Aapna aw in na lungsim takpi hongphul khia mah ahi hiam? “Ka Gumpa aw, Nang in hong neipa Na hi hi. Ka kha nuntak nangin, tatkhiat man ding Nang nong piaksak khin zo hi. Kei Nang aa ka hi hi. Sum leh paai ka ngah theih nading Nang ma’n siamna Nong pia hi. Zat nading a kilawm loh na munah ka zat khakloh nadingin Topa hongkem inla, kiphatsakna lungsim kei kiangpan hong hepkhiat sak in. Nang min a vanliat nading bek in kazang nuam hi.”
Na sep na bawlna masuan khempeuhah na ngimna in a nuai-a bang hi ta hen. Hih ka sepzia-in Pasian’ deih sepzia mah ahi hiam? Hih in ka Gumpa’n hong thukim pih takpi ding hiam? Topa in kei aadingin a nuntakna hong pia khinzo hi. Pa Pasian tungah ken bang piakik thei ding ka hi hiam? Kei sep theih khat in, Topa’ aadingin phaltakin ka piakhia thei hi a ci pa hong hisak ta in. Pasian min na taltang tungah a kiciapteh nai kei aa leh nangin khuavak sungah gamh na luah thei kei ding hi. Vantung pan a lamdang letsongin, Pasian in khatbek a neihsun a Tapa ahi hi. Tua letsong nang hong kipia hi.
Pasian in Ama khut siangtho tawh i sawmah khat leh sumpite lawngin, hih sumte in kei aa ahi hi ci hi. Kei in note tungah ka neih sate na kep dingun kong ap ciangin pawlkhat kei aadingin nong pia ding uha, pawlkhat no aadingin na kisapna bangbang un na zangthei ding uh hi a ci hi.
Lo lai-a na ante uh na laak uh ciangin, nang aading na khol ciangin Pasian aading sawmah khat zong na pia takpi hiam? Topa’ lenggah huan nasepna-ah kitasam a, a om loh nadingin na sawmah khat leh sumpite na ap khin hiam? Meigongte leh tagahte na en khin hiam? Hih nasepin innsung Pasian nasepna hi a, awlmawh loh ding hi lo hi.
Nakiim napamah mizawng micimawh, puanlum kisam, an kisam a om hiam? Tua banah itna a lunggulh, kep ding kisam a om kha hiam? Meigongte, lunggim mite, nang kiangah hong pai a, a tu a tate’ sangkah nading a kisam huh ngen a hong pai ciangin nang bang na hihsak hiam? Hih bang hun ciangin nang bang naci huh thei hiam? Tagahte huhding na hanciam ngei hiam? Kha nuntak nading a lungkham nu leh pa, pi leh pute nang kiangah hongpai-a amau haksat nate honggen ciangin, nangin khual namel nei lo-in thudon lo-in na ciahkik sak ngei hiam? A zenzen in nangin tuabangin na gamtat khak a leh na mailam nuntakna sungah Pasian’ neih hehpihna leh lainatna nang tung om ta hen. Note in mi dangte’ tungah bangtawh teh in na piakhia uh hiam? Na piakkhiat zah mah na ngah kik ding uh hi. Topa’ hongpiak thuphate nang nopsak nading bekin beelhei-in, thumaan lo a na zatkhak a leh Pasian in na thupha ngah ding piak loh in hong koih ding hi.
I biak Pa Pasian in hih leitung nuntakna tawh kisai i kisap thupha namkim a tawntung in hong pia den hi. A zenzen in Topa in na piakkhiat sum leh paaite nasepna a tuamtuamah khen khia ding hong cih a leh phaltakin khenkhia in. Tua in nang aading leitung thupha vantung thupha ngah nading hong geelsakna hi cih thei in. Pasian in ei hong nei Pa hi a, mihingte tawh kipawlin mihingte’ neek ding hong siik Pasian ahi hi. Tua ahih manin kha gupkhiatna-ah zong mihingte leh Pasian kipawl khawm a nasep pen Pasian’ deihna ahi hi. I teenna gam leh gamdangte-ah kha gupkhiatna nasep nadingin a kisam sum leh paaite a silate’ khut sungah pia hi. Pasian nasem dingte’ lakah a lang bekin sem hi leh zong zat ding sum leh paai kicing lo dinga leitung bup lungdamna thu tangkona ma kihial zo lo ding hi. (R&H, Dec. 23, 1890).
Kipumkhat Theih Nadingin Topa’ Thungetna Dawnkikna
Pawlpi mite in Pasian nasemte’ tungah telsiamna a neih kei-a leh Pasian deih dinmun tungzo ngei lo ding hi. Pasian nasemte in KhaSiangtho lungsim i neih masiah, pawlpi mite inzong Pasian nasep nading panpihna-ah kipuahphat thahatna a neih masiah Topa’ thungetna sunga kipumkhatzia cikmah hunin kingah lo ding hi. Pawlpi mite in nasem siate’ lungsim siangtho tak tawh panpihnopna nei a, kampau bek tawh hi lo, piakkhiatna gamtatna tawh a huh masiah Pasian nasem siate’n zong a nasep uh zozo lo ding uh hi.
Pasian in nasem ding mi sam hi. A sem ngiat dingin Topa’n hong deih hi. Ahi zongin tua nasem dingte a kikhel taktak mite hi masa dinga, tua hileh mi dangte gumkhia zo-in kikhelsak zo bek ding hi. (R&H, Sept. 10, 1903).
Angsung Ngaihsutna Paaikhia Ding
Pasian in a pawlpi a hehpihna tawh kidim sak hi. Topa’ sumkholna-ah, sum tampi a om theih nadingin sum muh siamna zong Topa’n hong pia hi. Tu ni in pawlpi sungah Topa’ tung lungdam kohnopna kimu lo ahih manin dah huai mahmah hi.
Pasian lenggahhuan sung a, a hiangkeute’ awtna aw in, “mite in ko hong thudon lo-in hong koihdap uh hi.” Khat leh khat vang kiam nading kibawlna in Pasian a kosia dinga Satan tha a piapia i hi hi. Pasian in a tanu a tapate leitungah gimna hong thuaksak hi ci-in mukhial sak hi. Topa’ neihsa kem dinga a ki-ap mite in a thudon loh manin Topa in mawh sakna thuak hi. Topa’ neihsa kemte in a kep dinguh ahi, haksatna thuakte thudon lo-in om uh hi. Tua hangin Pasian tungah kosiatna hong tungta hi.
Kuamah peuhin i nasep ding thudon lo-in om kei ni. Sum tampipi zangzo lo a, tawmcikcik tawh nasem na hih leh, Pasian thupha pen thuum lo taau lo a, hanciam a nasepna pan kingah hi, cih phawk in. Topa in thuneu penpen zong phawk lo-in om lo hi. Thu neuno khat a thudon mi in a lamdang khantohna ngah ding hi. Siamna neuno khat lungkim tak, thanuam taka nazat leh Pasian kiangpan siamna a zahnih na ngahkik ding hi. I sumzian tawh kituakin a met ngah ding i lamen ciat hi. Pasian in mi khatpeuh ahi bangin sang hi. A neih loh khat kal tuan lo hi.
Na sawmah khat leh sumpi bek mah piak ding Topa’n hong ngen hi. Topa’ nasepna khempeuhah, piakkhiatna hong kal hi. Nang hong sawl nasep kuhkal tak, citak -takin sem in. Topa Zeisu in nang kiangah om a, nang aading ngimna, geelna, nei hi cih thei-in lung lawp takin sem in. Pasian in nang aading a hehpihna hong kicing sak hi. Note in na khem peuh a kicingin na hoih tawh na kidim uh hi. Hih leitungah Pasian gam a zai nadingin na khat peuh sepsak thei na hih manin lungkim tak, deihsakna tak, lungdam tak in piakhia in. Na lungsim sung pan angsung bek ngaihsutna hem khia in. Hih munah Christian gamtatzia kiptakin len in. Nang in Pasian tawh kinai takin kizom hi lecin a kisia mite na muh ciangin amaute’ gup ngah nadingin sup lawh liangin na sem ding hi.
Khalam Khantohna Leh Christian Citpiakna
Topa sunga sanggam u leh nau khempeuh tungah kong gennop thu in, Pasian nasepna a kisap mahmah hunin Topa’ tungah huhna ngen ding hi hang. Pasian aading sumpi piakna-ah itsiitna in hamsiatna a samsam i hi hi. Khalam khantohna in Christian citpiakna tawh kihen khawm hi. Gumpa’ hehpihna an-duh tui-duh in duh ding hi. Na sum na paaite in nang mai-ah vantunggam kongkhak sung lut ding hi, ci-in a manpha mahmah kamciam om hi.
Na neih na lamte bittak in na kem nuam hiam? Singlamteh tunga siktukilh mapawn khut sungah koih in. A vekpi in nang bekin na kep leh tawntung a sumh na hi hi. Pasian pia in. Tua hunpan kipan Pasian ciaptehna na neihsate’ tungah kigelh ding hi. A kikhel ngei lo Topa’ ciaptehna kikhen hi. Topa’ kiangpan nangah neih leh lamte tawh na lung a kim hiam? Haksatna thuakte’ aading thupha ngahna hi tahen. Na neihsate na khangto sak nuam hiam? “Na neihsa leh na anpalte tawh Pasian bia-in, tua hileh na ansaalte kidim dinga, lenggah cilna-ah lenggah tui tawh kidim ding hi.”
Pasian In Hong Dimkik Ding Hi
Mihing khempeuh in i sep dingtek a sem hileng Pasian’ lenggah-huan sung a keu namun om lo ding hi. Jesu’ nungzui kineih khemte mawhsak nading zong om lo ding hi. Zatui tawh Pasian nasepna in hun tawh kituaka lungdamna thu hilh nadingin kong hong hon sak ahi hi. Vantungmi thumte’ thu mun khempeuhah kiza ding hi. Ciil zat in. Kiphasak kei in. Leitung tawh kisai na sumte Pasian ap in. Tu mahmah in na hih zawhzah piakhia in. Topa Jesu tawh kikop hilecin piakkhiat nadingin nakhut cingh mahmah ding hi. Kha mangthangte’ tungah LaiSiangtho thumaan a kipuakzawh nadingin Pasian in na khut sungah na zatsa khempeuh hong dimkik ding hi. Mi dangte hotkhiat ding Pasian in nang tungah hong ap ding hi. (R&H, Dec. 10, 1901).
