39. Buaina Hun

Buaina Hun

 

 

TUA ciangin saihadial puan a silh vantung mi in, ‘Na mite a cing, a lian vantung mi Michael hong kilang ding hi.  Tua ciangin leitungaa mihing apian’ zawh-a kipan a nasia penpen gimna hun hong tung ding hi.  Tua hun a hong tun ciangin Pasian laibu sunga a min kigelh na mite khempeuh a kihonkhia ding hi’ a ci hi. Dan. 12:1.

Vantung mi thumna tangkona a ki zawh ciangin leitunga teeng mi mawhte pen hehpihna in hum nawn lo ding hi. Pasian mite in amau nasep a zo ta a hi hi. Amaute in “Guah nu nung” “Pasian kiang panin puahthaknaa” a ngah khin uh hi. A nawk ding uh ki sittelna hun adingin amaute ki ging khol khin uh hi. Vantung mite ki cinglah-in vantung ah ki lek zel zul uh hi. Leitung panin vantung mi khat hong ciahto a, ama nasep kizo khin cih hong pulaak hi. Sittelna nu nung leitungah ki bawl khin a, Pasian thukham tungtang-a muan huai mite tung ah “A nungta Pasian’ ciamtehna” ki pia khin zo hi hong ci hi. Tua ciangin Jesu in vantung Biakbuk sunga A Palai nasep a khawl hi. A khut laam toin aw ngaih takin, “A zo zo hi” ci in a ki ko hi. Tua khit ciangin “a gilo mi in gilo lai ta hen, a kihhuai gamtatte in kihuai gamtat lai ta hen. A dik mi in dik in gamta lai ta hen. Athumam mi in thuman lai ta hen. A siangtho mi in siangtho lai ta hen.” Mang. 22:11, 12 ci in hong ki ko a, tua lai takin vantung mihonpi in a lukhu uh a la khia uh hi. Mite thu khempeuh, sihna thuak ding maw nun na ngah ding cih, ki khentel khin zo hi. Khrist in Ama mite mawhna laak khiat sak a, siansuah khin zo hi. Ama mi a hi ding te ki sim khin a, van nuai gam khempeuh ah Ama (614) Kumpi gam leh Ama Ukna kibawl khin ta hi.” Hotna ngah ding mite a luah ding uh ki pia ta a, Jesu in kumpite Kumpi, tote Topa-in a maang ta ding a hi hi.

 

Amah in van Biakbuk pan apusuah ciangin leitung pen khuamial sahpi in tuam cip hi. Tua lauhuai hun-in siangtho Pasain maitang ah midikte in Palai nei a om uh hi. Mi gilote a leen’ ni loh migitna pen ki lakhia ta a, Satan in a ki sik kik nuam lo mite a theih tawp-in uk ta hi. Pasian lungduaina pen a mong tung ta hi. Leitung in Ama migitna nolh uh a, Ama itna sim mawh-in a thukham sik cip uh hi. Migilote in amau hun hoih kheng khia ta uh a, Pasian Khaa a ki nolh denkeei pen ki dok khia kik ta hi. Pasian thupha in a kepna belh ding om lo a, migilote kiang pan ki dalna om nawn lo hi. Satan in leitunga teengte khempeuh lak ah lutin buaina lian pen piang sak ta hi. Pasian vantung mite in mihingte dal dingin huihsia nung ding a dal ni loh uh pen tu in ki khah ta ahih manin buaina om thei khempeuh tho khia lia lua uh hi. Leitung buppi in tanglai Jerusalem ki siat lai sangin nasia zaw-in kisia zia zua ta hi.

 

Vantung mi khat bebek in Izipt gam-a ta upa khempeuh that khin thei a, a gam bup dahna tawh dim sak vat thei hi. David in Pasian a lang do na in mikisimna abawl laitakin vantung mi khat bek in ama mawhna daan pia a, ki siatna lianpi a piang hi. Pasian in siangtho vantung mite tua bang siatna bawl dinga a sawl mah bangin Amah in vantung mite hun pia dinga a ut a dahun nuai ding uh hi. Tu-in tua bang sem dingte a ki gingsa-in om zo a, mun ci teng susia dingin Pasian in hun a piak khiat ding bek ngak-in om uh hi.

 

Pasian thukham a zahtak mite bawl-in leitung ah thukhenna hong tung hi ci in ki ngawh hi. Tua nate pianpih ki siatna lauhuaaite (ziinliing, huihpi) leh mite laka kitotna, ki dona sisan suahnate leitung ah dim a, gimna omte amau ki ngawh zaw sop ta hi. Patau kona nu nung a huh vangliatna in migilote tok tho hi. Amaute lunghaamna hong ki tawh kuangin thumaan saangte tungah heh ih hi. Tua baan ah Satan in a ki mudah ding leh bawl siat ding a na taw holh beh lai hi. (615) Jew mite kiang panin Pasian om pihna a ki lakkhiat laitakin siampite leh mipite in phawk kha lo uh hi. Satan in pum-uk gawp khin-a, siatna a mulkim huai no no nam kim thuak khin napi uh in amau leh amau in Pasian teel tuamte hi hang ci-in ki seh lai lai zen uh hi. Biakinn sung ah nasepnate zom zom lai uh hi. A kih huai biakna tau ah mawh sutna sisan te tawh ni sial in va pai uh a, Pasian Tapa-it’ sisan tunga a mawhna te uh ni sial-in va selpho niloh uh hi. Pasian naseemte leh sawltakte thah dingin zong kawm kawm lai sawn uh hi. Tua mah bangin van biakbuk sungah a ki khel kik theih nawn het lo khentelna a ki pulaak khin a, leitung omzia ding zong a kip-in a ki seh sak khit hun nangawn in leitunga teeng mite in thei nai lo ding uh hi. Pasian Kha Siangtho in a nusiatsa mite in biakna ngeina teng mah bawl bawl lai pepeuh tazen uh hi. Satan in tha nuam takin siatna namkimte amaute buakin nuai nuai keei ta napi, Pasian adinga tha nuama sem bangin ki seh lai lai tazen ding uh hi.

 

Sabbath pen Khristiaante lak ah ki nialna bulpi pen a suah hun leh biakna leh leitung ukte kikop hun ciangin Sunday tan’ nading aana hial-a a sawl ding uh hi. Pawlpi leh leitung kipawl in a sawlna anial niloh mi hon lomno khatte pen leitungah lipkhap huai muhdah pen pente bangin seh ding uh hi. Pawlpi khempeuh leh leitung bup vai hawmna a langdo leitung a buai sak tua mi lomte pen om kei zaw leh ci –in thuak zo nawn lo uh hi. Tua bang lungsim mah tawh tu ma kum 1800 lai-in “mipite leh Ukpate” in Khrist tung ah langdona na nei ngei zo uh hi. Mi huaai ham Kaiaphas in, “Ih minam bup in siatna athuak sangin ih minam bup tangin mi khart si leh a hoih zakna thu phawk lo na hi uh hiam?” Johan 11:50 ci hi. Hih vaihawmna tawh thu ki khentat a, Thukham li-na Sabbath a siangtho sak tei tei te a khel thei pen pen daan tatna thuak ding a ki lawm hi, tua hi leh mipite suakta thei ding hi ci in a hun seh-in tawm vei khit ciangin thah dingin thupiakna aging khia sak uh hi. Eu-rope a Rome pawlpi’ zat bawlsiatna nam mah America a Protestant te’ in Pasian thukham (616) zuite tungah hong zang ding uh hi.

 

Pasian mite in tua hun ciangin kamsangpa gen kholhna mah bangin Jakob lungkham hun sung ah lut ta ding uh hi. “Topa kong cih in ah: Launa leh patauna aw ka za a, lung nopna thu kaza kei hi.…Nu e! tua ni lianpi hong tung ding a, ni dang tawh teh thei ding hilo hi! Jacob’ suante’ gim hun hi dinga, ahih hangin amaute suakta ve ve ding uh uh hi.” Jer. 30: 5-7.

 

Jakob inb a lungkham ni zan in Esau khut pana hot khiat nading thu ngetna tawh Pasian a buan zia mah in mite in a buan ding uh lim a lak khol a hi hi. Piancil 32:24-30. Jakob in a pa thupha a saan’ theih nadingin Esau ki neih in apa akhem a hi. Tua khem bawlna hangin a sanggampa thah ding a lau ciangin a nuntaakna huu dingin a tai mang hi. Kum tampi khit ciangin, Pasian sawlna tawh, a zi a tate leh a gangualteng tawh a pian’ na gam lam ah ciah kik ding a sawm hi. A gamgi a tun’ ciangin Esau galkap hon khatte kiang pan thu a za hi. Tua ciangin hehna hong thuk kik takpi ding hi tah ci-in lau-in a liing hi. Jakob pawlte in galhiam leh belh ding om lo ahih manin, sat zaan leh thah thuak lel ding bang dinmun hong hi ta mai hi. Ama hanga hi thu a piang ahih lam amah leh amah mawh kisa pha saan-in, a lung kham lua hi. Pasian migitna leh hehpihna bek lam et theih ding om a, thu ngetna bek gal hiam hong hi ta hi. A sanggampa tunga khialhna teng bawlphat nading leh tua a lauhuai thu a ki lumlet in hotna angah nadingin, a bawl theih khempeuh siit loin a han ciam hi. Tua hun mah bang in Khrist nungzuite in zong tua buaina hun hong tun’ ciangin mite muhkhialna leh sunglam upna suahtakna a ngah theih nading un a dal teng bei a, thusia ki lumletin mipi telsiam a ngah nading un bawl theih khempeuh a bawl ding uh hi.

 

Alungkham luatna teng a muh pih lo dingin Jacob in a innkuanpih teng tuam om sak-a, amah kia-in Pasian koppih nading a ngen hi. Ama mawhna te pulaak-in Pasian migitna a saan’ sa te ko kik a, ki niam khiatna lianpi tawh a pa tunga a ki khaam sa thuciam leh (617) amah mah Bethel-a a giah nizan-a a mangmatna te khawng a pau lam hi. Ama nuntakna a lau huai na hun hong tunga, na khempeuh lauhuai khin hiau hi. Zan khuamial gam daai sung ah amah kia ki niam khiat-in Pasian mai ah thu a ngen hi. Tha khat-in a liangko tung ah khut khat hong ki nga hi. A lungsim sung ah galte in amah that ta ding hiam ci-in a tha tang neih khempeuh tawh a buan pah tal-tal hi. Zan khua hong vak dek tak ta hi. Mihing sangin vanglian zaw ahih lam lah nadingin a langpa in tua mithahat Jacob a lawng hi. Jacob zaw cip pah in, a puuk hi. Ci mawh-in, a kah kawm kawm-in a galpa ngawng kawi-in thu a ngen hi. A ki buanpihpa pen kamciamna a pia vantung mi hi ci-in thei ta hi. Tho zo nawn loin na sa mah mah napi, a deih na pen khah suah nai lo hi. Sawtveipi lung gim-in a mawhna a ki sik kik hi. A mawhnate ki maisak khin ahih lam khamuanna a hong deih ta hi. Pasian sawl lengla pa ciah nuam ta hi. Ahih hangin ama tung ah Jakob luai geigai lai a, thupha piak ding a ngen hi. Vantung mi in, “Hong khah in, khua vak ta hi” a ci hi. Ahih hangin tulpi pa in, “Thupha nong piak mateng in kong khah kei ding hi” a ci hi. A muanna, a thuakzawhna, leh a lametna kho in kip mah si maw! Ki sialhnaleh a kineihkhem peuh hi leh Jakob pen tha khat thu-in kisia takpi ding hi. Ahi zongin a thamcin’ lohna teng, leh a tha neemna teng a ki pulakna ban ah Pasian pen thuciam pelh lo, a migi ahihna kip tak in a muang mah mah ahih lam a ki muh telna a hi hi.

 

“Amah in vantung mi nangawn a thu zawh hel sam hi.” Hosea 12:4. Ki niamkhiatna, ki sik kikna, leh amah le ki pum-apna tawh, asi thei mi mawh mi khialh pa in vanglian vantung buan in a zo hi. Lau-in a liing sa pi pi mah-in, amah in Pasian thuciam a len ten tan hi. Mong neilo itna lungsim a neipa in zong hih mi mawh pa thumna mawk paih khiat sak thei nawnlo hi. Ama gualzawhna ciamteh nadingin leh ama omzia et teh-a mi dangte zong a lung khauh theih nadingin, mawhneipa phawkna min panin mawh a zopa cih tawh ki khek sak hi. Jakob in Pasian nangawn a zawh hel na pen in mihingte zong zo ding cih a ki lahna ahi hi. Pasian in ama belhpa hi ta ahih manin a sanggampa’ do ding zong, tu in, lau nawn lo hi.

 

(618) Satan in Pasian vantung mi mai ah Jakob pen mawh sakin, a mawhna thaman tawh a a ki suksiat ding mah hi, ci hi. Esau zong han suah a, amah nawk gawp dingin tawholh hi. Vantungmi tawh zan tawntung a ki buan buan laite in Satan in Tuulpipa Jacob tungah a mawhna te a phawk sak hi. Lung kia a Pasian a pom ten tan-na te a khah suah theih nadingin hanciam hi. Jakob pen lungkia sak zo dek tak phial hi. Ahih hangin vantung pan hong ki huh kei leh kisia takpi ding cih a thei gige hi. Amawhna lianpi ki sik kik mah mah hi. Pasian migitna a ngen hi. A deihna a tun’ ma teng talo keei-in ngen tei tei a, lung gim-in kap-a, a deih a ngah dongin a leencip hi.

 

Satan in Esau hansuah-in Jakob do dingin a kuan khiat sak mah bangin tua buaina hun hong tun’ ciangin zong migilo te hansuah-in Pasian mite susia ding in tawholh ding hi. Jakob a mawh siat mah bangin Pasian mite zong a mawh siat ding hi. Amah in leitung bup ama mi-in a seh laitakin Pasian thukham zui mi lom tawmno khat te in ama liatpenna na langdo uh hi. Tua milom tawmnote leitung panin phiat siang thei leh ama gual zawhna a picing thei ding a hi hi. Tua mite vantung mite in vil uh a, a mawhna te uh ki maisakin, van Biakbuk panin zong amaute thu ki khentel khin zo hi cih pen a mah in theih pih lo hi. Tua mite mawhbawl dingin zol ngei zo a a mawh sak sa te zong a mun, a hun, leh a thu te tel takin a thei hi. Hih mite zong amah bang mahin Pasian in amawhna uh hangin a suksiat lel ding te hi ci-in gen zal zal keei zen hi. Amah in, Pasian in tua mite mawhna mai sak-a amah leh a pawl vantung mi mawhte susia ding cih se mawk pen thutang hi thei lo hi cin-in gen sesa keei zen hi. Tua mite zong ama galmatsa vive hi khin zo uh a, a suk siat dingin ama khut sunga a piak lel ding hi zaw hi ci in Pasian kiang ah gen hi.

 

A mawhnateng uh paulap in Satan in Pasian mite mawhkawk den hi. Tua ahih manin Satan in ahih theih tawp in amaute a ze-et ding in Topa in aphal hi. Pasian a muanna, a upna uh leh a kipna te uh nasia takin ki sittel ding a deihna a hi hi. Hunbeisa a anuntakzia a et kik uh ciangin pulaak tham cing dingin hoihna neilo uh cih aki phawk uh a tua in a lam etna uh (619)a mial sak hi. Amaute in a ginat lohna te uh leh a tham cin’ lohnate ngen uh a mu uh hi. A lungkiat nadingun Satan in a nin baan’na tata te uh lakin tuate ki sawp khiat sak ngei lo ding cih lam in a buai sak hi. Tua hi leh Pasian a muan’ tentanna uh pan in ki heiikhia-in ama mawhzolna ah hong kipia lel dingin Satan in a lam en hi.

 

Agalte un Pasian mite a kiim kot uh ah kiim uum in susia nuam uh hi. A hih hangin amau lung gimna pen bawl siatna thuak ding launa hi lo-in, a mawhna te uh a ki sik kik nai loh uh a om khak ding, Honpa khapna a ngah zawh loh khak ding uh hi zaw hi. Tua khapna in, “Leitunga om mi khempeuh ze-et na dingin leitung bup-ah a hong tung ding lungkham na pan in kei zong note ka hong suaktak sak ding hi.” Mang. 3:10. Amaute in mawhmaina ngah takpi peuh le uh gawtbawlna sihna te kihta nawn lo uh hi. Ahih hangin amaute gamtat siangtho lohna hangin a nuntakna taan le uh tua panin Pasian min siangtho ki nop neh kha ding ahi hi.

 

A kiim uah langdo nading ngiimna leh langdona vive bek a mu uh hi. A lungsim sung uh ah hih upna-pialna lianpi ki khak tan thei hen la migilote’ gitlohna bei thei leh cih bek bek a ngaihsun uh hi. Langdo nasep a ki khawl nading Pasian tung ah a nget kawm kawm un amau mah mah in tua hoih lohna do zo daal zo lo uh ahihna a ki pulaak uh hi. Ahih theih zah-un Khrist’ nasepna ah hanciam den-in thatang hatna zong ngah to to uh a, Satan galkapte in lel ding hi cih a thei uh hi.

 

Amaute in Pasian mai ah amau mah ki sit tel-in hun beisa-a a mawhna tampi te uh ki sik kikna lak-in, Honpa kamciam paulam-in, “Ka tha hatna amah leen sak un. Tua hi leh Kei tawh ki lemna hong bawl thei dinga Kei kiangah gal muang ding hi” Isa. 27:5 ci uh hi. Amaute thu ngetna hong ki pia kik pah vat ta kei leh a upna uh khiam tuan lo uh hi. Jakob in vantung mi a let ten tan bangin Pasian len tentan uh a, “Thupha nng piak (620) matengin kong khah ngei kei ding hi” a ci uh hi.

 

Jakob in Upa za a ngah nading a zuau phuahna na ki sik kik khin zo hi kei leh ama nuntakna a ki khawi lai nadinga Pasian hehpihna a nget pen Pasian in ngai lo ding hi. Tua mah bangin buaina hun sungin Pasian mite in a ki pulaak nai lo mawhna a neih uh leh tua in lunggim sak in, lungkia-in a upna uh kitat-in, hon khia dinga Pasian a sapna uh ah muan huai zo lo ding uh hi. Ahih hangin amaute in Thamcinglo ahihna a ki muh uh ciangin a lah khiat ding uh mawhna a sel sim uh om lo hi. Amaute mawhnpa pen thukhenna ah ki puak zo a, a ki paih khiat sak khin zo hi. A maute in zong a phawk kha nawn kei uh hi.

 

Mite in a nuntak sung uh a a ginat lohna neng nengte uh Pasian in thu sim lo hi ci-in ngaih sun leh Satan in a deih hi. Ahih hangin Topa in Jakob a bawlna ah a hoih lo khat pen thu kim thei lo leh awi-aam thei lo ahihna a lak hi. A mawhna te uh sel sim-in pulaak loh leh maisak loh in vantung laibu ah a om sak lai mite tungah Satan gualzo ding hi. Dinmun saang sem sem leh a zah tak huai zaliatna te a let toh sem sem uh ciangin adin mun ding uh Pasian muhna panin lungkham huai sem sem a, a galpa uh’ adingin zawh theih na mun tam sem sem hi. Pasian’ ni lian ni adingin ki ginkholh a zekaite adingin buai hun sung ahi-a a nung ciangin a hi zongin kigin na ding om nawn lo ding hi. Tua bang mite ading in lam et a om nawn lo ahi ta hi.

 

96

Khristian kici napi tua lau huai hun adingin ki ging khol lopi-a hong paite in a cih mawh manin a mawhna te uh lung gim-in hong pulaak pong mawk uh ciangin, migilote in amau tavaihna a nuihsan lel uh hi. Tua bang ki pulaakna pen Esau leh Judas ki pulaak bang lel ahi hi. Tua bang mite kahna pen a mawhna uh a mu dah man hilo in, a mawhna thaman uh a muh uh ciang a kap uh ahi hi. A ki sik kik dan uh lampi maan lo a, gitlohna mudah lo uh hi. A mawhna uh hong gen khiat pen uh tua mawhna dan a kihtak man uh hi lel a, thukhenna ki phiat kik hial mah ta leh zong tanglai-a Pharaoh bangin Pasian gensia kik lel ding uh hi.(621)

 

Jakob tangthu ah Pasian in khemna zolna thuaka mawhna sunga kiate ki sik kik hen la Ama kiang ah lungsim maan tawh hong ki heii kik leh nil khia tei tei loin saang kik tham hi cih teci ki mu hi. Satan in tua bang mite suksiat dingin a zon zon lai takin ki siatna sung ah akiat loh nadingun Pasian in a vantung mite sawl in kem sak-in huh sak ding hi. Satan nawk na pen nasia in siam thei hi. A khemna te kihtak huai mah mah hi. Ahih hangin Topa mit in A mite en gige a, A bil in amaute’ kahna-aw za gige hi. Amaute thuak siatna pen nasia-in a thuak ding uh haksatna zong a kang tum sak meikuang zah a hi hi. Ahih hangin kham hal siang bangin A halpa in siangtho sak ding ahi zaw hi. A mite in sittelna suk pen athuak hun in zongh a hamphat nop sak pen hunlaitak a ait zah mah in Pasian in a it hi. Ahih hangin amaute Pum-mei tawh hal siang kul ahih manin ki hal dinga, a leitung vai teng uh khang tum phot ding hi. Tua khit ciangin Khrist a batna teng uh hong ki lengkik thei pan ding hi.

 

Mai-a ih nawk ding lunggimna hun-a gilkial dangtakna, zekaina, lunggimna te ih nan zawh nadingin upna kho leh ki sekna ki sam hi. Bang zah-in hong ki sittel ta leh a vul lo ding upna ki sam hi. Tua hun adingin a ki ging khol thei dingin mi khempeuh tung ah hun hoih kipia hi. Jakob in zo thei hi. Bang hang hiam cih leh khensatna khauh tawh amah luai ken kon hi. Ama zawhna in kuhkal a thungetna in vang nei ahih lam ahong mu sak hi. A kuama peuh in ama kuhkal tentan bangin Pasian thuciam len tentan-in, ama hanciam bangin hamciam in I nget tei tei leh, ama zawh bang mah in i zo ding hi. Ama utna nial nuam lo-a Pasian mai-a lunggim thuak nuam lo, thu saupi ngen nuam lo, Pasian thupha lung gulh khol lo mi in ngah lo pah lel ding uh hi. Pasian tawh kibuanna ih cih atel mi tawm lua mawk hi! Pasian deihna tel nuam a a hih theih tawp suah-a, a hong ki thasaan mi tawm lua hi. Kam tawh gen theih loh lungkiatna tui hual in thu ngente a nawk ciangin Pasian thuciam ah a belh ten tan-a a upna a khah suah het lo mi tawm mah mah hi.

 

Tu khawnga upna tawmno bek tawn a om nim nem lelte Satan khemna hong (622) laanga sunglam upnate aana hial-a hong ki uk ciangin a puuk khak ding uh lau huai mah mah hi. Tua sittelna ah thuakzo kha phial mah le uh zong buaina hun sunga a lut uh ciangin lungkiat huai pha san zaw zel ding hi. Amaute Pasian muanna ah zong sangh lo uh hi. Tua amau awl mawh loh upna zatzia pen a lungkiat huai mah mah hun sungin ut-in ut ta kei le uh buai huai takin phu kha ding uh a hi hi.

 

Eite in tu bangin Pasian tawh kinai khol khol-in Ama hong ciam thute I zui to to ding hi. Vantung mite in muanhuai tak leh deihna tak tawh thu ngetna khempeuh ciamteh uh hi. Pasian tawh ki thuzakna I taan sangin ei’ ading I sepna te taan le’ng a hoih zaw lai ding hi. Zawn’ pen penna te, ei leh ei kinialna lian pente nei a Ama hong saan’ ding pen hauh pen penna, liat pen penna, tawl dam pen penna te sangin deih huai zaw hi. Thu nget nading hun i seh ding hi. Leitung vaite I kin luat leh Topa in thu I ngaihsut theih nading hun A hong piakna-in i sum I paai, I inn I lo-gam hoih hong hep khiat sak thei mai ding hi.

 

Khangnote in mawhna a nial uh leh-a Pasian thupha nakpi-a a nget uh leh khemna sung ah puuk lo ding uh hi. Pasian thu-pua mite in leitunga patau kona a piak uh ciangin Pasian thupha a ngetna te uh ah a tha dah huai a tek nek peuhin ngen loin upna om se sa keei sa-in Jakob nget bangin ngen le uh, “maitang kituah in Pasian kamu khin a, ahi zongin kei hong ki hing khawi lai hi “ (Piancial 32:30) cih theih nading hun ngah ding uh hi. Amaute in Pasian leh mihing te kikal ah zawhna ngah-a vantung panin kumpite banga a sehte suak ding uh hi.

 

“A piang ngei lo haksatna hun” a sawt loin hong tung ding hi. Eite in tu-a I neih loh sikdona te I ki sam hi. Tampi takin a ngah nadingun hanciam nuam beek lo uh hi. Bang khat pepeuh te I seh kholhna zah-in haksa khol lo thei zel zaw hi. Ahih hangin hih buaina pen tua bang hi het lo ding hi. Ahi bang lian-in a kigentel thei lo zaw hi. Tua buaina hun ciangin mi khempeuh in ama khaa adingin Pasian mai ah a din tek kul ding hi. “Noah, Daniel leh Job te” leitunga a om lai un “ amaute hoihna in amau nuntakna ciat bek ahut zawh cih loh, amaute tate nangawn hu zo tuan het lo ding hi ci in a nungta Topa Pasia” in ci hi. Ezek. 14:20.

 

(623) Tu-in I siampilian pa in eite siansuahna bawl lai ahih ciangin Khrist hanga siantho kimna I zong thei lai hi. Eite Honpa in mawhzolna sung ah ngaihsut pak na neu no khat na ngawn pia ngei lo hi. Satan in mite lungsim sung ah ama khe ngak nading a mu zeel hi; zongsatna hoih lo te panin a deih bang a seem theih hi. Ahih hangin Khrist in “Leitung kumpipa hong pai a, Kei tung ah zawh theih nading siksanh bang mah mu zo lo hi. Amah in A Pa thukhamte zui a, Satan in a mai nawt theih nading Ama tung ah siksanh mu zo lo hi. Tua omzia mah mailam-a hong tung ding hun haksa sung a nawk zo suak dingte omzia hi ding hi.

 

Tu-a nuntakna sung mah ah Khrist hong siansuahna tawh mawhna pen ei tawh ki khenkhia ding hi. Eite’ Honpa in Amah tawh kizom dingin hong sam hi. Eite tha neemna te Ama hatna ah, eite’ haina te Ama pilna ah, eite’ thamcin’ lohnate Ama thamcin’na ah ki-ap dingin hong sam hi. Pasian hong sehsakna bangin lung neemna, ki niam khiatna Jesu’ saan ah I kah ding hi. Topa in I mai ah zuih ding lampi hong koih sak den a, a baih lam lam a nuam lam lam teel ding hi loin, nuntakna maan a ngim lampi I zui ding hi. Vantung in I nuntak zia dinga hong seh sakna bang in zuih theih ding eima nasep a hi hi. Kuamah in tua lampi khek thei lo, mot nusiat thei lo hi. Azuih kei leh kisiatna lau huaina mun a tung ding hi.

 

Sawltak Johan in vantung ah aw-ngaih mah mah khat za a, “Leitung leh tupi tunga teengte aw, dah-in kap un. Dawi in hun tomno bek nei lai ahih lam kithei-a, heh mah mah sa-in hong tuak suk hi,” ci hi. Mang. 12:12. Van pana tangkona hih thu in lauhuai mah mah hi. Satan hehna pen hun tom nei lua ta ahih manin so mah mah a, khemna leh suksiatna a deih zah pen hih buaina hun sung tengin a sep khiat man nadingin sawm gige hi.

 

A lau huai mihing bawl theih loh, dawite na lamdang bawlte van ah hong (624) kilang ding hi. Dawi khaa te in leitung kumpite leh leitung buppi khem dingin kuan khia uh a, vantung ukna langdo dingin Satan ki thasaan na koppih dingin amaute ngen ding uh hi. Tua nasepna-a Sawltuakte in Gam Ukte leh mihonte a ki bangin khem khawm ding hi. Mite hong tho khia ding uh a, Khrist-in kibawl ding uh a, Honpa ngah ding a zaliatna leh biakna te ngah dingin hong ki gen ding uh hi. Amaute in cina damsakna na lam dangte bawl ding uh a, vantung pana hong kilak thu hi I-inki gen ding uh hi. Tua a gen thute uh Laisiangtho sung thu tawh lah ki bang het lo zel mawk ding hi.

 

Satan in Khrist bangin hong ki bawl ding hi. Tua pen khemna laka a tung nung pen khat a hi Pawlpi in Honpa hong pai ding sawt veipi a lam et pen uh tu-in mi khem lianpa in Khrist aki lang in a hong pai ta bang in lim hong bawl ding hi. Leitung mun tuam tuam ah Satan va ki laak kawi kawi ding hi. Johan in mangmuhnasunga Pasian Tapa omzia a gen te bangin mite lak ah a thupina leh a vaang tann’na te hong lak ding hi. Mang. 1: 13-15. Amah kual khum minthanna te mihing muh ngei tua sanga thupi zaw om ngei lo hi. “Khrist hong tung hi! Khrist hong tung hi!” cihna awte huih lak ah ging khia zuah zuah hi. Khrist leitunga a omlai-a a nungzuite thupha a piak dan mah ciing-in a khut laam to a thupha a piak ciangin mite in a mai ah bok-in bia zai zai uh hi. A aw neem-in thu zawhna a nei hi. La-aw ngaih bang in zong kiza zel hi. Thu neem leh thu-duai tawh Honpa thupha piakte bang dan-in vantung thumaante gen khia a, cina te zong dam sak hi. Khrist a hi dan-in gamta in, Sabbath zong Sunday tawh ka khek khin zo hi hong ci ding hi. Tua ama thupha piak nipi thak pen mi khempeuh in zang ciat ta dingin zong sawl ding hi. Amah in ni sagih ni a zang tentan teei teei te pen ama min dem-a a gensiate hi, amaute kianga thumaan leh khuavak puak ding in a sawl khiat vantung mite a na nolh te in amah a nolh suak hi ci nong zen ding hi. Hih pen a khauh mah mah khemna hi a, khemna tung nung pen phial a hi hi. Simon Magus in a khem (625) Samaria mite mah bang uha, a neu pen pan a lian pen dongin dawi vai te um in, “Vanglianpa Pasian akici pen amah ahi hi” ci uh hi. Sawltak 8:10.

 

Ahih hangin Pasian mite bel khem zo tuan lo ding uh hi. Hih Khrist zuau thuhilhna pen Laisiangtho sung thu tawh ki bang lo hi. Ama thupha piakna pen Sapi leh a milim biate tunga kipia hi a, Laisiangtho in Pasian hehna zu ciil (zugei) ki tulh a cihte a hi zaw hi.

 

Minthanna tawh Khrist hong pai kikna lim a ciing mite akhem dingin Satan phalna ki pia lo hi. Honpa in Ama mite hih thu-a khemna om ding leh Amah tak tak hong pai kik cianga omzia ding pen kitel takin hilhkholh zo hi. “Khrist zuauthei leh kamsang zuau hong piang dinga, na lamdang lianpipi te lak ding uh hi. Ahih theih liai leh a teelsa te nangawn a khemzawh nading a hanciam ding uh hi….Tua ahih ciangin amaute in En un, Amah sehnel gam ah a om hi, hong cih uh leh pai kei un. Inndei sung ah om hi hong cih leh um kei un. Khuaphia-lep in nisuahna pan nitumna dongin a tang bang Mihing Tapa hong pai ciangin a hong piang ding hi.” Matt. 24:24-27, 31; 25:31; Mang. 1:7; 1 Thess. 4:16, 17. Hih Paikikna pen a lim ciin’ theih ding hi lo hi. Leitung buppi in muh khat-a muh theih ding in a piang ding hi. Leitung bup galmat banga a man cip-pa’ khemna sung ah thumaan it-in Laisiangtho tha nuam taka a sim, thumaan om bang a saangte pen a puuk loh nadingin ki hu ding hi. Hih bang mite in Laisiangtho teci pan’na tawh mi khempa ki neihtawmnate man khia thei ding uh hi. Mi khempeuh mai ah ze etna, sittelna hun hong pai tek ding hi. Mawhzolna hong kipia kawi kawi dinga, Khristian taktak te hong kilang khia ding hi. Pasian mite in ama thumaan ah a kip tak tak nam? Hih thu hong pian cianga a na taksan’ khak loh nadingun hih bang lauhuai hun ciangin Laisiangtho a len cinten na ding uh hiam? Ahih theih leh Satan in amaute tua hun cianga a kip loh theih nadingun khiang khol khol ngel ding hi. Leitung (626) hauhna khawng tawh van gik sak, lung gim sak-in, hih leitung nuntakna te tawh a tuantual nadingun daai kaai kaai-in daal khol khol ding a, tua sittelna ni pen guta bangin amau tung ah a tung sak ding hi.

 

Khristian gam-a leitung Ukte in Pasian thukham zuite langdo a a thupiak kawi kawina un gam ukte in a gam mite a kepna teng uh bei sak uh hi. Amaute a susia nuamte in susia thei ta ahih man in, Pasian mite in khuapi khua neute nusia-in a pawl pawl, a lom lom-in gam simtham zuan-in taai mangin a teeng uh hi. Tampi in mual lak guam lak, kaw-hawm sung khawng beel uh hi. Piedmont kuam-a Khristiante mah bangin mualno mun saang tung khawngte biakinn-in zangh ding uh a, “belh ding suangpi” peuh a na om ciangin Pasian tung ah lung dam ko lai ding uh hi. Isa. 33:16. Ahih hangin amaute laka tampi khop mah, gilo leh thumaan lopi in ki man ding hi. A saang a niam, a hau a zawng, a vom a kaang cih omlo in mi nam cin lak pain mawhsakna thuak om kai-kawi ciat ding hi. Pasian it te in gimna hun te pal tan to ding uh a, sik khau tawh khihna, thong inn-a ki kalh nelh ding hi. Thah dinga thukhenna thuak tawh, lei sung khuamial kaw-hawm sunga gilkial-a si lel dinga nusiat cipna thuak tawh, tua bang vive-in khel bawlna thuak ding uh hi. A maute thumna za in a awlmawh ding mihing khatbeek zong om nawnlo hi. Mihing khut peuh mah amaute huh ding om nawn lo ding hi. Hih sittelna hun ciangin Topa in Ama mite a mang ngilh ding hiam? Tuiciin tun ma a om mi hingte tungah a thukhenna a buak suk lai in zong a muan huai Noah khat bek nangawn mang ngilh ahi hiam? Zang lei tung-a khuapite van pan-a mei kuang tawh a ki hal lai-in zong Lot mang ngilh ahi hiam? Izipt gam-a milim bia honpi in a kiim uum lai tak-un Joseph A mang ngilh hiam? Jezebel in Baal siampite tawh kiciamna a bawl sak laitakin Elijah A mang ngilh hiam? Meikuang khukpi sunga lawmta 3 te leh humpinelkai khumna sung a Daniel mang ngilh ahi hiam?

 

“Jerusaleem mite in ‘Topa in ei hong nusia khin a, ei hong mangngilh khin ta hi’ a ci uh hi. Ahih hangin Topa in, ‘Ama sung pan-a a suak a tapa ahehpih lo ding zah in nupi khart in ama nawi ateep naungek mangngilh thei ding ahi hiam? Hihte in mang ngilh kha thei dinga, ahi zongin kemah in kon mangngilh kei ding hi...ka khutpekte sungah nang kong gelh khin zo a, kong mangngilh kei ding hi.” ci hi. Isa. 49:14-16. “Topa’ mite a su mi peuhpeuh in amit nauta bang a na man;ha pen khat asu ahi hi, mi honpi Topa in a ci hi,” Zech. 2:8.

 

Galte in amaute khumcip ta leh, thong inn kawm te in amaute leh Khrist kikal (627) kizopna daal zo lo hi. Amaute tha neemna teng a theipa, sittelna khempeuh a na thuak ngei khin pan, in leitung vangliatna khempeuh sanga a vanglian zaw pa a hi hi; a vantung mite in a lung zuang gam daai munte ah vantung pana lungmuanna te leh khuavakte puak ding hi. Thong inn sungte kumpi inn sung bang hi dinga upna kicingte a hih manun a inn sung khuamial te vantung khuavak taan’ dinga, Paul leh Silas te in Philippi thong inn sunga zan kimpi-a thu ngen-a la a sak bang uh a hi ding hi.

 

Ama mite a susia nuamte tung ah Pasian thukhenna hong tung ta ding hi. Hang taka thukham palsat ngam migilo te sawt veipi ki thuak thuak ahi ta zongin amaute thuak ding daan pen, a ki khiam het loin, hong tung veve ding hi. “Topa in Perazim muala A sep bangin

 

97

seem dinga, Gibeon kuam-a A heh bangin heh ding hi”. Isa. 28: 21. Amigi ih Topa adingin daan piakna pen a lam dang nasep a hi hi. Topa in, “Keimah in a nungta Topa Pasian ka hih mah bangin mawh nei mi khat asi ka muh ciangin nuam ka sa het kei hi,” ci hi. Ezek. 33:11. Topa in, “hehpihna nei in a dik Pasian, lungduai-in itna kip leh thutakna tawh a dim, mitul tampite ading in itna kip a nei, mawhna, thupalsatna leh khialhna maisakin; ahih hangin...mawhna a khahkhong ngeilo” hi. “Topa a lung duai mah mah a, avang zong liana, ahih hang in mimawhte khahkhong ngeilo hi.” Paikhiatna 34:6, 7; Nahum 1:3. Ama aana neihna a lak thukham a ki sikcip sak pen thumaan tawh phel khia kik dinga, lau huaina te hong piang ding hi. Palsatna a ngak khol kin ken thuk kikna pen nasia mah mah a, Topa in ut lopi pi-a thutang tawh a khen sat a hi hi. Amah in a thuak thuak hi. Mi namte in Pasian hehna ciangtan kheng ta uh hi. A tawpna ah migitna kihel nawn lo, hehna lenggah zu lawi(cill) dawn ding uh a hi ta hi.

 

 

Biakinnpi sunga Khrist Palai nasepna a khawl ciangin sapi leh a milim a bia mite tung ah khasiatna kihel lo hehna hai ki buak ta ding hi. Mang. 14:9, 10. Izipt gam pana Paian in Israel te a hot khait ding lai-a te bang mah-in, Pasian mite a ki hot khiat ma deuh-in zong a kih tak huaipi Pasian hehna leitung ah ki bua suk ding hi. Mangmupa in tua lau huai thuhkikna mu in a gen- (628) na ah, “Sapi ciamtehna a nei in amilim abia mite tung ah kih huai meima pianga hi”. “Tuipi in misite sisan bang suak a, tupi sunga nungta khempeuh si uh hi. Guntui leh tuinaak khempeuh zong sisan suak khin uh hi.” ci hi. Hih thute in Pasian pen thutang lua ahihna lah khiatna a hi hi. Pasian vantung mi in, “Misiangthote leh kamsangte sisan luangsak uh ahih manin tu-in amaute’ dawn dingin sisan apia na hi hi. Hih in amaute’ ngah ding a kilawm ahi hi... Vanglian Topa Pasian aw, na thukhenna te thumanin thutang hi. Mang. 16: 2, 6, 8, 9. Pasian mite sihna a thuak sak dingin apiak manin amau khut-lum a sisan a luang sak bangin thuak kik ding uh hi. Tua mah tawh kibangin Khrist in Ama hun-a Jew te zong Abel pan a kipan misiangtho te sisan te ki loh sak ding hi, ci hi. Amaute in zong tua lungsim mah nei in kamsang te thah dingin zong uh ahih manin, tuate sep bang mah a seem te a hi uh hi.

 

Gimna om lai te in hong zui a, Ni in “asatna taw mite a kang gawp hi. Nisa in mite kang gawp hi. “ Mang. 16:8, 9. Hih a lau huai hun lai tak kamsangpa gennna ah, “Lo ante kisusia a, leengguite keutum a, oliv kungte keugaw ahih manin, lo lai-ah bangmah om nawn lo a, litang lungzuangin a thum hi....Mihingte’ lungdamna teng zong a maimang ta hi. Guah tui om lo ahih manin, khai kituhte leisungah keucip a, an khol ding om nawn lo ahih manin ansal khemnpeuh kisia khin ta hi. “Khaici khempeuh a gaap sung ah muat a, saal khempeuh hawm khin hi.” “Ganhingte hum ham hi! gangualte kawi taai uh a, lopa hing lah om nawn lo hi. Guntuite lah kang keu ta a, gam sung lopa khempeuh lah mei in kaang tum ta hi.” “Tua ni ciang in kumpi inn-ah lungdam la sakna awgingte, kahna awging suak ding hi. Mun khempeuh ah misi dim ding a, mun citengah kipaithangin gamdai ding hi, Topa in ci hi.” Joel 1:10-12, 17-20; Amoss 8:3.

 

Hih gimnate tha khat-in leitung bup a tung khin pah hi nai lo hi. Leitung mite a vek-in a bei siang pah del del hi nai lo hi. Ahih hangin mihing theih ngeina sa khempeuh lak ah a lau huai pen pen thuaksiatna a hi uh hi. Hehpihna kong khakma deuha thuak- (629) siatna te pen migitna tawh a kihel lai a hi hi. Mawhnei te in a mawhna zah uh tawh kituakin a thuak liang loh nadingun Khrist sisan in khoh sak sak lai hi. Ahih hangin hih anunung bel thukhenna daan aki buak ciangin migitna ki hel nawn lo hehna thuk kikna daan a hi ta hi.

 

Tua ni ciangin mihonpi te in sawt veipi a sim mawh uh Pasian migitna beel nuam saan ding uh hi. Topa Pasian in a genna ah, “ Keimah in leitung ah kial pi ka tungsak hun hong tung ding hi. Tua kialpi pen an leh tui duhna kial hilo ding a, Topa’ thuzak nop mah mahna kialpi hi ding hi. Mi hingte , leulu pan leitaw dong, nisuahna pan nitumna dong, Topa’ thukanin vak kawikawi ding uh a, ahi zongin mu zolo ding uh hi.” Amos 8: 11,12.

 

Pasian mite tua thuaksiatna pan peng nailo ding uh hi. Bawl siatna thuak lai uh a, gil kial lai ding uh hi. Ahih hangin a kisia dingin ki nusia cip lo ding hi. Elijah a keem Pasian in Ama adinga kipia A tate khat beek mawk nusiat lo ding hi. A lu tung uh-a sam zang a sim khinpa in amaute keem ding hi. Kialpi sungin amaute in gilvah ding uh hi. Migilote in nat leh kial a thuak-in a sih dek laitakin, vantung mite in midikte liah-in, a taangsapna te uh pia ding hi. “Thumaan taka om mite” “an ki pia dinga, ama adingin tui ki tasam lo ding hi.” “A ci mawh mite in tui zong uh a, a om kei hi. A dang uh keu lua hi. Keimah Topa in amaute ka za dinga, Israelte Pasian Keiman in amaute ka nusia kei ding hi.” Isaiah 33:16; 41:17.

 

“Theigahte hut khin a, leengguite a gak kei zongin, olv kungte gah lo a, lo-ah an a piang kei zongin, gangualte a huang panin beita uh a, gan buuk ah tuu om nawn lo hi.” Ahih hangin Amah a kihta mite in “Topa tung ah lung dam uh a,” Pasian hotkhiatna ah a lung dam uh hi.

 

Hab. 3:17, 18.

 

“Topa in nangmah hong keempa hi a, Topa in na taklam panin hong liah ding hi. Nisa in sun-in hong haal loin, kha taang in zan-in hong ci mawh sak lo ding hi. Topa in siatna khempeuh panin nang hong keem ding hi. Amah in na khaa keem ding hi.” (630) “Amah in thangsiahpa thang panin nang hong honkhia dinga, buai huai natna te panin hong huu khia ding hi. Ama thumaan in na kidalna Lumm ahi ding hi. Zan-in migilote kihta kei dinga, sun-in zong migilote’ thaltang leeng na kihta kei ding hi. Khuamial laka nat gual leengte, sun-a pulnatnate in hong sukha lo ding hi. A tul lom-in na kianga te puuk dinga, na ziatlam ah tul tawm a puuk hang nang hong sukha lo ding hi. Na mit tawh migilote thaman saan’ na en lel ding hi. Topa pen nang’ belh na hih sak-a a Saangbelpa nang’ teen’na na suak sak man a hi hi. Siatna in nang hong sukha lo dinga, gimnate nang’ teenna mun ah hong kia lo ding hi.” Late 121:5-7; 91: 3-10.

 

Mihingte’ muhna panin Pasian mite bel a sawt loin ki that ta ding bang in a om uh hi. A sisan uh tawh amau teci pang ta ngel ding uh hi ci-in mu uh hi. Amau in zong, Topa in hong nusia ta a galte khut sung a tung ding I hi ta hi ci-in lau uh hi. Hih hun pen a lau huai lua hun a hi hi. Sun tawh zan tawh amaute in Pasian kiang ah hotkhiatna ngen-inkap uh hi. Mi gilote in ki sial-in nuihsan uh hi, “Na upna uh koi ah om hiam? A mite na hih uh leh bang hangin na Pasian un kote’ khut sung panin hong honkhia lo a hi hiam? ci uh hi. “Aamah in mi dangte hon zo a Amah leh Amah ki hon zo lo hi. Israelte Kumpi ahih takpi leh Singlamteh tung panin hong kum suk hen. Tua hi leh ka um ding uh hi,” Matt. 27: 41. ci-in Kalvary Singkhuam tunga Jesu a akizahpihna siampite leh Ukpa te in kammal te aphawk kik uh hi. Jakob bangin Pasian tawh kibuan ciat uh hi. Amaute mai suah in a sung lam uh ki tha saan ahihna lak hi. A maitangte khempeuh uh daang hi. Ahih hangin a thu ngetna uh bel khawl tuan lo uh hi.

 

Mihing te mit in vantung mu thei hi leh Khrist lungduaina kammal a keem vin ven te kiim uum-in a tha hat vantung mite a thuang a thuang a om lam amaute in mu mah ding uh hi ve’n! Vantung mite in hehpih takin alung gimnate uh mu in thu ngetna te uh zong va za uh hi. A ki siat loh nading un va hot khiat theih na dingin Avanglianpenpa’ a sawlna ngak bek uh a hi hi. Amau in tawm vei ngak lai ding uh hi. Pasian mite ina mau’ (631) dawn ding hai dawn phot ding uh a, amau ki tuiphum nading uh ah ki tuiphum phot ding uh hi. A hun zekai-a haksa a sak luatna te uh pen amaute a dinga a hoih pen penna tawh a thu ngena te uh a ki dawn’na hi zaw hi. Amau in Topa in hong sep ding deihna leh muanna tawh ngak uh a biakna lam-a a thuakna uh tawm lai pen a kicing upna, lam etna, leh thuak zawhna a ngah nading uh a hi hi. A’ teel te adingin buaina hunte ki tom sak ding hi. “Pasian in sun le zan a ama kiang kiko, a teelsate adingin thukhensak lo ding ahi hiam? A maute ngak saksak ding ahi hiam Ken khon gen ih ah , anute thu manlang takin a khensak ding hi.” Luka 18: 7, 8. Beina pen mite up mawh sangin tung baih zaw ding hi. Mangbuhte Topa’ saal sunga sen’ dingin ki kaikhawm in ki lom hen dinga, kiakte pen meisel banga hal tum dingin ki lom hen ding hi.

 

Vantungmite in cihtakna tawh gal vil lai uh hi. Thukham zuite a kithah ni ding sehsa-in thupiak om ahih hangin galte in a hun sehna cing nai lopi mah in paulap tuam tuam zong nin amau te nunnakna laak sak nuam uh hi. Ahih hangin midikte kiim uum-a vil vantung mite kua mah in pai let zo lo uh hi. Khuapi khua neu nusia-a taikhia pawlte a galtaina mun uh ah pawl khat te in sul zuih-in nawk gawp nuam uh hi. Ahih hangin a namsaute uh buhtuu bangin zaw nak nak-in kia lel hi. Pawl khat te leu leu vantung mite in galkap honpi bangin ki bawl-in a vil uh hi.

 

A beisa khang khempeuh te ah Pasian in a vantung mite zangh-in A mite huu khia zel hi. Vantung mite in mihing ading nasep seem zel uh hi. Amaute in khauvak puan silh-in hong dawk zel uh a, mihing khualzin bang peuh-in zong hong pai zel uh hi. Vantungmite in Tawsaw kungpi khawlmun khawng ah hong khawl uh hi. Mihingte zindo theih khawngin hong om uh hi. Khualzin mite lam hilh peuh-in hong pai pai thei uh hi. Biakna tau khawng ah amau khut tawh namtui halna mei peuh hong tawh thei uh hi. Thong kongkhak khawng hong hon khiat sak-in Pasian naseemte suakta sak zel uh hi. Vantung puan silh-in Honpn’ haan kongkhak suang hong liik khiat sak uh hi.

 

Vantung mite in mihing meel pua in mi dikte kikhopna khawng ah kihel zel in, migilo te kikhopna te ah zong va lengla zel uh hi. Sodom khua bang ah pai-in a gamtat- (632) na te uh va ciamteh teh uh hi. Pasian lungduaina gamgi a kaan ta uh hiam cih vil zel uh hi. Topa in migitna deih a, A na a seem tak tak mi tawmno omte hut na dingin suksiatna ding pan a dal kik sak zel hi. Tua bang in mipite lungmuanna hun asauto sak zel uh hi. Pasian langdo mimawhte in a nuih sat leh a net niam mi tawmno te tung ah leibat a neih gi-ge lam uh a phawk kei uh hi.

 

Hih leitung Ukte in a theih loh uh hangin a kikhopna sung uha thusung zel te in vantung mite a hi uh hi. A mittang in mu uha, a thu sun’te uh a bil un za-in a ngimna te uh nial in, a vaihawmna te uh mihing in nuih san kha zel uh hi. Mihing khat in amaute dong khak in sim mawh bawl kha thei zel hi. A ki nen cip te huu khia dingin kikhoppina inn deih te, leh thukhen zumpi te ah hih vantung sawltakte in a theih tawp un hong pang in mihing te nasepna te lak ah hong ki hel uh hi. Amaute in Pasian nasepna dal tan dinga vai kihawmte khawng va sat niam sak uh a, Pasian mite thuak siat luat nading donga a gitloh luatna te khawng uh va khiap sak zel uh hi. Kisiatna hun laitak ciangin “Amah azahtakte kim ah Topa’ vantung mi in giahphual sat a, amaute a hon khia hi.” Late 34:7.

 

Pasian mite in a Kumpipa uh hong pai nading lim khat peuh hong kilat ding ngak lah mah mah ta uh hi. Galvilpa kiang ah, “tu-zan bang ci hiam? hong ci hi. Gal vil kei mah in zing ni hon suak a, zan khua zon hong mial hi.” ci-a a dawn’ bang a hi hi. Isa. 21:11,12. Mual dawn khumvum-a meii tung ah khuavak te kiau kiau hi. A sawt loin Ama vangliatna hong kilang ding hi. Dikna NI hong taang khia ding hi. Zing sang leh zante tu in hong tung ta ding hi. Midikte adingin a tawntung ni hong suak ta ding a, migilote adingin a tawntung zan hong tung ta ding mah a hi zel hi.”

 

Thungetna tawh Pasian a buan nilohte in muhtheiloh Pasian tawh a kikal uh a liah dalna pen tu-in ki nilkhia pian ta cih a mu uh hi. Vantung zong tawntung nizang tawh eng hiu hiau ta hi. Vantung mite’ la aw ngaih bangin “Kip takin dingun. Huhna a hong tung ding hi ta hi.” cihna kam khum a bilte uah a za uh hi. Khrist gal zo belpa in a gim A galkapte ading a kisia thei lo (633)minthanna lukhu hong tawi khia ta  

hi. “Ngai un, Keimah in note tawh kong om khawm hi. Lau kei un. Na dahna te uh kong theih pih a, na lung gimna te uh Keimah in ka na thuak hi. Note in a ki do kha ngei lo gal a do na hi kei uh hi. Keimah in note adingin tua gal ka na do khin zo a, note in Keima min hangin gal zo belte na hi ta uh hi,” ci- in a zapi-a ki hong kong vang pan in a aw zong hongging khia hi.:

 

I kisap hun ciangin manpha Honpa in huhna hong pia ding hi. Vantung paina lampi pen Ama khekhap tawh a siiksa vive a hi hi. Eite khe hong sun thei ling te khempeuh in Ama khetaw na sun ngei zo hi. Eite puak ding Singlamteh khempeuh Amah’n na pua ngei zo hi. Lung muanna I ngah nadingin kitha saanna a tuam tuam te Topa in a hong pia a hi zaw hi. Pasian mite adingin buaina hunte kih taak huai hi. Ahih hangin tua pen mah in thu um mite upna khauh sak in, lung muan nading kamciam in sakhituihup bangin amah kual-khum in a om lam upna tawh a muh theih zawk nading ahi hi.

 

“Topa’ mi akithehthangte hong ciah kik ding a, lasakna tawh Zion-ah hong pai ding uh hi. Amaute, lungdam tawntung ding uh a, amaute in lundamna leh kipakna ngah in, dahna leh khuisatna nei nawn lo ding uh hi. Topa in ‘Kei, keimah pen note hong hehnempa ka hi hi. Lopa sangin sauvei a nungtra zaw tuan lo, mihing lellelte bang hangin kihta na hi uh hiam? Vantungte zal in lei bulpite a koih, note a hong bawl Topa hong mangngilh khinta na hi uh hiam? Note hong susia dingin a kithawi no a hong neng niamte hehna, bang hangin kihta in lau tawntung na hi uh hiam? Amaute hehna in note hong susia zo het lo ding hi. Thong sunga kikhum mite kikhah baih ding hi. Amaute sau veipi nungta ding uh a, annek tuidawn kitasam lo ding uh hi. Bang hang hiam cih leh keimah in tuipi tok gawp in tuihual a hawksak Topa, note Pasian ka hi hi. Keima min in Vanglian Topa ah hi. Vantungte zal in lei bulpi ka phut a, Zion kiangah Nang in keima mi na hi hi. Nang tungah thu kong hilh khina, ka khut tawh nang kong hu hi..” ci hi. Isa. 51:11-16.  

“Tua ahih ciangin gimna athuak, zu ne lopi in zukham a bang note in hih thu za un. Ama mite’ adingin a thumsak Topa, Topa ahi note; Pasian in hih bangin ci hi: ‘En un, note’ khut sung pan-in hoina hai ka lakhia khin a, ka hehna haipi na dawn nawn kei ding uh hi. Note kiangah ‘Na tung uh ah kong pai theihna dingun kun suk un, a hong ci no a hong bawlsiate khut sung ah tua haipi ka koih ding hi. Note in a nungzang uh lei lak bangin bawl in paina ding in amaute kongzing bangin na bawl khin uh hi aci hi. (634)” Isa. 51:21-23, ci hi.

 

Pasian mit in khang tawntung mu suk suak a A mite’ thuak lauhuaina te a en hi. Leitung thuneihna in amaute a langbawlna te uh a mu hi. Galmat nawh keek bangin gilkial leh sat thuak in a sih khak ding uh a lau uh hi. Ahih hangin Israel te mai-ah San Tuipi a khen keek Siangtho Topa in Ama vanglian hong lak khia dinga, a galmatte a leh heii ding hi. “Vanglian Topa in hih bangin ci hi:’Tua a kiciamteh mite pen keima mite hi ding uh hi. Kei mah in na ka sep ni ciangin, amaute pen keima neihtuam taktak mite hi ding uh hi. Pa in ama thu amang atapa a hehpih mah bangin, kei zong amaute ka hehpih ding hi’ “ a ci hi. Malakhi 3:17. Khrist teci muan huaite’ sisan hih hun sungin a luan hangin Pasian adinga kituh thahna thuakte sisan khaici bang hi nawnlo ding hi. Amau muan huaina in midangte thumaan mu sak ding leh ki khel sak nading teci pan’na hi nawn lo hi: lung khauh mite in migitna luang khia pen leh-nolh zo uh ahih manin hong luang nawn lo hi. Midikte pen tua buaina ah a galte mat lel dingin ki nusia mawk leh khuamial kumpipa gual zawhna lel takpi mah suak ding hi. Laphuakpa in, “Bang hang hiam cih leh haksat hun ciangin a buiuk sungah kei hong seel ding hi. A puan buk khuhna nuai ah kei hong seel ding a, kei hong koih ding hi.” Late 27:5 ci hi. Khrist in a genna sa khat ah, “Kamite aw hong pai un na inn sung uh ah tum un la na kongte uh khak un. Hehna a dam matengin tawl khat sung bu un. Bang hang hiam cih leh en un, amau’ mawhna hangin leitungah a teng mite gim apia ding in ama omna panin Topa paikhia a, leitung in ama tunga akithat mite laakkhia ding a, a kithaty ama mite sincip nawn lo ding hi” ( Isa. 26:20, 221) ci hi. Ama hong pai ding lungduai tak in a ngak, nuntakna laibu sunga min kigelh mite a ki hotkhiat nading zia pen vanglian, nasia, in a ciliap huai mah mah hi.

98