Kham Khen Pau,
Ratchaburi, Thailand
(June 17, 2014 Tuesday 10:12PM)
Isaih 1:13 sungah Pasian in Sabbath deih nawng keng acih thu Hilhcianna:
Thupatna:
1. Pasian in Sabbath deih nawnlo ahihman-in hih kammal a paukhia ahiam?
2. Banghangin Sabath le khadet nite ka muhdah hi, Pasian in ci hiam?
3. Tuate ama piak, asawl mah hilo hiam, cihte ensuk in nambat 1, le 2 idawng kik ding hi.
Tua adingin , deihmun bek tang laklo-in athudopphah(context) itel ding thupi hi.
Ngaihsut Ding:
Maymyo ka omlai, 1993 gual Sabbath nikhat-in, huangsunga vaimin gaute, naupang khat in ong gusim den hi. Kei zong ka pang sim hi. Huangsung onglut ciangin mi 2 ongpha uha, khat pen kongkhak ah gaalvil in om hi. Akhatpa in vaimimgau abal laitakin paikhiankhian-in a ban ah ka man hi. Lau lua-in ong khah in, Ks 60 ong pia ning ong ci hi. Tua laitakin gaalvilpa lau-in taisim hi. Ka matpa amin kadot ciangin,” thei keng,” vive ci hi. Na nute, na lawmte in ong bangci sap hiam ci ta leng, “Thei keng” ci den hi. Na min na gen leh na vaimin balsa gap 3 teng ong pia ding, ka cih leh, tua le gap sawm ong pia in maw, ong ci sawnsawn hi. Tua ciangin aban khau gak semsem in, na gen kei leh Police ah ong puak ding ci’n inn sunglam-ah kapai pih sawm leh, “Vok nam, vok gimna, kei ut ke’ng “ ci hi. Innkim etpih in voksa ne kei ung, veng pualam-a Lisu-te khawi gimnam bek hi, cih kawm in vok mulo ahihmanin, innsung ah ong lut ngam pan hi. Tutphah tung ka tutsak leh, “Na tanu ken thei, ko sang kahkhawm” ong ci lai nong hi. Na min na gen kei leh Police kiang ong puak tading hing, ka cih teitei ciangin, “Norman” hi ong ci hi. Amah pen SDA bang maha voksa nelo biakna nei khat ahi hi: Vok gim nam tuazaha lipkhap zah dongin abiakna ah citak bilbel napi, vaimim gau guk ding le min gennuamlo-a zuau phuah ding pen haksa salo mawk zaw hi.
Hmmm, biakna icih pen kingeina seh leng, ngeina khat suak lel-a, cihtak mahmah hang, biakna hihna taktak ahi nuntakna omlo theimawk ahi ve maw!
Hilhcianna:
1. Judah mite Biakna le Gamtat kituaklo--lampial:
Jews-te in Pasian nusia, mangngilh uh hi. Sakolte late in apu thei lai buangsam napi Jewste in Pasian mangngilhta cin Pasian in Isaih tungah gentehna pia hi(1:2-3).
Pasian bangci mangngilh uh hiam?: Mawhna le gitlohna lungsim vom, tua tawh khangin gamta uh: tua pen Topa anusiatna uh hi (1:4).
Tua manin gim thuak dinguha, a gam uh ki nusia ding hi, ci. Zion tanute(Jerusalem khua mite) lobuk bangin kinusia ding hi, ci hia(1:5-9).
Jerusalem le Juda-te pen Sodom le Gomorrah tawh genkak zah dongin Pasian mai-ah gilo uh(1:9-10)
2. Itna, thumanna, dikna le hehpihna Awlmawhlo sa-in Biakpiak Kuhkal Pong mawk pen Pasian in Deihlo:
Tua huhau-in Pasian kammal anuai-a bang hi:
a. Ngai dih un, na biakpiakna neunaute uh bang ahiam? Kei mah in bawgtal thau limci tampi biakpiak na ding in kisam ka hi kei hi. Biakpiakna sisan hangin ka nuam tuan kei hi. Biakna pia dingin nong pai uh ciangin bang hangin biakinn huang kihhuai in ong sik nahi uh hiam?(1:11-12) Hihte ah Judahte in Pasian tungah biakpiakna ahahkat mahmah hangin Pasian lungdam lo cih ong lak hi. Bang hang hiam cih leh, gitlohna, nusialo in biakpiak hangin akhiatna omlo hi Pasian in aci nuam ahi hi.
b. Tua manin, man neilo biakpiaknate ong paipih nawn kei un, sabat le khade nite leh kikhawpna te ka ning hi ci maita hi. Ahangpen, Judahte in tuate hahkat in abawl uh hangin, Pasian deih lungsim thumana, itna, migitnate awlmawhlo uh ahiman hi. Thungetna saupi na behlaplap uh hangin khut tungah sisan bangsa in thungetna saupipi na neih uh hangin ka ning hi ci hi. (1:15)Tuate omlo-a sabath, khadet nite ah biakpiakna a paipih hangin lungsim kipuahphatna omloa biakpiakna pen Pasian in deih masa lo hi(1:13-15).
Ei etteh dingin lungsim sung thumanna le migitna, itna awlmawh lopi a sabath tan voksa nekloh bek pen Pasian lungkim zolo hi, cihna hi.
Kipuahphat ding Sawlna:
c. Na khut uh silsiangun, gamtat hoih kisin un, thumanna zongun, na gamhtatna uh puahpha un, tagahte hu un, meigongte panpih un, Topa in ci hi(1:16-17).
d. Ong pai un, kikum khawm ni, na mawhnate uh sisan abat hangin, vuuk bangin kong paak sak ding hi. Thu mangin nong pai uh leh, leitang pan un gah hoihbelte na ne dinguh hi; nong nial uh leh namsau in ong valh ding hi, Topa kei mahin kong gensa hi, ci hi(1:18-20).
Banghangin Juda-te Biakpiakna Pasian in deihlo?
e. Bang hangin Judahte tua dinmun tung uh: Thuman thutak tui vung abatna Judahte banghangin numei paktat le mithat-te dinmun tung hiam? Ahangin na gamukte uh in langpangte vive asuak uha, gutate tawh kipawl uh hi. Golhguk sum bek tawh nasem uha, thaman bek lamen uh ahihmanin, tagahte hulo uha, meigongte thu amau kiang tung zolo hi, ci hi(1:23).
3. Tomkaihna:
Hih atunga (a,b,c, d, e) thu omteng ikaih khop ciangin, Juda-te le Pasian kikaal ah thu omzia ong kimu thei hi. Pasian in Juda-te pen thuman le dikna kemcing dingin asawl ahi hi. Tua adingin biakpiakzia tampi zong pia hi. Tua biakpiakziate in dikna le thumanna bulphuh nading le nuntak pih nading ahi hi: thuman thutakna, itna, hehpihna, khualna nei ding uh ahi hi. Tua ding kimlai, makaite akipan, a minam bup un, ngongtat, hehpihna neilo, meigong tagahte pampaih, letsong le golhguk piazote bek huam bawl uh hi.
Tua bangin Pasian deihloh teng gamta napi uh, sabath , khadetni, le biakpiakna te kuhkal tak in pia vet uh hi. Tua bang hi leh Pasian alung kim ding sa uh hi. Tua bang gamtat kihhuai tawh sabat khade ni le biakpiakna neih pen Pasian in ning ingh, akihiatna om kei aci ahi hi. Pasian deih pen thuman diktatna, hehpihna, khualna lungsim bulphuh biakna ahi hi.
Thukhupna:
1. Hih attunga thu omzia ah, Pasian in ama piaksa sabath le khade nite mawk deih nawn vetvetlo-a a gen hilo hi. Tua Sabbath le biakpiaknate laigil ahi Lungsim siangtho le gamtat siangtho awlmawhlopi Juda-te in a sabath, khade ni le biakpiak akuhkal pongmawk uhpen kih ing aci ahi zaw hi. Tua Sabbath le biakpiakna dangte pen Kha nuntakna taktak-ii lim bek hi-a, ataktak pen Pasian deih itna, thumaanna, dikna, khualna le Hehpihna ahi hi. Tuateng kinlopi-in,Norman bangin, Juda-te in a puatham biaknateng kinbawl zaw kha den uh hi—agol penpen meh neu tawi sak uha, aneupenpen meh gol tawi sak-in lehbulh uh hi. Tua bang lungsim tawh Sabbath atan pen uh deih keng aci hi beka, Sabbath limlim pen Pasian in deih lo hi ci-a, tua Laisiangtho mun bulphuh pen, athudopphah tellohna le a khiatna lak khialhna ahi hi.
