36. Hong Tung Ding Alauhuai Kidonalian

Hong Tung Ding Alauhuai   Kidonalian

VANTUNG ah kidona hong om-a kipan Satan in Pasian thukham a paihkhiat zawh nadingin a hanciam den a hi hi.  Hih thu mah a picin nading deihna-in Piangsakpa langdo-in tualgal na phuang khia hi. Vantung pan a ki nawh khiat khit nangawnin tualgaal leitungah ana zom to lai hi.  Mihing in Pasian thukham khat pepeuh zui nuam loin nial leh, ama deihna a taang tung ding a hi hi. Ahangin thukham khat apalsatte in a vekpi-a a nial mah bang a hi hi. Tua hi leh ama huzaap in nawk a hih manin a palsat mah uh hi ve ve a, “a vekpi a susia bang mah hi ve ve,” ding hi. James 2:10.Pasian dinmun mawh sak ding a hanciamna ah Laisiangtho sung thu upnate a lum let sak hi. Tua hangin Laisiangtho thu um a kicite mi tul tampite lam hong pial pah uh hi. 

Thumaan leh thukhial ki nialna lian nu nung pen zong hih Pasian thukham tung taang mah a kinialna ahi hi. Tu-a eite do ding gitlohna lian zong mihingte thukham leh Jehovah thukham kikala kidemna ahi hi. Laisiangtho thuman zui-a biakna leh mite phuah tawm khang thuciin te zui-a biakna kilaka kinialna a hi hi.

 

Hih kidonalianpi sungah thumaan leh dikna do dingte in tu nangawnin a seem niloh ta uh a hi hi. Eite khang donga sisan nai san leh thuaksiatna tuam tuam (583) tawh a hong kipia suk suk Pasian kammal siangtho pen ki neu seh lua hi. Laisiangtho pen mi khempeuh neih theih dingin om napi, nuntakna lampi alak dingin a saang tak tak mi tawm mah mah hi. Leitungte lak bek hi loin pawlpi sung nangawn ah Pasian uplohna khang mah mah hi. Mi tampi in Khristiante upna bulpite nial uh hi. Thu lianpipi ahi Piansakna thu Laisiangtho-a om bang in umlo uh hi. Khristian a kicite mah in mihing puukna, hotkhiat kikna, leh Pasian thukhamte kip den ahihna, cih thute um nawnlo in, a buppi a hiam, a khawk khat peuh a hiam-in nial het mawk uh hi. Mi tul tampi in amau pilna suangin kisathei uh a, Laisiangatho sung thu a mal no no donga va zuih ciu-teu ding pen haina, ginat lohna bangin tuat uh hi. Kha tawh ki pawl vaipi pen pente nangawnah Laisiangtho thumaan mawh zon’-in, amau theihna leh siamnate tungnung sakzaw uh hi. Thuhilhsia tampite leh, mipil lai hilh siate in a pawlpi mite uh tung leh, a sangnaupangte tung uh ah Pasian thukham kikhek khinzo hi, a neng a tawnga zuih a sawm lai laite pen khuak kicinlohna hi, a nuih zak huai a khial zaw uh a hi hi ci-in mawhsakna thu hilh uh hi.

 

Thumaan a nial uh ciangin tua thumaan neipa nial a suak uh hi. Pasian thukham a sikcip uh ciangin tua thukham a piapa’ aana a nial uh ahi hi. Sing leh suang tawh milim bawl ding a baih zah khat-in upna maan lo thu pawl khat peuh bawl-in sep ding baih sa pah uh hi. Mite in Pasian a muhkhialhding deih in, Pasian omzia aleh-lam in aki muh theih nadingin Satan in mihingte amakaih hi. Jehovah tutna mun ah thuguisaupi anei thei ding milimte bawl in a tu sak uh hi. Pasian a nungta hia, Laisiangtho sung, Khrist nuntakna sung, leh a pian sak-nate sung pan kilang in dawk kawi-kawi hi napi, ahi ding bangin a bia mi tawm mah mah hi. Mi tul tampite in piansakna-te pasian-in nei napi uh in, a piangsak  Pasian a nial uh hi. A bawldan a tuam ahi ta zongin milim biakna ah Elijah khang lai-a Israelte biak mah bangin tu lai Khristian te in zong bia uh hi. Tua bangin mipila ki seh thuguisut siam pipite, laisiamte, gam le minam akinte, College leh siamsinna Sangpite thamlo in Laisiangtho sinna Sangpipite’ biak le paai a pasian uh akizutzol tawm singtum peuh hi zen a, Phoniciate’ ni-pasian Baal sangin tawm bang a mel lawm zaw tei bek ahi lel zen hi.

 

Khristiante pom thumanlote lak ah mihing in Pasian thukham zuih kul nawn lo ci-a akihilhna uh sangin zaa zeel baih (584) zaw-a, tung Pasian thu neihna asukha zaw, mihing thungaihsutna asu-sia zaw, leh gamtat ginalo apungsak zaw dang omlo hi.

 

Kumpi gam peuh peuh in zong a gam uh a uk nading thukham nei tek uh hi. Van leh lei bup a bawlpa in zong tua a bawlsate khempeuh a ukna ding Thukhun neiloin om mawk thei ding ahi hiam? Gentehna in, thuhilhsia minthang khat in mipite mai ah a gam mite leh leitang akemcing ki ukna thukhun leh thukhamte kul lo hi, tua te-in mipi suahtakna leh ut peuh-a gamtat theih nading hong dongkholh hi, zui nawn kei un, ci-in hilh den keei mawk leh, tua siapa sawtvei kikhah khong mawk in na um hiam? Tua bangin, minamte ki ukna leitung Upadi awlmawh lohna bek zong lau huai ding ahih leh, ki ukna khempeuh hong piankhiatna bulpi Pasian neih Upadi sik cip sak mawk ding pen bang zahin lau huai zaw kan lai ding ahi hiam?

 

Pasian in a thukham a beisak ding sangin, leitung gam leh minamte in agam ukna thukham phiat-in, gam miteuh a ut bang peuh-in om in, migilo thukhen nading leh midik pahtawi nading siksan leh thukhun meel neilo thamlo in, akhial adik cih omlo a koih dak ding uh baih sa zaw lai mai ding uh hi. Pasian thukham omlo hi cih na muna ki-ukna leh a piang thusiate ki mu thei zo hi. France gamah Pasian omlo hi cih thu in gam a uk lai-in, ukna agilo pen pen leh a thuak-hak pen pen ki-ukna nuai-a lutna ahih lam leitung buppi in amit tawh mu ngei khin zo hi. A hong hu den dikna le thumaan dinmun ahi Pasian thukham a ki paampaih ciangin, gilo kumpipa in leitung ah a vangliatna hong kip sakin, a ut banga gamtat theih nading lampi honsakna asuak zaw hi.

 

Pasian thukham a ki nialna mun ah mawhna pen mawhna bangin ki mu nawn lo ahih man in, thumaan limcitna zong a beei pah hi. Pasian ukna sung alut nuam lo mi in amah leh amah ki uk dingin zong a cinglo pha saan mi ahi hi. Pianpih lung tomna, huukna lanna tawh kidim in kikhaalna neilo, a paangtatsa khangnote tungah tua bang thuhilhna hoihlo a behlap uhciangin, khangnote lungsim ah thunialna lungsim aguan beh asuak uh hi. Pasian deihna (585) azuite mi navaaklo bangin nuih san uha, Satan khemnate lah lawp takin a saang uh hi. Lawkite tungah Pasian hehna dan atungsak leitung lunggulhna leh mawhna teng mah abawl uh hi.

 

Pasian thukhamte zuih kul lo hi ci-a hilhte in sawlman’ lohna khaici a tuh uh ahih manin, sawl man’ lohna gah mah at kik ding uh hi. Eite a hong len len Pasian thukham pen paikhia le’ng mihing thukhamte zong a ki awlmawh nawnlo pah ding ahi hi. Bang hang hiam cih leh, Pasian in gamtat hoih lote, ki hazaatnate, zuau gennate, leh kikhemnate a khaam hi. Mihing in ama suahtakna dongkholh hi ci-in tua teng sikcip leh, a thaman dingin Pasian thukham in a khaam tua teng mah a leh-ngah kik zaw ding uh ahi hi. Tua thukham in khaam kei leh kua in mawh ding kihta nawn ding hiam? I neihsa nate mang thang gawp pah ding hi. Mihingte in thatang hat ciam-in a vengte’ nate sut dinga, a thahat pen pen te a hau pen suak mawk ding hi. Mihing nuntakna nangawn kizah zo nawnlo lel ding hi. Innkuan nuntakna a hum, ki teena kamciam zong asianthona bangmah om nawnlo ding hi. A hatzaw pa in a veengte zi a deih gawh naak leh a thatang hat suangin sut ding hi. Thukham 5-na zong a 4-na mah bangin ki paaikhia pah ding hi. Tate in a lungsimnin uh tawh a deih khat a ngah theih nading uh hi peuh leh a nu a pate zong that ngam ding uh hi. Hoih taka ki uk leitung pen guta leh mithat teng kikholna mun suak dinga, lungmuanna, tawl damna, leh nop sakna, cihte khempeuh a vekpi-in leitung ah kimu kha nawnlo ding hi.

 

Pasian thukham zuih nading pan kapeng zo hi cih thuhilhna in mihing lungsim sung ki ukna teng thaneem sak a, leitung ah mawhna tuiciin hong lut nading kongvang a hongkhia hi. Ki uk theih lohna, vaak thaapna, kihhuai gamtatnate in tui hual bangin I tung ah hong tuum hi. Innkuan sungah Satan in na seem hi. Khristian innkuante tung mah ah zawhna dialkaih ki khai a, phe val val hiau zen hi. Ki een’nate, mawhzonnate, simtatnate, ki nusiatnate, ki demnate, elnate, thuciam siangtho siatsaknate, leh lunggulhnate adingin kamkaih phelkhia in a ki khahkhong uh hi. Biakna thubulphuh leh upnate pan ahi zongin, mihing ki ukna thubulpite pan ahi zongin puuk khin uha a kisia lel ding in a om uh hi. Migilo kheltat pen pen te bang thong a ki khiat ciangin a een’ huai bang liangin piak (586) peuh nei-in ki kinbawl mah mah zaw sop hi. A gamtatsia leh a suksiat thute uh ki tangko mai zaw lai hi. Thu ki zakna laite in a gamtatna te uh kim tak-in hong tangko leh lah tua te in mi khemna, guktakna, mithahna peuh a hong hi zel hi. Tua bang ciangin Satan bel a lung dam mah mah lel hi. Gitloh nuam a sate, mi thah nuam a sate, leh a ki deek thei lote’ omziate pen Pasian zahtakte adingin, tua gitlohna te bangci daaih sak ding cih ngaihsutna a pia khanlawh nading ahi hi.

 

Thukhen mang zumte zong kihhuai gamtatna tawk ki dim hi. Gam ukte zong huai ham in ngah nading leh gualnopna en lah lua uh hi. Ki deeklahnate meii bangin kaai a, Satan in amaute a pumpi in uk khin zo dek ta hi. Thukhente in golhguuk ne-in thu a manlo in thukhen uh hi. Upadi a leente-in zukham-a gualnopna, iiplahna, een’nate pan a kipan a gamtatsia tengin gamta zaw mawk uh hi. “Thutang kihawlkhia a, thuman in hong naih theilo hi. Mihonpite kikhopna munah thuman kizang lo a, thutang tum thei lo hi.” Isa. 59:14.

90

Rome liatpen hun sungin gitloh gamtatna leh khaa lam khuamialna in a ukcip na ahangin Laisiangtho a paih khiat man-a piang a kipelh thei lo thaman ahi hi. Biakna suahtakna om-a, Lungdamnathu sun nitang abat na munte ah cik in Pasian a phawk lohna, Pasian thukhamte nialna, gamtat siatna, leh kih huai gamtatna te in ukcip ngei ahi hiam? Tu in Satan in leitungte mai ah Laisiangtho pen len cip thei nawn lo ahih manin, a nasepna zia dang ah heii ta a hi hi. Laisiangtho sunga upna susia-in ama deihna bang um sak thei leh, ahih kei leh a Laisiangtho mah mah susia thei leh, ama deihna bang ngah thei ding hi. Pasian thukham in hong uk nawn lo hi ci-a hilhna tawh mite in thukham hong palsat leh, a thukham a seelcip sak zah mah-in muibun ding hi. Tu in khang masa lai-a mah bang in, pawlpite zangh in a sem leu leu hi. Biakna pawl pawlte in taangpi zaknop loh leh theih loh Laisiangtho sung thumaante ngai nuam het lo uh hi. A ngahsa uh thu ah tutkho in, aLaisiangtho khiatna manlo tawh alangdo uh a, lung hian (uplah) nading khaici a vawh kawi kawi uh hi. Pope lampialna ahi sih theihlohna leh sih cianga phawk theihna om lai cih upna khawngte pen sikha khemnate bekmah siksan dingin a nei uh hi. Migilote in gawtmunah, si la silo hing-la hinglo in, tawntung daan thuak ding cih thuhilhna in zong (587)mi tampite Laisiangtho a umlah sak tuam hi. Pasian thukham li-na mite a ki hilh ciangin a ni 7 ni Sabbath zat nading thu tawh hong kizom hi. Deih lo-a a zuih noploh uh thu ahih manin, a paih khiat theih nading un thukham in hong uk nawn lo hi ci-in aki hilh ngiau mawk uh hi. Tua hangin Sabbath leh thukham paikhia khawm uh hi. Sabbath puah kikna hong om ciangin thukham li-na zuih ding pelh theih nading hanciamna leitung bupin hong lawh ding hi. Biakna makaite in Pasian phawk loh nading, sikhathu up nading, leh Pasian thukham siangtho huatsah nading kong a hong uh hi. Tu lai Khristian lak-a om gamtat gitlohna teng zong tua makaite hang ahih man in amau ki ngawh kik ding hi.

 

 

Hih te pawl in mawhna gamtatsia akhanna pen “Khristian sab-bath” acih pong hel uh Sunday akithusim loh man hi ci uh hi. Zawhthawh sawlna tawh tua ni aki tan sak ciangin mihing lungsim ong piangthak in gitlohna teng ong kiam ding hi ci zaw sop uh hi. Hih thu pen Sabbath maan a kinak hilh pen na mun America mah ah ki nak sawl pen pah leu leu hi. Hih Sunday tanna ding aana tawh a sawl uh ciangin mite thupi sim bel ahi lungsim puahphat nading ki deek ki daamna leh cidamna lam nasep a paulap uh hi. Mipite lawp theih pen pen dinga naseem ka hi uh hi, hih thu a hong saang nuam lo te pen ki deek ki daamna leh cidamna gal ahi uh hi, ci nong deep sam uh hi. Tua nasepna ah thuhoih ahi kideek kidaamna a ki hel tei hangin a thupi zaw-in ci le’ng lampial dinga sawlna bulpi hi zaw mawk hi. Guu pen an limci tawh I hel hangin guu a hihna kheel tuan lo hi. Tham loin a theilote in guu tawh ki hel an ne hiau mawk ding uh ahih manin a lau huai mah mah lai hi. Tua banga mite deih theih nate leh a khial na khat gawm-a sepna se zen pen Satan ngimna a hi hi. Sunday nasepna (588) makaite in mite kisapna lian pen khat ahi cidamna thu tawh hong gawm ciangin Laisiangtho sung thu tawh zong a kituak ding mah a bang hi. Ahih hangin Pasian thukham tawh a ki lehbulh khat tawh hel hiau se mawk uh ahih manin Pasian nasem tak takte pen amau tawh a kipawl thei lo uh a hi hi. Mihing bawltawm thukhun zuih theih nadinga Pasian thukham paih khiatna in pau lap tuam-tuam a neih hangin aki dikzun theingeilo thu ahi hi.

 

Lamkhial thu lian mah mah nam nih zangh in Satan in mite a khem hi. Tuate in, Khaa sitheilo hi cih upna leh Sunday tanna thu ahi hi. Amasa pen in Khaa sitheilo cih upna a kip sak nadingin sikha hopihna tawh pan in, a Sunday nipi a zatna in Rome tawh kilemna ding lampi a zik khol ahi lel hi. Sikha hopihna pom ding in America-a Protestantte in ki lamdanna kuamthukpi kantan-in a khut hong zam masa pen ding uh hi. Tua khit in Rome vangliatna tawh khut hong kileen ding uh hi. Tua khit ciangin hih pawl thumte thuzawhna tawh United States (America gam) in Romete khekhap tawn in, pianpih gogil ahi biakna suahtakna hong sikcip ding uh hi. Sikha thu upna pen tu hun Khristian upna tawh kinak zop mah mah ta ahih manin tua sunga a thaangsiahna mah ah mi tam awk zo zaw pah ding hi. Satan mah mah zong tu hun omzia in hong om hi. Amah in khuavak tawh kipawl vantung mite bangin kilak ding hi. Sikha nasemte zangh-in na lamdangte bawl dinga, cina te dam sak ding uh hi. Nial theih loh na lamdangte tawh nasem ding uh hi. Tua khaate in Laisiangtho ka um uh a pawlpi zong ka zahtak uh hi ci ding uh hi. Tua ahih manin amau nasepna pen Pasian sep vangliatna bangin ki mu ding hi.

 

Khristian ka hi aci te leh Pasian abia him him lo te ki kal ah ki lamdanna bang mah om lo a, khen tel hak mah mah ta hi. Pawlpi mite in leitungte deihte deih ve uh a, amaute tawh kipawl uh hi. Satan in zong sikha nasepna athakhauh sak nadingin tua bangin amaute gawm in pawl khat a suah ahi hi. Papist pawlte pen nalamdang bawlna tawh pawlpi maan hi aci dente uh ahih manin, tua na lamdangte tawh a khem baih mah mah ding hi pah lel uh hi. Protestantte zong thumaan paikhia khin mawk uh ahih manin hong lut pah lel ve ve ding uh hi. Rome pawlte, Protestantte, leh leitungte, a thum un Pasian thuzui bangkeek in hong om ding uh hi. Tua teng ki gawm amuh uh caingin leitung bup kikhel-in, sawtveipi ki lam-en kumtul maan’na hong piangsak ding kipawlna hi ci ding uh hi.

 

(589) Sikha nasepna zangh-in Satan pen mite thupha piapa bangin hong kilang dinga, mite natna te damsak in, upna thak biakna hoih zaw a hong puak bangin ki gen ding hi. Ahih hangin tua nasep pen mite suk siatna ahi zaw gige hi. Ama mawhzolna sungah mihing tampi kisia hi. Ki kep lahna in thu theihna kiam sak ahih manin, khuaval zulhtatna, ki elna, khangsak in sisan naisan kisuahna in zui pah hi. Satan in ngonghtatna nuam sa ahih manin, a thuakte in gitlohna, sisan luanna banah a tawntung maiman nadingin, a sia pen pen dong sem dingin mite lungsim a hansuah hi. Pasian nilian ni-a ding kigin kholhna lungsim neilo in a heikhiat theih nadingin, mi nam khat leh nam khat sutuah taw holh in akido sak den hi. A kiging khol lo khaa te ama ansaal sunga a sen’ theih nadingin Satan in na bulpite (elements) zong zangh-in na seem hi. Amah in Pasian bawlnate pianzia bulte a thei hi. A siamna leh a theihna Pasian in aphal zah zah siit loin pianpih nate tungtawn in zong na a sem hi. Job bawl siat theih nading thu angah ciangin nawh sa tak-in a gangualte, a naseemte, a innte, leh a tate, Pasian piansaksa nate zang-in tawm vei sungin abanban in a sukmai mang sak hi. A susia nuampa’ vaangliatna tawh kipelh nadingin Pasian in a mite dal dal in, hum hum zaw napi Khristian bup in Pasian thukham a hua uh hi. Topa in a gensa bang mah in A thukham a langdote leh mi dang hilh-a a langdo sak te a daalna thupha leitung pan in dok khia ta ding hi. Pasian huut tang tuamte lo peuh mah Satan in ukcip pah hi. Ama ngimna a picin zawk theih nadingin pawlkhatte bang daupai sak-in a lawh cing sak hi. Midangte buai sak-in gimna hong pia pen Pasian hi ci-a up theih nadingin mite a makaih hi.

 

Natnate a dam sak zato mangpipa bangin mite lak ah kilang vial zen a, ahih hangin khuapi pawl khat a bei mang sak dongin natna leh buaina a piangsak kawi kawi hi. Tu in zong amah pen kicing lah liang-in na a seem seem a hi hi. Leitung tuitungah tuahsiatna piang sak a, patau kaangmei nasia te, huihpi le (590) piingpei te, gialpi kia te, khuasia kipeite, tui leet vuh cipna te, tui hual te, leh ziin liinnate, mun tuam tuam ah a bawl kawi kawi hi. Satan a vangliatna tawh kheltat siamna nam tul bang zangh-in tuahsiatna akhelno no apiang sak hi. Khaici min ta an laak ding hun lin lian laitak khawng suksiat sak hiau mawk-a kialpi in a nungzui pah hi. Huih lak ah sihna guu khah a, nat gualtaai in mi a tul lom lom-in a sisak hi. Tua bang thuaksiatnate pen ki nawh seemseem in hong ci mawh sak seemseem lai ding hi. Mihing leh ganhing te hong susia ding hi. “Leitung in dahna tawh kidima, vulcip ta hi”, “mi kiphasakte…tha zawm ta hi. Leitung in a tunga teengte nuai ah a niin gawp hi. Tua pen amau in thukhamte palsat-in thuciamte khek uh a, tawntung thuciamna a suksiat bang uh a hi hi.” Isa. 24: 4, 5. Tua hun ciangin mikhem mangpa in, ama bawl thuaksiatna teng pen Pasian biate hanga hong tung hi ci in mite a umsak ding hi. Pasian thukham zuite hang in vantung heh in, tua buainate hong tung hi, ci in leh-ngawh ding uh hi. Sunday nipi a palsat man-un Pasian hehsak uh hi ci ding uh hi. Tu-a gimnate pen Sunday nipi palsatna tawh Pasian kilangdo ahih mana hong piang ahi hi. Sunday aana hial-a I tan sak kei leh daai ngei lo ding hi, ci zaw lai ding uh hi. Thukham nambat li-na a zuite in Sunday zahtak lo uh a, mite gim pia-in Pasian thupha saang sak theilo uh ahih manin khantohna leh picin na ding teng susia uh hi, ci in ngawh ding uh hi. Tua bangin Pasian naseemte lang bawlna pen tanglai-a te mah bangin hong kinei kik ding hi. A paulap uh zong tanglai-a te mah bang hi a, “Ahab in Elijah amuhciangin, Israelte buaisak nang na hi haim? a cih ciangin Israel te buaisak pen kei hi loin nang aki pan napate leh na bawng bup uh a hi uh hi. Topa thukhamte na nusia uh a, Baalim pasian na biakna hang uh a hi hi”, 1 Kumpite 18:17, 18, a cih lai hun bang hi kik ding hi. Lamkhial Israel te inElijah a ngawh zaw sop mawk uhmah bangin mite in ngawh khialhna tawh Pasian mite tung ah nakpi heh in a mudah ding uh hi.

 

Sikhah hopihna pana piang na lamdang bawlna tawh Mite thu sanga Pasian thu ka mang zaw ding uh hi a ci mite nakpi-in ki langdo ding hi. Sikha tawh a ki thuza zel te in (591) amaute pen Pasian kiang pana Sunday nialte tel hilh ding a hong ki sawl hi kici ding uh hi. Pasian thukham zah mah in leitung thukham Upadi zong zuih nading in a hilh a ki sawl bang keek in gen ding uh hi. Leitunga gitlohna pung lua khawngte a lung himawh mah mah bangin kibawl in hong thuum ding uh hi. Biakna makaite teci pan’nate thukim pih-in mihing ginat lohna pen Sunday a thu neu sehna hang uh hi ci ding uh hi. Amau hong puak tecipan’na a na nialte tung ah nakpi heh-in lungso ding uh hi.

 

Satan in kidona lian vantungah a patcil lai-a a azat ngeina teng mah tu huna Pasian mite a dona nu nung pen ah zong zang suak lai ding hi. Amah in Pasian gam kip nading a hanciam bang keek in ki gen dinga, a simtham tak-in a leh sawn paih nuam a hi hi. Ama nasep gitlohna teng leh sep a sawmnate vantung misiangthote sepna leh hawmna hi ci in ngawh hi. Tua mi khemna nasepzia pen Rome pawlpi sung ah ki zangh ngei zo hi. Amah pen vantung Sawltak in kigen a, Pasian sangin a kilian sak zaw hi. Ahih hangin Pasian thukham te a khek hi. Rome uk hunsunga Lungdamna Thu len tentan-a a sih pih te pen thusia bawlte, Satan tawh ki pawl te hi ci in a leh-ngawh uh hi. Min siat theih nading van nuai siit loin mipi leh amaute mai ah a sia thei pen pen-a dawk dingin hanciam uh a, mi gilo pente hi a ci uh hi. Tua bang teek teek mah zang in tu-in zong hong om kik ding hi. Sa-tan in Pasian thukham zuite a suksiat theih nadingin kumpi thukhun palsatte, Pasian zah tak lo te, kamsiatna hong thuaksakte, cih vi ve-in leh ngawh ding uh hi.

 

Pasian in bel mihing te sunglam upna leh deihnate aana hial-in nawk sak ngeilo hi. Satah in mite a uk zawh theih nadingin gitlohna zawhthawh bawlna vi ve zangh ding hi. Tua cih kei leh lah uk zo lo mah ding hi. Kihtakna leh launa hang peuh, zawhthawh sawlna zangh in mite sunglam upna lungsim lencip in, amah kibia leh a ut a hi hi. Tua banga a sep theih nadingin biakna lam leh leitung ukna lam thuneite zangh kop hi. Tua ciangin, Pasian thukham sia sak in mihing thukham a ultung sak dingin a zawhthawh bawl sak hi.

 

Laisiangtho Sabbath a zahtak mite pen Upadi leh vaihawmna langpangte, (592) mihingte kipawlna a susiate, kumpite a buaisakte, Pasian hehsak in leitung buai sakte hi ci-in ki ngawh ding hi. Amaute pen kumpi deihlote ci in ki ngawh ding hi. Biakna Sia seem Pasian thukham a nialte in pulpit panin kumpite thu mang ding hi cih pen pi gen pha se ding uh hi. Thukhen zumte, thu sitna zumte panin PasianThukham zui mite pen ahi lopi-in ki mawhsak ding hi. A kampau malte uh a tuampi in pehtawi in zepsiat sak ding uh hi. A gamtatna khempeuh uh a sia lam lam-a a uang thei pen pen in bulh sak ding uh hi.  

Pasian thukham kip den nading tel takin Laisiangtho sungah a kimu pen Protestantte in nial mawk laklawh uh ahih manin, tua thukham leente gamdaai takin a om lel ding uh a deih lua peuh mah uh hi. Amaute in tua thu ki muh mawh bawl in a mit uh hum uh ahih manin, Khristian khempeuh zuih pope’ nipi a zui nuam lo, sung lam upna ahi biakna suahtakna a kip let tentante bawlsiat nading vaihawmna ah a pawlpih zaw ta uh hi.

 

Pawlpi leh kumpite lam makai uliante kikop-in mi khempeuh golhguuk hiam zawhthawh bawl hiam tawh-in Sunday tang sak ding uh hi. Pasian thupiakna a let-san ding uh lah om lo mawk ahih ciangin tua bang mite gawt nading upadi hong zangh ding uh hi. Leitung ki ukna kisia lua ahih manin tua in thuman manpha sakna leh itna te a kisia sak hi. A suakta America gam na ngawn ah kumpi te leh thukhun bawl te in mipi pahtak ding a deih man un, mi honpite ngetna leh deihna zui-in Sunday aana hial-a tan’ nading Upadi bawl ding uh hi. Sunglam upna bang zui thei ding suahtakna pen a manpha pen hi a, tua thu ki awlmawh nawn loin aki thusim nawn loh hun hong tung ding hi. A sawt lo-a hong tung ding kidona ah, “Gulpi in numei tung ah heh mah mah a, Pasian thukhamte tham loin Jesu’ teci pan’na a len numei’ suante lak pan a om laite tawh galdo ding in” (Mang. 12:17) kuan khia hi cih kamsangpa thugen atak tak a hong piang ih mu ding hi.

 

                                                                91