Leitung leh Pawlpi tuamtuamte in Pasian’ thukham palsat uh ahih manin vauhilh ding kisam hi. “Mi khatpeuhin sahang leh amaa milim bia-in, amaa taltang tungah ahih kei leh, a khut tungah ciaptehna a ngah leh tua mi in Pasian’ hehna hai-ah, bangmah tawh a kihel lo lenggahzu dawnding uh hi.” Pasian’ nisiangtho ni a siasak mite’ tungah tua bang hamsiatna tunga, eite in a lianzaw veina, a lianzaw hanciamna, i lah ding hi lo ahi hiam? Eite in banghanga hih thu, thudon lo a, ei aading bek zonga, leitung lunggulhna tawh i hun beisak i hi hiam? I lunggulhnate Topa Jesu tawh kikhen ta ahi hiam? LaiSiangtho kammal khauh lua ahi hiam? I lungsim hong nawngkai sak lua ahi hiam? Lungsim sungah thuak zawh lohna tawh a nung heikik Jesu’ nungzuite bang mahin leitung lam maingat ta i hi hiam? I sum neihte ei nopsak nading bekin zangin ei lunggulhte leina in i zang ziahziaha kha tampite in lungdamna thu thei lo-in mual hong liapsanta uh hi. Hih bang dinmunah bang tanvei kivei lai ding i hi hiam?
Upna hing nei ciat ni. Itna tawh nasem upna hi a, nuntakna khate siangtho sak hi. Mi khempeuh in ei mau nopsak nading bangmah peuh sem dingin kiging sa in om thei napi hangin, Topa Jesu leh thumaan thutak a kisam a kisia ding mihingte’ aa dingin themzong a ngaihsun lo tawh i kibang hi.
Tu Mahmah In Vantung Sumkholna-ah Khol Ta In
I neih i lamte, i khiap hun hong tungta hi lo ahi hiam? Tu-in na khatpeuh sepna tawh vantungah sum khol thei dingin Pasian in nang hong huh ta hen. Leitawi pia i hi kei a, lungsim siangtho takin sumpi i pia hi. Topa in ei hongkop nate a piakik bek i hi hi. Nang’ Pasian it mahmah in, nang leh nang na ki-it mah bangin mi dangte zong na it takpi leh Pasian nasep nadingin deihsakna taktawh na piakhia takpi ding hi, cih ka-um uh hi. Kha gupkhiat ding om hi. Kha gupkhiat nadinga a nuntakna a piakhia Jesu Khrist tawh kipawla nasem hi ta in. Topa’ vangliatna muanna tawh thupha na bawl leh Pasian in nang tungah na hoihte hong kicing sak ding hi. LaiSiangtho a humuap KhaSiangtho in na lungsim uh hong uk henla, Topa’ kha leh nuntakna ahi Pasian kammal a it taktak hong suaksak ta hen. Pasian KhaSiangtho tawh kisai khempeuh na muhtheih nadingin namit-te kihong ta hen. Tu hunin biaknathu tawh kisai, a kineumuhna in mi khempeuhin Jesu’ lim sun lo, amau pumpi nial lo, suplawhlianga nasem lo i hih man ahi hi. (R&H, Jan.8,1889).
Guah Nunung Hong Pailoh Kikna
Pasian tawh kikop a nasepna in bangzahin manpha hiam cih a thei a om masiah Leitungbup Topa’ vangtawh a tangsak Pasian KhaSiangtho nasia tak in hong kibua lo ding hi. Pasian’ nasepna-ah lungsim takpi tawh ki-apna a om ciangin Pasian in a kiteh thei lo KhaSiangtho hong buaksuk ding hi. Ahi zongin pawlpi mi a tamzaw in Pasian tawh kikop-a na a sep naikei-a leh tua guahtui ngah lo ding uh hi. Angsung aading zonna leh pumpi’ deihna a kilat laitengin Pasian in a KhaSiangtho hongpia thei lo hi. “Kei mahin ka sanggam a kempa ka hi hiam?” ci-a Kain in a dawn mah bangin i lungsim sungah angsung ngaihsutna leh mawhbawlnopna in hong ukcip laiteng Pasian in a KhaSiangtho hong buak lo ding hi. (R&H, July 21, 1896).
Leitung Lunggulhna Lungsim Khempeuh Phiatsiang In
Kongit ute naute aw, note’ tungah itna leh kamkhum kamnel tawh konggen hi. Kha gupkhiatna nasep i sep laitakin leitung lunggulhna lungsim i phiatsiang ding ahi hi. Pasian nasepna a nawngkaisak khempeuh a phiatsiang Jesu Christ lungsim bang Jesu nungzui khempeuhin i neihding phawkni. Pasian’ hongnget thute a sangpen a thupi pen in i koih ding hi. “Kei hongit sangin anu apa a it zaw mi in keitawh kituak lo hi.” Christ nuntakzia in i nuntak sung i sinding laibu ahi hi. Topa’ nuntakzia in mi dangte’ hamphat nading bulphuh in gim lo tawl lo tak a suplawh ngamna lungsim tawh sepsak ding tha hongpia hi.
Tanu tapate Pasian kiangah i paipih zawh nadingin Pasian sila a hi nu leh pate in i thahatna khempeuh siit lo-in gamtang ni. Pasian’ nasepna-ah thudon lohna lungsim leh angsung khualna lungsim nei lo ding hi. Jesu in a pawlpi hong nunget hi. Amau ii kha nuntakna in amaute khial hi ci-a, khensatna a thuak bangzah omta hiam?
Siit nei lo a, ki-ap dingin Pasian in hong ngen hi. Jesu gumpa leh Topa a i san hun a i kiciam mahbangin thumaan takin zuisuak hilehang leitung a om mi tampite in, mawhna sungah kisia lo ding uh hi. Gumpa mu dingin kiging lopi-in hankhuk sung a zuan mite kua mawhpuak hi ding ahi hiam? Eite aadingin Topa Jesu in Amaa pumpi mahmah biakpiakna ganno dingin hong kipiakhia hi. Mawhnei mite hotkhiat nadingin Topa in bangzahin hongvei-in semkhin ahi hiam? A nungzuite Pasian nasem a suah nading pattahna-ah gim ing ci lo-in hanciam mahmah hi. Ahi zongin eite’ sepkhiat pen tawm mahmah hi. I sepkhiat tawmcik ii huzapin i sep loh ii huzap tampite’ nuai-ah thanem mahmah hi. Pasian hong piak nasep i zawh nadingin mainawt a, kisem lo ahih manin bangzahin sumkhin i hi hiam? Christian i hihna tawh kizui-in, hih thute hangin i patauh mahmah ding ahi hi. (R&H, Dec. 30,1902).
Sup Ngamna Lungsim
Gupkhiatna geelna-ah biakpiakna tawh kilak ahih manin bangzahin zai in, thuk in, sang hiam cih kiteh thei lo hi. Topa Jesu in vantungah om hithiat in hih mawhna leitungah vantung mite hongsawl ziau cih bang hi lo hi. Amah mahmah a kem a cing om lo-in hongpai a, kosiatna, mawhsakna hong thuak hi. Topa pen haksat thuak mihing khat hong hi-a, lunggimna hong thuak hi. I mawhna danteng hong thuak in i thanemnate zong hong thuak lailai hi. Topa nungzuite lakah pumpi deihna nial lote a muh ciangin amaute in Christian hihna a nial hi ci-in Pasian in ciamteh hi. Jesu tawh pumkhat ka hi ci-a, a manpha mahmah puan silh niikten, inn sung vanzat hoih nono leh a lim nono annek tuidawnte tawh nuam tak a omte in, a minbek a Christian ahi uh hi. Chritian khat hih nading pen Christ tawh kibat kul hi.
Ahi zongin sawltakpa’ thugen bangzahin maan ahi hiam? Mi khempeuh in ei aading bek kizong ciat hi. Topa Jesu tawh kisaite kizong lo hi. Christian tampi takin i min tawh kituak in kigamta lo hi. A manpha mahmah gupkhiatna a kigelkhol thu a za ngei lo bangkeekin om uh hi. Mi tampi’ ngimna in leitungah a min than theih nading bek hi-a, leitung paiziate leitung nasepte sem uh hi. Amau deih a kicin nadingin semin om uh hi. Leitung mite bangin a ngimnate-uh veitakin zui uh hi. Hih bangin Pasian’ gam a kiphuh zawh nading huhnopna lungsim phiatkhia ta uh hi.
Tu-a i neih thahatna tawh i kidim sanga a zah sawm-a, a khangto ding Pasian’ na sep in, phalbi huihvot in, tukguah a dal mah bangin khangto thei lo hi. Hi bang, a pianna in, amah leh amah Pasian’ ta ka hi a ci mi pawlkhatte in Topa nasep nadinga a kiseh sumte amau nopsak nadinga a zatmang nahanguh ahi hi.Topa Jesu in a nuntakna piakhia lianga hong itna thu amau nuntakna-ah kihelkha lo a hihman in thahat nading mun-ah thanemin amau leh amau in a meivak uh sumit uh a, mi tampi tungah lungdamna thu khuavak tung lo-in, khuamial sakta uh hi.
Jesu Christ in hihzahin amau aading hong suplawh a hih manin Topa’ thuphate amau aading bekin zang ngam ding ahi hiam? Topa’ hong itna leh pumpi deihna nialna-in tehpih ding om lo hi. Hih itna a nungzuite’ tungah hongtun takciangin amau lunglut thute Topa-a mah bang a hihna hong kilang ding hi. Amaute’ nasep in Pasian’ gam phuh ding ahi hi. Amau pumpi bek hi lo-in, a sum a paai a neih a lam khempeuh Topa’ tungah ap in Topa’ nasep nading a kisap bangin zangsak ding uh hi. (CS-5).
Topa Jesu in a nungzuite’ tungpan a lamet thu in hih sangin a lianzaw khatbeek om nawn lo hi. Hihzah a thupi kha gupkhiat nasep nadingin pumpi deihna nialna in haksa lua hi ci lo ding hi. Hih nasep in mimal nasep ding ahi hi. LaiSiangtho thumaan tangkona a zat ding ahi zongin, Topa Jesu a sawt lo-in hong paita dinga, Topa thumaan a zanuam leitung mun khempeuh a om mihingte’ tungah tangko nading ahi zongin, i piak khiat sum khempeuh Pasian’ sumkholna sungah lut ding hi. Hih nasep a sem ding Pasian nasemte i khahkhia ding hi.
I nuntakna sungah Jesu i itna i kam tawh genin, i gamtatna tawh i lak ding hi. Jesu Christ gam a thupi pen i hisak ding hi. Pasian tokhom tungah kuama sawl loh in ei leh ei i ki-ap ta ding hi. Pasian Tapa in vantung kumpi tokhom nusia ngam liang-a a it kha manphate, Jesu Christ tawh a kipawl mihing peuhmah in itna a nei ding uh hi. Topa in eite’ aadingin zawnna hong thuak hi. Topa’ zawnna in eite’ hauh nading ahi hi. (R&H, Oct.13, 1896).
A Ki-ap Innkuante Sapna
LaiSiangtho a thei mite amau leh amau hanciam dingin Pasian in sam hi. Khuamial sung leh khialhna mun a, a omte, gam dangah pai-in mithakte tawh meltheih bawlding a, Topa aading pilna tawh hanciam dingin, Christian innkuante Topa in sam hi. Hih sapna a dawng dingin kipiak ngam mahmah kul ding hi.
Haksatna a tuamtuamte hepkhiat nading mi tampite in a ngak laitak in, leitungah nuntakna nei kha tampite in, lametna nei lo Pasian thei lo-in hong sihsan ta uh hi. Mi tampite in leitung ii hamphatna thupha leh leitung pilnate sin nadingin sum leh paai tampi ngah ding lametna tawh a lau huaina mun-ah pai uh hi. Ahi zongin Pasian thumaan khuavak a om loh namun-ah, a teeng mite’ kiangah lungdamna thu puakdinga, a va peem ding innkuan koi-ah om ahi hiam?
Macedonian sapna aw leitung mun khempeuh pan hong pai ta hi. “Kote’ kiangah hongpai-in hong huhun” cihna mipi otna aw mun khempeuhah kiza ta hi. A banghangin tua sapna dawng lo mawk i hi hiam? A nuntakna leitung buppi aading a piakhia Pasian’ nasep banga a sem, mi a tul a then lom in Christ KhaSiangtho aana sapna ngah ding kilawm hi. Tu hun tawh kituak LaiSiangtho thumaan a thei nai lo mite i hilh theih nadingin bang hangin ei deihna nial ding kizekai saksak i hi hiam? Pasian nasem siapipa in hih leitungah hongpai khin hi. Tua siapipa in eite’ mai-ah pai-in, i sep dingzia hong lak khin ta hi. Jesu’ teci pang dingte kuama tungah a malmal in hilh tuan lo hi.
Sum neite’ tungah a zahnih nasep ding om hi. Pasian in amaute’ tungah hih sumte a ap hi a, Pasian’ nasepna a mainawt nading vai khempeuhah vaipuak nei uh hi. Pasian thumaan in nuntakna nei kha khempeuh khamkhau kual zangin Pasian tokhom tawh hen khawm ahih manin mihingte in Pasian piak thahatna tawh ahih zawhzah in sem ding uh hi. Pasian’ thu LaiSiangtho thu pen a gamla munte-ah vahilh dinga, teci pangin Christ atheinai lote’ kiangah kizeel sak ding uh hi.
Mihingte’ tungah thupha dingin Pasian in sum leh paai neihsa tampitak ap hi. Mi dangte leh amau aading mahmah in thupha ahih sangsik in thaangkam bang hongsuak ta hi. Pasian hongpiak neih leh lamte in nang aadingin hong nawngkai sak a suak kha hiam? Nazat dinga Topa’ hongpiak sum leh paaite in Pasian’na a sem thei lo dingin nang hong hencip kha hiam? Topa’ neihsakep siampa khat hihna tawh hong ap sumte in na thuneihna leh nazat theihna hong tawmsak in Pasian tawh na sepkhopna pan hong khawl sak kha hiam? Vantung sumkholna sungah nakhol dinga hong ki-ap sumte na ukzawh nadingin na innsung bekah om hithiat na hi hiam? Nasep ding om kei ci-in paulap nazong thei kei ding hi. Sepding tampi om hi. Na inn hoih sungah nuamsa-in na om kha hiam? Topa a it mite’ aading a kibawl khol vantung inndeite ngah ding hi ci-in kha mangthangte’ kiangah gen lo na hi hiam? A kisia thei lo gamh ngah nadingin na neih na lamte sup ngam huai lo a hiam? (R&H, July 21, 1896).
