1943: Sabbath
bei ciangin Ephesus SDA pawlpi mite Dodson Book Store ah kikum-in geelna khat
bawl uh hi. Tua in, National Association for the Advancement of Worldwide Work
Among Colored SDA(NAAWWC) cih kipawlna phuankhia uh hi. Joseph Dodson in
Chairman, Alma Scott in vice-clhairman sem hi. Gambup SDA mivom teng hanthawnin
laihawm, laikhak uh hi. Hihte pen laymen vive ahi uh hi. Columbia Union-a mivom
lak nasepna secretary sem J. H. Wagner in advisor in om ngam bek hi. Tualo
mivom sia dangte in a nasepna uh sukhak ding lau uh ahihmanin a mipihte uh
alkilangin dinpih ngamlo uh hi.
Separate Conference
Mivom lay membete ngetna
tawh kisai, GC president J. L. McElhany in mivom palaite tawh tamveipi kimuh
khopna nei hi. GC ah pulak sak dinga GC-te ngaihsut zia zong mivom palaaite
tungah zasak kik dingin kam ciam pia hi. Tua zui-in GC in mivom
pawlpi makaite, local le union mivom department-a mivom makaite tawh kikupna,
April 8-19, 1944 in GC Committee Spring Council, Chicago ah nei uh hi.
Tua lai ah saploh in
NAAWWC pan palai nih va pai hi. Meetingah a kilut sakloh hangin GC President
Elder McElhany le delegate-te tawh kimu uha, abawlkholh uh laimai 8 apha lai
pia uh hi.
Elder McElhany pilvaang
ahihmanin mivom le mikaang kikaal buaina hoihtak le pilvaang takin len hi. Hih
thu ading kikuppi taktak pen April 10 Sunday ni zing sang dingin kigeel hi.
Mivom department sia G. E. Peters in GC President tua meeting ah a omloh thu
atheih ciangin, GC Presidentpa kiang ah meeting nong tut kei leh, hih buaina ki
siangsak zolo dinga, nidang ciangin kei zong kong pang ngam nawn kei ding hi.
Thamlo-in mivom khempeuh in nang mai ong mukik nawnlo ding hi, ci-in va zol hi.
Tua ciangin McElhany zong damlopi mahin meeting ong tu kik hi. Lake Union
Conference president J. J. Nethery panpihna tawh khensatna bawlzo uh hi. Tua
khensatna ah, “mivom pawlpite mi kicing, sum ngahna le a gam ding aki cianin
aneih uhciangin mivom conference organize sak ding hi”, ci-in union tungah
phalsakna thu khensat ta uh hi.
Hih conference-te pen
mivom makaite in makaih dinga, union-ah mikaang conference-te mah bangin
kipawlna nei ding uh hi.
Tua zawh kha 3 ciangin
Nethery makaihna tawh Lake Union Conferene EC in a union sung pan mivom a
thukim nak leh conference tuam(separate conference) ding thei dingin
phal ta hi.
Sept 26, 1944: Chicgo
Shiloh pawplpi mivom palaaite kikaikhawm uha, nakpi-in kikum kinial khit
ciangin Separate conference in mivomte khantohna ding le nasep siamna pia takpi
ding hi, cih amuh uh ciangin delegatete in Lake Region Conference
phuan uh hi. Indianapolis Capitol Avanue Pawlpi pan J. Gershon Dasent pen
president in teel uh hi. Tua zawh kaal khat khit ciangin Lake Union-a mivomte
in amau Conference phuan uh hi. Azom in Atlantic Union sunga mivomte in zong
meeting nei uha, conference kipan uh hi.
1944 ma-in Columbia Union
sunga mivomte in Allegheny Conference na pan khin uh hi. Tua bangin Atlantic
tuipi geito-tengah mikangte sung pan-in mivom conference ong dingto pah
phangphang uh hi.
Mivom conference a
kipatcil in North America ah SDA mivom 18,000 pha hi. A conference gam zai
mahmah-a, pawlpi tawm-in kivangh hi. Zum inn le vanzat neilo uh hi. Sum zong
neilo uh hi. Experience nei makai omlo uh hi.
Tua bang haksatna
kawmkaal mah ah, member khangto-a, 1966 in NAD ah mivom SDA 60,000 pha hi.
Local sumpi $ million(tan) 2 vaal, sawm-a-khat, million 6 le, mission sumpi $
million 1.4 cin uh hi. 1976 in NAD ah SDA mi 5 ciangin mivom 1 hita a, mivom SDA
buppi-ii azah 2 phata uh hi. North America ah SDA mivom khit ciangin pawlpi
khangto pen Southern Baptist ahi hi.
R. W. Shwarz, “Light
Bearers to the Ramnant: Denominational History Textbook for SDA College
Classes,” (prepared by the Department of Education of GC of SDA,
Idaho: Pacific Press, 1979). Pp. 564-578. Chapter 34 The Rise of
Indigenous and Ethnic Leadership
