LESSON 4 * October 18 - 24
UPNA LE SEPNA
_________________
SABBATH NITAK
TU KAAL SUNG SIM DING: James 1: 23, 24; Matt. 19: 16 22; Lk. 6: 27 38; Rom. 8: 2-4;
12: 9 18; 2Pet. 1:4.
KAMNGAH: Nomau kikhem tawmin thu zak bek tawh maisak kei unla, na zak bangun zui-
in sem zaw un (James 1: 22).
William Niblo pen Niagara tuizeu pi kantanin minthang mahmah hi. Niblo in a nungah mi khat pua kawmsa-in tua tuizeu sang mahmah kantan hi. Wales kumpipa tapa in
Niblo siamna, a hannsanna zong za hi. September 1860 in kumpipa tapa in zong Niblo siamna lakna Niagara tuizeu ah hong pai hi. Nilbo in tua bangin tuizeu sangpi a kantan khit ciangin, Niblo nungah a tuang ngam kuamah om lo hi. Cihnopna ah: zakna le muhna bek tawh kicing lo hi. Mi khat in Pasian um mah hi. Ama hong paikik ding zong lamen mah hi. Pasian in hong it hi, ci-in zong um hi. Tua tawh, kicing lo hi. Topa Pasian tawh kizopna nei takpi mah hiam cih pen ama nunzia in pulaak ding hi. James in hih thu mah limtakin hong hilh hi. Thu a zakte bek hi lo-in zakna bangin a nungta mi hi ding, hong hilh hi.
SUNDAY * OCT. 19
NA LANGPAN DING THEI-IN
Mi khat in, “limlang ah ka ki-et sialin na gal ka thei hi,” ci hi. James in hih thu hong hilh hi. Eite gal lian penpen in ei mahmah ihi hi. Ei le ei dinmun i kiphawk theihna in hotkhiatna lampi kipatna hi.
Sim in James 1: 23, 24 sim in. Kua thu kigelh a, bang khialhna lianpi nei hiam?
____________________________________________________________
A hoih theithei nikten puansilh silhna pen mawhna hi pah lo hi. Ahi zongin kipuah kizep nading sum le paai, hun tampi bei hi. James in ei le ei kikhem lo dingin hong hilh hi. Puatham etlawmna sangin nuntak zia le tong etlawm ding hong hilh hi.
Matt. 19: 16 22; 26: 33 35, 69 - 75 sim in. Koi bangin tua mi nihte omzia pulaak hiam? Koi bangin Khrih thuhilhnate in kilamdangsak hiam?
_______________________________________________________________
A hau tangvalpa in thukham khempeuh ka zui khin zo hi, ci-in kingaihsun hi. Ahi zongin ama lamet loh thumanna, a theih ngei loh thu, a thu bekin thukham zuihna sangin a lian zaw, Khrih in pulaak hi (Rom. 7: 7). Peter bang mahin, hih a hau tangval pa zong amah le amah kitel taktak lo hi. Dinmun kitel lo, amau le amau kimuanna in pukna piangsak hi. Siatna in a hencip noplam amau phawk kha lo uh hi. Amau le amau a kikhem ahih lam uh kiphawk lo uh hi. Ahi zongin Peter bel kikhel thei hi. Mihau tangval bel i theihna ciangah, kikhel lo hi.
Midangte hoihlohna i mu thei bilbel hi. Ahi zongin ei' hoihlohna i mu thei kei se hi. I khialhna kiphawk taktak lehang, mawh thuum lo-in i om kei ding hi. Nang le nang ki-entel pha kik in. Bang zahin Honpa na kitangsam hiam? Tua lo-in a tawntung kisia ding hi lo na hiam?
MONDAY * October 20
A UPNA BANGIN A NUNGTA MI
Sim in| James 1: 22 sim in. Topa' thupiak bangin a nungta mi dingin hong hilh hi. Koi
bangin Topa' thupiak bangin a sem mi le Topa' thupiak bangin a nungta mi kibang lo hiam?
_______________________________________________
_______________________________________________
James in a thu-in sepkhiatna le a thu nuntakpihna khen lo hi. Zui-in a nuntakpihte dingte ihi hi. Tawl khat sung bek hi lo-in nisimin thumang ding ihi hi. Topa sungah nunna thak tawh a nungta mi in, a mi thak hihna hangin Topa sawl bangbang semin a nungta mi ahi hi. Mihau tangval pa bangin a thu bekin thukham zui hi lo uh hi.
Lk. 6: 27 38 sim in. Nunzia ding bang hong hilh hiam?
__________________________________________________
__________________________________________________
“Na galte it in.” “Huh ding kisam mite huh in.” “Note a hong kihehpih bang mahin midangte zong hehpih in.” (Lk. 6: 27, 30, 36). Hi thei ding mah hiam? cih huai phial mai hi. Ei le ei tha-in bel piang zo lo mah ding hi. I galte it ding cih pen mihing pianzia hi lo mah hi. Tua hi-in Khrih in singkung namnih panin singgah namnih tawh genteh hi (Lk. 6: 43 45). Tua tawh kizui-in Galatian 5: 19 21; 22, 23, ah Paul in cilesa gah le Kha Siangtho gah ci-in khennih hong hilh hi. Sepna bek siksanin i neih khak leh kisiatna lam manawh ihi hi. Ahi zongin Kha Siangtho kimakaihsak lehang thumanna le itna gah i nei thei ding hi.
Sep loh phamawh ahih manin i sep, hong kisawl ahih manin i sep nate ngaihsun in. Ahi zongin, kuama sawl hi lo, sepnop mana i sep nate, na sungah Khrih nungta ahih manin, nasep nate ngaihsun in. Koi bangin hih thu nih kilamdang hiam?
TUESDAY OCT. 21
SUAHTAKNA THUKHAM
Sim in| James 1: 25 sim in. Koi bangin thukham ii nasep pulaak hiam?
_________________________________________________________________
James in David pulaak, a kicing Thukham, suahtakna Thukham (Late 119: 45) pulaak hi. Thukham in mawhna pan hong honkhia thei lo, hong siangtho sak thei lo hi. Thukham in Pasian deihna hong theisak hi bek hi. Pasian deihna bang nuntak zawh nading Khrih vangliatna kisam hi.
Rom. 8: 2, 4; 2Kor. 3: 17, 18 sim in. Bang in sihna piangsak thukham le suahtakna, nuntakna piangsak thukham kilamdangsak hiam?
_________________________________________________________________
A thu-in theihna bek in Khrih dikna ngah kha lo ding uh hi. Ahi zongin ama upna bangin nungta mi in diktanna ngah ding uh hi (Rom. 2: 13). Tua bangin diktanna i ngah nadingin i sungah Kha Siangtho hong omin i lungtang tungah Topa thukham i gelh kul hi. Lungsim khempeuh tawh Ama thupiakte i zuih ciangin thukham in suahtakna lampi hong suak hi. Thukham a khial hi lo-in, mihing ngaihsutna in a khial hi zaw hi.
I dinmun kitel lo, mawhnei mi ihih manin Honpa i kitangsaplam zong i mangngilh hi. Khrih lo-in mawhna thukhenna tawh kipelh theih nading om lo hi. Tua hi-in Khrih sungah a om mi in nunna thak tawh a nungta hi (2Kor. 5: 17); Khrih sungah a kisuaktasak mite ahi uh hi (Jn. 8: 36). Ama hong thupiak i za a, Ama hong it bangin eite zong khat le khat ki-it ding hong ci hi (Jn. 15: 12).
Pasian tanu tapate ngah ding suahtakna Khrih tungtawnin i ngah hi. Hehpihna tawh tua suahtakna kingah hi-in, mawhna sila ihi nawn kei hi. Tua bang suahtakna nei mite in mawhna sungah nungta nawn lo hi. Khrih sungah mawhmai i ngah banah Ama deihna bangin a nungta thei dingin nunna thak tawh a nungta ihi hi. Dikna ngah nadingin a Ama thupiakte a zui ihi kei hi. A hong kihotkhia khin ahihlam kitel a, tawntung sihna thukhenna pan suahtakna ngah khin ihih lam kitel ihih manin, Ama thupiak a zui nuam ihi zaw hi.
Hotkhiatna ngah nadingin Thukham a zui hi lehang, bang i suak zen diam? Koi bangin hih bang upna in thukham sila hong suak sak hiam? Koi bangin Khrih in mawhna sila panin hong suakta sak a, Ama thupiakte zui ding thu hong pia hiam?
WEDNESDAY * OCT. 22
A MAWKNA MAW KIMANNA NEI?
Sim in James 1: 26, 27 le Matt. 25: 35, 36 enkak in. Koi bangin Khristian cih kammal
hong telsak hiam?
_______________________________________________________________
_______________________________________________________________
Jesuh, James le Paul cihte in kimanna nei Tapidaw, thu-um hi ding hong hilh uh hi. Naupangnote tungah itna i nei, cimawh genthei, nek le dawn, silh le ten nei lote i huh ciangin eima tungtawnin Jesuh hong itna kilangkhia sak ihi hi. Mite it ding banah ei mahmah zong a it huai mi a hi ding kisam hi. Tua in Lungdamna Thupuak a dingin vanglian mahmah hi. Tua bang mi i suah nadingin sep kul, kipiakkhiatna, pumpi deihna cihte kikhalhna kisam mahmah hi. Tua lo-in, ama thuthu in hong piang lo ding hi. Biakna i cih in thungaihna le ka um hi, cih bek hi mawk leh, tua biakna in kimanna nei lo hi. Ellen G. White, The Ministry of Healing, 470.
James in biakna man tawh kisai-in a biak taktak mi nunzia (1: 26 27), ama gamtatna in pulaak hi, ci-in hong hilh hi. A diakdiakin i kampau tawntungin kithei thei hi, ci hi. Tua bang mi in kimanna nei lo, phattuamna piangsak lo kampaute, mi a sia sak thei kampaute zang lo hi. Ama lungsim, kampau ki-uk zo mi hi, ci-in hong hilh hi.
Kimanna nei biakna a hong hilhna ah, James in, meigong, tagahte kitangsapna huh tawntung ding hi, ci-in pulaak hi. Leitung mit tawh en lehang, a hong thuk kik thei lo ding mite vahuh cih pen khiatna nei lo hi. Ahi zongin Pasian muhna pan a hong huh kik thei lo ding huhna kisam mite huhna in, Khrih nungzui ihihna kilangsak hi. Lk. 6: 35; 14: 12- 14; Matt. 5: 44). Paul in zong, “ na hoih a sem thei dingin Khrih in hong thaksuak sak hi,” ci hi (Eph. 2: 10).
Huhna kitangsam mite huhna in na hun, na neihsate bangzah na zang hiam? Tua thu in, na upna in man nei takpi ahih lam pulaak hi lo hiam?
THURDAY * OCT. 23
LEITUNG MITE BANG LO-IN
Sim in “Leitung siatna tawh kisawh kha lo” cih kammal in bang hong hilh hiam?
James 1: 27. Koi bangin piang thei hiam? 1Jn. 2: 15, 16; 2Pet. 1: 4.
______________________________________________________________
_______________________________________________________________
Mi kim khat in, mi om lohna mun khat peuh om lehang siatna tawh kigamla ding hi, ci uh hi. Ahihna ciang khat om sam napi, siatna kipatna pen mite tung pan hi lo-in, i sung pan hong kipan khia hi zaw hi. I paipaina mun, i om omna munah, i sung a siatna in hong zui zui ding ahi hi. I sung a om siatna i zawh ding kisam mahmah hi. I omna peuhpeuhah i do ding i gal lian penpen in, tua mah hi pah hi.
Khrih tawh kinai zaw semsem mi in, mimawh ahihlam le ama hoihlohna kitel zaw semsem ding hi. Na lungsim siangtho leh, Khrih hoihna na lunggulh zaw kanlai ding hi. Topa le Ama kammal i deihna tam semsem leh Ama zia le tong i tel muh zaw semsem ding-a, i nunzia in Ama nunzia i suun zaw sem ding hi. Ellen G. White, Steps to Christ, 65.
Biakna man in thuman thutak hong lunggulhsak hi (Matt. 5:6). Khrih in Pa Pasian deihna a kicinsak theih nadingin, nisim in Amah tawh kizopna, ama kia-in thungen tawntung hi. Ahi zongin mite tawh a kikholhkhopna tatsat tuanlo hi. Mite' om omna munah va pai hi. Nengniam mite tawh kikhawlkhawm, gimna thuak mite huh, tawntung Lungdamna Thu pulaak cihte in Ama nunzia ahi hi (Jn. 4: 28 35).
Khristian masate in Gentilte mite gamtatzia, nek le dawn cihte zui lo-in, kilamdang uh hi. Siatna namcin tawh kidim Rome khuapi a kipan mun tuamtuamah Lungdamna Thu genin pai kawkawi uh hi.
FRIDAY * OCT. 24
SIMBEH DING: Ellen G. White, “ The Test of Discipleship” in Steps to Christ.
Thukham in a sia a pha hong khentel theisak Pasian hong piak limlang ahi hi. Topa kammal siksanin kampau, ngaihsutna le gamtat zia le tong sittel ding kisam hi. Ellen G. White, The SDA Bible Commentary, Vol. 7., 935.
Upna in Pasian thu man ding panin hong pengsak hi lo-in, upna tawh Khrih hehpihna a ngah hi zaw a, tua bang upna in thumang lo-in a hong omsak kei ding hi. Jesuh in mihingin a hong pianin, siangthona tawh a kidim mah bangin Ama nungzui mite zong, Amah bangin siangtho ding hong deih hi. Ama vangliatna tawh nuntakna siangtho, Ama deihna tawh kituak nunzia hong nei thei sak hi. Ellen G. White, Our Father Cares, 69.
KIKUP DING DOTNATE:
1. “Leitung tawh kipawl kei un,” cih thupiak in, nuntak siangtho nading hi. Siatna a bawl mi khatin kiim le paam nate ngawh ding hi lo a, sung lam siatna hang hi zaw hi. Bang hang hiam? Kiim le paam nate in koi bang din mun ciang hong tunpih thei hiam? Koi koi ah i om zongin bang lampi bek in ze-etna hong naang zosak ding hiam?
2. Hong mu ngei lo pawl khatte in hong tawng pahpah uh hi. Ahi zongin a duh theih khat , sa guh cihte pia-in, hong mu mu le-uh a sawt ciang, hong tawng nawn lo uh hi. Tua bang mahin siatna khat, awl mawh lo, kin lo-in om lehang, a sawt ciangin, siatna ahih lam nangawn kiphawk lo ding hi.
3. A um mi le a up bangin a sem mi kibang lo hi. A tawp khakna ah bang kilam dang ding uh hiam?
4. “Khrih in hong hehpih khin ahih manin thukham tawh i kisai nawn kei hi; kul nawn lo hi, ci uh hi. Hih in bang khiatna pulaak hiam? Koi bangin na nial diam?
