27. Tu Hun Kiphuahphatnate ~ MUC

Tu Hun Kiphuahphatnate

PASIAN thu om bang hoih taka aki hilhna peuhpeuhah Pasian sehna bangin thaman nei zel sam hi. Pasian Khaa in Ama naseemte huh a, A thu in vang lian nei hi. Mawhneite lungsim hong ki phel hi. “Leitung mite khuavaak in taan’ a,” aki dawk khia lo lungsim tawng nung dongin taan’in, alak khia hi. A lungsim uh thuk takin va lawng a, va khel sak hi. A mawhnate uh mu in thumaan mu uh a, hong tung ding thukhenna te zong phawk uh hi.

Amau te in Jehovah deihna mu uh a, lung sung zongkhiapa mai ah a siantho lohna te uh leh a mawhbaan’na te uh ki mu in hong kha lau thei uh hi. Lung gim in, “hih a si ding pumpi panin kua in hong hon khia ding hiam? ci uh hi. Mihingte mawhna thoih dam nading a ki pia Kalvary singlamteh hong ki langh hi. Khrist cin’na lo ngal amaute mawhna phel khia dingin a dang bang mah om lo cih thu leh tua bek mah in amaute Pasian kiangah lemkik thei hi cih thu a mu uh hi. Ki niamkhiatna leh muan’na tawh leitung mawhna a pua khiapa Pasian Tuu no na saang uh hi. Tua ciangin, Jesu sisan hangin “a mawhna uh a omsate ki mai sak hi.” Tua bang mitein ki sikkikna gah hong gah uh hi. Amautein um-in ki tuiphum uha, nuntakna athak tawh tho khia in gamta uh hi. Jesu sungah piangthak uh a, ni danga a lung gulhna te uh deih nawn loin Pasian Tapa upna tawh a nung zui uh hi. Ama gamtat bang (462) gamta in Amah a sian’tho bangin siangtho in nungta uh hi. Ni danga a muh dahte uh tu in it thei ta uh a, ni dang a itte uh tu in mu dah thei ta uh hi. A ki sa thei a ki hi sakte ki niam khiat in lung neem ta uh hi. A maitat aki phasaktein thu hong ngaihsun in, hong leiihaang nawnlo uh hi. A thopptat te hong zahtaak kaai in, zu kham khamte hong tei sit set uh a, a khuaval te hong siangtho ta uh hi. A mawkna tawh kipawl leitung kizepnate paai khia uh hi. Khristiante in pua lam zepna, sampaak manphate, kham leh a man pha na te zatna te, a ki lang khia na te zangg loin,..Pasian muhna-a a manpha zaw nate ahi lungsim sung zepna a zongg zaw ta uh hi.” 1 Pet. 3:3,4.

Kipuahphatna in lungsim sung thukpi bun suk ahih manin, kinaimkhiat sak hi. Amaute hoihna tawh ki sek uh a, Khirst sisan in a lei lungsim hoihte deih uh hi. Numei-pasal hotna ngah nadingin thu ngetna tawh Pasian a buan uh hi. Amau leh amau ki nial-a a kipia mite in tua bang ki puahphatna gahte gah uh hi. Khrist hangin simmawhna leh bawlsiatna te thuak tham cing a a om uh zong lungdam zaw uh hi. Midangte-in zong Khrist min tawh amaute ki khel takpi uh hi cih a gamtatna pan un mu thei uh hi. Amaute huzaap in a veeng taang uh ading phatna a bawl hi. Khrist tawh kikop in khaa khaici tuh uh a, tawntung nuntakna a la uh hi.

“Hong dahsaka hong kisiksak ahih manin alungdam ka hi uh hi.” “Pasian deihna tawh kituak in kong dah sak uh hi. Bang hang hiam na cih uh leh, Pasian’ deihna tawh kituak dahna in hong gup nading tawh kizom kisik kikna lungsim hi a, kikheel theilo kisik kikna lung sim hong bawl thei hi. Leitunga dahna in sihna a piangsak thei hi. Pasian’ deihna tawh kituak note dahna in note sungah bang ci bang phawkna, bangci bang mawh kiphelna, bang ci bang hehna, bang ci bang launa, bang ci bang lunggulhna, bang ci bang dikna lungsim, bang ci bang thuman tawh dan piak thu-a bawlphatna ci-in en ta un. Note in hih thu sung pan mawh sakna tawh na kipelh uh ci-in na khempeuh hangin na lak zo uh hi.” 2 Kor 7:9-11.

Hih in Pasian Khaa nasepna thaman ahi hi. Ki puahphatna taktak a ki muh khiat mateng ki sik kikna maan teci a om nailo ahi hi. A kam khapna taang tun’ sak-in, a suhsa na te pia kik in, mawhna ki pulaakna nei in, Pasian leh a mi pihte a it leh tua mawhnei (463) mi in Pasian sung ah lung muan’na ngah takpi a hih lam ki thei thei ding hi. Kum beisate ah biakna khan’ lawhna a om ciangin tua bangin a piang hi. Amaute gahte Pasian thupha pan ahihna ki thei thei a, mite hotkhiatna leh ki niam khiatna ki lam to pah zel hi.

Ahih hangin tu lai kipuahphatna pawl khat pen nidanga Pasian nasemte nasepna thaman Pasian thupha ki saang ngeisa te tawh ki lehbulh hi. Khaa lam lawpna kuang khia a, mi tampi ki khel hi ung ci in pawlpi sung lut uh hi. Ahih hangin a omzia te uh ah upna kimu lo-in, khaa lam nuntakna maan om tuan lo hi. A khuavak uh tawmvei sung a taan’ khit ciangin a mit hi.

Ki puahphatna ci-a a minthang pawlkhatte pen lungsim-a ngaihsutna lel peuh hi mai a, a lawp kineih tawm pong te peuh hi mai hi. Itna phuahtawm leh peh tawi mawk mawk peuh a hi lel hi. A ki khel a kicih uh teh tawm vei Laisiangtho hong sim nuam zok uh a, kamsangte leh sawltakte teci pan’na thei nuam pak lel te a hi zel uh hi. Biak ki khopte bang a lawp huai zek a a om kei leh ut lo pah mai uh hi. A thu ki gentein azaknop thuneem amau deih lam pang ahih kei buang leh bun lo hi. Pasian hong gen a tawntung kimang ding thute awl mawh lo lel uh hi. kizom koi ah om mawk hiam? Thuzui a kici mite in ki saktheinna leh leitung iiplahna khah het lo uh hi. A ki khelma uh sangin a ki niam khiat zawkna, a lung neem Jesu a zuih zawkna mah mah uh om lo hi. Amah leh amah ki niala a ki khalna singlamteh a puakna mah mah om tuan lo lel hi. Biaknate thu umlo mite ciam nuih mawl bawlna suak lel hi. A min bek pua in a thu lah a zui kei ve ve mawk uh hi. Khristian gamtat hoihna in Pawlpi tampi te nusia ta hi. Picnic peuh, biak inn-a pawi lahna peuh, biak inn-a van zuakna, inn zep, mi mal ki lahsanna te in Pasian phawkna hawl khia hi. (464) Leitangh neihna, vante neihnaa, leitung nate hauh nading bek bek mite lungsimte ah ki dim a, a tawntung nate a saan nadinguh in lungsim mun awng nei nawnlo hi.

Upna leh hoihna ah pawlpite a niam kiat mah mah hangin a lak uah Krist nungzui maan zong om lai ve-ve sam hi. Pasian hehna in a hong phial ta tak ma in Pasian mite lak ah sawltak te khang lai-a kipan a piang ngei lo zah kipuahphatna lianpi hong piang ding hi. A mite tung ah Pasian Kha Siangtho ki buak ding hi. Tua hun ciangin leitung deihna in Pasian itna a bawhkhiat sak pawlpi te sung panin mi tampi hong pai khia ding uh hi. Siate leh pawlpi mite in Pasian thumaan lian lungdam takin saang ding uh a, Topa hong pai kik nading tangkona nasep hong sem ding uh hi. Tua nasepna pen galpa in dal nuam ahih manin, tua nasep a ki sep ta tak ma-in a lim ciing zuau thu tawh na ma leep khol sak ding hi. Ama kheem zawh pawlpi te tung ah Pasian kiang pana hong kipia thupha takpi bangin ki dawk sak ding hi. Biakna lam khan’lawhna, leh lawpna lianpi bang in a dawk sak ding a, Pasian in thupha hong buak takpi hi ci in mi honpi te a ki sial ding uh hi. Ahih hangin khaa dang khat nasep na hi gi ge mawk ding hi. Biakna lim mah zui in kheem dinga, Satan in Khristian khempeuh ngahzawh nadingin a hanciam ding hi.

Kipuahphatna nasepna mun tampi ah kum 50 bang-a kipan in tua bang pian ngen hi ta zaw hi. Nung sang ciangin tua bang vive hong ki om lai lai ding hi. A maan leh a khial helzau-sa in mite lam khial sak dingin lawp hen han pak nading khanlawhna khem hong ki om ding hi. Ahih hangin kua mah in tua kheemna tak san’ kul lo hi. Pasian kammal khuavaakte pan in tua bang nasepnate telhaklo hi. Mite in Laisiangtho thumaan ci cintenlo uh hi. Pumpi nial-a leitung nusiat a kul sak, a ki tel sin sen, lungsim tawng dong a sit tel thumaan te a ki thu don lohna peuh peuh ah Pasian thupha ki pia takpi het lo hi cih a ki tel pah hi mai hi. Khrist in a genna” (465) “Amaute a gah-in na thei ding uh hi” a cih pen ettel ding ahi hi. Matt. 7:16. Tua teci tawh hih khanlawhna pen Pasian Kha Siangtho’ aa hi lo cih ki thei pah ding uh hi.

Pasian in Ama thumaan kammal sungah Amah mah aki laktel hi. Tua thu tawh aki dal mite Satanin kheem theilo hi. Tu khawnga leitunga biakna maan lo a ki theh luatna zong tua thumaan a awl mawh loh luatna uh in a kongvang a hon’ haang ahi hi. Pasian thukham leh nate pian ngei ziate mu nawn lo sak hi. A tawntung thute saang khial uh ahih manin Pasian thukham a kulna te mu nawn lo uh hi. Pianthakna leh Khristian nuntak sianthona te ah lam pial in khial pah uh ahih manin, pawlpi din’ munte niam kiat suk pah hi. Tua mun ah Pasian vang leh Kha Siangtho nei lo uh ahihna tu lai kipuahphatna a kici te ah ki tel thei hi.

Pawlpi tuamtuam tampite ah mitein ki Pasian thu zui sak mah mah uh ahih man mah in, a kisia zaw uh hi. Prof. Edwards A. Park in tu lai kisiatna a genna ah, “A lau huai thupi bul khat in, pulpit pana Pasian thukham I gen loh na hang ahi hi. Ni dangin pulpit pen sunglam upna tangkona mun-in ki nei hi. Ih thuhilh sia a seem siam pen pente in ih Topa hong lamlahna vangliante gen uh a, thukhamte a thupi pen in gen uh ahih manin tua thukham te nasepna a phat tuamna zong hong ki dawk khia a hi hi. Amau in thu lian pen nih te ahi, Thukham leh Lungdamna Thu, gengen uh a, thukham in Pasian sianthona kilah khiatna ahih zia leh thukham deih lote in Lungdamna Thu a deihlo suak ahihna te zong gen uh hi. Thukham ahi a Lungdamna Thu ahi zongin a thu nih mah un Pasian omzia liimlang banga hong lak a hi tuak tuak uh hi. Tua tegel a khat kinusia leh mawhna a sia huai ahih na neu sehna ciang hong tun in, tua in siatna hong tun pah hi. Thukham maan luatna zah mah zui in tua thukham azuilote khialhna zong khial luatna a suah to pah lam aki lang pah hi.

“Tu-a ih gen lauhuaina tawh ki pawl a lau huai khat om leu leu hi. Tua pen Pasian thumanna(thu-tangna) a ki neu sehna thu a hi hi. Tu lai pulpit te in Pasian thutang khenna leh Pasian hehpihna khen khia uh hi. Citna tawh Pasian thupha bawlna pen thubulphuh suak sak nawnloin lungsim phuut tawm thu ki suak sak hi. Theology thu phuah tawm a neih thakna uh ah, Pasian in a ki kim-a a (466) koih thu phelkhap-in khenkhia uh hi. Pasian thukham a hoihlo ahi hiam? A hoih ahi hi. Thutang-na zong a maan ahi hi. Tua manin Upadi kilen thei ahi phing zaw hi. Pasian thukham leh thutang a ki neu seeh na pan in, sawlman’ lohna leh deihkaihna ong om hi. Tua ciangin, mawhna pan a hong sian suah hehpihna zong neu seh nopna hong om pah hi.” Tua in mihingte lungsim ah Lungdamna Thu-ii manphatna bei mang sak a, Laisiangtho na ngawn kul nawnlo ci-sak in a nawl khin sak pah leuleu hi.

Khrist in Ama sihna tawh thukhamte phiat khia khin a, mihingte tua thukham khut nuai pan ki suakta khin hi, ci in biakna sem sia tampite in hilh uh hi. Tua thukham kolbulhna in gim hong pia a, Lungdamna Thu in ahih leh ut bang in om theihna ding suahtakna hong pia hi ci-in hilh uh hi.

Pasian kamsangte leh sawltakte in bel amau cih bangin hilh lo uh hi. David genna ah, “Nangma thukhamte zuih ding hanciam ka hih manin, nuam takin ka nungta ding hi “ ci hi, Late 119:45. Sawltak James in Khrist sih khit in thukham sawmte a genna ah, “Kumpi Thukham “ leh “Suahtakna tawh kizom a kicing thukham” ci in na gen hi. Jakob 2:8; 1:25. Singlamteh khit kum sawmnga bang khit ciangin mangmupa in, “Thukham zuite in thupha ngah uh ahi hi. Bang hang hiam cih leh khuapi kongvang ah lut theihna ngah-in nuntakna singkung kiang a tung thei ding uh hi” ci lai hi. Mang. 22:14.(KJV) Khrist in Ama sihna tawh A Pa Thukhun phiat mang sak hi cih ngiau mawk pen bulkip nei lopi a hi hi. Thukhamte a ki phiat thei, a ki khel hi leh thukham palsat mite mawhna daan thuakna pan hotkhiat kik nading kullo dinga, Khrist zong asih kul lo pah ding hi. Khrist sihna in Thukham aki phiat cih tha dah-in, thukham kip sak zaw a, “zahtaak huai sak zaw” dingin hong pai a hi hi. Isa. 42:21(KJV).

Amah in, “Thukham leh Pasian kamsangte thu siasak dingin hong pai hi ci-in hong um kei un. Akicingsak dingin hong pai ka hi hi. Aman takpi kong cihinah, van leh lei a mangthang zongin thu khempeuk a kicin’ matengin Pasian’ Thukham a neu pen nangawn kisia ngeilo ding hi.” na ci zaw hi. Matt. 5:17,18. Amah mah in, “Nangma deih bang hihna-ah nuam ka sa hi, ka Pasian aw; na thukham ka lung sung ah om hi,” ci zaw lai hi. Late 40:8.

Pasian Thukham pen a pian lim phet-in kheek theih loh in tawntungin a kip (467) a hi hi. A neipa deihna leh a gamtat lah khiatna ahi hi. Pasian in ki itna hi a, a thukham in ki itna a hi hi. Tua thukham thubulpi nihte in Pasian it nading leh mihing te it nading a hi hi. “Tua ahih ciangin ki-itna in thukham zuihna thu kicin’na ahi hi. “ Rom. 13:10. Pasian gamtat zia pen Dikna leh Thumaan hi a, thukham zong tua hi pah hi. Laphuakpa in, “Na thukham zong maan tawntung hi. “ na ci hi.

Late 119: 142,172. Sawltak Paul in zong, “Thukham in a siangtho hi. A thu in zong a siangtho, a dik, apha hi” na ci hi. Rom. 7:12. Tua thukham pen Pasian deihna leh a lungsim omzia pulaakna hi a, a neipa a kip lai teng kip ding hi.

Pasian leh mihingte ki lem kik sak a, a siangtho kik sak ki khelna in Ama thukhamte tawh ki tuaka gamtatna ahi hi. A kipatcil in mihing in Pasian lim le meel suun-a ki bawl ahi hi. Siangtho in kicing a, Pasian leh a Thukhuntawh ki lem hi. A lungtang sung ah Dikna thubulte om kholzo hi. Ahih hangin mawhna in a bawlpa kiang panin khen khia hi. Tua-a ki pan Pasian lim suun thei nawn lo hi. A lungtang puak in Pasian Thukham sawl thute a langdo hi. “Ci leh sa lungsim in Pasian’ Thukham manglo tham loin a mang zolo ahih maninah Pasian tawh a kido hi. “ Rom. 8:7. Ahih hangin “Pasian in a Tapa khat bek a piak dongin leitung mite a it hi.” Tua pen mihingte Pasian tawh ih kilem kik theih nading a hi hi. Khrist’ dikna hangin mihing in amah abawlpa tawh a ki lem kik thei hi. Pasian thupha tawh a lungsim uh ki thak sak dinga, vantung pana piak nuntakna thak nei ding uh hi. Tua ki khelna in pianthakna hi a, tua bang tawh loin “Pasian gam sung ah alut thei kei ding hi” ci-in Jesu in a gen hi.

Pasian tawh ki lem kikna theih nadingin mawhna hoih lohna tel theih ding kisam masa bel hi. “Khialhna in thukham palsatna ahi hi”. “Thukham tawh mawhna kilang” hi.” 1 Johan 3:4; Rome 3:20. Mawhnei mi khat in a mawhna a tel muh nadingin ama gamtat te leh Pasian Dikna din mun ahi thukham a et kaak ding ki sam hi. Tua in gamtatpha a ki taangcing lak khia a, tua panin ama kisap laina munte a ki kawk khia hi.

Thukham in mite kiang ah a mawhna lak a, a zatui ding bel pia lo hi. A sawlmang nuntakna pia ding ci in khaam a, sihna bel palsatna thaman (lem lawh) hi cih athei sak hi. Khrist (468) Lungdamna Thu bek in mawhsakna leh mawhna in a hong suksiatna panin hong suakta sak thei hi. Amah in a thukham palsatnate hangin Pasian lam ah ki sik kik ding, Khrist leh Ama tatkhiatna muang dingin in hong sam a hi hi. Tua ciangin a “mawhna omsa te mai sakna ngah in,” Pasian omzia a suun in hong nungta ding hi. Tua ciangin amah in ta dinmun ngah kikna lungsim hong nei in Pasian pen “Abba, Pa!” hong ci ta hi.

Tua bang ong hih ciangin Pasian thukham palsat theih nading thu ngah a hi hiam? “Tua ahih leh, upna hangin eite in thukham paaikhia ihi hiam? Tua bang hi lo hi. Thukham ih kipsak hi, “ Paul in ci hi. Rom. 3:31. “Mawhna a anusia eite in tua sung mah ah nungta lai lai ding I hiam?” Johan in a genna ah, “Pasian itna in Ama thukhamte zuihna a hi hi. Pasian thukham zong a zuih hak a hi kei hi.” Rom 3:31; 6:2; 1 Johan 5:3. Pianthakna ah lungtang puak in Pasian tawh ki lem a, Ama thukham

tawh zong kilemna hong puak hi. Hih a lamdang kikhelna hong pian ciangin amah in sihna pan hin’na ah, mawhna pan sianthona ah, palsatna leh galbawlna pan sawlman’na leh migitna ah a tung ta a hi hi. Pasian tawh a ki khen khia nuntakna lui pen bei ta a, a ki lem kik nuntak thak ahi upna leh itna hong kipan ta hi. Tua ciangin, “cileh sa deihna zui loin Pasian’ Kha Siangtho’ deihna zui-in a nungta eite tung ah a Thukham hanciamna thu a tun’na ding hi. “ Rom 8:4. Tua ciangin “Na thu deih mah mah ing! Sun tawntung-a ka lungngaih-ngaih ahi hi” ih ci thei ta ding hi. Late 119:97.

“Topa thukham in kicinga nuntak a thak suah sak hi.” Late 19:7 Thukham simloh Pasian cihtakna leh sianthona muh theih nading dang omlo hi. Thukham simloh mihingte’ mawhna leh kih-huaina aki dawk nadingin alak thei dang omlo hi. Mawhna aki muhloh ciangin ki sik kik a kulna zong phawk lo uh hi. Pasian thukham palsatte in a mang thang ahih lam uh thei loin Khrist sisan a ki sap lam uh phawk lo uh hi. Lungsim ki khel lopi leh kipuahpha lopi in hotkhiatna saan’na thu lamen pah mawk uh hi. Tua bang a pua tham bek kikhelna tawh mi honpite in pawlpi azop pong mawk uh hangin, Khrist tawh kizom kha ngei hetlo mawk uh hi.

(469) Pasian thukham nial pi pi mah in sianthona ngah ding ki lam-etna pen thumuh dan amanlo ahi hi. Tu hun-a biakna sunga a thupi ngaihsut pen khat uh hi ngiau mawk hi. Tua bang upna pen amau in dik asak mah mah uh hangin, a thu in a lau huai ban ah a tak tak ciangin zong lau huai gamtatna in zui kik hi. Hih bang munte ah Laisiangtho hilhna a tel theih nadingun a tel sim phat zawk ding uh a ki sam ahi hi.

A maan sianthona pen Laisiangtho hilh upna maan ahi hi. Sawltak Paul in Thessaloni pawlpite a laikhakna ah hi bangin ci hi, “Note sianthona pen Pasian deihna bang hi, na pumpi-un lungmuan’na-Pasian in hong siantho sak nadingin thu ka ngen hi,””Nopsakna a pia Pasian mah in note khempeuh hong siangthosak ta hen.” 1 Thess. 4:3; 5:23. Laisiangtho in sianthonathu bang ahi hiam cih ahi zongin, ih ngah theih dan ding ahi zongin a hong hilh hi. Honpa in anungzuite ading agenna ah,”Na thuman tawh amaute na siangtho sak in: Bang hang hiam na cih leh na thu in thuman ahi hi,” na ci hi. Paul in thu um mite “Kha Siangthoin a siantho sak nading” vai a hilh hi. Tua ahih leh kha Siangtho nasep bang ahi hiam? Jesu in anungzuite kiangah agenna ah: “Thuman thutak Khasiangtho hong tun ciangin Amah in thuman a om khempeuh hong makaih ding hi,” ci hi. Johan 16:13. Laphuakpain, “Na thukhamin thuman ahi hi” na ci hi. Pasian thu leh Akha in thukham sunga om dikna bulpite mite tungah a lakkhia hi. Pasian thukham “siangtho in, thutang in, hoih” hi. Pasian kicinna zia leh tong teng muhkhiat theih dingin a ki gelhkhia ahi hi. Tua ahih manin thukham tawh kituak ding a kipuahpha nuntakna pen a siangtho ding ahi pah hi. Tua bang nuntak ih neih nadingin Khrist in a et teh ding a picing pa a hi hi. Amah in, “Keimah in ka Pa thukhamte ka zui hi,” ci hi. “Ama deihna bangin ka hih tawntung hi,” ci hi. Johan 15:10; 8:29. Khrist nungzuite in amah tawh ki bang ding ahi hi,—Pasian hehpihna tawh a siangtho thukham deih thubulte tawh a kituak in nungta ding uh hi. Tua in Laisiangtho gen sianthona pen a hi hi.

Tua bang nuntak pen Khrist upna neih taktakna leh, ih sunga Pasian Kha Siangtho a teen’bek tawh aki tangtun thei ahi hi. Paul in thu um mite a lamlahna ah, “launa liin-na lungsim tawh, na pumpi uh na gup nadingun na hahkat un. Banghang hiam na cih uh leh, note in ama deihna bang na sep nop na’ng uh leh nasep theih na’ngun amahmah Pasian in nomau sungah hong bawl ding hi.” ci hi. Filipi 2:!2,13. Mawhna in a phut (470) lam Khristiante in thei ding uh a, a nan’ den ding uh a ki sap lam zong a thei ding uh hi. Tua mun ah Khrist huhna ki sam hi. A thanem mihing pen Pasian thahatna in kop pih hi. Tua ciangin upna in, “Ih Topa Jesu Khris hanga eite zawhna hong pia Pasian’ hehpihna ka phat hi” ci hi. 1 Kor. 15:57.

Khristian nuntak ahi Sianthona pen tatsatlo in akizom den kalsuan’na hi ci in Laisiangtho in teltak in ong lak hi. Mawhnei mi khat hong ki khel ciangin tatkhiatna sisan hangin Pasian tawh kilem-lungmuan’na a ngah hi. Tua pan-in Khrisitan nuntak kipan pan in, “kicin’na kim” zuan in a kalsuan to to ding ahi hi. Khangto to in “Khrist din mun ciang aphak dongin” mai a nawt ding ahi hi. Sawltak Paul in, “ka nungah a om nate ngaihsun loin, ka mai lamah a omte zamin, Khrist Jesu sungah Pasian in tung lam pan hong sapna tawh kipawl lungdamna ngah nading in, kidemin kung dongin hahkatin ka tai hi.” ci hi. Filipi 3:13,14. Peter in I mai ah tua a kicing sianthona ngah nading kalsuan daan a na gen’na ah: “Tua thu hangin note in upna tungah lungpilna, lungpilna tungah noptat khamna, noptat khamna tungah thuakna, thuakna tungah Pasian biakna lamah nopsakna, Pasian biakna lamah nopsakna tungah ki-unau itna, ki-unau itna tungah ki-itna hahkat mah mah in na koih thuap un....Tua bang na hih uh leh, na puk ngei kei ding uh hi.” ci hi. 2 Pet. 1: 5-10.

Laisiangtho gen sianthona a ngah mite ki niamkhiatna lungsim tawh hong kithei ding hi. Moses bang mah in sianthona thupina mu-in mong neilo Topa sianthona leh kicin’na tawh ki khai lua uh ahih lam zong ki mu uh hi.

Kamsangpa Daniel pen sianthona manah etteh tham cing ahi hi. Amah khangto-in, Topa nasep thupi sepna-in anuntakna bup zangh hi. Amah pen “Pasian in a it mah mah pa ahi hi.” Dan. 10:11. Ahih hangin a siangthonate akisial in a pulaak sang sik in mawhna dim Israelte tawh ki genkhawm in, deihsakna tawh amite ading in Pasian mai ah, “Kote’ gamtatna pha suang hi loin, nangma’ migitna suangin thu kong ngen uh hi.” “Ka mawh khin uh a, ka khial khin uh hi.” “Keima mawhna leh ka mi pih Israelte’ mawhna pulakin, ...thu ka ngen hi.” ci zaw hi. Dan. 9:18, 15, 20; Tua khit ciangin Pasian Tapa amah thuhilh dingin hong kilang hi. “Ka tha neih teng bei khin a, ka mel kikhel gawp ahih manin kei ka hih lam mel kua mah in a hong thei nawn kei uh hi,” Dan. 10:8. ci hi. (471) Job in pingpei lai pan Topa aw a zak ciangin “ka paunasate khempeuh hangin ka maizuma, tu-in vut leh vai khu-in nakpi takin ka kisik hi. “ ci-in a kiko khia hi. Job 42:6. Isaiah in Topa minthan’na a muh ciangin, Cherubim in “Mihonpite’ Topa, Siangtho, Siangtho, Siangtho hi” a cih azak ciangin, “Gim ngahpa hi ta ing! Bang hang hiam cih leh a mawkna pi ka hi hi” ci hi. Isa. 6:3-5. Paul in van athuapthumna ah a ki laak toh lai in, mihing in a ki tel gen theilo thu azak lai in, ama omzia a genna ah, “Keima pumpi ahih leh, thanemna simloh, ka kisa thei kei ding hi,” ci in ki gen hi. 2 Kor. 12:2-4; Eefesa 3:8. Johan pen Jesu awm-a kingama a minthanna a mupa hi a, vantung mi khe mai ah misi bangin puuk hi. Mang. 1:17.

Kalvary singlamteh liim bel-a kalsuan mite in mawhna su kha loin ka siang hi ci-a kisialh nading leh ei leh ei ki pahtawi nading mun om thei peuh mah lo hi. Amaute in amau mawhna in Pasian Tapa lung gimsak, a lungtang ki tamkham sak hi cih mu zaw uh hi. Tua muhna in ki niam khiatna a piang sak hi. Jesu kiang nai pen pen-a om te in mihing tha neemna leh mawh kidimna te tel muh pen pah uh hi. A ki khailum, a tho kik Honpa’ sepsakna bek mah amau lam etna a hi hi.

Tu khawnga biakna sunga sianthona-a a ngaihsut pi pen uh in, ei leh ei ki pah tawina, Pasian thukham awl mawh lohnate peuh hi zaw mawk hi. Tua bang lungsim pen Laisiangtho pan aki ngah biakna lungsim hi lo hi. Tua bang ahilhte in sianthona pen tom kha no sunga ki ngah upna tawh ki zui-a sep zom pai suakna bek tawh hi a, upna bek tawh thuah le hang a kicing siangthona ki ngah thei hi ci uh hi. Amau cih dan ah, “Um lel un,” leh “thupha bel saang het ding hi teh” cih a hi hi. Tua thupha ngah nadingin nang ki thasaan kullo hi, ci uh hi. Tua ci kawm kawm sa-in Pasian nial uh a, Thupiakte zuih ding kul nawn lo hi, na suakta khin zo uh hi, ci in ki hilh uh hi. Ahih hangin ngaihsun le u cin Pasian gamtat, Ama pian zia, Ama deihna te tawh kilem lopi a leh tat gawp keeipi mah in Ama lung ki dam sak thei zaw zen in a siangtho I hi ve ve thei ding hiam? Ki thasaanna, pumpi deihna nialna, akullo leitung hai-vai (472)te tawh zong ki khenna nei loin biakna a baih lam thei thei ki ultung sak hi. Upna bebek, ci lan lan lai uh hi. Ahi ta mawk zongin Pasian kammal in bang gen hiam? Sawltak James in, “mi khat in, “Upna ka nei hi, a cih hangin a hoih a gamtat kei leh bang phat tuamna a om hiam? Tua upna in tua mi gum zo ding ahi hiam?...gamtatna hoih omlo, upna in khat bek om ahih ciangin asi-in a om hi. Kiphasak pa aw, gamtatna hoih omloin upna in phattuamna omlo hi cihna thei nuam hi hiam? Ih pa Abraham in ama tapa Isaak biakna thau tungah a piak ciangin a gamtatna hoih hangin dik kitangsak hi lo ahi hiam? Upna in ama gamtatna tawh bawlpha khawm a, gamtatna hoih hangin a upna a kicing hi ci-in na thei ta in.” ci hi. Jakoh 2:14-21.

Sepna omlo upna pen lampial nading thang zak ahi hi. Pasian kammal tawh a ki leh bulhna Laisiangtho in tel takin teci a pang hi. Hih bang upna in thupha piak dinga vantungin a khap upna pen hi lo hi. Deih bawl tawm ahi zaw hi. Laisiangtho sunga upna maan in zuih ding sawl a, khapna tawh ki zui pah zel ding hi zaw hi.

Mi kua ma peuh in Pasian nget khat peuh susia ngit nget sa kawm kawm in mi siangatho hi ve ve dingin ki lam en in amah leh amah ki kheem se dah zaw hen. Akilanga mawhna bawl teeiteeina in, Kha Siangtho teci pan’na aw meng cip in, mihing leh Pasian khen khia hi. “Khialhna in thukham palsatna ahi hi.” “ Mawhna a hih mi in amah a mungeilo, a thei ngeilo ahi hi.” 1 Johan 3:6. Johan in zong a lai khak na ah ki itna thu bulphuh in ki cing takin a gelh hi. Tua sungah zong Pasian thukham palsat sa pi pi-a mi siangtho hi dinga kigen te tung ah thumaan gamtatna a tel lah ding cik zia loin zekai het lo hi. “Tua Topa ka thei hi, ci napi-in ama thukham a zuilo miin thu zuau genmi hi-a, ama sung ah thuman thutak a om kei hi. Ama thu a ngai mi sung ah Pasian’ itna a kicing taktak hi.” 1 Johan 2:4,5. Hih lai tak ah mi khempeuh amau ki genna tawh a ki bang uh hiam sit telna om hi. Eite in mi khat peuh sianthona, van leh lei sianthona tehna dinga Pasian thukham pen a man nei loin seh a Pasian makaihna a neu seh leh, tua thukhamte a neu pen khat na ngawn a palsat leh, mi dangte zong a palsat dinga a hilh leh, tua mite vantung (473) in pakta thei ding lam et om lo a, amaute din mun kip a nei lo hi cih I thei thei pah ding hi.

Mawhna nei lo-a ki genna him him in tua banga a gen mi sianthona maan tawh a ki gamla mah mah ahihna dawk sak hi. Tua bang mi in mongneilo Pasian siangthona, a ki ciatna a maan in saang khalo lua zaw a, Ama gamtat pha zuih ding mu kha nai lo lua zaw uh ahih hang hi. Tua bang mite in Jesu-ii it huaina leh kiciatna tel muh kha nai lo uh a, mawhna gitlohna in a suksiatna te zong tel muh nailo uh hi napi, amau leh amau siangtho-in a ki gen kha mawk mawk ahi zaw uh hi. Amau leh Khrist a kigamlat sem sem ciangin, Pasian deihna bang zuih ding hong ngetna saang kha lo sem sem uh hi. Pasian tawh a ki gamlat ngel laitakun amau leh mau mi dik in ki mu pha zaw kaan lai deep uh hi.

Laisiangtho sung a sianthona kigen pen in lungsim pumpi leh khaa dongin huam kim hi. Paul in Thessalon pawlpi ading thu a nget sakna ah “na lungsim na ngaihsutna uh leh na pumpi uh, ih Topa Jesu Khrist hong pai kik ciangin mawhsakna tawh a kipelh nading un “ a ngen hi. 1 Thess. 5:23. Tua baan ah, thu um mite lai a khakna ah, “Tua ahih ciangin ute naute aw, a hing biakna, a siangtho leh Pasian’ deihna tawh kituakin, na pumpi uh Pasian kiangah na piak nadingun Pasian’ hehpihna tawh kong thum hi.” ci hi. Rom 12:1. Tanglai-a Israelte hun laiin zong kithoihna Pasian kianga a kipiak ding ciangin phinciil takin ki sit hi. Ganno tung ah poina neu no khat ki mu leh ki nolh kik hi. Bang hang hiam cih leh, Pasian in tua biak piakna pen “Kawk baang lo ding” ci in ngen hi. Tua ahih manin Khristiante pen amau pumpi mah mah, “a hing-biakna, a siangtho kawk baanglo Pasian saan’ theih dinga” kipia ding ahi uh hi. Tua bang a pian theih nadingin amaute vaang pen ahoih thei pen pen in keem ding uh ahi hi. Pumpi ahi-a lungsim a hi zongin a tham neem sak thei gamtatna khat pepeuh in piangsakpa’ na ih sep ding zah sem thei lo dingin hong tuantual sak hi. Eite hih theih ding zah sanga tawm zaw tawh Pasian biakna pia leng Amah a lungkim zo ding hiam? Khrist genna ah, “Na Topa Pasian na lungsim khempeuh, na kha khempeuh, na pilna khempeuh tawh na it in “ ci hi. A lungsim khempeuh tawh Pasian a it mi in ama nuntakna a hoih pen pen tawh A na sem nuam ding uh hi. Ahih theihna khempeuh ah Ama deihna a sep theih nading hanciam in, thukham tawh ki lem-a nuntakk ding han suah ding uh hi. Amaute nek leh dawn, lungsim gamtatnate ah vantunga Pa

mai-ah ki awng hon lo ding uh hi.

(474)

Peter in, “kha tawh a kido thei pumpi tawh kipawl deihgawhnate khempeuh na tan’ nadingun, khualzinte, peemtate bang ahi note ka hong thuum hi.” ci hi. 1 Pet. 2:11. Mawhna lam ei deih bawl a peh tawi tawm mawk mawkte peuh mah in lungsim leh khaa navaakna mol sak hi. Lungsim sungah zong Pasian khaa leh Pasian thu thaneem sak thei hi. Paul in Korinth pawlpite a lai khakna ah, “ih pumpi kihhuainate leh lungsim kihhuainate khempeuh pan kisiangthosakin, Pasian kihta-in, a siangtho gamtatna tawh dimin om ni.” ci hi. 2 Kor. 7:1. Tua ciangin Kha Siangtho gah, “Ki itna, lungdamna, lungmuanna, lungduaina, thumaanna, hoihna, muan’na leh lung neemna” te tawh “ki deek ki daamna” a gen khawm hi. Gal. 5:22, 23.

sep ding zah sem thei lo dingin hong tuantual sak hi. Eite hih theih ding zah sanga tawm zaw tawh Pasian biakna pia leng Amah a lungkim zo ding hiam? Khrist genna ah, “Na Topa Pasian na lungsim khempeuh, na kha khempeuh, na pilna khempeuh tawh na it in “ ci hi. A lungsim khempeuh tawh Pasian a it mi in ama nuntakna a hoih pen pen tawh A na sem nuam ding uh hi. Ahih theihna khempeuh ah Ama deihna a sep theih nading hanciam in, thukham tawh ki lem-a nuntakk ding han suah ding uh hi. Amaute nek leh dawn, lungsim gamtatnate ah vantunga Pa

mai-ah ki awng hon lo ding uh hi.

(474)

Hih Khasiangtho thumuapna tawh hong ki hilh thumante tawh ki lehbulh in Khristian tampi te leitung hamphatna tuhna in biakpiak zia , Pasian deih bang lo huai hamna, uisanna, zu nekna, awiloh gualnop bawlna te ah bual uh a, a hatna uh tha neem sak uh hi. Pawlpi in lah a khal zawk gen loh tua bang gamtatna te thapiakna lim vive a lak zaw sop hi. Tua bahg in a om maan un Khrist itna tha neem sak uh hi. Tu lai biak-inn sung te ah Jesu hong lut leh pawi bawlna te, biakna min paulam-a ki bawl a siangtho lo sum bawlnate mu ding ahih manin, Jerusalem Biak-innpi sunga sum khekte leh anin sakte a nawh khiat bang mah in amaute zong hawl khia tham mah lo ding hiam? Tunglam pana ki pia pilna pen a”siangtho masa”ahih na thu sawltak James in agen hi. Jesu min manpha lawh na in amuk zang in, tua muuk mah ah a mi nin sak, gimsia-in, vantung huih a kih huai sak, za teep khutawh pum sunga gu a thun thun khawng mawh sak ngel mah lo ding ahi hiam? Sawltak pa hong pai leh zong Lungdamna Thu sianthona a dal te, “Dawi aw, leitung mi aw, khawval mi aw” ci in mawhsak mah hi lo a hi hiam? Zanah-ii silate hi napi in, sianthona ka nei ci a a ki gen te, vantung alamen lai deepte khawng Pasian kammal in ki tel takin, “A kihhuai na te khempeuh tua lai ah ki lut sakk lo ding hi” ci hi. Mang. 21:27.

(475) “Note pumpi in Pasian hong piak na sung uh ah a teeng Kha Siangtho’ biakna inn ahi zong, na pumpi uh no aa ahi lo ahi zongin thei lo na hi uh hiam?Bang hang hiam na cih uh leh, man tawh kilei zo na hi uh hi:tua ahih manin Pasian neihsa ahi napumpi uh leh lungsim uh tawh Pasian vaang na pia un.” 1 Kor. 6:19,20. Ama pumpi Kha Siangtho teen’na biak-inn ahi mi peuh mah in hong susia thei na te’ sila in om lo ding hi. Ama vaang khempeuh in Khrist neihsa hi a, Ama sisan tawh leisa a hi hi. Aneihsate zong Topa aa a hi hi. Kepsiamna tawh apungsak dinga ki aap na manpha teng a zang tum mang mi peuh mah mawhnei lo kici thei ding ahi hiam? Khristian a kicite in kum sial in ki manna nei lo hong susia lel ding munte ah ki awnghon in sum bang zah gaitum uh hiam? Tua te hangin mite in nuntakna pan ki sia uh hi. Tham loin, Pasian Kaih(sawm-ah khat) leh a sumpite pia loin suh sak sim tawntung lai uh hi. Mizawngte a huh sang sik un, Lungdamna Thu Tangkona-a a zat sang sik un, a pumpi uh suk siat nadingin ne tum uh hi. Khrist nungzui ka hi aci mite in a siangtho in nungta ding uh hi. A kul lopi, leh hong na sak zaw thei mun khawngte peuh ah a sum uh zang zaw loin, Topa sum kholna ah pia zaw ding uh hi. Ki deek ki daamna lam te ah ei leh ei ki nial a ki ukna, ei leh ei kipiak zawhna te ah et-teh hoih suak ding uh hi. Tua bang hi leh amaute in leitung khuavak a suak ding uh hi. Ci le sa lunggulhna zuihna ah leitung buppi ki khah khong in om uh hi. “Ci leh sa lung gulhnate, mit et lah nate, gamtat ki phasakte” tawh mipi ki uk hi. Khrist nungzuite ahih uh leh a siangtho zaw ding in tuate sung pan aki sam khia ahi hi. “Tua mite lak pan paikhia unla, a tuamin om un. A siangtho lote na lawng kei un,” Topa in ci hi. Pasian hong khuavaak piak tawh eite in Dikna ki ngah a, sianthona pen tua mawhna lampi te zui kawmsa pi pi in leitung tawh kizopna te nial kei mawk leng a ki ngah thei ngei ding hi lo hi, ci in I tangko khia hi.

“Tua mite lak kpan hong pai khia un la,... a siangtho lo nate lawng kei un” cih thu a mang mite tung ah Pasian thuciamna in, “Note Pasian ka hi ding hi, Note zong ka tanu ka tapa na hi ding uh hi, Vanglian Topa in ci hi.” 2 Kor 6:17,18. Tua ahih manin Khristian khempeuh in Pasian piak hih hauhna leh hoihna na te I neih theih nadingin thu a ngah I hi hi. (476) “Keimah in hih leitung khuavaak ka hi hi. Ka nung hong zui te in khuamial lakah pai lo-in nuntakna khuavaak angah ding hi” Jesu in ci hi. Johan 8:12. “Thuman mite’ zuih lampi ahih leh, sun dong a taang pha sem sem zing khua vaktung tawh kibang hi.” Paunak 4:18. Upna leh thumanna tawh a kalsuan khempeuh in Leitung khuavak lam neh sem sem uha, “khua mialna om nawnlo hi.” Dikna Ni in Pasian mite tung ah a taang hi. Amaute in Ama khuavak leng kik ding uh hi. Aksite in van ah khuavak lian’ vaang taang tawh a taang khia sawn ahih uh mah bangin, Khristian te in khua vannuai khempeuh te ukna Tokhom tungah a tu Pasian khat om a, A vaang leh gamtat pha te biak tham cing, ngaihsut tham cing hi ci in I pulaak ding ahi hi. Ama Kha Siangtho thupha, Ama omzia, leh a sianthona teng A tecite tung ah a ki dawk ding a hi hi.

Kolosete tungah Paul lai khakna ah Pasian mite thupha ki buakna thu tampi a gen hi. A cihna ah, “Tua ahih ciangin kote in zong ka zak uh ni pana kipan, note ading thungen tawntungin ka om uh hi. Ka thungetna un: note in gamtat hoihna apawlpawl ahi gah gahin, Pasian theihna pilna khan’tohna nei-in a hi zongin, lungdamna tawh na khempeuh thuakin lungduaina ding in ama minthan’na vangliatna bangin, thahatna tawh dimin ahi zongin, Topa tawh a kilawmin gamta-in, na khempeuh ah a hong deihsak nading in Pasian tawh kipawl theihna leh pilna apawlpawl tawh, ama deihna khempeuh na tel nading un thu ka ngen uh hi,” ci hi. Kol. 1:9,10.

Efesa-a sanggamte tungah zong a deih sakna gelh a, Khristiante hamphatnate a theih nadingun a gen hi. Amaute maiah kammal ki tel mah mah tawh a lam dang vangliatna leh theih theihna in, a Tungnungpen pa tanu tapate a suah nading uh a hilh hi. “Topa in ama Kha Siangtho hangin note sungmi in hatna tawh kip tawntungin,” “ki-itna thu ah zungkha-in, “ “misiangthote tawh itna a zai zia, a sau zia, a thuk zia leh a saan’ zia thei telin; theih zawh loh zah-a Khrist’ itna theih nading a hi hi.” Sawltakpa in thungetna hun hoih angah zah zah tawh amaute “Pasian’ kicin’na a om khempeuh tawh a kidim nading un “ a nget sak hi. Efesa 3:16,19.

(477) Vantung I Pa in Ama hong deihsakna te I na zuih leh upna tawh I ngah theih ding thute hiah hong lakk hi. Khrist sepna masuan in Mong nei lo Vanglian tokhom ih zuat theih nading thu a om hi. “Ama Tapa khat bek haza lo a, eite khempeuh ading a piapa in man ngen lo-in nate khempeuh ama Ta tawh hong pia khawm loin om ding ahi hiam? “ Rom 8:32. Pa in Ama Khaa tehna nei loin A Tapa a pia hi. Ei zong tua mah a dim in angah khawm thei ding ih hi hi. Jesu in, “Note in migilo hi napi-in na tate uh ahoih na piak uh leh, tua sangin vantungah a om na Pa un a ngen mite Kha Siangtho hong pia zaw ding hi lo ahi hiam? “ Lk 11”13. “Kei min suangin na nget peuhmah uh hong hih ding hi.” “Na lungdamna uh a kicin’ na dingin ngen un, na ngah ding uh hi.” Johan 14:14; 16:24.

Khristian nuntak ah ki niam khiatna ki mu ding hi. Dahna leh khakunna ki mulo ding hi. Pasian in mi khempeuh thupha a piakna thu a muh theih nading hunpha ngah ciat uh hi. Vantunga i Pain eite khuamial sunga mawhsakna thuaka ih om cip ding hong phallo hi. Lukuunsa-a ei mah bek ki ngaihsutna pen ki niam khiatna maan lahna hi tuanlo hi. Jesu kiang pai in ih ki puah siang leh thukham maiah zum huaina leh ki suantaakna omlo ding hi. “Khrist Jesuh tawh kipawlin anungta mite pen mawhna thukhenna tawh kipelh hi,” Romans 8:1. Jesu hangin apuksa Adam suan le khak khempeuh “Pasian tanu tapa” asuak kik uh hi. “Mawhna pan in mite asiangthosakpa leh sian’thona a ngah mite in, Pa a kibang a nei khawm uh hi” Hebia 2:11. Khristian nuntakna in Pasian sung ah upna leh gualzawhna tawh lungnopna ahi hi. “Pasian ta ahite peuh mah in leitung nate zo uh hi: i upna tawh leitung nate tungah a gualzo ihi hi.” 1Zawhg 5:4. Tua thu in, upna tawh ih ngah zawhna a hi hi. Pasian sawltak Nehemiah in man taka a genna ah, “Topa sungah lungdamna in note’ thahatna ahi hi” ci hi. Neh. 8:10. Paul in, “Topa sungah lungdam tawntungin om un. Khat vei ka hong gen kik inah lungdam un!” “A tawntug in na lungdam ta un. Thungen niloh un. Na khempeuh ah a hong hehpihna phat un. bang hang hiam na cih uh leh, note in tua bang na bawl dinguh Jesu Khris hangah Pasian’ deihna a hi hi.” Filipi 4:4; 1 Thess. 5:16-18.

Laisiangtho sunga ki khelna maan leh sianthona maan in tua bang ahi hi. Ahih hangin Khristian-leitung in Pasian thukham-ii deihna thubulpite a bulhna uh lam dangpi khat suah uh a, hih a gah te ki tawm muh mah mah hi. Tua bang mah in a thuk zia te man khia zo loin Pasian Kha Siangtho sep pihna neu lua cih hun beisa-a puahphatna a cihte uh omzia te ah ki mu hi.

Mitsuan in ih etna tawh a ki khel ih hi hi. Pasian in mite mai-a hong hon khiat sak Ama omzia siangtho leh kicin’na a lak a siangtho thukham pen ki awl mawh lo hi. A lungsim uh in mihingte bawltawm leh ngaihsutna bek deih uh ahih manin, pawlpi sung nuntak hoih mi kiam suk pha mah mah pah hi. Tua tawh kisai Topa in a genna ah, “nuntakna ciktui(tuinaak) ahi keimah a hong taisan zo uh hi; tuibeem bawltawm uh-a, tuibeem keh-in tui a vung thei kei hi,” ci hi. Jer. 2:13.

“Mi nuamsa ih cih in, migilote’ thu a zuilo mi” ahi hi. “Ama nopsakna in Topa’ thu sung bek ma hi a, sun leh zanin ama thu ngaihsunsun mi ahi hi. Amah in luitui luang gei-a a kisuan, ama gah hunin gah a, a teh avul lo sing kung tawh ki bang hi. Ahihna khempeuh ama apai hi..” Late 1:1-3. Pasian thukham ama mun mah a a ki koih kik ciangin mite lak ah taang lai upna maan pasianmi hihna te Pasian’ mi ka hi a ci te lak ah hong om thei bek ding hi. “Topa in mite tungah, ‘Lamka bomah ding un la khuadak un. Lam hoih ahi lampi luite dong unla tawn un. Na kha uh a ding tawldamna na mu ding uh hi.” Jer. 6:16.

Share This: Facebook Twitter Google+ Stumble Digg

MUC

Wednesday, October 22, 2014