I tate a dam hiam?

Leitung nuntaak na-ah a thupi pen in “Damna” a hih manin, ih Nu gilsung nangawn ah ih om lai akipan ih damna dingin, kikem, kidawm in, damloh na ih neih ciangin ih hihtheih zah in damna dingin, ki hanciam tek hi. DAM NA ih cih ciangin Pumpi cidam na, Lungsim cidam na, Kha cidam na ci-in nam (3) in kikhen thei a, Pumpi a dam hangin, Lungsim a damlo, Kha a cidam lo cih bang om thei hi. I gennop damna pen Pumpi, Lungsim leh Kha damna a hihi.

Tu hun Leitung pianzia i et ciangin Khantoh na manlang lua mahmah in, Mihing te zong tua khantoh na tawh kizui-in, na khempeuh kidelh hun hong hita hi. Hih bang hun sungin ih Innkuan sung thu, ih tate’ damna, damlohna zong ih don man kei kha thei hi. A pumpi uh a dam a bat hangin a lungsim, a kha ana damlo tate om thei hi. Maku 9:22-27 ah Dawivei ata damna dingin Jesu kiangah a paipih, apa’ upna hangin, Jesu in ata a khutin len in aphot leh dinghi. Tu ni-in dawi vei abang ih tate a om kha hiam? Nu leh Pa’ thu manglo in, a utut in gamta, kampau in, Nu leh Pa leh midang dang te lungsim nawngkai sak in, a nungta mawkmawk aci dam lo ta ih nei kha hiam? Jesu longal in damsak thei lo ding a hih manin ZEISU a damsak theipa kiangah paipih ni!

Mate 15:18 ah Canan nupi nu’ upna hangin dawivei ata nu damna thu kimu thei hi. Ata nu dawivei, damlo a theih teh a damsak thei Jesu kiang’ paipih hi. Jesu in ‘Tate neek ding an, Ui kipia ngeikei’ ci-in, Ui tawh genteh in ko gawp ta se leh a ta a itna, a deihsak luatna hangin Lungduai tak, Ki niamkhiat takin a nget teitei ciangin dawivei a damlo ata nu dam hi. Tua ahih manin a masa pen in I tate adam le adamloh theih masak phot kul a, a damlote a damsak thei Jesu kiangah paipih kul hi. I tate a dam na ding, pantah, hunpia in, thu ngetsak ciat ni!

Pantah in: 

Mihing khat ih cidam na dingin Nu’ gil sung panin kipan., Nu leh Pate vaipuak a hihi. A diakdiak Nu in nek le dawn kidawm in, thupha pia in, pattah pah ding kisam hi. Sunday school, kumpi sang sia/ siamahte tawh a kikholh ma in Nu leh Pa te makaih, pattahna nuai ah ki khangkhia masa hi. Nangmah limpha hihna tawh pan tah in. (Thna 6:4-7)

Hunpia in: 

Tuhun ciangin Nu leh Pa’n numpi nasem in, sum zong paai zongin ahi zongin manlahna tuamtuam tawh tata pen naukeem, a hih kei leh TV khawng hon sak in, amau leh amau khawng ki nusia zanzan hi. TV leh naukeem tawh a khangkhia tate in Nu leh Pa’ thu manglo, thusim lo in om thei a, a kha, a pumpi damlo thei uh hi. Tua ahih manin hunpia in kikhawlh den ding kisam hi.

Biakinn ah paipih in: 

Zeisu in ama kiangah aki paipih naupangte bek khutnga in, thupha pia hi. (Mt19:15) Leitung bup naupangte it mahmah na pi’n, agei ah hong ki paipih naupangte bek THUPHA pia hi. Tua ahih manin Zeisu omna, Zeisu thu a kigenna mun Biakinn ah kha in, tonpih in, biakpiak na-ah mai ngal sak ni!

Thu ngetsak in: 

Job1:5 ah Job in a tate khialin, alung sim sung uhah, Pasian samsia kha thei ding uh ahih manin ci-in, zingsang in thobaih in ata phazah tawh ki zui-in, meihal biakpiakna pia den hi. Kahla2:19 sungah kong zing khempeuh ah naupangte a puksih loh nading, na tate in, Pasian’ hehpihna a ngah nadingin, zan in tho themthum in, Pasian tungah kiko in, thunget sak ding pen Nu leh Pate’ vaipuak a hihi.

‘Leitung ah Pasian mizat mahmah ahi John Wesley’ nu Susana in Ta (17) nei-in, atate a dingin, nipi khat ah nikhat, nai (1) sungta a tate khatta bulphuh in thungetsak den hi’ ci hi. Nu leh Pa te’n Tate thunget sak, thupha piak ding mangngilh kei ni! Khatvei lai-in, Nupi khat si-in, Vantung a tun teh Vantung kongcing pa Peter in thudongin, leitung ah na nuntak lai-in, na tate bangci pattah na hi hiam ci-in dong hi. Nupi nu’n ka Tate ka thuhilh dan pen - 

1) Guahpi leh Huihpi thu;

2) Aksite thu;

3) Lasak ding thu;

1. Guahpi leh Huihpi thu: 

Mihing ih hih nak leh ih nuntaak sungin Huihpi leh Guahpi pen a kipel theilo thu hi. Tua mah bangin haksatna, lungkhamna, gentheih na leh natna, satna cihte pen i tuah peel mawh ding thute ahih manin, tua bang hun ciang akip suangpi tung, a kilam Inn bangin linglo laulo aa a om theina dingin, akip suangpi Zeisu tungah a kingate a hih theih na dingun Guahpi leh Huihpi thu tawh pattah ding hi. I Tate Zeisu tawh i kimu sak ni.

2. Aksi te thu: 

Vantung a, aksite pen zankhua amial ciang kilang phadiak in, etlawm mahmah hi. Tua mah bangin khua mial tawh a kibang leitung gitlohna, buaina, mawhna sungah aksi etlawm tak a, atan mah bangin, thumanna, cihtaknate tawh atang tate a hih theihna dingin Aksi thu tawh genteh in ka pahtah hi. Aksi a it te in zan khuamial laulo uhhi.

3. Lasak ding thu: 

Nuntaak na sungah lungkham, buaina khat peuhpeuh na tuah uh ciang, thumthum, tautau lo in, Pasian in a tate adingin, ahoih pen in honggeel sak thute phawkin, thu neukhat nangawn ah Lungdam ko in, la sa in, phat theih ding a kulna thu te tawh ka pahtah hi. Phatna in galdona hi a, lungdam kohna in gualzawhna hi.

Tua a hih manin ih tate a ci a dam hiam? A cidam tate ahihna dingin, adam sakthei Zeisu kiangah zuatpih ding pen Nu leh Pa te’ mawhpuak hi. Aci dam Innkuan ahi kim dingin Pasian in Thupha hongpia kim ciat ta hen! Amen. 

Nu Niang Zam Mang