Mi khempeuh a lianin kipan nuam ciat hi. Ahi zongin Pasian in a neunote simmawh lo hi. Mi tulnga val vaak nadingin a kicing an leiding sangin khomun pum nga leh ngasa tawn nih thupisazaw hi. Mihaupa' sumpi piak sangin meigongnu' sumpi piak thupisazaw hi.A cineute a khankhit hangin gol kim lo leuleu hi. Zusa khat a khankhit hangin sai cia pha ngei lo ding hi. Ahi zongin sai in zusa kihta mah mah leuleu hi. Ei phaktan tawh ki tuak a i sepnate Pasian in thupi sa mahmah hi. I sepna peuhah Pasian in hong ompih ding le hong thukim pih ding thupi hi. Nasep aneu alian ahi zongin i sepna peuhah nuam i sak ding zong thupi hi. Nasep neu tawh a lungkim theilo te nasep lian tawh zong lungkim tuan lo ding hi.
Pasian in "Kua sawl ding a, ei ading kua va pai ding ahi hiam?" a cih ciangin Isaiah in" Hih laiah kei oming, kei hong sawl in" ci-in dawng hi.Ahi zong Israel mite a paikhiatpih dingin Pasian in Moses a sawl ciangin Moses in "kei hihlai ah oming. Ka upa Aaron sawl in" ci hi. Sawtpi a kinolh khit uh ciangin Pasian sawl bang in Moses in a ciangkhut a paih leh gul suak a, amahmah in kihta hi.
Moses in amuan mahmah a ciangkhut pen gu anei, hong tu thei gul hi cih thei pan hi. Tua gul amei pan a mat kik ciangin ciangkhut suak kik hi. Tua mah bang i pilna i siamna, i hauh na i gualzawh nate lei lak ah khia phot ni. I muan i suan i kepkep te tawh na i sep hangin Pasian in hong zang loding hi.
Moses in a ciangkhut leilak ah a khiat suk khit ciangin a mat kik ciangkhut pen Moses' ciangkhut hi nawn lo in Pasian' ciangkhut hi tahi. Amah in akhut sungah Pasian' ciangkhut atawi hi.(Pai.4:20) Tua Pasian' ciangkhut tawh Faro' maiah va ding a nalamdang tampi piang hi. Tua ciangkhut in a kihtaktak Faro maiah hangtakin ding sak ngam hi. I sep theihloh i mabinnate Pasian in thupha hong suak sak nuam hi.
I muan mahmah mite le na tuamtuamte hangin Pasian' thupha ki khaktan thei hi. Thagum hatna hanghi lo, vangliatna hang hi lo, ka kha thabek tawh na ma na tungzo dinghi. Thu haksa pente nagawn in na man hong khaktan zo lo dinghi.(Zek:4:6-7)
Gualzawh na pen kumpite, Siate mihaute hang peuh kisa kha thei hi. I thagum hatna ahi pilna hauhna le muan i suan i ciangkhutte leilakah khia in Pasian' ciangkhut zang zaw ni. I ciangkhut lei lak ah i khiat khit ciangin a lauhuai hong si sak thei gu nei gul ahih lam i phawk pan ding hi. Mi gensiatna, mi hawmthawhna. mi mawhsak nop na ciangkhutte leilakah khia le'ng Pasian kiangpan hong pai Kha tha tawh i ma i tun ding hi.
