A 1ST VEINA TONZANG CIRCLE,
AY CAMP BAWL’NA
(VIALCIAN/TONZANG)
PAU LAM DAL
Dear Leitung bupa om; Zomi SDA milip te,
A (1) Veina Tonzang Circle Adventist Youth Camp hong piang khiat na leh; ahun sungin, sep zia/bawl zia leh phattuam na tuam tuam te Pasian’ tung leh Zomi SDA te’ tungah ka hong pulak hi.
_______________________________________________
MUC – SDAs
A (1) Veina Tonzang Circle AY CAMP
Thu Bulphuh : Col. 2:21 “ Lawng Kei Un, Ciam Kei Un, Su Kei un”
VIALCIAN LEH TONZANG
April 21 – 28, 2013
(Theme Song)
KHA SIANGTHO - BIAK INN
V1
Mihing’ nuntak na tom pakpalh bang lel hi,
Lungkham’ buai na, haksat na sung pan;
A mangthang cip ding Topa’n hong tatkhiat nungsang,
Ama’ itna sungah nungta dingin;
Cho:
Na lungsim pumpi niin sak ken maw,
Kha Siangtho te’n na biakinn, suk siat ding hi kei;
Ei’ aa hilo Pasian’ aa hi.
V2
Lawng kei un, a sianglo peuh mah lawng kei un,
No leh no ki siansuah tawm un ci;
Na lungsim, pum pi, na kha tha hong dim sak kik ding,
Zan ni, tu ni, atawn tung kikheel lo hi.
(Hih la sa in hun kipat ding sim in, ka awi ngiat ngiat, ka vei ngiat ngiat uh hi.)
c.1998, 2000 kum hiam khat in, Pr Tuan Sian Pau, leh Pr Let Kho Pau te’makai in, Tonzang Circle sunga Adventist pawlpi om tengin Revival Camping khat Tonzang gam sunga om; Manipur or Meitei gun ah, kibawl ngei hi. Tua tengah circle sungpan Camp lut mi 70, 80 kiim bang kihel thei uh hi. Tua a kibawl pen, Youth Camp lian hilo in, nupi, papi tampi tak mah kihel thei uh a, tu aa pen ahih leh Khangno vi ve bek hong kihel uh hi. Tonzang Circle sungah Adventist khangno mi 150 val bang ki om ta hi. Tu tung aa AY Camp ah pen, circle sungpan khangno-tuai-dawng numei 40 val leh pasal tuai-dawng 30 val bang hong kihel thei uh hi.
Hih bangin, Tonzang Circle AY camp hong piang’ na thu hong gen masa ning.
A bei sa 2012, September kal nunung ah, Tonzang Circle Meeting ka nei uh a, tua meeting ah AY CAMP vai agenda ding khat in, kikoih hi. A bulpi ah pen, tulai tak khangnote, adiak diak in kum 13 – 19(teenagers) tampi tak in, guih theih kham theih, zu-le-sa tawh akidiah leh a zangh lawm tampi tak tawh kithuah, kikhawl in, a sangkah na uh, akhualzin na uh ah, kikhawl uh, kingai uh, kiteeng uh, ki-it uh, kilawh uh a, ih pawl sungah zong tua dan tampi tak ki om ta cih kimu ahih manin, AY Camp khat neih ding, Circle in hoih kisa hi. Social leh Spiritual bul phuh ding hoih kisa hi.
Camp sungah thu bulpi dingin, Temperance tawh kisai thusun na/kikupna/vuau na/khalna cih a hi hi. Tua lo atuam tuam zong tampi tak kihel hi. (i.e, Zi zon dan ding, teel dan ding, Pasal zon dan ding, teel dan ding, kiim leh pam kep siam zia ding, etc…, ) Meeting ah hih vai tawh kisai, kikum in hoih sa tek in, ka thukim tek uh hi.
Tua leh circle sung pan, upa maikai te in, hih vai tawh kisai in, circle sunga khangno makai te hong ap uh hi. Tua leh ko zong hong kiseh khangno makai te meeting khat ka nei pah uh a, circle in lah khangno min tawh, sum bang mah kinei lian nailo ahih man in, akhua akhua in satanh seh in, akisam lai teng gamdang ah huhna ngen dingin ka kithu min phot uh hi. Tua khit ciangin, ahun ding pen ka seh khol thei lian kei uh a, sum hong lem hun hun ka ciphot uh hi. A hun ding tawh kisai, makai te in hong nung zaksak ding cih hiphot hi. Sum hong lem bang hizen zen leh, Kumpi sang aa kah sangnaupang te ii sang kongpi khak hun sung(khaal) sung hi lim lim leh cih pen hoih ka sa tek uh hi. Tua bang teng leh Pasian’ tungah thungen ding, hong huh, hong panpih na ding leh, ma hong tut pih na dingin, ka om na mun ciat tek uh pan thunget na tawh ma ka pang khawm uh hi.
Tua leh theih loh kal in, hun in hong liamsan to vat a, 2013 hong tung vat ziau ta hi. Mun tuam tuam ah makai te in, maingap zawk deuh te’ tungah, AY camp bawl’ zawh na ding tawh kisai athu ala, sum neih zah leh, sum kisam zah or abei ding zah te’ gen in, huh na ka ngen kawi kawi uh hi. Tua sungpan, ka thunget na te uh Topa in hong dawngin, a mite nih hong zat sak hi. Tonzang Circle sunga om; Adventist khangno te hong lainat, hong vei mah mah na uh hangin, sum leh paai Ks 1,00000 tuak tawh AY Camp aa dingin, ma hong khuat te ahi: Tg Sing Cin Mang, (Naulak Beh, Suangzang Khua mi, Tahan ah teeng uh, amah tu laitak USA ah om); leh Tg Go Min Thang, (Tonzang Khua mi, tulai tak Malaysia ah om); a mau pisal nih in, ma hong khuat uh a, amau’ hong sumbul pat na hang leh Pasian’ hong thukim’ pih na tawh A 1st veina Tonzang Circle AY Camp kibawl thei suak ahih manin Circle sung khangno teng’ ai taangin ka lungdam’ na uh Pasian’ tung leh no pisal nih tungah hong pulak ung. Topa in thupha tampi tawh hong thuk kik sak hen!
Tua leh a sum ding pen, sum bul kician hong om thei ta suak ahih manin, ahun seh ding hong hi leu leu ta hi. A hun ding pen geel hak sim ka sa pian uh hi. Bang hang hiam cih leh, guah tui kiat hun hi ta mawk, an or lo kipawi khin, ki tuh khin tek ta hi, tua ban ah: 2013 kum kipat lam tengah ih pawlpi sungah, pawi tuam tuam; Talek ah Tonzang Circle pawi (Jan. 2013), Phaiza ah Ngente Khawk Pawi(March kha lai, 2013), leh MUC-SDAs TIN JUBILEE(March kha beilam leh April kha kipat, 2013) sung teng ih pawlsung ah hih bang pawi tungin, pawi ki khaam ziah ziah in MUC sung pen kikha lum’ suah mah mah hi.
AY camp hun ding pen ka kikup kup uh teh Pasian’ thukim pih na ih ngah leh (April 21 – 28) kal khat sung teng in bawl ding ka kithu kim uh hi. A mun ding pen Vialcian/Teekzang hi leh Manipur or Metei gun tawh zong kinai-in, an sing, tui, mei lem, om na , khawl na ding mun zong taangzai pen na ding mun zong ahih manin Vialcian/Teekzang a ih pawlpi mite tawh kithuza in hong sang zawh ding vua leh, amau kiangah bawl dingin, hoih ka sa tek uh hi. Tua leh asawt lo in, hih atung a pawi te aban ban in, ki khaam kibawl in, ka siim kawi kawi uh a, tha ka ngah mah mah uh hi.
Pawi te nuam tak in, kizo thei tek a, pawi hong veng khit tak ciangin, ko Circle sunga Khangno makai pawlkhat te’ Circle sunga ka vaihawm uh khangno suhbuu or satanh te akaikhawm dingin,circle sungah ka vak ta uh hi. (Vialcian/Teekzang – Tonzang(Phaitu) – Talek – Zampi – Cikha – Tonzang) cih bangin suhbuu dong in, thu leh la AY Camp tawh kisai te; atha ngah huai zia, alawp huai zia, anop tuak dan, etc…., cih tuam tuam te’ ka gen’ pih uh hi.
Camp bawl na ding mun vai zong Vialcian/Teekzang te tawh ka kikum thei uh a, amau zong hong sang zo mah nung, ahizongin, khangno tawm lua ka hih manun, no mau mah innteek na tang uh kul ding hi hong ci uh hi. A hih hang kong huh theih bangun hong huh nung hong ci lai uh hi. Tua teh, Ko zong “aah! Kingah lua ei” thu nget na ah kiphawk ni ei, ci’n ka kikhen phot uh hi. Pasian’ hong hehpih na tawh, suhbuu ka dong na vuah, sum tang tampi mah ka ngah uh hi. Circle sunga Suhbuu teng’ ka kaih khop khit uh ciangin, Tedim ah U Mangpu’ hong sum’ khak leh U Thangpi’ hong sum khak thoh or la ding in, ka pai leu leu uh hi. Pasian’ hong hehpih na mah tawh, nawngkai na bangmah om hetlo in, sum hong kikhak te ka thoh thei uh hi. Tedim ah zan khat ka taam uh a, sum bawm puak ing-eng sa in, Tonzang lam manawh in ka ciah leu leu ta uh hi.
Tua ban ah, inn teek asem ding, Tonzang pawlpi te tawh zong Sabbath ni khat thu kikup na ka nei uh hi. Amau zong abiak inn lam uh a zo zo phial uh hi ta mai a, puah ding zuun ding bek akisam ta dan uh ahi hi. Innteek hong sem ding, Tonzang pawlpi’ upa makai te in, “ih AY Camp bawl hun sunga om ding SABBATH pen Tonzang ah zangh khawm ni in, circle sung tuam tuam mun tuam tuam pan combined worship khat nei leng, tua teh ih biakinn zong kikhop theih na ding aa zat theih ding hong suak ta ahih teh Pa Pasian’ tungah hih ciang hong tonpih na hangin, Biakinn lut theih na leh lungdam’ koh na AY Camp kah teng tawh nei khawm leng lunggulh ung” hong cih uh ciangin, ko zong hoih ka sa mah mah pah uh hi. Ka program vuah pen, akal khat bup a Vialcian/Teekzang ah zat dinga ka geel khit uh hi na pi, Tonzang pawlpi te ii hong deih nget om mah bangin, Tonzang ah SABBATH zat khop dingin, ka vaihawm kik leu leu ta uh hi.
APRIL 21, SUNDAY- Zintun Ni
A sawt lo-in, April 21 hong tung ziau a, tua ni pen zintun ni ahi hi. Zin hong kitung ngei ngai takpi a, Sakollam pan Sia Thangboih makai in, khangno pawlkhat, Anlangh pan Sia Naamung makai in khangno pawlkhat cih bang, Kawlpi pan ka sap tuam uh Sia Kimno leh Tg Sanghoih cih bang dan in, akhua khua pan hong kitung ngei ngai kei ta hi. Ko amaikai lam te zong asun in, Camp hun sunga, neek ding, dawn ding, zat ding van kisam tuam tuam te zong in, lei in, kawm in, ka buai mah mah uh hi. Innteek pawlpi pan khangno pawl khat leh zin hong tung thak teng tawh Nitak biakpiakna hun tomno khat leh thunget khop na “khua hun mah mah Topa in hong hoih sak na ding” cih thunget na limci tak in, ka bawl uh a, tua teng ah Zampi pan Sia Mangbawi in hun hong makaih in, tha kingah mah mah hi. Hun man teh makai teng zingvai ding leh thu tuam tuam, vai tuam tuam ka kikum suak uh hi.
APRIL 22, MONDAY
Zing ni in, Mukhuai mual hong kap ciiiciai ta a, dam dam in zing ni hong suak in, ni hong sang to hat hat ta hi. AY khangno te zong amau van tek pua lil lel sa in, hong kithawi, hong kizawn diam diam, liai liai ta uh a, Pasian’ hong hehpih na tawh, mawtaw pei 10 anei khat Tedim, Kawllam zuan a pai ding khat a awng hiu heu ding khat na om a, mawtaw nei pa kiangah ka thu ka la teng uh ka gen uh leh, amawk na in, hong tuang sak hi. Mawtaw tungah Khangno 30 val leh ka neek, ka dawn ding uh, antang, besan, meh ding tuam tuam gawbii, lothang, zasan, etc…., meisett, Am, Keyboard, etc….., cih bang leh ka van uh a tuam tuam pawlkhat amawk na in hong puak sak hi.
Mawtaw tuang lo teng Cycle tawh ka pai uh hi. Lampi ah kizom ngeet ngeet sa in, music hong kawm in, lasa in, awng in, dam dam in ka ki khin lit lit uh hi. Cycle pen 12 bang pha hi. Cycle khat ah mi thum, mi nih cih bangin ka kipua zeizai uh hi. Leivui kitung khuut pilak mah ah, awng in, lasa in ka gamlum suk mah mai kei uh hi. Mawtaw te ko sangin na tung masa zaw uh a, vanteng zong na suah khia khin ta uh hi. Tua leh asawt lo in, cycle tawh te, Vialcian khua ka tung ta uh hi. Ka van teng uh seng seng in, sing tom thei te’n sing tom, antang hum en thei te’n en, tui tawi thei te’n tui tawi, an huan thei te’n an huan, lothang kheh thei te’n kheh/at, zasan gawi thei te’n zasan gawi in, a kamtam pau thei te lah pau pau, mit ki suk sim sim tawh bang tawh, etc….., cih bang dan in, dung dung dang dang ka sa kei ngei ngai uh hi.
Tua leh asawt lo in, nitak meh ding besan ka-la-be huan ding, meh uii ding ci a ka besan uh ka zon zon uh leh, ka mu zo hiau kei uh hi. Aban ban in mawtaw tungah vanguang teng kidong in, ka guang ngiat uh hi. Kei bang besan tungah tu kha lai ing aci pawlkhat om ahihman in, Tonzang ah akimang ngilh loh lam ka telpah uh hi. Mawtaw tung tuang a tangval no vansuah te in, Vialcian a tun tak tak uh teh, lawp lua uh hi ding hi ven na suah mang ngilh kha uh hi. Tua leh ko zong amawk aw, guai hih bang tawh nitak an ngawl thei ve ni e, ci’n ka kicimawh nuih kha zizen hel uh hi. Tua leh ko zong, ka lak vuah cycle hawl manlang ding ka kiseh seh uh leh Sakollam pan’ aa hong pai Sia Thangboih tungah ka tu sak uh hi. Ama’n zong hong nial ngam lo in, tha khat in, a cycle man pah in, mawtaw va delh pah ving veng hi. Tedim khua sungah pha dan hih tuak hi. Mawtaw te’n bel thei se lo uh, na hih tuak lai lai hi. Sia Thangboih , Vialcian hong tung kik ciangin, nitak lam nai 3pm bang hita a, hong tung teh nawh sa tak in, mei phat in, besan ka ui phing uh hi.
Tua ni pen nitak an nai 7pm pawl in ka ne kha pan uh hi. Nitak biakpiak na pen innteek pawlpi pan Sia Suann in hong makaih in, tha kingah mah mah hi. Hun man ciang in, Social Games ka bawl ngei ngei uh hi. Anop dan bel! Hih ni pen tu a bang dan teng in, ka zangh phot uh hi.
APRIL 23 – 26, TUESDAY – FRIDAY
Hih hun sung te pen, time-table sunga om mah bangin, khat zong kipelh lo in, aban ban in, Pasian’ hong hehpih na tawh, ka zangh thei uh hi. A ni ni in, nuam ka sa tek mah mah uh a, thu kigen, thu kisin te zong zaknop in, tha ngah leh manpha ka sa tek tek mai uh hi. Khangno’ hun tawh kisai in, Khangno leh Pilna, Khangno leh Sum zon zia, Zizon zia/ Pasal zon zia ding/ Khangno leh Hun awng/ Kiim leh Pam kep siam zia ding/ etc…., cih te tawh kisai in, Forum tuam tuam zong ka nei thei uh hi. Hih camp hun sungah Spiritual leh Social lam tawh kisai pen ka bulphuh mah mah phadiak uh hi. Thugen leh thusin na te ka cim uh teh, social games tuam tuam bawl zel, kimawl na tuam tuam, gual nop na, nuih na cih bang te tawh kal helh in ka nei uh hi.
Nitak kisil kuan sim in, tui bual kawm tawh thuah in, nitak meh ding leh zing meh ding ngaihsut na tawh, Meitei gun tuizeu lak ah ngasa ka sawk zel uh a, meh khop khopm zasan mehkhop cih bang dan ka ngah zel uh hi. Zingsang nitak biakpiak na te ah, Khua zang bup in hong uap zel zel uh a, biakpiak na inn sung ki dim zihziah den in tha kingah mah mah tek hi.
Nisim in hih bang dan in, Khazih sungah Pasian’ thu leh la lungngai in, sin in, gualnuam in, ka om’ laitak un, ka hun uh hong cing to vat ziau hi. April 26 Friday ni hong tung to vat ziau a, geel na om mah bangin, Tonzang ah Biakinn Thak Lut na leh Lungdam’ koh na nei khawm ding in, nuam sa lai pi pi mah in, Vialcian pan, ka ciah to ta uh hi. Pai lam aa mawtaw tuang teng khe tawh ciah ding in, Cycle tawh apai te in leh dawn kik ding cih aa ka geel sa uh hi a, Pasian’ mah in hong hehpih in, Tonzang mataw lampi akipuah laitak tawh kituak citciat ahih manin, Suangsii pua mawtaw pi khat in, camp kah pawl khat leh ka van uh pawlkhat te amawk na in, hong puak sak leu leu hi. Mawtaw tuang te mah pai masa sak zel ung. A nungah Cycle teng kithawi leu leu in, kigual diu deu in, aban aban in ka ding khia leu leu uh hi. Lam tawntungah ka gamlum to mah mah uh hi. Ka kituah pih uh te bangin lamdang hong sa liang mai kei uh hi.
Tua leh Tonzang khua lut ding ka hi ta uh hi. A sawt lo in, Tonzang khua sun 12:00pm in, ka lut pet pet ta uh a, khua sung teng amasa in ka kiim kot phot masa uh hi. Ka kiim kot khit uh tak ciangin, Tonzang te’ Biakinn thak lam ka zuan leu leu uh hi. Ala sai! A Biakinn uh ih upmawh na bang kei veh e, Tonzang khua sunga lettama siam teng’ lam ding mah in pha ei. Nak hoih mah mah si e. Ka ci tek mai uh hi. Innteek pawlpi mite’ hong awm tuivot ka dawn uh a, ka tawl uh ka dam sak hit hiat phot uh hi. Nitak lam pian tak ciangin, ka pumpi uh tunga om leivui teng sil khia in, ka kisawp siang uh hi.
Tua leh innteek lamte in zin maangpi dingin asap uh Sia Khenno te’ innkuan hi a, vai tuam tuam hang tawh innkuanpih dang te hong kihel thei lo uh a, Sia Khenno bek hong kihel thei suak hi. Ko zong khangno pawlkhat Cycle 8 tawh Kawlpi pan in Mannlong tawh ahong zing din khiat Sia Khenno(Talek Myodaw) dawn dingin ka ding khia uh hi. Khawl nuam, mun nuam sim khat ah ka ngak uh a, mannlong hong tun toh ciangin, khawl sak in, tua pan Sia Khenno hong tuak khia in, maitai tak in, khut te ka kilen ngei ngai uh a, ka tuivot puak uh ka dawn sak hithiat phot uh hi. Tua khit teh mawtaw in hong taisan a, Ko Sia Khenno leh avan tawm cycle tawh pua in, Tonzang te’ Biakinn thak ah ka lut pih masa uh hi.
Tua ni pen Friday ni hi a, Tonzang pawlpi te in, Sia Khenno te’ innkuan leh AY Camp lut teng an lim mah mah leh meh lim mah mah tawh an hong nek pih uh hi. Tu a Tonzang te’ biakinn lamthak pen abiakinn mun leh atuam tuam a pia khia pen Sia Khenno(Gin Khen Kham) – Talek Myodaw te’ innkuan ahi hi. Biakinn tungkhuh siik kang abei khempeuh hong sik, hong pia khia pen, Lamka a teeng, BSA siapi pa -Dr Dal Lian te’ innkuan ahi uh hi. Tua lo, Biakinn Pi’ aa dingin, mimal in apia khia tampi om lai hi.
Camp kah / lut ka hih uh mah bangin, Camp hun bei nailo, man nailo ahihman in, Biakinn pi ii khan awng munkhat ah ka vek pi un, tung khawm in, numei atuam,pasal atuam cih bangin, ka tung khawm ka giak khawm uh hi. Nitak zong biakpiak na limci takin ka nei uh a, tua lai ah, Sia Khenno in hanthot na tom no hong nei in, hong nui nui sak mai a, tha ka ngah mah mah uh hi. Hun man ciangin Camp kah tengin, Choir ngaih mah mah khat Sia NaaMung, Anlangh in hong sin pih hi.
APRIL 27 - HAPPY SABBATH DAY!
Sabbath School Service pen Camp kah te in ka la uh hi. Divine Service hun pen Pr Paulek in hong makaih in, hunpi pen Zin maangpi Sia Gin Khen Kham in thugen na hong nei a, kikhawm milip pawlpi mite in tha ka ngah mah mah uh hi. Divine Service hun sungah, International Youth’s Choir camp kah tengin ka sa zeizai uh hi. Sabbath ni S.S leh D.S man khit tak ciangin, thusin sa, thu kikup sa te review na or discussion nei in leh, Bible Quiz, Bible Pointer leh General Knowledge tuam tuam aa kipan Pasian’ in abawl sa na te sung pan atuam diak theih ding a kilawm tuam tuam te kikum in, kidong in, ka telloh na mun te uh ki hilh in, kigen in, Sabbath sunhun tua bangin ka zangh uh hi.
Nitak AY ah innteek pawlpi te in Camp kah teng hun hong la sak uh a, aban aban in, khat khit khat thangah na leh teci pan na tawh hun ka zangh uh hi. Hih AY hun sungah, adiak diak in hih AY camp tawh kisai in, sum bul hong pan khia Tg Sing Cin Mang leh Tg Go Min Thang te geel’ tungah lungdam’ koh na in, Pahtawi Na Laipi khat tuak Tonzang Circle Adventist Youth Society(TCAYS) min tawh kipia hi. Tentaann hong makaih sia te zong Zo dial pasal aa puan laidum neu te khat ta tawh lungdam’ koh na in TCAYS in kipia hi. Kikhawm khempeuh in tha ngah hi cih bel maw!
Sabbath nitak ah zong biakpiak na khat ka nei leu leu uh a, Khua sung, veng sung pan, kikhawm mi tampi tak hong pai in, biakinn pen gol mawh lo hi aki ci hi ven, mipi hong dim meimai a, kita lo dektak phial a, tua hun sungah Sia Kimno in hanthot na leh khangno te’ thapiak na hong nei in, kikhawm te in, tha ka ngah mah mah uh hi. Sabbath nitak pen hih bang dan in hun ka zangh uh hi.
APRIL 28, SUNDAY – A TAWP NA NI
Zing sang khua hong vak ta a, Camp kah te in zingbiak piak na ka nei uh hi. Hih zing sang biakpiak na hun sungah, Sm Cingboih, Anlangh in hong makaih a, tha kingah mah mah hi. Hun man ciangin ah Sia Kimno in hun tom no khat hong makaih a, Psychological View lam tawh kisai in, “Zi leh Pasal ding zon zia ding” cih gen pi in hong nei a, nungak tangval pawlkhat leh college sang naupang te in tha ngah mah mah uh hi. Zing biak piak na ka man khit uh tak ciangin, ko maikai pawl in budget en in, sum om zia sit in, tawm bang cian lai ahih man in, kikhen ni ahih si tawh, Tonzang aa innteek pawlpi miteng leh Camp kah teng in nitak an nekhawm ding cih ka vaihawm uh hi.
Innteek pawlpi mite’ sung pan in, Maingap zawk deuh teng’ tungah maitang dong kholh om sak lo in, ciammuih leh citak in meh man ding ka ngen uh hi. Tua pen sum tang pawlkhat ka ngah takpi uh a, aktui bek bek tang 500 val ka lei uh hi. Innteek nupi te in, anhuan meh huan lam tavuan hong lak sak uh hi. A sun sung tengin, bawlung kimawl na, khau kisuh na, khau kan na, tai kidem na, ballon game, kimawl na tuam tuam, etc…..cih bang in gualnuam in ka khuisa ngei ngai uh hi. Nitak an pen innteek pawlpi mi khempeuh tawh ka ne khawm uh a, ka gil uh avah mah mah hi.
Hih nitak pen atuam vilvel in ka bawl uh a, ka kipan baih thei thai uh hi. Biakpiak na hun tomno khat mah limci tak in, ka pawl thei uh a, Pr Kapta in hong makaih hi. Tua hun sungah Camp lut/kah teng khempeuh Pasian’ tungah apna leh Camp zawh lungdam’ koh thunget na Pasian’ sathau nilh Pr Kapta in hong neih sak hi. Biakpiakna hun tomno ka zat khit uh tak ciangin, pawlpi mi te tawh social games tuam tuamte ka kimawl ngei ngai uh hi.
Lup hun mah mah ta, kua mah alum nuam nai ka om kei uh hi. Ki khen ding hi ta ka hih manun, ka tha uh anem mah mah leu leu zel hi. Tua leh zingsang akmasa khuan dong cim hetlo takin, gualnuam in, kimawl na tuam tuam, kidem na tuam tuam, thangah tak, lawp tak , nop ci tak in ka bawl ziah ziah lai uh hi. Nop sa lai, gual nuam lai, ut lai pi pi mah in, ka lum ta mai tek uh hi. Hi ci bangin atawpna ni nitak hun ka zangh khawm uh hi.
A zingciang zingsang ciangin, ut leng, ut kei leng kikhen kul ahihmanin, khitui mual tuang sa leh khitui luang, khitui tak sa pi mah in, kikawi in, khut te kilen in, kikha kawi kawi in, ka ki khen ta uh hi. Ka lung aleng dan bel……maw!
Note :
- Time-table aa bang lian in, ka hih set set uh a, kipelh na bangmah om lo hi.
- Camp hun sung tengin, kua mah ut bangin pheng gamtat sak lo in, siii kan tawh ka ki uk or makaih uh hi. Vak na ding, pai’ na ding hawh nop na khat bang khat aom leh, a khuan ka la sak tangh tangh uh hi. Tua lo in, ka mawk len sak kei uh hi. Lup hun, thawh hun, kimawl hun, etc….. cih te ah ki thu mang in, hun man tak in, ka pang khawm liai liai uh hi.
- Biakpiak na hun sung tengah, lamakai, chairman, thungen, solo, duet, etc…. cih bang te ah Camp kah te khat zong peng lo in, ka kihel kim sak tangh tangh uh hi.
- Nitak sim Praise N’ Worship kinei den a, hun akiman baih pian leh, Social games tuam tuam ka kimawl zel uh hi.
- Hih camp bawl na hangin, Camp kah khangno te lungsim ngaih sut nate api cing zawk nate tampi tak ka mu uh hi. Kikhop thadah khat, kikhop hat, kikhawm dinga kisawl zolo khat, sawl kul lo in, kikhawm aa pai biakinn sung nuam sa mah mah ta, biakinn sunga pusuak suak khat, pusuak ngam nawnlo, biakinn sunga aki ho ho khat, kiho ngam nawnlo uh, solo sa ngeilo leh sa ngam lo te’n sa ngam ta, biakinn sunga PK hai hai khat in, hai nawnlo, Biakinn sungah om dan khawl dan ding thei tel zaw ta uh, kikhop ding thadah nawnlo, lawp ta uh, adang etc……., social lam hong siam mah mah ta uh, hong kidawm siam, hong kikem siam mah mah ta uh a, Spiritual lam bel gen vet lo in, hong siam mah mah ta uh hi. A dang zong tampi tak om kha lai ding hi.
- Zing an, nitak an, huan pen, Camp kah te sungpan numei leh pasal helh in nasep kipia in, an huan, meh huan kipan tah hi.
- A lamdang diak khat ah, Camp hun ma kal khat in asap in, kham tungah guah khuapi guah hong zu ta hi. Camp hun sung, nitaang in khua hun nuam mah mah hi. Camp ka man zawh uh akal lian ah akal bup in, guah ciin cih tak in ciin ngel ngelh zu ngelh ngelh hi. Topa in, ka thunget na te uh hong dawng mah mah hi. Topa in nak hong om pih mah mah hi, cih pen Camp kah teng in gen bel in ka nei uh hi.
- Belh thuah ah Time-table leh Mann pawlkhat hong belh ing.
LUNGDAM’ KOH NA
- A (1) Vei na Tonzang Circle AY Camp hong makaih, hong zawhpih, hong ompih den, Piangsak Pa, ih biak tawntung PA PASIAN’ tungah,
- Camp bawl’ na mit muh ngiat in, hong picing theih na dingin, khangno te avei na uh gamtat na tawh ahong lak in, sum leh paai tawh hong zep sak adiak diak in, sanggampa te geel, Tg Mangpu leh Tg Thangpi te’ tungah, leh piakkhiat na tawh ahong pang akua mah peuh tungah,
- Khua hun hong cing hong kep sak khua hun nei pa tung Pasian’ tungah,
- Camp hong lut khangno tuai-dawng khempeuh te’ tungah,
- Innteek hong sep sak, akisam bangin vai ding teng; hong van sak, Vialcian/Teekzang pawlpi te’ tung leh Tonzang Pawlpi te’ tungah,
- Thu sin na, lasin na/ atuam tuam hong makaih makai / sia/ siamah te’ tungah,
- Hih AY Camp tawh kisai in, thu hong nget sak leh tha hong pia mimal kim’ tungah,
- Phawk khak loh adang tampi om lai kha ding hi. Hih thu te pen leitung bei’ donga akiciam teh ding thu ahi hi. Camp lut teng leh ma hong pan pih khempeuh tungah ih biak Pasian in, thupha hong pia kim ciat hen!
- Hih lai hong sim sak mimal khempeuh tungah zong,
……Lungdam mah mah ei maw!.....
_______________________________________________
Ka Sin’ Thu, Ka Zai’ La
Dal,Tawmging(Tonzang)
7 Nov 2013
