LESSON 3 *October 11-17
ZE-ETNA Nangzo
SABBATH NITAK
TU KAAL SUNG SIM DING:James 1: 12 13; Late 119: 11; Pian. 3: 1 -6; Titus 3: 5 7; Rom.
13: 12; Eph. 4: 22.
KAMNGAH: A hoih takpi mah hiam, ci-in sinna a thuak ciangin a nangzote a hampha
mahmah ahi hi. Tua bangin a nangzote in, amah a ittte tungah Pasian in a piak dingin a ciam nuntakna lukhu a ngah ding uh hi (James 1: 12).
Ze-etna tawh kipelh kuamah om lo hi. Ze-etna nangzo kei lehang, maizumna, siatna tawh kipelh lo hi. Ze-etna sungah a puk kha lo ding ngaihsun napi, thaneemin siatna sungah a pukkha
mi tampi om hi. Ze-etna sungah a awkcip mi in, lamet bei, thanem thei hi. Ahi zongin ze-etna a kantan zo dingte ihi hi. Bang zahin mawhna tawh kidim kha phial mah taleng lamet bei ihi kei hi. Bang hang hiam cihleh Khuavak Pasian in mawhna khempeuh sangin lian zaw hi (James 1: 17). Amah bek mah in hong zosak thei hi. Ze-etna om takpi a, mawhna zong om takpi hi. Tuate a do ding ihi hi. Ahi zongin Pa Pasian in a hong siasak thei ze-et bawlsiatnate hong zawhpih hi.
SUNDAY * October 12
ZE-ETNA ZUNGPI
Sim in James 1: 13, 14. Pasian in kuamah ze-et lo hi, cih thu bang hangin thupi hiam?
Koi panin ze-etna kipan hiam? Ze-etna kipatkhiat i theih manin, ze-etna zawhzawh nadingin koi bangin hong huh hiam?
________________________________________________________
James in limtakin a hong hilh thu in: Pasian kiang panin mawhna hong pai hi lo hi. Tua bang mahin ze-etna zong Ama kiang pan, hong kipan hi lo hi. Siatna panin ze-etna hong kipan hi. Mihing in mawhna tawh kidim hi a, tua mawhna a do ding ihi hi. Tua hi-in, lungsim panin siatna hong kipan khia hi. Kuamah in i za nuam kei zongin, a taktakin, siatna bawl ding a tel ngiat ihi hi. Kuama hong sawl hi lo hi (Rom. 6: 16 18). A hoih lo, a sia nate lamah i lungsim awn zaw hi. Sabengte le nga bengte thangsiah bangin siatna in hong man nuam hi. Pumpi cilesa deihnate in hong ukcip nuam den hi.
Sim in Eph. 6: 17; Late 119: 11 le Lk. 4: 8 sim in. Bang thu pulaak ciat uh hiam? Koi bangin
ze-et bawlsiat zawhtheihna tawh kizom hiam?
________________________________________________________________
James in ze-etna le mawhna kibang lo hi, ci-in kitel takin hong hilh hi. Ze-etna i thuak leh, mawhna hi pah lo hi. Jesuh in zong ze-etna thuak hi. A thupi-in ah, ze-etna hi lo-in, tua ze-etna i do zia siksanin, a mawh le mawh lo kitel hi. A khial thei mihing ihih manin, tua in, siatna hi pah lo zaw-a, tua a khial thei i mihing hihna in a hong ukcip gawp ciangin mawhna ahi hi. Tua hangin, Topa in a hong piak kamciam in: tua kamciamte kei ading hi, ci-in upna tawh a sang khempeuh in ze-etna zozo ding uh hi.
Ze-etna zo lo cih pen i khensatna tungah kinga hi. Mihing khensatna hi kei leh, bang hangin mimal in thukhenna thuak thei ding hiam? Nisim nuntakna ah bang thute in, a hoih lo nate i teel khak ding panin hong kem thei hiam?
MONDAY * OCT. 13
I SUNGAH MAWHNA A PAAI CIANG
Sim in James 1:13 15 sim in. Bang hun ciang ze-etna pen mawhna suak hiam?
________________________________________________________________
Mawhna tawh kisai Greek kammal ah mawhna tawh kisai kammal a zatte in, a hoih lo, siatna khat peuh ngaihsutna panin, a hoih lo, siat gamtatna pusuakkhia hi, ci-in pulaak hi. Naupaaite bangin, siatna i sung panin hong khangkhia-in sihna dong hong tunpih hi (James 1: 15). A taktakin si lo-in a nungta ding i hi zaw hi (Rom. 7: 10 -13) Cancer natna bangin,mawhna in hong susia hi. Mawhna hangin siatna tawh i nungta hi. Siatna tawh i kidim hi. I pianzia, siatna tawh kidim hi. Ei le ei-in kuamah i kikhel thei kei hi.
Sim in Pian. 3: 1-6 sim in. Koi bangin Eve in siatna thuak hiam? Bang in mawhna
sung tunpih hiam?‘
_________________________________________________________________
Pasian muanlahna in mawhna zungpi hi. Satan in tua mah zangin vantung mi khempeuh, seh thum suah seh khat khem zo hi (Mang. 12: 4 -7). Eve lungsimah Pasian' zia le tong muanlahna hong om hi (Pian. 3: 1-5). Nek loh ding singgah gei ah vapaina in mawhna hi lo hi. Singgah lokhia-in, nekna in mawhna hi. Ngaihsut khialh manin thupalsatna in zompah hi (Pian. 3: 6). Satan ngaihsut bang mahin, Eve in hong ngaihsun hi. I sung, lungsim panin mawhna hong kipan khia hi. Eve bang mahin thupiak palsat manin hamphatna ngah kha thei dingin i ngaihsun hi. Tua bangin ngaihsutna tungtawnin siatna kipankhiapah hi. I khialh khit ciang, bangci bangin siatna thuak kha i hiam cih i tel kei hi. A taktakin, phal i hih manin siatna in hong uk hi. Kuamah in zawhthawh thu tawh hong tawsawn lo hi. Satan' hong ze-etna khempeuh thungetna le a nungta upna tawh i zo zo thei hi. Siatna i pelh thei hi.
Ze-etna khat peuh natuah ciangin paulap ding om nuam pha diak hi. Mawhzolna na zuih leh, nangma deihtelna le khensatna tawh a zui na hi hi. Kuama hang hi peuh mah lo hi. Kuamah ngawh theih hi lo hi. Ngaihsutna panin khensatna in zom to a, siatna in hong zo gawp ahih manin mawhna in siangthona vukcip hi. Ellen G. White, “Christian Privileges and Duties,” Signs of the Times, Oct. 4, 1883.
TUESDAY * OCT. 14
A HOIH KHEMPEUH LE A KICING LETSONG
“Sanggamte aw, mite khemsa-in om kei un. A hoih thu le na khempeuh, Pasian kiang panin hong pai hi a, vantung khuavak a Piangsakpa ahih manin amah kikheel ngei lo a, Amah a kihei manin khua zong mial tuan lo hi.” James 1: 16, 17.
Mawhna in sihna hong tunpih hangin, Pa Pasian in nuntakna bulpi hi. Amah in vantung khuavak a Piangsak Pa (James 1: 17); na khempeuh a Piangsak Pa hi (Pian. 1: 14 -18). Nunna thak hong guan Pa hi. Tua nunna in a lian penpen letsong hi (James 1: 17 le John 3: 3 enkak in). Pasian in ama hehpihna tawh eite a hong tankhia hi, ci-in Paul in a gen bang mahin James in zong tatkhiatna pen piakkhong hi, ci-in gen hi (James 1: 17). Tatkhiatna, nunna thak i cih in Pasian in ama geelna bangin a sepkhiat, eite adingin hong koihsak ahi hi. “Ama piansakte khempeuhte lakah eite a masa pen i suah theih nadingin thuman thutak zangin ama utthu tawh eite a hong piangsak tawm ahi hi (James 1: 18). Cihnopna ah, eite a nungta tawntung dingin Pasian in hong deih hi. Tua dingin i pianma pek nangawnin geel khin hi. Tua hi-in, tu le a tawntungin nunna thak tawh a nungta dingte ihi hi.
Sim in Nunna thak tawh kisai, James thute in Paul le Peter in a gente uh tawh koi bangin
kizopna nei hiam? Titus 3: 5 -7; 1Pet. 1: 23
_____________________________________________________________
James, Paul, Peter le Jesuh in nunna thak le tatkhiatna a tonkhawm hi, ci-in hong hilh uh hi. Pasian geel tatkhiatna in mawhna suksiat leitung le vantung hong kizom kiksak hi. Mawhnei mihing hanciamna tawh mawhna dim leitung le vantung kizopna piangsak thei ngei lo hi. Mawhnei lo Pasian in mihing in a hong nuntak ciang bekin vantung tawh kizopna nei thei i hi hi. Topa kammal Lai Siangtho in Pasian hong piak nunna thak hong nei thei sak hi. Vanglian khuavak Pa Pasian thuphate ngah dingin a kilawm lo pipi mah, hong pia veve hi. Khrih in amah le amah a hong kipiak khit nung ah, nunna thak hong guanin, tua sangin a hoih zaw a hong piak ding om lo hi.
Pasian in bang vantung thupha hong pia hiam? Bang hangin tuate i ngaihsut ding thupi
hiam? I phawk khak loh hun ciang, bang piang hiam?
WEDNESDAY * OCT. 15
HEH PAHPAH KEI IN
Sim in James 1: 19, 20 sim in. Bang thulaigil hong hilh hiam?
__________________________________________________________________
Pasian kammal in vanglian hi. Tua bang mahin i kampau in zong na tampi sukha thei hi. I kampaute, pau kei zaw leng maw, i cih hun om thei hi. Kammal khat in siatna tampi piangsak hi; hehna in siatna piangsak hi, ci-in thei pipi mah, tua bangin i gamta kha zel veve hi. Ei tha tawh tua bang siatna panin i suakta thei kei hi. Tua hi-a, Pasian' hong hopihna ngai tawntungin, Aman hong puah theih nading i phal kul hi. Pasian' hong hopihna aw i zak theih nadingin, ngaihsunna aw ging tuamtuamte khakcip phot a, lungsim daaihna tawh Topa aw i ngaih kul hi.
Tua hi lo-in, Topa hong hopihna banah, mi khat ii hong hopihna aw i ngaih loh ciang, siatna, buaina kipanpah hi. Inn sung, biakinn sung, nasepna munte ah khat le khat kihopihte kithudon kei leng, buaina kipanpah thei hi. Buai-na hong om ciang, kitot kiselna, hehna in zompah hi. Hih bang omziate in Pasian' dikna gah kici thei lo hi (James 1: 14 -15). Tua hi-in, James in Pasian dikna le mihingte hehna kilangdo hi, ci-in pulaak hi. I mihing hihna bulphuh den hi lehang, Kha Siangtho in i sungah nasem thei lo ding a, siatna lam manawh tawntung i hi ding hi. Vanglian Khuavak Pa Pasian' puahphatna tawh nunna thak nei mi in, a kampau kidawm hen, ci-in James in hong hilh hi.
Kampau tawh kisai Pau. 15: 1; Isaiah 50:4; Eph. 4: 29; 5: 4; Kol. 4: 6 sim in.
___________________________________________________________
Mi khat ii kampau in a hong hehsak hun ngaihsun in. Kampau in a hoih, a sia piangsak thei ahih zia na phawk hiam? Bangci bangin kampau kidawm ding na hiam? Bang hangin i paukhiat ma-in ngaihsut phot ding thupi mahmah hiam?
THURSDAY * OCT. 16
UPNA TAWH HOTNA NGAH
Sim in James 1: 21 sim in. James ii pulaak “Thu” bangci bangin na tel hiam?
_________________________________________________________
James in upna le hotkhiatna kizopzia hong hilh hi. A sianglo, a hoih lo nate nusia-in, siatna, mawhna panin kihemkhia ding hong hilh hi. “Nusia” “hemkhia” cih kammal in Khrih tungah ki-apin a hoih lo zongsatna khempeuh nusia ding cih thupiakna ah kizang mun mahmah kammal ahi hi (Rom. 13: 12; Eph. 4: 22, 25; Kol. 3: 8; Heb. 12: 1; 1Pet. 2: 1). Puansilh khat i suah khiat bang mahin siatna, a hoihlo nate suahkhia ding cihna hi (Sawl. 7: 58); “mawhna niin bannna khempeuh” suah khia ( Isaiah 64: 6) ding ihi hi. Nunzia hoih le a sia nunna” Mizawngte silh puan sia” le mihaute suah puan kang, puan manpha tawh James in na genteh hi. Khrih thuhilhna bang mahin, James in zong, a kimu thei puatham hoihna bek sangin i lungsim, i nuntakzia a siangtho ding, Pasian in hong deih hi, ci-in hong hilh hi.
Lai Siangtho Lui sungah puansia (ryparos) cih kammal mun khat bekah kimu hi. Zechariah 3: 3,4 ah: Siampi lian Joshua in mawhnei mite limcing hi. Pasian in Joshuapuan niin suahkhiat sakin puan siangtho silhsak hi. Hih in mawhmai-na le siangthona limcing hi.
Khrih in mawh niin baanna tungah puan siangtho hong silhsak hi. Kuamah in puansia tungah puanpaak silh thuah lo hi. Zechariah bang mahin puan siangtho a hong silhsak nadingin i puanninn hong lakkhiatsak hi. Khrih dikna puansiangtho i silh ma-in mawhna nei lo-in om ding cihna hi lo hi. Tua bang hi mawk leh, kua in hotkhiatna ngah ding hiam? Khrih i sann khit ciang, i khialh khak leh, hotkhiatna ngah thei nawn lo cihna zong hi tuan lo hi. A hong hilh thu in: Khrih tungah kipum ap ding, nisimin mawhna thute ah misi bangin, Khrihmeel suun dingin, na lungsim kongkhakte hong khia-in Amah kipuahphasak ding cihna hi.Tua hi leh, Khrihdikna puan a silh ihi hi.
Sim in James 1: 21 sim kik in. A nuntak pih thei dingin koi bangin kalsuan ding na hiam?
Lungtang tungah Topa kammal gelh, cih thu koi bangin na tel hiam? Koi bangin gelh ding na hiam?
FRIDAY * OCT. 17
SIMBEH DING: “ Repentance,” in Steps to Christ, 23 36. Satan ukna sung pan suahtak nading
lampi in tatkhiatna lampi hi. Mawhna hanga a dah, a kisik takpi mite in siatna pan, Khrih in honkhia lo-in a om kei ding hi. Khrih in mawhna susia dingin hong pai hi. Mawhna kisik mite tungah Kha Siangtho om hamtang ding a, siatna tawh kipelh sak ding hi. Ellen G. White, The Desire of Ages, 311.
Khrih, Honpa-in sang takpi na hih leh, nangma phattuam ding sangin midangte' phattuam nadingin na nungta zaw ding hi. Khrih hong itna, Ama hoihna gen nuamnasa ding hi. Sep dinga hong kisawlte sem lo-in na om kei ding hi. A mangthang ding mite in nunna ngah ding nasep theih bangbang sem lo-in na om kei ding hi. Kha Siangtho tawh kidim na hih nak leh, angsung noptuam nading na zong kei ding a, mite ading gah tampi na gah ding hi. Kha Siangtho in na gamtat zia le tong hong puah ding hi. Na upna hong khang zaw semsem ding a, na lungmuanna kip semsemin, itna kip na nei tawntung ding hi. Khrih zia le tong, a siangtho, a it huai, a deih huai nunna na nei thei ding hi.
KIKUP DING DOTNATE:
1. Kampau khat ii sep theih thute ngaihsun in. Bang hangin tua bangin vanglian hiam? Koi bangin kampau kitelkhial kha pahpah hiam? Khat vei vei ciang, i gen thute sangin, i genzia a thupit hun om hi lo hiam?
2. Na hoih khempeuh Pasian' hong piak hi. Ama' hong piak khempeuh lak pan a thupi pen in bang hi ding hiam? Bang hang hi ding hiam?
3. James 1: 12 21 sung sim kik in. Bang thugil hong hilh hiam? Bang lametna le kamciam hong kipia hiam?
4. A hoih lo lunggulhna in mawhna, siatna piangsak hi. Tua in sihna hong tunpih hi. Tua hi napi, bang hangin siatna pelh lo i hiam? Mawhna neu ngaihsut khak loh ding bang hangin thupi hiam?
5. A um zo taktak nailo mite tungah Ellen G. White in bang hong hilh hiam?
