"Kumpite' Kumpi leh topa te Topa" ong pai kik nading vantung-a meiite omzia in alim leh meel ong lak hi. A zahtak kaai Pasian' omna mai ah daii takin amite in leitung tawh ong kinai zaw tektek-a ong kilang suksuk lim leh meel gal et uh hi. Tua lim leh meel pen avang' ong tang zaw tektek-a, vaangliatna, minthanna tawh akidim aong pai suk Zeisu ahi hi. "Vantung aom van galkapte in" ong zui suk uh hi. Mang.19:11, 14. Vantungbup pen a tuamtuam-in tang pempam-a vaangtang pha mahmah ding hi- "atulsawm lom atulsawm leh atul atul in" hi zihziah ding hi. Leitunga aom laitui, laikung, laidalte tawh zong kilakhia zolo ding hi. Hi bangin, asiangtho, alamdang vantung khuapi pen mihing' lungsim tawh geel zawh ding hilo
"Apuan tung leh akha tungah,"kumpite' Kumpi, topate' Topa," ci-in amin kigelh hi." Mang.19:16.
Vaanglian Kumpi alamdang meeilom panin ong tuaksuk laitak-in akuang meivak tawh kituam ding-a, tua laitak-in leitung liinglawng dinga kizialgawp ding hi. Leitang pen kipei kizial gawp in mualte aom na panun kikhin ding hi. "I Pasian hong pai-a, amah dai om mawklo hi. Amaa mai-ah meei husia oma, akimmkotah huihpi om hi. Amite thu akhen theih nadingin tunglam vantung leh leitung asam hi." Late.50:3,4.
"Tua ciangin, leitung kumpi leh miliante, galkap mangte, mi haute leh mi thahatte, silate leh sila ahi lote-a kipanin akua mapeuh, mual tung-a leihawm lakah bu uh-a, mualte leh suangtum lianpite kiangah, "Kote tungah hong kiasuk unla, 'tokhom' tungah atupa' maitang leh Tuuno' hehna panin kote hong liah un. Amaute' hehna hangin gimna hun hong tungta ahih manin, kua in thuakzo ding ahi hiam? a ci uh hi? Mang.6:15-17.
Ciammui, kheltatnate khawlta hi. Samsiatna leh zuau thu gen kamte daita hi. Cikziathuai lauhuaina, gimna kawmkaal ah Pasian' mite lungdamtak-in akikona aw te migilote in aza ding uh hi. "Tua ni ciangin, En un, amah pen eimaa Pasian ahi hi, eite hong hon dingin amah i ngak hi. Amah pen eima Topa ahi hi; amah i ngak hi. Amah in eite hong honkhia ahih manin lungdamin kipak ni," kici ding hi." Isa.25:9.
Leitung pen zukhaam mi bangin akivei akizial laitak-in, alipkhaphuai ahawk veva vanging aw leh leitung nate tuihual bangin kilokgawp in aom laitak-in Pasian in acitak-a Amaa mite han khuuk sung panin asapkhiatna aw kiza ding hi. "Pasian" thupiakna aw ging lianpi, vantungmi mangpa' thugenna, leh Pasian' peengkul hong ging dinga,Topa mahmah vantung panin hong pai suk ding hi. Tua ciangin, tua hun laitak-in anungta lai eite pen van kim lai-ah Topa adawn dingin asisa mite tawh hong kila khawm dinga, Topa tawh i omkhawm tawntung ding hi, cihna ahi hi." 1Thess.4:16,17. “Tomno kaal, mitphiat kaal sungin" Pasian' mite hong kikheel ding hi. 1Cor.15:51, 52. Leitung kiu li panin hong kikaikhawm mite leh akikheel khin anungta lai Pasian' tate tawh "huih lakah Topa tawh kimu khawm ngeingai" ding hi. 1Thses.4:16. "Topa in huih kiu li sung pan leh vantung mong khat pan khat kikaal ah ateel mite kikaikhawm" dinga vantung mite tawh kipawlkhawm ding hi. "Naupangnote vantungmite in anute khut sungah ap ding hi. Sihna hangin sawtveipi kikhenna anei it leh ngaih, lawm leh gualte kimu ding uh hi, Pasian' khuapi sungah lungdamna late kisa ziahziah dinga kikhena om nawn lo ding hi."
Bang zah-in athupi hotkhiatna hilo ahi hiam? Bang zah-in Avaanglian Honkhiapa hilo
Avaanglian Pasian' gam sungah om nuamlo-in, Zeisu Topa' nungzui ding lunggulhpi-in neilo na hih uh leh bel hi athuman Pasian' kammalte sim nuam hetlo ding na hihna siangtak-in ken ka um hi. Na lungsim sungah hih athuman thute lunglut takpilo-in Zeisu paina khempeuh zui nuamlo-in na om lai-siah adang laibute tawh akibang lo hi laibu sunga thute asim kha ngei nailo mi na hihna kong thei hi.
Satan in hi leitung pen azawh nading thu tuamtuam pilna tuamtuam zanga, alianpen pen zuaukhemna mihingte in asan kimciat theih nading ahilo lo-in ong khemna thute na sim khin, na theikhin tek uh hi. Tua ganhing ii ciaptehna lim na ngahloh nading ong hilhkholh, patauhna lungsim nei-a i pelh theih nading ong gennate zong ii thei khin hi. Tun' Mangmuhna 17 sunga apaktat numei ii min pen "Babylon" ahihna na theih banah taanglai Babylon hun pek-a kipan nibiakna azang, thuman leh thuman lohna akizelh, akithehthang, upna kip neilo Khristian minpua bek ahihna zong eite in i tel theita hi. Mang.18:4 sunga Pasian' gen thu taangkona sung panin zong kimu thei hi tua sungah hi bangin, ci-hi, "Keimaa mite aw, amawh gamtatna-ah kihel kha-in, agim thuakna thuakpih kha ding na hih manun hong pai khia un." Hi thu pen itna tawh hong sapna ahi hi. Amah in nang hong sam hi. Pasian' thukhaamte zui nuamlo-in Zeisu' thu amang nuamlote, bang zah in diktat in, itna nei ahi-phial zong tua banga kipawlna panin kikhenkhia-a, kisawh kha selo-in pianthakna, kisikkikna i neih nading Pasian in ong sap atawpna hi ding hi.
Asawtlo-in mihingte amau teelna tawh kizui-in "Pasian' ciaptehna Lim" ahih kei leh "ganhing ii ciaptehna Lim" khat zaw sangsang angah ding uh hi. Hi thu pen ni khat, ni nih ci thute tawh kisai hetlo-in, biakpiakna thu tawh kisai thu hi-a, tua pen Pasian ahih kei leh ganhing ii thuneihna cih thute kikaal ah citaktak-in koi zaw pen ah om ding cih thu ahi hi. Tun - Zeisu in vantung biakbuuk-a Siangtho pen mun ah Amaa sisan tawh palai ai-awh sepna aneih laitak mahin tun "thukhenna ni leh hunte ong tung ta hi." Mang.14:7. Hehpihna hun atawntung akikhakmaa, tu-hun, tu laitak mahmah in zong Zeisu in na khempeuh Amaa tungah ap-in nuntaakna leh kilemna, lungnopnate angah dingin eite ong sam hi. A sawtlo-in hi thute ong zekaai kha ding hi.
Topa Zeisu in singlamteh tungah Amaa ii sisan manpha kei ading in ong buasuk ahih manin, Pasian hehpihna tawh Amaa thukhaamte zui-in, Amaa ni sagih ni Sabbath azui ding leh "anungta Pasian ii ciaptehna Lim" angah ding leh hi atunga thu teng azuih dingin, ken ka khensat hi. Nang ee leh bangci khensat ding na hi hiam? Amaa tungah athuman dingin khensat-in na teel hiam? Asawtlo-in Amah hong pai dinga Amah tawh kanungta khawm nuam hi, nang ee ut lo maw? Ama'n hi bangin gen hi, "Khuapikulh kongpi sungah alut theih nading leh nuntaakna singgah anek theihna dingun apuan uh asiangin asawp mite, mai pha ahi uh hi." Mang.22:14.
Tu-hun ciangin, mi tampi takin thuman thei nuam in lunggulh mahmah ding uh hi. Mi citak, athuman mite in thu maimai ciang tawh lungkim zolo ding uh hi. Asiang, paubanna aomlo thuman lunggulh uh hi. Pulpit tung panin akigen akhial, amaanlo thu gennate hangin amau bil nengcik khat zong liinglo ding hi. Nang pen athuman, amanpha thute citaktak-in azong, a theinuam na hihna kong thei hi, tua bang hi kei le cin Pasian' deihna lungsim leh athumanna athute tu-a tanciang dong na sim het kei ding hi.
Hi teng munah athupi dotna thu tawh kisai i lungsim sungah ong lutvat hi-Khazih tawh kum 1000 manna pen bang ahiam? Akimaisak theilo mawhna bang ahiam? Mawhna, kisuanna lungsim te nei lo-in alungnophuai thute koici ngah theih ding i hiam? Bang hangin pawlpi tuamtuam om ahiam?
Nang ii dotna leh theihnopna khempeuh ong dawng thei ding thu leh la hi laibu neu sungah akicing in om lo hi. Tua ahih manin, hi bang thute leh dotnate adingin laibu a nihna kong bawl hi tua pen "Kidona Lianpi" ahi hi. Hi abucing laibu sungah na theihnop dotnate' dawnna oma, athupi dotna leh dawnna aom banah Topa Zeisu ong pai kik nading thu ah zong kiginkholhna ong nei sak ding hi.Tua "Kidona Lianpi,"laibu sungah "Bang hangin mawhna ong lut-a, tua hangin thuman thuaknate hong om ahiam? cih thu leh "Vantung mi acih te kua ahiam?" cih thu tuamtuam na thei ding uh hi. Satan' geelna, ngiimna hoihlote hong kilangkhia ding hi. Mangmuhna.12:17 sunga "acianlai pawlpi" akiphut nadingin akisam thu tuamtuam azui kipawlna om maw omlo cih thute zong na tel khia ding hi. Vantung pen bangci bang ahiam cih thu natel ciangin nakpitak-in lawp-in na lingliang dinga, Kha Siangtho nasiatak-in ong kibuaknate zong na mu ding uh hi. Hi laibu tawh kisai nang adingin na deih leh laibu lahkhiatna Sazian ah en in la, amanlang theithei in kong puak pah ding uh hi.
Hi banga alamdang Pasian' kammalte nasim tohtohna ah i biak Topa Pasian in na innkuan sungah thupha tampi tak ong pia ta hen! No teng khempeuh tungah i Topa Zeisu ii hehpihna ong tung ta hen! Amen."
