1 Tel zon na in nei behlap zaw un: “ Lawm aw, nong kawi ciangin, ka kawng nuai siah, hong kawi vet ken maw”
Ni dang lai in ah, khua khat ah, Tawmi te leh Mihing te teeng khawm in ah, nungak , tangval te kithei khial in, kingai in, kiteeng kha pah pah hi, ki ci hi. Khat vei mihing nungak khat in, Tawmi tangval te ahoih mah mah khat hong lengla, mihing mah sa in, na ngai a, kiteeng kha uh hi. A kiteen uh alup khop cil uh nitak in ah, Tawmi pa in ah, a zi kiangah, “ Lawm aw, nong kawi ciangin, ka kawng nuai siah, hong kawi vet ken maw” ci ngiau mawk hi. Mihing nungak mothak nu zong, alung nuam lo zaw sem in ah, a lawm pa a ih mut khit teh, kaang tak in a tawbo a vazawt sak leh, mei na nei ge ga mawk a, amah zong thokhia in ah, zuntha ding kibawl in ah, a inn lam vuah tai pah ving veng hi, ci hi. Tai pah kei leh, zing meh ding khawngin, sual pah khamawk ding ahih teh, a pil ai ve! Suak ta hi.
Tua mah bangin ah, hih leitungah Pasian’ man bia(Sabbath Ni) leh, Pasian mah bia na pi a, aman lo(Sunday Ni) lampi tawh a bia hel se mitampi om hi. Tua te in ah, hih thu man gen na, pawldang te in hong zak ciangin ah, mann zaw sa in, kikhel pah pah uh ahih man in ah, pai kei un, va za kei un, ci’n khaam thei uh hi. Tua te pen Tawmi pa’n amei alawng khak ding lau tawh kibang hi ci’n phawk un la, vazak loh sang sik in ah, tel zon na in, nei behlap zaw un, bang hang hiam cih leh, zing meh ding a hong deih te lo ngal in ah, va za kei un, ci aa kham na ding thu om zen zen lo hi.
2 Dawimang pa hong khem na I:
“Leitung satmong kah, Phazaa tung muu dii, Myan myan la khuh khuu”
Ko Tonzang ah, ka neu lai in, dawi kamsang khat numei om in ah, mite aci anat ciang in ah, kamsang dong niai, ki ci in, dawi sa te in ah tua kamsang nu lup na tungah lum sak in ah, bel tung mut leh, amah pen alup na pan in ah, van va kah thei ci’n kigen hi. A van kah na gim lua in ah akhua ul sa, suak hi ci’n ah, a khua bang hong ul pek pak takpi thei hi. Tua teh vantung ava tung ciang in ah, Kawl kam lah hibuang hi khol lo khat, “Leitung satmong kah, Phazaa tung muu dii, Myan myan la khuh khuu” ci nong leh, vantung tung ta ei, ci in ah, dawi sa te in ah, beltung mut sungah, cina pa’ min lo in ah, tua leh kam sang nu aw, to te in ah, hih ih cina pen kua te mat hi a, bang zah in tan leng hong khah thei ding uh hiam? Cih hong dong dih oo…ci uh hi. Tua leh kamsang nu in ah, aa…to te in ah, gam gamla te maat hi’n, sial sawmthum in hong tan uh hen, a ci ve peuh hong ci kik hi.
Tua teh dawi sa te in ah, tuann vai khat sam in ah, tuan vaii pa in tung man va la in ah, sai lungtang hual in ah, tang sawm thum hual in, azang mek pek in, amai sik in, sial khat, ci zel in ah, sial sawm thum phiikphek tungah lui in ah, a va hawl ding dawi te’ kianga, ava tun ding in ah, daakbu te, zaam bu khawng te aliim suai in ah, tua phiikphek va lui uh hi. Tua sailing tang te pen, dawi te in sial sa hi, ci a, a um uh hi ta zen hi.
Ka neu lai khat vei ka lawm te khat uh hong cina ngei uh in ah, sial sawm thum aa lut ding hong hitak pi in ah, tua leh ka lungsim sungah bang ngaihsun ka hiam? Cih leh, nungak melhoih, acidam, athahat, te zi a kineih teh, sialpi nuta bang kipia bek ci leng, hih naupang no khat sial sawmthum a tan ding cih ngiau mawk pen, kiman zo thong ding hiam? Si ahih leh zong si suk mai zaw leh met zaw lailo ding hiam? Ci’n ah na lungkham peuh mah zen zen hing.
A hih hangin ah, tuan vaii pa in ah, tungman vala in ah, sai lungtang hual in ah, a zaang mek pek in, a mai a khutpi cin tawh sik in, tang khat sial khat, tang nih sial nih, hong cih meng meng teh, kei zong om khong thei lo in ah, Eh! Hih te dawi te’n sial a mu maw? Ka cih leh, ai ve hong ci lau pian nong hi. Tua teh kei zong, ah ke’n a sial tak tak ding ka sa a hi ven, ka lawm cidam’ na ding sial za hong ngen uh zongin ah, kei man sii ning ei, va hual hual mai ning ei, va ci kha zaw zen hing. Tua leh mawk mawk naupang om peuh in, hong ci uh hi.
Hih pen mihai pen pen te Lai Siangtho cih bang, gumpa cih bang a za ngei kei lo; Lawki te akhem na a cial nuai nung pen hi. Dawi te pen bel vantung mi kimlai, a za kia dawi a hong suak hibek a, sai lungtang pen sial sa ngei het lo ding hi. Dawi te amit ciim mah mah in ah, dawi mitlim langh bulh cih bang zong kimu ngei peuh mah lo hi.
“ Aaa…Kei bel lungmawl kei veng in ah, a lungmawl tak tak nang nai ve maw, ciai ciai bek”
Ih pu Zil Thawng, dawi sa lian minthang pen pa in la na phuak in ah;
“Zin aw ee, zin lungmawl aw, mantung sawm siala ka bawl, sial na sa in,
Mantung sawm sial in bawl ing ee, zin tual vatuan aw cii’ng”
Ci’n la na phuak hi.
Tua la pen khiat na nei mah mah in ah, khanglui te in ah, zu nekna lam vui te bangah, nitum kuan, tuang dung zui ni sa, khua bang ul pek pak, zugim tawh, tuibuk gim tawh, pisal te zukham sa in ah, tua lasa in ah, zin lung mawl aw, ci vau vau kei leh, tua laitak in, phung beem khawng, huan sak gawl khawng pan in, zin te laam en in hong ding suk dingin tuat leng, “ Aaa…Kei bel lungmawl kei veng in ah, a lungmawl tak tak nang nai ve maw, ciai ciai bek” ci’n na nui nui ding uh hih tuak hi.
Tua ahih man in ah, Dawi in hong khem zo lua a, sai lungtang khawng sial sa ahih teh, tua ama deih sial, sai lungtang hi lel a haksa lua khol lo, a zian tam lo ci mai leng, va pia leng ih cina pen hong dam sak thei ci’n um uh ahih teh, va pia zel in, ih biak ding Pasian bia lo in, dawi kibia zel hi. Tua pen dawi in phazo a sa na hi mawk hi. Tu a te pawl pen a dawi mah mah bia hi.
Dawimang pa hong khem’ na II:
Tu in ah, Lai Siangtho leh Gumpa cih bang a za ngeilo ve ve Lawki te akhem na leu leu ah, gua te siik in mu a, thau aa ih kap sangin zong sai lii in kap leng nasa zaw..cih cial khat hong om se leu leu hi. Hih te pawl pen in bel, dawi pen bia lo dingin, nawh khia ding cihel bilbel hi. Hat tuak ngel uh hi, dawi nawh khia zo ding pen…Tua hi’n ah gua khawng sui in ah, gua tem ci’n ah, dawi te’n namsau in mu hi, cipah hel sawn sawn hi. Tua pen a tak tak in ci leng, dawi te in ah tua cimuh hi hetlo zaw in ah, en’ tua ci muh uh hi, cih um dih mawk ih hihmanin, ih biak ding Pasian bia lo a, Ama’hong sawl ih man teh, lungkim na na hilel zaw hi.
Tonzang ah tua te pawlte hong pai in ah, 1937 kum, inn khat khit inn khat dawite hawl khia ding, mun sia, dawi sia teng bia nawnlo ding, ci bilbel in ah, NgaiiZawl khua te Vum Khai a kici khat hong makai hi. Inn khat phiatna ah, dangka pek thum ne hi. Dawi te man ding palik ci zaw zen in ah, pisal pawlkhat bang, Uniform kibang leu lau kei in ah, zeem hi. Gua tem khat tek leh, theikhuang ih cih, khat tek a letnet dinguh pia hi. Galkap buu te khat’ inn mun sia akici den kei, a huan khang ah kua vang khat ngil den in ah, phalbi lam bang the meikhu suak thei zel cih khat om se mah hi. Tua te’ khuk sia pen hawlkhiat sak ding hong ci ngei ngai uh hi. A inn liim khawng ah zuu kilup ngem ngam hi. Ko tua laitak in sang naupang, tua leh a palik te pen a uniform teng uh tawh, bel tung khat tek tawh, gua tem khat tek tawh, a huang kiimkot ah ambush dingin pang sak hi.
Tua akua vang tak tak gei ah, zo thau tawi minih a lang tuak ah, a vui khia thun in ah, a tang thun lo in ah, a kap dingin na pang khol gige uh hi. Tua laitak in ah a Vum Khai pen bikha lap pan in, inn sung lam ngaa sa in ah, zu khaihsa thawl khat tawi in ah, inn sung lam a zuu phih in ah, inn liim khawng bangah sakhi tuihup kual zua zua kei hi. A khut vasa leng ding bangin zak kem kam in ah, kilawm tham nong in ah, tua laitak in a phuisam na ka mangngilh theihloh, “ Pasian’ tapa Pau Cin Hau’ mai ah, kei hong suak ing, Vum Khai hong suak ing, tung muvan lai bangin hong laam dildial ing, pang sak pang khang gulpi kualna, thaampi kualna, kual thei nawnlo ding hi, mun sia deih lo, khuk sia deihlo, dawi sia deihlo, kau sia deihlo, Pasian’ tapa a aii choi in, Kalvary ah, ka lo kal ee, lan rawh lan rawh” a cih khit teh, kap vo leh! Ci aou mawk hi ven.
A khuuk vang ngim a zo thau tawi a na ding len lan kei te’n, a vui kia tawh akua vang hong kap leh, hong khu khia ngeng ngang kei sam hi ven, tua lak ah, ko midang te’n lah muthei peuh mah lo, “eeii…a pa uh hong tai ei, hong tai ei, na namsau bang a na man ding ahia? Sat ve” ci a, a sawl nong zen leh, a kong khang a mun kia phung a pang pa in, a gua tem tawh leilak pi hong sat ngau mawk hi ven, heii, sat lum pah ciai, a ngawng kitan ei, ci pong hel zen hi. Tua khit zek teh, “ eeii….a nu hong tai khia leu leu ei..a nu a nu, sunh oo…sunh oo, a cih leh, phaza buk lam pang pan a pang pa in, a gua zum tawh leilak sun pong hel hi ven, heii, a dipngek ah sun let pah ciai, ci leu leu hi. Tua teh a den zek leu leu teh, eeii…a ta u pa pen, a ta u pa pen, delh oo, delh oo, ci hi ven, phaitam lam gua phung a pang pa in ah, a gua tem tawh a sat leh, a zadang bek na sat kha mawk ve le, a si zo kei ve leh, delh ve delh ve, sat lai ve ci nong zen in, a khe sat kha lak lawh ve cin, tai suak hiau, pha zo nawnlo maw…dah si hang ei..suang pal te va bel in ah, hong kuan kik in, hong sim thong leu uh mataw…dah zen si hang ei…ci ngau ngau kei zen hi.
Tua pen mitsal liang a ko ka na et uh hang, mu kei lo mawk in ah, ka lungkim zo hetlo pah hi. Ka kianga ka u te khat ka dot leh, kei zong mu het kei mah veng aw, hong ci hi. Ka sak vuah ka nuno te khat naupua khat innka ah ding in ah, ko bel tang ban dawn pan a ka et uh ci leng, tua leh no na mu uh hia? Ka cih leh, bang en muh kul zen zen, dawi sa pa’n mu peuh leh a phazo ve le! Hong ci pah malam hi. Pisal tua zah ta, nungak tangval tua zah ta, tha 500 bang bei mawk ding ahih teh, tua teng pen sun tha paai a, zu peuh ne in ah, a bei khia hon khat aom lai dep, zuau thu bek bek tawh kikhem a nitum zen cih ciang in ah, sum lua mah hi hang.
Dawi in hong neu khem peuh mah in, zong hong khem zo tham ngiau mawk in, tak sang het hat hi hangh. A tak tak in cileng, gua te bang ci dawi in mu thei mawk ding, gua te sik in mu ahih mawk leh, gua sik in mu leh, sik te banga mu leu leu zel ding? Sik te suang in maw? Tua leh suang te bangin mu zel ding? Hih zahta a dawi hong khem na pen, Pasian’ thu ih zak nailoh man hi. Lawki sunga dawi’ hong khem na cial nih, amasa pen sai lungtang te, sial sa in, tua te va pia in dawi va bia. A nih na ah, gua te sik sa in, amah bia nawn lo in, ih kianga om dinga deih lo in, nawh khia..gua vive lek kei.
Dawimang pa hong khem na III : Pasian’ thukham nambat 10 na phel nih suah in ah, 10 mah cing kik sak uh hi
(Pasian’ thukham 10 te’ lak aa nambat nih na in ah, milim peuh mah abawl in bawl ken la, a mai ah kun in bia ken! )
Tun lawki te akhem na bang ahilo, Khristian a kici, Lai Siangtho zong mukha, gumpa zong thei kha, hina pi hang a, tua te lak a hong khem na acial dang te, en to lai leu leu ni!
Khristian kici te gi gu bang hong ci khem hiam? Tapi daw aki ci a bawng bawng te laka a ki inn tek sak mah mah pawlpi gol pen pen te ahi, pawlkhat in ah, amau’ makai pi pan pen, Pope ci in ah, Zeisu cia apha thei in, gen uh hi. Hih leitung a Pasian’ tapa Zeisu a om lai a, a aanaa liat cia in lian hi, ci in amite uh um sak uh hi. Pasian’ thukham khawng zong laih leh, Pasian’ thukim in, mang lel ding hi, ci’n um uh hi. Nipi ni khawng zong laih leh, Pasian’ in thukim pih in, mang zel ding hi, ci’n um sak uh hi. Tua ahih man in, amakai pi pen pa, leitungah Pasian in a zangh uh hi in ah, mi’ mawh na khawng maisak in ah, milim khawngte, Mazih lim, mi siangtho te lim leh Topa Zeisu lim khawng biakinn ah koih in ah, mite in tua atak tak pen, a zahtak na un, tua milim pen bia leh phamawh lo hi, ci sak in ah, milim biak na khawng hong nei uh hi. Pasian’ thukham 10 te’ lak aa nambat nih na in ah, milim peuh mah abawl in bawl ken la, a mai ah kun in bia ken, ci a akham na pen, phiat khia in ah, Thukham 10 pen 9 hong pha ding ci leng, tua pen nambat 10 na phel nih suah in ah, 10 mah cing kik sak uh hi.
Hih pawlpi te in thuman amuh theih loh na ding in ah, Lai Siangtho pen Phunggi te’ lo ngal in, sim thei lo ding, a khiat na khawng bang khawng te, mawk gen theilo ding ci’n kham pah malam hi. Tua man in, milim peuh mah longwah bia lo ding cih khawng te thei se lo, phunggi te’n a gen bang bang, um lel uh hi. Genteh na in phunggi te’n zingsang na maiphiat uh ciangin ah, na zun uh tawm kha ta hel ding ci leh zong, tua bang mah a ahel den kei ding te uh hi lel ngiau mawk hi.
Dawimang pa’ hong khem na IV: LST in bang gen hiam cih en nawnlo
Tu in, tua protestant; Topa’ migit na, migi sak lua lianga asang khial te’ lak ah, dawi’ hong khem na, cial dang khat hong paito lai in ah, piang thak ci het hat leu leu in, tua piang thak te’ om zia pawlkhat, kei bel va kihel ngei keng in ah, Kaptel khua ah sikha lamdang khat om, mun tuam tuam ah zong tampi om hi. Ai hang tu a Kaptel aa pen tel zak pen ka hih teh, hong gen ning in ah, Pawl tuam tuam te in tua sikha lamdang pen bawh khiat ding va hanciam tek uh ci, ai hangin thungen in ah, peuh khukden vial leu uh, a pang khawng beng ek, cih bang suang tum khat peuh in ah, a si zolo liang lo ding khawngin deng ek, cih bangin hi zel a, kua ma’n hih meng meng ngam lo hi. Tua laitak in ah, piang thak pawl, pawlkhat vapai in ah, nawh khia ding hi hel leu leu hi. Thunget bek zong hilo in ah, tua leh anawh khiat ding uh ciangin ah, amakai pa un muthei in kineih hel se in ah, ei’ tai ei, tai ei, calendar ah lut ei, thakhat in alawm te tai in, calendar alom atangin thup bunuai in ah, meikhuk ah khul uh hi, ci. Tua leh, ei…taikhia leu leu ei, vut tui um ah lut ei, delh meng mengin la, a gong huu oo. A vuttui taw a om lai teng tawh, lok gawp oou. Taikhia theilo dingin, agong huu ou. Lok lum oou, ci in ah, vut tui um sungah, dawi kiguang, agong hu in ah, a vut tui cian lai teng tawh, amit khawng siip gawp in, lok gawp in, lung ngam a si dingin, lok gawp uh hi, ci’n ah atel theih mah mah khat in, hong gen hi.
Ka ngaih sut sut ciangin ah, hih khem na pen, khem na sang mah mah hi na pi’n, niam mah mah zel hi. Bang hang hiam cih leh, LST leh Topa Zeisu min a zangei nai kikeuh hiau lo, lawki te a khemna den a ih gen, cial nih na, gua te siik in mu a, sai li aa ih kap teh, thau a ih kap sang nasa zaw, a ci hel se zen te’ khem na pongsan in pai hi. Tua te’n zong khuk sia khawng, gua tem khawng, tawh delh zak zak in ah, dawi te nolh khia ding, ka kiangah om ken, pai khia in, a ci hivet nong sam hi. Ai hangin, dawi pen bel vantung mikim lai, aza lian lua peuh mah kim lai, hong zakia in, dawi te asuak hi mawk in ah, calendar a lut in, tua pan a, calendar ih haltum khit teh, vut tui um ah lut in, agong hu cip dingin, lok ding in, lok lum ding cih bang leu leu teh, tua lawki te’ akhemna cial tung nung zaw zek pen, tua pen sen tawh hong khem kik hi hel zen cih, hih Pasian thu thei a, aki ngaih sun mah mah piang thak te in ah, phawk kha lo uh hi. Mangmu peuh om in ah, amau’ mang muh na pen, LST in bang gen hiam cih en nawnlo in ah, tua mang muh na zui pah ek mawk leu leu uh hi.
Leitunga a makai lian pen pa uh, Topa Zeisu cia in zangh in ah, tua pa gen peuh peuh zong Pasian zong thukim, ama cih bang bangin zui, ci’n um sak hi. Hih leitung ah Topa Zeisu Aaanaa neih zah nei hi, ci’n um sak hel se hi. Tua hin ah, thukim peuh leh, thukham zong phiat thei, puah pha thei, milim biak khawng te phiat, Sabbath kim lai Sunday in laih, Mazih lim peuh bawl sak, Topa Zeisu lim leh misiang tho te lim peuh a ta tak te ih it na ih zahtak na in, tua milim mai ah kun in, bia sak, ai hang Pasian thukim ding hi ci’n um hel sak mawk hi.
Pasian in vantung mi seh thum suah seh khat leh, a it mah mah avang lian aa bawl Lucifer sangin a it zawk Thukham 10 a phiat nop loh pen, phiat zo sak uh hi. Protestant te lak mah ah, LST zuih kul hi, milim biak khawng, hoih lo hi, ci a sisan naisan luang liang aa, milim bia te nusia aa, a pai khia protestant te. Tu in ah tua milim bia te’ phuat sa ahi Sunday tan na pen mah tawh lungkim to leu leu uh hi. Pope in ah Pasian’ thukham laih thei zen zen kei, ci nuam na pi uh, Pope leh Kumpi te kop aa akikhek, Sabbath kim lai Sunday aa bawl uh, tua pen mah zangh in, Pasian biak na ah lungkim hel leu leu uh hi. Tua pen tapidaw sa te hina pi, Satan in, ahong khem zawh na ahi hi. Tua pen a hong khem na atung nung pen kici thei ding hi. Ai hang tua sang a nasia zaw khat hong pai in ah, piang thak te, tua piang thak te pen in ah LST don nawn vet lo leu leu in ah, LST in bang gen hiam cih om lo in, mang lamdang peuh hong man uh in, mang mu peuh hong om uh in, kamsang peuh hong om uh in, tua te cih bang bang zui hiau mawk leu leu uh hi.
U te nau te eite, Pasian tawh maitang kimu aa, kiho om lo, tua man in Pasian’ kiangah, ih deih va ngen thei, Ama hong awi na pen a awging en za pah lo ih hih teh, LST sung dong in ah, Topa Zeisu kuudai dawimang pa in na na ze-et lai in ah, tua ci in, LST in gelh hi., tua ci kigelh hi, ci’n na phi zel ahih teh, PASIAN’ tapa takpi in LST kammal man aa phi ahih leh, ei zong ih din mun pen LST kammal bek zat ding Pasian biak na ah lungmuang huai hi. IH lawm te khat in amang mu in ah amang mu na ah amuh cih bang lel te, muan huai zolo hi. Hih pen phawk khial kha peuh mah kei ni. Bang hang hiam cih leh, Pasian tawh maitang kimu lo ih hih teh, maitang kimu aa ih kiho taang dingin, LST na na om hi. Tua LST sung aa agen tawh kibang lo pi pi te, kamsang hing aki ci zongin um kha mawk kei un, a nung zui kha kei un, tua kamsang pen, dawi piak, Pasian’ aa ding lim pong san sun aa a piak, en Pasian’ aa sa kha, ai hang amang muh na pia pen dawi na hi gige, tua ding aa dawi hong khem na ahi hi.
Pasian in leitung abawl phet in, leitungah mawh na hong lut khak leh gup kik ding ci’n ngiim sa in na nei kin ken uh hi. Mawh na hong lut takpi ngeii in ah, Pasian mah hih na anei tapa Zeisu Khrish lo ngal, mimawh te gup kik na dingin ah, agum kik zo ding om lo ngiau hi. Topa Zeisu in hong gum kik lo hi leh, bang zah hanciam na tawh a thuman ih zon, ih zuih hangin, ei leh ei in akisuak ta zo ngei nawnlo ding mun kitung hi. Mihing te pen zukham aa ken sang pi pan aa kia tawh a kibang hi’n ah, amah in bang zah in ahan ciam hangin, ken kho tungah a tung to zo kik nawn lo, ken kia bang ih hi hi. Ai hangin Zeisu in hong hehpih ahih man in ah, ih luai toh kik na ding khau zang khat a ken kho pan in hong khiat suk tawh kibang hi. Khau hong khiat suk in kel lei hong dawh sak ahi zongin, ei na luai nuam het kei mawk leng aa, hi mawk leng, gum pa in akhau zang a kaih toh kik hangin, a luai nuam lo ken kia pa pen, hong paa to het thei tuan lo ding hi.
Dawimang pa’ hong khem na V:
Ezekiel 22 : 26 – A siampi te un ka thukham palsat in, a siangtho biakna nate ninsak uh hi. A siangtho biakna nate le amawk mawk nate khenna mel nei lo uh a, a ta te uh tungah a siang le a nin a kilamdangna zong hilh nawn lo uh hi. Sabbath te zong don in nei lo uh hi. Tua te khempeuh hangin Israel mite in kei hong zahtak lo uh hi.
Tangval no khat in lawm ngai a, a lawm nu mai ah a hoih na tak san kidawk sak nuam den hi. Khat vei a lawm nu kiangah ahawh dingin kizeem aa, sabuai tungaa liim langh neu tawh aki et leh, a maitang leh a sam hiat khawng teng bang mah siat na om lo in hoih hi. A hih hangin liim langh neu in a pumpi vek in lak nai lo aa, a puan angkhih khat atung leh anuaii, kikilh kha in apuan ton kheu khau hi. Tua bang lel mah tawh apai leh, a lawm it pa khat in kong vang gei ah, liim langh sau khat tawh na pang aa, akhe dong aki mu sak, liim langh lak in ah, lawm aw, na aangkhih khat khih khial ve teh, a cih leh aheh suak mawk in, a liim langh sut khia in, lei den na in kizaan hi. A angkhilh lah khel tuan lo in pai aa, a lawm nu kiang tung hi. A lawm nu in liim langh pi lah deng zan ta ahih teh, tua puan aang khih kilh na a man mah in ana mu ding hiam?
Tulai aa pawlpi a tampen te in Nipi man lo SUNDAY khat a na tan lak lawh sa uh ahih manin, tua akheel nop loh man bek un, thukham khempeuh bei hi, cih lam pang mite up theih na ding un, gen a cih in gen mawk uh hi. 1John 2:3,4 – Pasian ka um hi, a cih hangin Thukham te azuih kei leh, zuau gen hi. Tua mi sungah thuman thutak om lo hi, ci zaw hi.
Thuman thutak ih cih bang hiam? ZEISU HI.
Tua leh tua mi’ sungah Zeisu om lo hi, cih na hi mawk lo ding hiam?
1John 2:7 – Ka it te aw, no te aa dingin, thukham THAK kong pia kei hi. A cil pan aa na neih uh, na zuih uh thukham lui pen mah kong pia hi, ci hi.
1John 5:3 – Pasian it na in Ama’ thukham te zuih na hi, ci hi.
Pasian ka it ih cih hangin, Ama lo akhawh sak, tui a tawi sak, puan agat sak, kua mah ki om lo hi. Ama’ thukham ih zuih pihna bek loh ngal, Amah ih it na bang hi mawk peuh peuh hiam?
James 2:10,20 – Thukham 10 te khat na nial lai teng a vek aa khial na hi hi, ci hi. Gamtat na in a zui lo upna pen, a hawm pi hi. Zuih na kihel lo up na in a si hi, cih na thei nuam hiam?
Sawltak 17:30, 31- PASIAN in theih nailoh hun te, bangmah in a sim loh hangin, ih theih khit ciangin, adan thuak sak ding hi, ci hi.
Hebrews 10:26 – Thuman thutak, Thei gige aa ei deih teel mawh na bawl na pen adam sak na dingin, thoih na adang om thei nawnlo hi, ci hi.
Pawlpi manlo sia khat peuh in PASIAN THUKHAM te bei ta! A cih lel manin, bang ci a lungkim thei thong na hi uh hiam? Telsit dih un! Amaan zong un! Na ziakai man kha ding uh hi.
PASIAN’ langpang pa Dawimang pa in, leitung ulian te leh, biakna makai te zangh aa, a kheel sak; Pasian in a mite a ciamteh na kimlai, ciamteh na manlo, a hong bulh sak na hizaw ….tua pen tel theih leng a kua mah peuh in SUNDAY khawng va tan hawi hawi tei tei ding bel ut huai lo lamdang hi. Thei nailo ih hih man in kihang ngam kha hi zaw hi. Hih thuman seel na ding amaan zaw lah ding na neih kei leh, nial ding lungsim leh awlmawh lo lungsim nei kha kei un la, thuman na theih bang uh manlang takin hong zui pah un ci’n hong zawn ing.
