CHAPTER V
GANHING II CIAPTEHNA
“Ganhing ii ciaptehna" leh "Pasian ii ciaptehna"cih thu nih pen akilehbulh thu ahi hi. Ni tawpni ciangin, mi khat ciat khat ciat in, hih ciaptehna nam nih lakah khat peuhmah angah kha ding vive i hi hi.
Pasian' ciaptehna lim ateel mite, ahih leh alamdang Amaa bawlsa gamah Zeisu tawh om khawm kha ding uh-a, eite' ngaihsutna mawk mawk tawh i bawltawm theihloh anopci gam nuam sungah i mangkhawm ding hi. Tua munah itna, hehpihna, migitna leh lungnopnate tawh kidim ding hi. Ganhing ii ciaptehna anei, asangte ahih leh mei-liipi sungah kikhia ding uh hi.
Mihingte ahih leh! Eite in i deihloh thu khat om-a tua pen ganhing ciaptehna ahi hi!
Khemna, zuauna teng lakah zuauthu tawh akidim phadeuh thute atelkheh dingin, i kipanta ding hi-hi banga, kikhemna, zuauthute hangin, hi leitung pen tua bang khemna sungah atawntungin lamet bei-in mangthang ding hi. Hi thu pen sa-ngawngsau'(kala-oh) nung zang "ciaptehna" thu tawh kisai Pasian in ong gen ding thute hoihtak-in ngai ding hi hang.
"Tua ciangin, vantungmi athumna in amasate gel hong zui leuleu-in nakpitak-in, "Tua ganhing leh alimbia-in ataltang ahih kei le akhut tungah ciaptehna angah mi peuhmah in, Pasian' lenggahzu zong dawn ding uh hi, Pasian in amaa hehna ahi leengahzu khauh pen amaa hehna hai sungah adimtak-in, sung khin zo ta hi. Tua bang mite pen asiangtho vantungmite leh Tuuno mai ah meikuang leh kaat khu twah gimna kipia ding hi." Mang. 14:9, 10.
Ganhing ciaptehna tawh kisai baih takin i tel theih nading lampi nih om hi. Nambat khat-amaa thuneihna akiciaptehna lim leh meel bang hiam cih tua ganhing dong un. Siangtak-in, tua thu ong gen ding hi. Nambat nihna- "Pasian ii ciaptehna" bang hi cih zong masa un, tua "ciaptehna" pen atuampi khat, akilehbulh thu ahi hi.
Tua ganhing ii ciaptehna thu tawh kisai i ngah khak ding patauhna tawh nasiatak-in, patau hilhkholhna ong kikokhiatna adeihna pen tua ganhing ciaptehna angah mite pen Pasian alangdo taktak te ahih manin, nakpitak-in ong kihilhkhol hi zaw hi. Tua ahih manin, tua ganhing ciaptehna angahte pen mangthang taktak ding ahih manin, ong kihilh ahi hi. Pasian ii ciaptehna a ngah, a sang mite ahih leh a-itna, akhamuanna uh tua ganhing sangin, Pasian tungah ong lakkhia zaw ding uh-a, sihna, bawlsiatna athuak uh hangin puuk tuanlo ding uh hi! Hi mah ei!, thuneihna (aana) leh zawthawh bawlna ong zangtei tei ding uh ahihna Lai Siangtho in gen hi (Hi bang tatzia pen ganhing ii deihmah mah nasep zia ahi hi).Tua ganhing' thuneihna (aana) anialte pen kibawlsia ding, kideihlo ding, neihsa vante zuak khuan leh leikhuan kipia lo ding banah a tawpna ah thahna sihna kipia ding hi!
A lamdang, diipkhuathuai hih kammalte enpha pha dih uh. Tun ahih leh "ganhing ii ciaptehna" amaa thuneihna (aana) tawh "sihna thupiakna"te lakin agamtatna thu phawktek ni.
"Tua ganhing nihna in, ganhing masa lim dingin, akibawl milim sybgag ahu amuap ciangin, hong pau thei-a, tua milim abialo khempeuh athah theih nading thu angah hi. Tua ahih manin, tua ganhing min ahih kei leh amin tangin, a nambat ciaptehna atungah anei lo mi peuhmah, van lei van zuak in paikhia thei lo uh hi." Mang.12:15,17.
Abang lim hi mawk ahiam!
Bangci bang lampi tawh hi thute na en phial zongin, buaina, gimna in, hi leitung ong vukcip hi ta hi. Mi tampi takin hi thu ong phawkkha, thei kha ding uh hi. Tua hun pen ong sawt nawn hetlo ding hi.
A lungsim takpi uh tawh Pasian a-itte in mihonpite' deih bang, sep bangin, ong zui hetlo ding uh hi-bang bang apiang zong laulo ding uh hi. Sihna ii alauhuaina thu ah zong hangsantak-in, ding ngam ding uh-a, anungta Pasian ii ciaptehna ataltangte tungah ngah ding uh hi. Hi thu nang zong na teel hiam? Hi thu pen thu mawkmawk hilo hi-hi thu pen atawntung nuntaakna tawh kisai thu ahi hi, ahih kei leh akilehbulh thu zong hi kha thei hi.
Pasian'ciaptehna thu tawh kisai hi bangin, gen hi. "Tua ciangin, Pasian' ciaptehna atawi vantung mi khat, ni suahna lam panin ahong paito kamu hi. Leitung leh tuipi suksiat theih nading vaangliatna akipia vantungmi lite kiangah amah in nakpitak-in gen-a, "Pasian' nasemte, a taltung uh-ah ciaptehna i bawl khitmaa tengin, leitung, tuipi leh singkungte susia nai kei in," a ci hi."Mang.7:2, 3.
"Huih" cih thu pen Lai Siangtho genkholhna sungah "galpi" ahih kei leh nakpitak-in kisankhiat na ci-in kigen hi. Leitungbup galpi asawtlo-in, ong piang dinga, eite in zong asawtlo-in, i mu ding hi. Ahi zongin, hi teng munah galpi, siatnate ong tunmaa, Pasian mite leh anasemte in Pasian ciaptehna angahkhit tek masiah gimna, haksatnate akibawl nailoh nadingin, vantungmite in susia nailo-in, ahun ngaklai ding ahihna kigen hi. Tu-in Pasain mai-ah na khempeuh siatna, hoihlohna, gamtatsia/khel atuamtuam tawh kidim dinga, siatna, bawlsiatnate ong tung takpi ding hi, ahi zongin, Pasian' hehpihna leh itna, athukhualnate in ong lehkaihkik phot ding hi-ahih hang tua hun pen sawtvei hetlo ding hi. Tua hun ciangin, "meikhupi ii tuamcipna" hun leh gal leh sa tawh kidimna hun ong tung ding hi. "Athahat gam leh minam", adang minam atuamtuamte in "kilemna" thu ding tawh kisai kikumpha pha keei zelzel ding uh hi. Gam tuamtuam, minam tuamtuamte in kilemna ding thutawh kisai gengen in, hanciam kawmkawm mah-in "pilna sang, van hoih nono tawh gal kidona" ong sawm ngeingai in, ong kiging phengphang ding uh hi. "Kilemna, kilemna" ci-in mi tampitak kikokhia, lunggulh in buai keei ding uh-a, ahi zongin, kilemna om lo ding hi.
"Ganhing ii ciaptehna" ong kithakhauhsak, kikipsak nailian hetloh hang lamet loh, geelkholh het loh-a, ong piang ding thu zong hi tuanlo hi. Ahi zongin, asawtlo-in, vantungmite-in, phalna ong pia in ong kipan hak nawnlo ding hi! Pasian' ciaptehna ngah mi pawlkhat akibawlsiatna T.V, Radio ahi zong atuamtuam pan i zakna, i muhna aom mah bangin, mihingte in "Pasian' ciaptehna" leh "Ganhing ciaptehna" akilamdan zia ong telkhia ding uh-a, amau muhzia, ngaih sutna tawh ong om ding uh hi. Alamdang thupiangte na theih nadingin Pasian in hi laibu nang adingin, ong piak, ong teel sak zong hi kha ding hi! Tu laitak nasim thu leh thupiang pen ong kituakkhawm, ong kituntuah thu cih zong hipeuhmah lo hi. Satan in bangzah-in daltan, khenkhia, gakcip nuam mah tase leh Pasian in Amaa "ciaptehna" thu tawh kisai apaizia athei ding, hih ciaptehna thu angah thei dinga kihel thei dingin akiniamkhiat, alungduai Zeisu nungzuite ong hungaih, ong ngakngak hi.
Hi ganhing ciaptehna leh Pasian' ciaptehna thu tawh kisai mihingte ong buai, ong kihel ngeingai bek thamlo-in, atawpna teelna, khensatna ong nei ding uh hi-tua hun abeina hun ong hi ta ding hi! Tua ciangin, mihingte ading hehpihna hun ong beita dinga, gimna nam sagih leh leitung' beina ong hi ta dinga alamdang gal kidonate zong ong tung ding hi, (Hi thu tawh kisai asawtlo-in i sim toto ding hi).Tua hun ciang na dinna, na omna mun pen tu laitak nang ii khensatna, teelna ong hi ding hi!
A masa pen thu ah Pasian' "ciaptehna" bang ahiam? Ciaptehna i cih pen zumvai tawh kisai thukhun tawh kituak-a nasepna ahi hia? Thukhun, thukhaam cih pen ukna thuneihna (aana) anei kumpi ii ciaptehna lim leh meel tawh kipsakna letmat kituum suk hi. Ciaptehna pen nam thum bangin kikhen hi:
1. A-uk kumpi' min
2. A-uk kumpi' zaa /dinmun
3. A-uk kumpi' mun leh gam teng
A-uk kumpite' ciaptehna lim leh meel pen thukhaam leh sum tungah ciaptehna letmat akitup suk ciangin, thukhaam tawh kituak hi ci-in kizang thei pah hi. Acitak gam minam khempeuh in tua thu zui ciat uh hi. Psian in zong Amaa' thukhaam, thukhun ciaptehna lim leh meel tuumsuk ahih manin, acitak leitung khuavannuaibup in anungzui hi.
Kumpi ii ciaptehna lim leh meel letmat akitupsuk ciangin, thukhaam pen anungta, vaangnei khat ong hih mah bangin, Pasian' ciaptehna lim leh meel zong Amaa thukhaam sungah om hi. Hi tengah Pasian in hi bangin, gen hi: "Ka nungzuite aw, Pasian in kei tungah hong piak hi thute, limtak-in kem in koih cing un." Isa. 8:16.
Eite koi munah ong kiciamteh ahiam? I taltang tungah ahi hi. Amaa thukhaam pen i lungtang sungah om hi. Thuciamna athak sungah Amah in hi bangin, kamciam ong pia hi:
"Topa in hi bangin, ci hi: Mailam hunah amaute tawh thuciamna khat Kabawl dinga, amaute sungah Kathukhaamte guan'in, amaute’ lungtang tungah Kagelh ding hi." Heb.10:16.
Pasian' ciaptehna eite in i teel ciangin, Kha Siangtho in i taltang tungah tua ciaptehna ong pia hi. Tua i taltang tungah "amailam khuak" om hi. Hih i mailam khuak pen i thungaihsutna, i thutheih theina mun ahi hi. Pasian ciaptehna na taltang tungah na sangna, nangahna pen tua ciaptehna thungaihsut theihna sungah akem, akoih cih deihna nei hi.Tua thu sungah nang upna na nei hi. Tua thu tungah cihtakna na nei hi.
Kumpite in amau "ciaptehna lim leh meel, letmat" te azat uh ciangin, amau kumpi thukhaam a ukna leitangah ong khauh sem sem mah bangin, Pasian in zong Amaa thukhaam akhauhzawk nadingin, a "ciaptehna lim leh meel” zang hi. Pasian' ai-awh in, Pasian dan mah in ganhing in zong amaa thukhaamte akhauhsak nadingin a "ciaptehna lim leh meel” azang hi.
Pasian' ciaptehna lim leh meel khen thum teng koi tengah mu thei na hiam? Amaa thukhaam, a thu laigil, alai zangah kimu thei hi. Deihtak-in kiciantak-in en dih ni:
"Sabbath ni asiangtho-a zat ding phawk un. Ni guksung nomau'na semin na nasep ding khempeuh uh na hih ding uh hi. Ahi zongin, a ni sagih ni in, Topa note' Pasian' Sabbath ni ahi hi. Tua ni-in note, na tapate, na tanute, na nasempate, na nasemnute, na ganhingte uh ahi-a, peemtate in ahi zongin, na bangmah nasem kei ding uh hi. Bang hang hiam cih leh a ni guksung tengin, TOPA in van leh lei, tuipi leh tuate sunga om khempeuh bawla, a ni sagih ni tawlnga hi. Tua ahih ciangin, TOPA in Sabbath ni thupha pia-in siangtho sak hi." Pai.20:8-11.
Lai Siangtho sung hi mun teng bek ah Pasian' ciaptehna lim leh meel muhna hi bek ding hi. Tua ciaptehna lim tawh kisai thu nam thum pen hi teng ahi hi.
1. Amaa min - "TOPA"
2. Amaa Aa/Dinmun - "PASIAN (PIANGSAK PA)
3. Amaa-ukna gam/mun - "Vantung leh leitung,tuipi leh asunga om khempeuh".
Hi thu pen lamdang mahmah hi! Eite kiang panin Sabbath ii athuman, asiangthona Satan in hanciam takin selcip, daltan hi. Hi pen Pasian' lim leh meel ahi hi.
"Sabbath pen Pasian ii ciaptehna lim leh meel taktak mah ahiam? ci-in nang dotna nei kha mah ding hi teh. Ezek.20:20. sim in. "Keimah in, TOPA ahi note' Pasian Ka hihna na phawk nading uh leh note tawh i bawlsa thukimna lim dingin Sabbath na siangtho sak un, 'Ka ci hi." Ezek.20:20. ("Lim ciaptehna” cih adeihna pen "ciaptehna''letmat mah tawh kibang hi-Rom.4:11 sim un).
Adang akitel zaw aom ding hiam? Pasian’ ciaptehna lim pen Sabbath ahi hi.
Satan in hi thu tawh kisai nakpitak-in, hanciam ding ahihna thei hi. Tua thu teng ganhing in hemkhia, botkhia bek lo-in, adang khat tawh behlapna anei pen lamdang sak ding zong hi lo hi!
Pasian' Sabbath pen Sunday ni ah ong laihna thu ataangko khiatna alamdang akammalte en dih un- "Hi bangin, Sabbath ni laihna pen Catholic Church (R.C.Pawlpi)in amau sepkhiat ahihna gen hi. Hi bangin, gamtatna (tun tel thei ta diam!) pen biakna tawh kisai ganhing (pawlpi) in thuneihna (aana) aneihna ciaptehna lim leh meel ahi hi.”! Sunday ni biakpiak ni in zatna pen Pope ii thuneihna (aana) alahkhiatna lim ahi hi. Ciaptehna lim leh meel-Sunday ni biakpiakna zuihna, tan pen "ganhing ii ciaptehna lim ahi hi!"
Tua thute pen khauh mahmah in tel haklo hi. Pasian in Amah pen athuman Pasian Ka hi hi ci- hi. Pasian in Sabbath ni pen na khempeuh Abawlpa ahihna leh Amaa thuneihna (aana) alahkhiatna lim leh meel dingin ong piak ahi hi. Hih ong piak thute i zuihna in Amaa vaangliatna, thuneihna i zuihna, i theihpihna ahi hi. Ahi zongin, Catholic Pawlpi in athupiang hi bangin gen hi:
"Hi lo hi! Nipi khat ii a ni masa ni zui un, tua ciangin, en un leitungbup in asiangtho Roman Catholic pawlpi' thupiakna zahtakna tawh athumang hi." "Hi pen Pasian' thukhaam ka-uk zawhna, kagualzawhna ko ii thuneihna CIAPTEHNA ahi hi."
Ahi zong Sunday ni atang, azui a-ithuai i sanggam u leh naute in ahoihzaw thei zawlo uh ahiam? Amaute in ganhing ii ciaptehna a ngah uh hiam?
Hi lo hi! Pasian' thukhaam lina tel mahmah-a, apalsatte tungah mawhna kisuan ding hi. Lai Siangtho in hi bangin, gen hi, "A hoih, a manin gamtat ding thei napi-in agamta lote akhial ahi hi." James 4:7. Tu'n nang leh kei in hi thu thei i hih manin, eite tungah vaipuak om hi. Asawt lo-in, i vekpi-in i thei ding hi. Ni tawpni hunah Pasian in hithu pen leitung adingin alianpen i kisittel nadingin, ong bawl ding hi. Bawlsiatna nakpitak-in, ong om ciang na ngawnin, Pasian pen itna takpi tawh it-a , athu amangte leh Piat Mangpa banga Khristian min apua lelngel mite kikal ah kikhenna lianpi ong om dinga, tua banga Khristian min pua bekte pen mihonpi' deihna bang zui-in, asang te ahiziau mite ahih leh kisia takpi ding uh-a, ganhing' ciaptehna ngah-in a nuntaakna uh bei lam manawh ding uh hi. Tua "ciaptehna Lim" pen Mangmuhna 13 sunga "kii nih nei ganhing" in thuneihna (aana) neihna apiak maateng thukhun tawh kizui-in ong gamtang nailo phot ding hi.
Thukhaam palsatna hangin a-ithuai 'Honpa'ii lungsim a nasak dingin eite in bang mah i sem nuam kei takpi hi.Tua bangin, thukhaam palsat lehang i Topa alungsim kitamzan ding hi. A tamzaw en lehang i Topa alungsim kitamzan ding hi. A tamzaw mawhna in i Topa' lungsim sukha penpen hi. Eite' mawhna ong paihkhiat sak nangin, Calvary mual singlamteh tungah Zeisu in nakpitak-in, lungsim tamkham-in ong thuak sia hi. Amaa pumpi sung panin sisan ong luangkhia hi. Eite ong itna khum ngaungau-in neem dikdek hi. Ganhing' ciaptehnate hipah pah-a, a sang, a zui mite in alungsim takpi tawh theipi pi mah-a, Topa' lungsim asu tamzan nuamte ahi hi. Amaa thukhaam zui ding i khensatna leh i zuihna hangin i Topa alungdam sak te i hi hi.
A lamdang atuam diakin, Sabbath ni pen i Topa Pasian biakpiak ni in i zat nak leh tua ni pen eite adingin, kaal khat sungah lungnop pen pen ni ong suaksak ding hi. Na lungkhamna, na nasepna, na gamtatna tua Sabbath ni ni bup sungin, akoihkhia, ahemkhia thei i hih banah Zeisu tawh ahoih mahmah anuamhuai mahmah tawlngak khopna anei ii suak dinga pumpi ci leh sa tawh tawlngakna bek hilo-in mawhna, lungkhamna panin kipelh-a khalam cidamna, lungnopna, suahtaknate anei, angahte i hi ding hi.
Sabbath ni tawlngaa theilo-a nasep anei na hi leh zong Ama'n ong ompih, ong kem veve ding hi. Hi hangin, khialhna, buaina, supna bel om hi ci-in, ken kathei tuan kei hi. Ahi zongin, Sabbath ni nasep na pan tawlngaa-a, tua ni biakpiak ni-in i zat takpi leh alamdang Pasian ompihna, thupha atuamtuam leh na lamdang tampi na mu ding hi. I Pasian in Sabbath ni tawh akipelh nasep ong pia takpi ding hi, ahih kei leh tua Sabbath hangin, nasep ong pia takpi ding hi! Ong pia takpi ding hi ci-in kong ciam ngam hi. Tua pen Pasian hang ahi hi! Tua bang ong pia ding pen i biak Vangtung-a aom Topa Pasian ahi hi.
Hi thu tawh kisai leitung mi khempeuh in upna sittelna kingah ciat tek ding hi. Nang mah bangin leitung mi awn zalom tampitak-in zong hih alamdang thuman mukhia, theikhia ding uh-a, nidang sangin, Zeisu tawh kinai zaw-in, lampai khawm ding uh-a, lungnopna zong atamzaw ngah ding uh hi.
Hi tengah dotna adang khat ong om hi-ciaptehna khut tungah ngah cih pen bang agen nuam ahiam?
Na phawktek uh hiam? -Taltang tungah tua ciaptehna ngah cih pen nang mahmah in na lungsim, na khuak tawh um cihna hi-a, tua upna tungah nang citak mahmah cihna zong ahi hi. (Tua ciaptehna lim ngah na tawh kisai i pumpi pualam-a, lim leh meel te midangte in ong et ciangin, kua tengin, ciaptehna lim ngah-a, kua tengin ciaptehna lim ngahlo cih pen mite in ong etna uh tawh ong thei ding uh hi. Tua thu tawh kisai asawtlo-in, i sin to ding hi). Tua ciaptehna lim khut tungah ngah cih adeihna pen tua "ganhing ii ciaptehna lim leh meel" thuneihna, aana ong kipiak ciangin, tua bang akhut tungah angah mite pen tua ciaptehna thu tawh kisai upna, santheihna lungsim nei sam loin a nasep a taanlawh loh nang, a nuntaakna uh adal theih nang leh van lei theihna, zuak kiktheina khuan adeihna uh bek tawh a uploh uh hang anung azui pongpong te cih na hi-a, 'Khut'cih adeihna pen nasepna, nuntaak nading khuasakna cih limciinna nei hi.
Hi pen adiipkuathuai, alipkhaphuai ngaihsutna ahi hi! Hi bangin, suahtakna tawh akidim i gam (U.S.A) ah koici bangin, ong piang thei ding ahiam? A zenzen in, "ganhing ii ciaptehna lim leh meel" in ukna, thuneihna (aana) ong neih ciangin, "ganhing ii ciaptehna" mi khempeuh in angah nading koici bangin, na ong sem ding ahiam?
Tua ahih leh zong "ganhing ii ciaptehna lim leh meel" acih pen kua hi ding ahiam?
