MUC

Print Friendly and PDF

Wednesday, October 22, 2014

25. A Kikheel Thei lo Pasian Thukham



A Kikheel Thei lo Pasian   Thukham

 

 


VAN tungah  a  om  Pasian’  biakinnpi  kihongin  thuciamna singkuang biakinnpi sung ah aki muh khit ciangin khuaphelepte, kam aw gingte, vangingte, zinliingte, nakpi gialkiatnate a piang hi.”  Mang.11:19. Pasian Thuciamna singkuang in Biak-inn dei nihna sung tawng Siangtho Bel Mun-a om a hi hi. Hih leitung Biak-buk sunga mawhsutna nasepna te in “vantunga ki seem ding et tehna leh lim lak” khol a hi hi. Tua dei sung nung pen Biak-buk Siansuah(Kilemna) ni ciang bek a a ki hong a hi hi. Vantunga Pasian Biak-innpi ki hongin Thuciamna singkuang hong ki mu a cih ciangin, tua in vantung Biak-innpi Siangtho Bel Mun ah 1844 kum in Khrist in Siansuahna bawl dinga alut cianga ki hong pen a gen ahi hi. Tua hi a, Upna tawh Siampilianpa mawh sut nasepna mun a va zuite bek mah in Thuciam singkuang a mu a hi uh hi. Amaute in Honpa nasep cial dangah kin to ta cih tel theih uh hi. Amah in Pasian mai Thuciam kuang ah mawhneite adingin A sisan va puak hi cih a mu uh hi. Leitung Biak-buk-a thuciamna singkuang sung ah Pasian Thukhamte kigelhna suangpeek nihte a om hi. Tua kuang pen Thukham suangpeekte koihna bek hi napi, asungah Pasian thukhun ahi thukham a omna hangin asiangtho leh a manpha a suak hi. Vantunga Pasian Biak-innpi a ki hon ciangin tua thuciam kuang pen hong ki dawk ahi hi. Van Biak-innpi a Siangtho Bel Mun ah Pasian Thukham siangthote ki koih hi. Sinai mual tunga van (434) ging khuaphia lak a Pasian mah mah in a gen thukham sawm pen mah tua suangpeek tung ah Ama khutme teek tawh aki gelh ahi hi.


Vantung Biak-innpi a Pasian Thukham ki koih pen a bulpi (origi-nal) hi a, tua pan in suangpeek tunga ki gelh pen leh Moses in Laisiangtho sunga a gelh pen a ki tei khia sawn a hi pan bek hi. Hih a phamawh athupina a thei tel pawlte tungah thuthuk zaw Pasian Thukhamte asianthona leh a ki kheek sak thei lo ahihna te zong ki lak to lai hi. Amau in, “van leh lei a mang thang zongin thukham a neu pen khat nangawn ki sia lo ding hi” a cihna Honpa kammal pen ni dang sangin a thuk zaw in amu tel to pah uh hi. Matt. 5:18. Pasian Thukham in Ama deihna ki lah khiatna hi a, Ama gamtatzia ki dawkna zong ahih manin kip tawntung ding hi. “Vantung ah Teci a pang den ding ahi hi.” thukham khat beek ki phiat ngei nai lo-a, a ciamteehna no no te na ngawn khat beek ki khel ngei nai lo hi. Laphuakpa in, “Nangma thumanna in khang tawntungin kip hi” ci hi. “Ama thupiaknate muan tak mah mah hi. A tawntung in tuate kip ngitnget.” hi ci hi. Late 119:90; 111:7,8.

 

Tua Thukham sawmte laizangtak ah a lina in hi bangin ci hi: “Sabath ni a siangtho-a zat ding phawk in. Ni guk sung nangma na semin na nasep ding khempeuh na hih ding hi; ahih hangin a ni sagih ni in Topa na Pasian’ sabbath ahi hi; tua ni-in nang, na tapa, na tanu, na nasempa, na nasem nu, na ganhing ahia, na huang sunga om peemtate in ahi zongin na bang mah nasem kei ding hi, bang hang hiam cih leh ani guk sung tengin Topa in van leh lei, tuipi leh tuate sunga om khempeuh bawla, ani sagih ni tawlnga hi; tua ahih ciangin Topa in sabbath ni thupha pia-in siangtho sak hi.” Paikhiatna 20:8-11.

 

Pasian thu asin beh zelte’ lungsim Kha Siangtho in lawngin a hansuah hi. Piangsakpa tawlngak ni theiloa a palsatte tungah hih Thukham ki genin ki tel hilh hi. Bang thu hangin Pasian sianthosak ni mun ah ni masa ni ki guan beh zenzen hiam ci in a hong zong khia to zel uh hi. Thukham nambat li-na a phiat mang nading (435) Laisiangtho sung pain mu khia zolo uh hi. Tham loin Sabbath ki khekna zong mu zo lo uh hi. Ni sagih ni ki siantho sakna leh thupha a ki piaknate a ki khinkhiatna omlo hi. Pasian deihna thei tel ding in kuhkal takin hong zon ciangin, Pasian’ thukham a palsat den keeite ahih lam tak uh ong ki mu uh hi. A lungsim sung uh ah dahna tawh ki dim in Pasian thu mang nuam lua zen uh ahih lahna in A Sabbath siangtho zong hong zangto pah uh hi.

 

Mi tampi te in amau upna suk siat sak nuam in na seem uh hi. Leitung biak-buk pen atak tak vantung Biak-innpi et sakna lim ciing hi, leitung biakbuk thuciam singkuanga ki koih thukham pen vantung Thuciam kuanga pen et teh-a ki tei sawn bek hi, cih a tel khempeuh ading in Pasian Thukham leh Thukham li-na a Sabbath kip lai-in, zong zuih lai ding ahi lam tel lah ding thu haksa hi nawn lo hi. Hih thu panin Laisiangtho khiatna maan Khrist in van Biak-innpi-a mawhsutna a sep zia hong ki lang khia a, a sim tham-a langpangte ngimna zong ki mu hi. Mite in Topa’ hon’ kongvang khak sawm uh a, Ama khakte hon’ sawm uh hi. Ahih hangin “ kua ma khak theih loh ding in hong in, kuama hon’ theih loh ding in a khak thei “ a cipa in, “En in, kuama khak zawh loh ding kong na mai-ah ka hong hi,” ci hi. Mang. 3:7,8. Khrist in van biak-buk ah Siangtho Bel Mun a mawhsutna kongkhak ahong hi. Tua ciangin aki hong van Biak-innpi sung pan khuavak hong tang khia in Thukhamsawmte hong ki langh hi. A nambat li-na zong tua lai-a ki koih thukham lak-a ki hel ahihna hong lak khia hi. Pasian kip sak pen mihing kua mah in pai khia thei lo hi. Khrist Palai Siampi sepna leh Pasian Thukhamte kip den hi cih thuman khuavak asaang mite in hih thu pen Mang. 14 sung a aki gelh thuman hi cih hong mu khia leu leu uh hi. Mangmuhna 14 sungah tangkona cial thum a om hi. Tua in leitunga teeng mi khempeuh Topa hong pai nadingin a ki ging khol sak ding tangkona ahi hi. A tangkona in, “A thukhenna hun a hong tung zo hi,” cih thu hi hi. Tua in mite hotkhiatna dinga Siampi Khrist mawhsutna nasep ma ki hial ta ding cihna ahi hi. Honpa in (436) Palai nasep akhawl hun dongin hih thumaan pen ki tangko ding a tua zawh ciangin A mite Ama kianga om dingin ala dinga leitungah hong pai kik ding ahi hi. 1844 kum pana ki pan thukhenna pen asi leh ahingte thu khempeuh a ki khen tel khit dong ki zom to dinga, tua zawh ciangin mihing te hun hoih hehpihna kong ki khak ta ding hi. Tua bangin mihing te in thukhenna mai tang a a din’ theih na dingun ki ging khol dinga thupiak na in, “Pasian kihta un la, avangliatna phat un. Vantung, leitung, tuipi leh cikte apiangsakpa na bia un,” ci hi. Tua thu a mangte pen “ Pasian’ thukhamte leh Jesu upna a zui mi siangthote “ ci in gen khia hi. Thukhenna ading ki gin kholhna in Pasian thukhamte zuih ding ki sam cihna ahi hi. Tua Thukhamte thukhenna-in a ki zangh a hi hi. Sawltak Paul in, “Thukham thei lo-a khialte in Thukham loin a sia ding uh hi…. Pasian in Jesu Khris tawh mite’ seelsim lungngaihna akhen Ni ciang in tua bangin a khen ding hi.” “Thukham banga azuite bekin dikkisakna angah ding uh hi.” Rom. 2:12-16 ci hi. Pasian thukham zuih nadingin upna ki sam hi. Bang hang hiam cih leh, “Upna om loin Pasian lung ki dam sak zo lo hi,” Heb. 11:6 ci hi. Tua ban ah, “Upna lungsim tawh kituaklo gamtatna khem peuh in mawhna ahi hi.” ci leu leu hi. Rom. 14:23.

 

Vantung mi khatna in, “Pasian kihta-a, avangliatna phat ding” hong sawl hi. Tua teh, Amah pen van leh lei apiangsakpa hihna tawh bia ding hi ci hi. Hihte ih zuih theih nadingin thukham te I zuih a kul na hi gi ge hi. Mipilpa in, “Mihing hong kipian’sakna, a thu bulpi pen in: Pasian zahtakna, leh a thu piakte man na ahi hi.” ci hi. Thuhilhsia 12:13. Ama thukhamte zui ngap lopi I biak hangin tua biakna in Pasian lung dam sak thei lo hi. “Eite in Ama thukhamte I zuih leh Pasian ih it hi cih ih thei hi.” “Mi khat in thukham a zuih nop kei leh, ama thungetna nangawn Pasian in zak thadahhuai sa hi.” 1 Johan 5:3; Paunak 28:9.

 

Pasian biak ding I nasep ahihna pen Amah in Piangsakpa hi a Ama tung panin a dang khempeuh a piang khia sawn ih hih man ahi hi. Koi lai Laisiangtho mun ahi zongin Amah zahtakna pen pian sak theihna vaang nei ahihna na lak zel ding hi. “Bang hang hiam cih leh (437) minam dangte’ pasiante khempeuh in milim hi lela, ahih hangin Topa ahih leh vantungte a bawlpa ahi hi.” Late 96:5. “ Kei kua tawh hong genteh ding na hi uh hiam? Siangtho Pa in ci hi. A sangna lam ento unla mu un, kua in hihte piangsak ahi hiam?” “Topa in vante bawl a, Pasian mah mah in leitang bawl hi. Keimah in Jehovah ka hi a Kei lo adang omlo hi,” Isa. 40:25, 26; 45:18, ci hi. Laphuakpa in, “Topa pen Pasian ahih na thei un! Eite hong bawlpa in amah hi a, eitein am aa ih hi hi.” “Hong pai un, bia in kun ni, eite hong bawl Topa mai-ah khukdin ni! “ Late 100:3; 95:6. Vantung ah misiangthote in Pasian a biak uh ciangin a biakna uh a hang pen, “Kote’ Topa, kote’ Pasian aw, nang in na khempeuh na piangsak a, Nangma deihna hangin piangin a om uh ahih ciangin, tua vangliatna, minthan’na, ukzawhnate ngah dingin na kilawm hi “ ci uh hi. Mang. 4:11.

 

Mang. 14 sunga thupuak tangkona in Piangsakpa bia ding in mite sawl hi. Tua tangkona hang in Pasian Thukhamte a zui mihon lom khat zong a hong dawk sak hi. Tua thukhamte lak ah khat in Pasian pen Piangsakpa ahihna zong a hong lak khia lai hi. “Ni sagih ni in na Topa Pasian Sabbath ni hi: Ni guk sungin Topa in van leh lei, tuipi leh a sunga om teng bawl a, a ni sagih ni tawl nga in, Topa in tua Sabbath ni thupha pia-in a siangtho sak hi.” ci in Thukham li-na in gen tel hi: Pai. 20:10,11. Sabbath tawh kisai in Topa in a genna ah, “Topa ahi keimah in amaute pen mi siangtho in ka bawlna thu a phawkna dingun lim ding in…ka pia hi.” Ezek. 20:12, ci hi. A hang a genna ah, “Ni guk sungin Topa in van leh lei bawlin, ani sagih ni-in amah tawlnga a, a tha dim kik sak hi,” Pai. 31: 17, ci hi.

 

“Sabbath pen Piansakna phawk nading a kulna in, Pasian biak ding ahihna hong lak tawm tawm den hi. Amah in piangsakpa hi a, eite in Ama piansakte I hi hi. “Tua ahih manin Sabbath pen Pasian biakna vai ah a thubul pen hong suak hi. Tua pen, thumaan in a ki mu thei pah hel thu tawh hong hilh hi. A thu dangte piangsakpa ahihna tua zah a a ki (438) lang sak pah om lo hi. Pasian biakna vai khempeuh dangte en leng tua ni sagih ni tan’na lo ngal in a Piangsakpa leh a pian’ sakte kilam dan’na lam tangpi-a a dawk sak om lo hi. Hih thu lianpi ki heem khia thei ngei lo dinga, zong mangngilh mawk theih ding ahi ngei kei hi.” - Andrews, J.N. “ History of the Sabbath.” ch. 27.. Pasian in Eden ah Sabbath na koihzo hi. Tua ahih manin Amah in eite hong piangsakpa hi ih cih lai teng Amah ih biak ding hi a, Sabbath in zong piangsakpa ahihna leh eite in Amah bia I hihna lim ciamtehna hi ding hi.Tua ahih manin, mihing ahi peuhmah te lungsim in hih thumaan a theih gige den ding uh thu a hi hi. Sabbath hoih takin na ki zang pai suak hi leh, mihing lungsim leh deihnate pen Piangsakpa tung bek ah tu ding a, Amah bek zahtak in ki bia ding hi.Tua hi leh milim biakna te, lawki na te leh muan huai lohna cih bangte om hetlo ding hi. Sabbath tan’na in Pasian thu mang nuam hihna teci lim a hi hi. Tua Pasian maan pen, “Van leh lei tuipi leh tuinakte piangsakpa” pen hi. Pasian bia un ci-a patau kona thupuakin Ama thukhamte zui un a cih ciangin a tuam vil vel in nambat li-na zuih ding acihna hi phadeuh hi.

 

A thumna vantung mi in Pasian Thukhamte zui a Jesu upna a neite tawh a ki leh bulh mipawl dang khat gen a, tuate pen patau tangkona alangdote pawl ahi uh hi. “Mikhat peuhin sahang leh ama milim bia-in, ama taltang tunga hih kei leh, a khut tungah ciamtehna angah leh Pasian hehna hai-ah a kihel khawm lo-a kikoih hehna leengahzu tua mi in a dawn ding hi,” ci hi. Mang. 14:9,10. Hih thu I tel theih 

 

65

nadingin hih lim in a gen nop thu a khiatna I theih ding ki sam hi. Sapi acih bang hi a, a milim leh a ciamtehna a cih bang ahi hiam?

 

Hih hilhkholhna leh limte Mang. 12 pan ki pan ahi hi. Gulpi san in Khrist a suah phet in na susia nuam hi. Gulpi cih pen Satan cihna hi. Mang. 12:9. Amah in Herod thu muam in Honpa sih nading vai hawm sak hi. Kum zakhawk masa lai te-in Satan in Khrist leh A mite adona ah a khutzat bulpi pen Rome kumpite ahi hi. Lawki biaknate hi pi pen hi. Gulpi san pen Satan cihna leh Lawki Romete a cihna ahi hi.

 

Alian 13 ah Sapi dang khat gen leu leu hi. Tua in “kamkei tawh ki banga,” (439) Gulpi in amah vangliatna, a tokhom, leh a thuneihna a pia hi ci hi. Hih limlahna in Protestant khempeuh in zong a upsa, tanglai Rome kumpi baan zom-a a vanglian, a tokhom, leh a thuneihna uh a zangh to papacy (pope thuguipi) a hi hi. Kamkei bang sapi acih pen tung ah “Pasian gensiatna thu lianpipi a gen thei kamvang kipia a, amah hong kam pau a, Pasian neu bawl in thu gen a, Ama min neng cip—in A biak-innpi sim mawh-in vantunga teengte khempeuh a el hi.

 

Amah in misiangthote gal-in do a, amaute a zo gawp hi. Minam khempeuh, pau nam khempeuh, mi pawl khempeuh tung ah tung nungin vangliatna a ki pia hi.” Hih hilhkholhna leh Daniel 7 sunga kii neu a ki bang hi a, dot kik akul lo zah-in a mal mal in papacy ahihna teci a om hi.

 

 

“A vangliatna ki piak hun sawtna pen kha 42 hi.” Kamsangpa genna ah, “A lutangte khat a si ding zah-in a liam ka mu hi,” ci hi. A cih kikna ah, “Gal mat a ciing te ki man ding hi: namsau zangh te namsau tawh si ding hi.” Kha 42 pen hun khat, hun te, hun lang, Daniel 7 sunga “kum thum leh a lang”, ni 1260 a cih ahi zongin avek in aki bang si sek a hi uh hi. Tua pen papal vangliatna in Pasian mite a net cip hun sung teng a hi hi. Hih hun sung teng Papacy vangliat pen hun hi a, AD 538 pan 1798 kum dong a huam hi. Tua kum 1260 bei-na ahi, 1798 in French galkapte in pope man uh hi. Papal vangliatna pen “si dektaka suk khakna liam-ma” a thuak ahi hi. Tua ciangin “Mikhat peuh in namsau tawh midang athah leh tua in zong namsau tawh thahna athuak ding hi” cih genkholhna a tangtun’na a hi hi.

 

Limlahna dang khat om lai hi. Kamsangpa in , “Tua khit ciangin lei sung pan a dang sapi khat pusuak ka mu hi.” ci hi. Mang. 13:11. Hih sapi meel leh hong khawk khiat dan te a masa sapi te tawh ki bang lo hi. Leitung bup a-uk kumpi gamte sapi-in Daniel tungah ki lak a, “tuipi tung ah (440)huih li-te a nun’ ciangin” amaute hong dawk uh hi. Dan. 7:2. Mang. 17 sung ah tui in “mipi, mi hon, pau namte cihna hi” ci-in vantung mi khat in hilh cian hi. Mang. 17:15. Huih nung cih ciangin gaaldo na lim a hi hi. Van-a huih lite tuipi lian tungah nung hi a cih pen nakpi-in kido na tawh ki lum let-a angah gamte’ vangliatnate a genna ahi hi.

 

Ahih hangin tuu no bang sapi pen “lei sung pan-in hong dawk khia hi.” Hih gam in ama mai a gam dangte do in a zawh ciang in a luah hi lo hi. A gam pen ama mai ah a ki teeng nai lo, dam dam-a khang to, muan’na leh nopna a omna gam ahi hi. Tua pen leitung lui ahi Europe pan-a mi namte kidona tawh gualzo-a ding gam ahi kei hi. Tua a so zuah zuah tuipi — “mihon, mipi, minamte leh pau namte” lak ahilo nitumna lam gam Continent ahi hi.

 

1798 kum a a thak lai gam thak hong pusuak, hatna leh liatna a nei thak, leitung buppi huup zo ding bang gam om hiam? Tua limlahna tawh kisai in akitel cian mah mah Gam khat ahi hi. Tua pen in America gam a kawk ahi hi. Laigelhte, Laisiangtho hi ta leh, leitung tangthu gelhte in hi ta leh, ki kum khol het lo a a gelh mah uh tawh a mal a lo khia phial phial zah-a ki tel in hih gam po khiatna leh a khan’ tohna zia tel gen ciat mah mah uh hi. Sapi in “lei sung pan in hong pusuak hi.” Laitei te in, “hong pusuak” a cih pen uh in singkung no khat bang a hong po khia, hong khang khia cih gennopna kammal ahi hi. Ei zong en leng tua gam ni dangin a na ki luah sa a hi lo hi. Mun awng khong ahihna ki mu thei hi. United States hong dawk khiatna thu lai gelh minthang khat gelhna ah, “A hong pian khiatna in mun awng pan a hi hi. Khaici bangin khangto in Kumpi ciang ih tung to hi,” ci hi. 1850 kum a Europe gam daai khin khian sung pan in nisial in a vangliatna leh a kisaktheihna ki behlap den” na ci hi. Hih (441) gam a mu khia Pilgrim makaite lak a khat ahi Edward Everett in a genna ah, Amaute in hong nawk kha om lohna, tawldamna mun zong uh hi. A gamlat man-a gal muan theihna mun, Leyden pawlpi no in amau upna bangin a suahtak theihna mun zong uh hi lo hiam? En dih un, mun zapi, lung muan’na in hum a amau in singlamteh galkap a sepna mun uh hi!” a ci hi. - Speech delivered at Plymouth, Mass., Dec. 22, 1824, p. 11.

 

 

“Tua sapi in tuu no bangin kii nih nei” hi. Tuu no-bangin, kii nei cihte in a moi lai, a migi, a kawk baang lo, a thu neem United States om zia tawh ki tuak lin lian hi. Kamsangpa tunga ki lahna ah, “hong pusuak” a cih mah bangin 1798 kum-a hong ding khia phing gam a hi hi. Siampite leh kumpite gitlohna pan Khristian ki nawh khiate lak a America hong beel masa te in zai tak en sa-in kumpi leh biakna a suah taakna tawh a ki phut kumpi khat phut ding na ngaih sun uh hi. A ngimna uh Indepen-dence pulaakna sung ah dawk sak uh a, tua tawh “Mi khempeuh a ki kim-a kibawl a hi hi” cih thumaan na phut uh hi. Tua thu tawh ki deidanna om loin “nuntakna, suahtakna, leh nopsakna ding zon’na te” na nei uh hi. Upadi in zong mihingte in amah leh amah ki uk theihna thu ngah a, mee tawh a teel uh te in upadi bawl in zangh ding cih thu a hi hi. Biakna lam ah zong suahtakna ki pia uh a, mi khempeuh in ama upna ama khentatna zui-in Pasian abiak theih nading thu pia uh hi. Mipi vai hawmna leh Protestant upna tawh a gam bup thubulte ki phut hi. Tua thubulte in a vangliatna leh a mai nawtna uh ahi hi. A ki nencipte leh aki sik cip den Khristiante in lawp tak leh lam en tak in hih gam zuan zel uh hi. Mi mak tampi in tua gam tuipi geiteng ah hong ki sep khia uh hi. United States in leitung bup-a a vanglian pen gamte khat ahong suak hi. Hi napi tuu no a bang, kii a nei sapi in “Gulpi bangin pau hi. Amah in amasa sapi mai-a amasa sapi ngah ana khempeuh nei in, asidektak aliamna ma a dam kik amasa sapi pen leitung leh leitung mi khempeuh a bia sak hi. Leitunga teeng khempeuhte tungah (442) namsau tawh liam-a a dam kik sapi milim abawl nading un asawl hi.” Mang. 13: 11-14.

 

Tuuno abang, kii a nei, leh Gulpi banga paute a limen leng ki leh bulh uh hi. A nasep zia leh a gamtat zia ki lam dang pi ahi hi. Gam khat “kam pau” cih ciangin a Upadi leh a thuneihna ahi hi. Tua bang lian in la ni ci le’ng hih gam in lungnopna thubulphuh nei, suahtakna tawh a po khia, tua Upadi leen te a hi uh hi napi a zuau ding tawh ki bang hi. A hi zongin hilhkholhna in, “Gulpi bangin” kam pau a “sapi masa vangliatna teng mah” zangh ci mawk hi. Ki thuak lahna bawl siatna a piangsak Gulpi’ sawltak leh kamkei bang sapi lungsim mah nei dingin genkhol hi. Tua baan ah, kii nih nei sapi in “si dektak a liamna ma a dam kik amasa sahang pen leitung leh leitung mikhempeuh a bia sak hi” ci hi. Cih nopna ah, hih gam in zong zuih ding khat pe peuh bawl in a thuneihna tawh papacy tungah to kaai sak ding cihna ahi hi.

 

 

Tua bang bawl-a gamtat ding pen hih kumpite thubulphuhte tawh ki lehbulh mah mah hi. Suakta taka nasepnate, Suahtakna lak lai-a a pulaak uh Gam thukhun bulphuh te uh leh gam Upadi a bawl te uh tawh ki tuak het lo hi. A gam satcilte in zapi en a leitung thuneihna in pawlpi a suk khaak loh nading dalkhol uh hi. Ki thuak lahnate leh bawlsiaatna te a om loh nadingin pil vaang takin dal khol uh hi. Gam Upadi ah, “Congress in Biakna khat peuh a kip sak tang tuamna ding leh ut peuh biak theih paai theih suahtakna a khaam ding thukhun bang mah bawl thei lo ding hi,” cih thu na koih uh hi. Tua baan ah ‘United States-a mipi zum na seem dingin biakna tawh sit tel na deidan’na om lo ding hi,” cih thu zong khung uh hi. Hih minam suahtak nopsaknate akep cing laiteng un, kumpi thuneihna zangh in biakna thuzuihna khat peuh zawh thawh bawl in ki sawl gawp thei lo ding hi. Ngong tat-na lo ngal in tua minam thukhunpi susia theilo ding ahi hi. Minambup thukhun tungah cih tak zawh lohna pen limciinna tawh a lahna sunga a lah ong bang ding ahi hi. Tua sapi tuu no tawh ki banga, kii nih nei hi. Thu hoih deih, mi gi, thu neem-hi napi gulpi bangin kampau ci ve ve mawk hi.

 

“A nungta sapi milim khat peuh peuh bawlsak in ci-in leitungah a om mite kiang ah ci” hi. Hih thu panin kumpi (443) gam khat, mipi deihna tawh Upadi kibawl ahihna gam a gen hi; hilhkholhna gen mah bangin United States tawh kisi kim pen zel hi.

 

Ahih hangin “sapi milim” cih pen bang ahi hiam? Bang ci ki bawl ding hiam? Kii nih nei sapi in tua milim bawl ding ci hi. Bawlding milim pen a masa sapi a suun ding ahi hi. Sapi milim zong ki ci hi. Tua milim bang tawh ki bang ding, bang ci ki bawl ding cihte ih theih nadingin sapi ahi Papacy gamtat ziate en suk ding hi.

 

Pawlpi masa te in Lungdamna Thu hoihna leh gen nopna thu nusia in lawki ngeina te hong saan’ uh ciangin Pawlpi ninsak in Pasian Kha Siangtho vaang nusia uh hi. Mite upna lumgsim zawhthawh in a uk zawh theih nadingun leitung kumpite huhna hong zong uh hi. Tua ciangin Papacy hong piang khia in, kumpi thuneihna ukcip suk leu leu hi. Pawlpi in ama tupna a tun’ theih nadingin, a diakdiak in “upna lampialna” a gawi cip nadingin thuneihna a hong zangh hi. Tua mah bangin United States in sapi milim a bawl theih nadingin, pawlpi in leitung uk kumpite nehzo zaw in, a tawpna ah Biakna in Kumpi aana zangin hong uk ding uh hi.

 

Pawlpi in leitung aana hong zat theih hun pepeuh ciangin ama deihna bang upna a zuilo peuh daan pia zel uh hi. Tua bangin leitung tawh kipawlna lam-a Rome nung a khe-khap teng a zui Protestant-te in mite lungsim sunga suahtakna ukcip nopna mah hong nei pah uh hi. Hih bang lim pen England Pawlpi thunialte bawlsiatna sawt veipi a omna ah teci kimu khin hi. Kum za khawk 16 leh 17 lai pawl in amau deih banga zui lo Pastorte leh pawlpi mite a tul tampi-in, daan tatna, thong khiatna, gawt bawlna leh bawl sia a thahnate thuak uh hi.

 

Pawlpi masate in leitung kumpi panpihna leh huhna ngenin tua tawh ding uh hi. Tua in Papacy ahi sapi picin’ nading lampi ziik asuak hi. Paul in, “tua Ni hong tun ma-in Langpana lian a piang masa dinga, kisiatna’ ta ahi Gilo Mi in hong piang ding hi,” 2 Thess. 2:3, ci in gen khol hi. Tua bangin pawl sung upna-pialna in sapi milim ading lampi a hong khol khol ahi hi.

 

(444) Laisiangtho in Topa hong pai ma deuh in biakna hong niam kiat lua in pawlpi masate lampialna mah bang hong om ding hi, ci hi. “A nunung bel nite lai tak in a haksa hunte a hong piang ding hi ci-in na ciamteh in. Bang hang hiam na cih leh, mite in amau pumpi uh it mi, sum it mi, akisathei mi, lungkhauh mi, mi gensia thei mi, anute a pate thu a mang lo mi, hehpihna a phawk lo mi, a siangtho lo mi, ngeina bang itna a neilo mi, kitotna lungsim nei mi, mi a gendai thei mi, a hoih lam a deih lo mi, thuciam a siasak mi, thuhilh a ngai nuamlo mi, kisatheihna tawh a hai thei mi, Pasian biakna puatham teng zui uha, ahih hangin a vangliatna a nial mi ahi ding uh hi” ci hi. 2 Tim. 3:1-5. “ Kha Siangthoin tel taka agenkholhin ah, a tawpna hun ciangin, amau lungsim uh kisuan’na ah siksa tawh ciamtehna a ngah khit uh ciangin, zuau thu a gen thei mite’ simtatna hangin mi kim khat in upna thu zui nawnloin a kheem thei khate ahi zongin, dawigilote’ thuhilhna a hi zongin a ngai ding uh” hi,” ci leu leu hi, 1 Tim. 4:1. Satan in “a vaangliatna khempeuh siit loin zangh dinga, lim leh phuahtawm thu lamdangte bawlin thumaan lo lamah a kheem theih zah suah-in a kheem ding hi.” “Thumaan a it tatak-a hotna ngah dingte lo buang” in tua “kheemna khauh zuau thu um lel mai dingin” amaute ki nusia ding hi. 2 Thess. 2:9-11. Hih thute hong tun’ ciangin kum zakhawk masa lai-ate thuak ngei teng mah ki nawkto kik leuleu ding hi.

 

66

Protestant pawlpi tuamtuamte lak-a upna zapi pi ki kaak na zong a ki bat nading a bawlna khauh a om ngei loh hang hi ci in mi tampi in gen ta uh hi. Protestant pawlpite lakah a upna uh a ki bat khakna mun om sun sun te din munpi in nei in ki pawl hon nading hanciam pha mah mah uh hi. Tua banga ki pawl theih nadingin a kibat lohna munte uh a ki kup uh ciangin, Laisiangtho sung thumaan sukha phial taleh, ki pum khat theih nading in ahih nak leh kibat lohna mun paikhiat zawk mai a kul ahi ta hi.

 

Charles Beecher in 1846 kum a a thuhilhna khat ah, “Evangeli-cal Protestant pawl tuam tuamte” nasepna mite kihtakna ciang lel ahi hi. A nuntak zia, a gamtatzia peuh mah uh nin in, a hun hun-a thumaan a omte susia in leitung nate lut beh beh sak uha, lampialna vaang mai ah khuk din ta uh hi. Hih pen Rome tawh a ton khawmna uh hi lo hiam? Ama omzia (445) mah zui in nungta leu leu hi lo I hi hiam? Tua a hih leh I maii ah bang om lai hiam? I mu hiam? General Council dang khat! Leitung bup thukimna! Thuhilhna lam pumkhatna, leitung bup upna khat-a luan’na!” ci hi. - Sermon on “ The Bible a Sufficient Creed,” delivered at Fort Wayne, Ind., Feb. 22, 1846. Hih thu hong pi cin’ uh in, a mi vekpi in a ki bangin hong bawl theih tak uh ciangin zawhthawh thu zat theih nading siksan a siik ta uh hong hi lel ding hi.

 

United States-a pawlpi a gol zaw deuh deuh in a upna uh a kibat khakna mun om sunte hong let khawm uh ciangin a ki pawlna uh pan in leitung ukte thuzawh zaw in amau phuh saangte, zatote, nasepna khat peuh te puah toh sak dingin thu (decree) pia khia ding uh hi. Tua pen Protestant gam ahi America in Rome milim a bawlna hong hi ding hi. Tua panin amau thu manglo peuh mah leitung thu tawh daan piakna hong om ding a, tua pen a kipelh thei lo thaman saan’na hong hi ding hi.

 

 

Kii nih nei sapi in “upa, naupang, sum hau, mi zawng, sila, to nei lote khempeuh sahang’ min ahih kei leh, tua min ciamtehna khat peuh peuh a nei lo mi peuh mah in sum zuak theilo, lei theilo ding in mikhem peuh a khut tak lam tung ah a hi zong in, ataltang tungah ahi zongin a ciamteh sak hi.” ci hi. Mang. 13:16,17.

 

Vantung mi thumna tangkona ta leu leu in, “Mi khat peuh mah in sapi leh a milim bia-in, ama taltangtung a hih kei leh, a khut tungah ciamtehna a ngah leh, Pasian hehna hai-ah a kihel khawm lo-a kikoih hehna leenggah zu tua mi in a dawn ding hi “ ci hi. Hih tangkona sunga “sapi” a cih pen ki-nihnei sapi in mi khempeuh a biak sak pen hi a, Mang. 13 sunga kamkei bang sapi pen hi in, “Papacy” ahi hi.

 

“Sapi milim” a cih pen amaute upna te a kipsak, a hat sak dinga leitung ukte thuneihna a ngen Protestant te a hi hi. “Sapi ciamtehna” a cih zong ih tel hilh lai ding hi.

 

Tua sapi leh a milim biakloh nading a tangko khit ciangin hilhkholhna in “Hih na ah Pasian thukhamte leh Jesu upna a zui misiangthote thuakna a om hi” ci in lak hi. Pasian thukham a zuite sapi leh a milim bia-a a ciamtehna neite lak panin ki lang khia tuam pah sam hi. A langah, Pasian thukham zuite, a leh lam ah, a palsatte, hi pah (446) ahih manin Pasian biate leh sapi biate ki deina a hi pah hi.

 

Tua sapi leh a milim gamtat pen Pasian thukham palsatna nasep hi pah hi. Daneil in kii neu thu a genna ah “Amah in thukhamte leh hunte kheek dingin hanciam hi” na ci hi. Dan. 7:25. Paul in zong tua pa “aki seel Gilo Mi,… Pasian sanga a ki lian sak zawpa” na ci hi.

 

Hilhkholhna omsa khat pen a dang khat in kip sak zel hi. Pasian thukham khek sakna bek mah tawh papacy in amah Pasian sangin a lian zaw in aki bawl a hi hi. Tua a ki kheek thukham thei napi in a zuih tei tei uh ciangin a omsa thu neipa sangin a khekpa a kihta zaw uh ahih lam lah na a hi hi. Tua banga papal thukham a zui mi in Pasian ciamtehna mun ah pope ciamtehna a saang zaw a hi uh hi.

 

Papacy in Pasian thukham khek ding hanciam den hi. Thukham nambat nihna, Milim biak ding khaamna pen zong thukham lak panin phiat khiat uh hi. Thukham li-na-a a ni sagih ni zong a ni masa ni tawh khek in Sabbath banga tan’ dingin thu pia in khek sak hi. Papist te in thukham nambat nihna a bei sakna uh a genna uh ah, thukham khatna ah thu kihel khin ngawn hi, hih pen kul nawn lo hi, tua manin Pasian ngimna bang a aki tel theih nadinga a paaikhia hi ung ci zen zen uh hi. Tua bel a ki khekna zia ding kamsangte gen kholh bang hi zo lo hi. Ngim ngim-a, tun tang hial-a kheek a hihna a gen ahi hi: “Amah in thukham leh hunte khek ding a hanciam hi” ci hi. Thukham li-na a khekna ah tua hilhkholhna tangtung lian hi. Tua bang mah in tua a khek thunei pen Pawlpi hi ci uh hi. Hih laitak ah Papal thu pen Pasian thu sangin a ki tung nun’ sak zawk na a hi hi.

 

Pasian biate in thukham nambat li-na a thupi sehna uh tawh amau ki tuam dawk uh hi. Tua in Amah bek Piangsakpi hi, mihing in Ama tungah tokaai in zahtak ding hi cihna lim ahi hi. Sapi bia-a anung zui te leu leu in Piangsakpa ciamtehna susia a Romete phuh tawm pen a ultun’ sakna uh tawh kithei tel ding uh hi. Tua Sunday lapsangna pen popetein zong a ki phat sakna a lah masakna hi a, Sunday pen “Topa’ Ni” ci a tan’ dinga a sawl tei tei theih nadingin (447) kumpi thu a zat masakna uh zong a hi hi. Laisiangtho in bel ni masa ni Topa ni ci ngeilo a, ni sagih ni bek Topa ni ci zaw hi. Khrist in, “Mihing Tapa in Sabbath ni’ Topa zong a hi hi,” ci hi. Mk. 2:28. Thukham li-na in, “Ni sagih ni Topa Sabbath ni hi” ci hi. Topa in kamsangpa Isaiah a gen sakna ah, “Keima ni siangtho” ci hi. Isa. 58:13.

 

Jesu in Sabbath khek hi a ki ci thithe zenzen pen maanlo ahih na Amah mah’ kammal in lak hi. Mualtung thuhilhna ah zong” “Thukham leh kamsangte thu siasak dingin hong pai hi ci in hong um kei un. A susia dinga hong pai ka hi kei hi. A kicing sak dinga hong pai ka hi zaw hi. A mantakpi kong cih in ah, van leh lei a mang thang zongin thu khempeuh a ki cin’ ma tengin thukham pan in lai malno khat zong kisia lo dinghi. Tua ahih ciangin mi khat peuh in thukham aneu pen khat palsat a mi dang zong a hilh leh, tua mi vantung gam sung ah mi neu pen kici ding hi. Ahih hangin kua ma peuh in thukham zui a mi dang te zong a hilh leh tua mi vantung gam sung ah milian ki ci ding hi.” ci hi. Matt. 5:17-19.

 

Laisiangtho in bel Sabbath khek nading thu pia lo mah hi, ci in Protestant te amau leh amau ki mawh sak thei sam uh hi. Tua pen a ip bawl bang uh zong hi lo a, American Tract Society te leh Sunday School Union te bangin lai gelh in a hawm khiat zawk uh thu a hi hi. Tua laite sung khat bang ah, “Laisiangtho Thak sung peuh mahah Sunday nipikal sung ni masa ni pen Nipi ahi ding leh tua bangin zat nading tel genna om het lo hi,” ci in tangko hi. - Elliot, Georte, “The Abiding Sab-bath,” laimai 184.

 

A dang khat leu leu sung ah, “Khrist sih dong nite khekna bang mah om ngei nailo hi,” ci hi. - Waffle, A. A., “ The Lord’s Day,” laimai 186. “A kiciamtehna te ah amau (nungzuipi te) in zong ni sagih Sab-bath nusia a nipikal sung ni masa ni a tan’ ding sawlna zong om ngei het lo hi” mah ci hi. - Idem.. pp. 187,188.

 

Roman Katolikte in ahih leh Sabbath pen amau pawlpi khek hi a, Protestant-te in tua Sunday a tan’ uh ciangin a mau thu neihna nuai-a lut uh hi lel hi, ci uh hi. “ Catholic (448) Cathechism of Christian

 

Religion” bu ah Thukham li-na tan’ nading Ni thu dotna a dawn’ kikna hi bangin ki gelh hi.” “Thukham lui hun in Saturdayni pen ki siangtho sak mah hi. Ahih hangin Pasian’ Khaa in a sawl Jesu Khrist in ahilh pawlpite in Saturday pen Sunday tawh laih uh a, tu ni kote in ni masa ni tang zaw in, ni sagih ni ka nusia uh hi. Tua hi a, Sunday in tu mah mah in Topa ni ahi hi” ci hi.

 

Katolik pawlpi thu neihna lim a dawk sak nadingun papist laigelhte in, “Sabbath pen Sunday tawh ki khek pen Protestant te in zong zui uh hi. Tua Sunday a tan’na pih uh ciangin pawi ni khawng a hi zongin, mawhna sung ah sawl na a hi zongin, pawlpi thu a mang uh hi lel hi” ci in gelh uh hi. - Tuberville, H., “ An Abridgeement of the Chris tian Doctrine,” laimai 58. Tua ahih leh, Sabbath khekna pen bang ahi hiam! Roman Katolikte thuneihna ciamtehna hi-a, “Sapi ciamtehna” zong hi lo hiam?

 

Rome pawlpi in amau tungnun’ penna khah suah ngei lo uh hi. Leitung buppi leh Protestant pawlpite in Laisiangtho Sabbath nusia in Romete’ bawl tawm sabbath pen a saan’ uh ciangin a thuneihna uh zong a dawk sak uh ahi hi. Amaute in aki zanghsa aban zom lel ahihna uh peuh paulam kha ding uh hi. Tua bang acih manun Rome pan-a a tai khiatna thubulte uh a thusim nawnlo suak uh hi. “Protestantte biakna letsanpi pen in Laisiangtho bek, cih a hi hi. Papistte in tua banga amau leh amau ki kheem-a hih thu en tel nuam lo-a mit si veu vau-a om a mu thei uh hi. Sunday tan’ ding sawlna mi tampi in a thu kim ciangin na lungdam mah mah a, Protestant buppi Rome thuneihna dialkhai nuai ah ki lut sak zo ding hi ci in a lung kim uh hi.

 

“Protestantte in Sunday tan’na ah amau leh mau ki thusim lo a Pawlpi thuneihna nuai a a to kaaina uh ahi hi, “ ci in Romete in gen uh hi. - “ Plain Talk About Protestantism,” laimai 213. Protestantte laka Sunday tan’ sak tei tei ciang in papacy ahi sapi a bia sak teitei a suak uh hi. Thukham nambat li-na nget pen thei napi a khial sabbath mah a maan (449)Sabbath sangin teel zaw-a a tang tei tei te in tua thu a pia khiate’ thuneihna bia mah ahi takpi uh hi. Biakna thu kimlai pawlpite in leitung aana tawh a sawl tei tei ciangin amau mah Sapi milim-a a ki bawl uh ahi hi. United States gam sung pan in zawhthawh thu tawh Sunday tan’na ding thu ong bawl uh ciangin Sapi leh A milim bia-a a sawl tei tei a suak ding uh hi.

 

Hun bei sa-a Khristiante in Sunday ni pen Laisiangtho Sabbath ni mah a tang tangin a ki seh uh hangin tu lai Khristian pawlpi te lak ah Roman Katolik upna a saang tuan lo, Sunday pen Pasian Sabbath pen mah sa-a a tang ni loh uh Khristian hoih tampi a om lai hi. Tua bangte pen amau hoihna leh diktatna te Pasian in a saang hi. Ahih hangin Sunday tan’na pen Upadi tawh zawh thawh thu-a hong kisawl gawp ciangin Sabbath maan kulna khuavak in leitungbup taan’ dinga, tua hun ciangin Pasian thukham pen Rome thuneihna sangin lian zaw a a saan’ zawk ding hi napi, a palsat tei tei te pen Pasian sangin pope a zahtak zaw mah a suak ding uh hi. A tua ci mi in Rome a bia suak-in, Rome in a sawlte zong a bia a suak uh hi. Tua bangin sapi leh a milim abia a suak uh hi. Pasian in Ama thuneihna ciamtehna lim dinga a piak pen nial a, tua taanga Rome tungnun’ penna ciamteh nadinga a teel pen mah a deih zawte in Rome tawh kizopna lim a saang suak uh hi. Tua in “Sapi ciamtehna” ahi hi. Mite mai a a ki tel tak in tua thu ki pholaak ding hi. Pasian thupiak leh mite thupiak teel ding in ki luui ding hi. Teel nading tua hunpha aki piak khit ciang in a palsat zom den te in “Sapi ciamtehna” ngah ding uh hi.

 

Vantung mi thumna tangkona sungah mihingte adingin a lauhuai khia penpen thu kihel hi. Tua in, migitna tawh kihel lo Pasian hehna atun nading a sam suk mawhna a hi hi. Mihingte pen hih thuphamawh thei kha loin ki mawk nusiat lo ding hi. Pasian in daan a piak ma-in hih a mawhna tawh kisai patau kona pen leitung buppi ah ki za sak phot ding hi. Mite (450) in tua daan a thuaklo in asuaktak nop uh leh a suah tak theih nading uh hun ki pia phot ding hi. Hilhkholhna in vantung mi khatna tangkona pen, “minam khempeuh, mi pawl khempeuh, pau khempeuh, mi khempeuh” tung ah ki tangko ding hi, ci hi. Hih vantung mi thumna tangkona zong tua sangin toi zaw thei tuanlo hi. Hilhkholhna in van kimlai ah aw ngaihpi tawh vantung mi leeng in ki ko a, leitung buppi in a ngaih ding uh thuphamawh tangko hi ci hi.

 

Tua ki demna thu nih ki piate ah Khistian khempueh in phelgol nih-in ki phel khap ding uh hi. Pasian thukhamte zui a Jesu upna a neite pawl, leh Sapi leh a milim bia-a a ciamtehna a saangte pawl ahi ding uh hi. Pawlpi leh gamukte kop-in “aneu a lian, a hau a zawng, to nei toneilo, a vekpi in sapi ciamtehna” nei dingin zawh thawh thu tawh a sawl uh hangin Pasian mitein bel na saanglo ding uh hi. Mang. 13:16. Patmos-a kamsangpa in a muhna ah, “Sapi-a kipan ama milim leh ama min nambat gimna pan a suakta zo mite in Pasian’ gawsemte tawi-in tua limlang tuipi kiangah dingin a om uh ahi zong in ka mu hi. Tua mite in Pasian sila Moses’ la leh Tuuno’la sa” uh hi ci in gen hi. Mang. 15:2,3.

 

67


To get the latest update of me and my works

>> <<