MUC

Print Friendly and PDF

Tuesday, October 21, 2014

31. Kha Gilote’ Sawltakte



Kha Gilote’ Sawltakte

 

 

MUHTHEIH leh muhtheih loh leitungte kizopna ahi-a, Pasian vantung mite nasepna leh khagilote’ nasepna ahi zongin mihing tangthu bup ah khen theihloh zahin Laisiangtho sungah teltak in na kilak hi. Khagilote om ahih lam ki um nuam nawn lo a, “gupna luah nading mite kem dingun, sawltak nasem“ (Heb. 1:14) vantung misiangthote bang misisate’ khaa hi a ci nuam tampi om ta hi. Laisiangtho in vantung mite om a hih thu a gen hi.Ahoih leh akisia vangtungmite ahi uh-a, misite’ khaa hi cih a genna om lo hi.



Mihing akibawl ma-in vantung mite om khin hi. Leitung bulpi a kingak lai-in “zingsang aksite in la sakhawm uh a, Pasian tate lungdam-in awng uh hi” ci hi. Job 38:7. Mihing hong puuk khit ciangin nuntakna singkung vil dingin vantung mite kisawl hi. Tua pen mihingte asi a om ma uh a hi hi. Vantung mite pen apianlim pek un mihingte sangin a lian zaw-a kibawl hi uh a, laphuakpa in mihingte “vantung mite sanga niam zaw deuh-in na bawl hi” mah na ci hi. Late 8:5.  Laisiangtho sungah vantung mite tamna, a vangliatna leh a minthannnate uh, leh vantunga teengte thu, Pasian’ Kumpina tawh kisai ama sepnate, eite hotkhiat nadinga a nasepnate uh, hong gen zo hi. “Topa in a tokhom van ah koih a, Ama gam in a vekpi huam hi” a na ci hi. Kamsangpa in “Topa tokhom kiim ah vangtungmi tampi’ aw ka za hi” zong na ci hi. “Vantung mi a thahat pha deuhte in” kumpite’ Kumpipa inn dei sung vil uh hi (512)ci hi. “Ama nasemte in Ama deih bang bang seem uh hi”. “Ama thu ngai uh hi”, Late 103:19-21; Mang. 5:11. Daniel in “Tul sawm mun tulsawmte leh a tul tul te” Dan. 7:10; in vantung sawltak na seem in om mu hi. Sawltak Paul in zong, “Akisim zo lo vantungmi tampi “, Heb. 12:22. ci hi. Pasian sawltakte ahih mah bangun amaute a paikhiat uh ciangin “Khuaphelep a bang uh hi”, Ezek. 1:14, taang zia zua-in leeng zau zau uh hi. A kiliansak Assyriate kumpi Sennacherib in Israelte susia dingin, Pasian kosia in hong pai-a, hong nawk “ zan in Topa vantung mi khat pusuak-in Assyriate Giahphual va vaat a, mi 185,000 a va that hi.” Tua laitak ah “agalhaang thahat teng, abu makai teng uh” a si hi. “Tua ciangin Sennacherib maizumsa-in a gam ah a ciah kik hi.” 2 Kumpite 19:35; 2 Khangthangthu 32:21.

 

Vantung mite pen migitna thu puak dingin Pasian mite kiangah kisawl zel hi. Abraham kiang ah thupha khaam dingin a ki sawl hi. Sodom kongkhakpi ah midik Lot in dan a thuak loh nadingin a honkhia dingin kisawl hi. Sehnel gama gilkial lungkhama a sih dektak laitakin Elijah kiangh kisawl hi. A galte in khuaneu khat ah Elisha kiim-uum a a kalhcip laitakun tua khua kiimkot ah sakol leengte leh sakol meikuangte kualkhum sak hi. Lawki kumpipa khat zum sunga Pasian pilna angeet laitak leh humpinelkai kua sunga akikhiat laitak in Daniel kiangah vantungmite ki sawl hi. Herod thong kaw-hawm mial sunga si dinga akikhum lai-in Peter kiangah vantungmi a kisawl hi. Philippi-a thongkiate kiang khawng, Paul leh a lawmte tuipi tunga a tuahsiat lai khawngun vantung mite va pai uh hi. Kornilius in Lungdamna Thu saang dinga a lungsim a honsak ding, Peter in hotkhiatna thu lawkite tunga a thehkhiat ding laite in siangtho vantung mite hong kisawl a, a khang khangin Pasian mite adingin na a seem uh hi.

 

Khrist nungzuite khempeuh a cing dingin vantung mite ki seh hi. Tua thu pen (513) Satan mah mah in zong thei a, “Job in Pasian hong mawk zah tak ahi hiam? Amah leh a innkuan leh a neihsate khempeuh na hutna-in a kimkotah dai kai hilo nahi hiam? “ a ci hi. Jop 1:9,10. Pasian in A mite keem-a a sawl sawltakte thu laphuakpa inzong la-in a sa hi, “Amah a zahtakte’ kim-ah Topa’ vantungmi in giahphual sat a, amaute honkhia hi.” Late 34:7, ci hi. Honpa in zong Amah a umte thu a genna ah, “Note in hih naupangte khat peuhmah na simmawh lohna dingun ka kikeem un. Bang hang hiam na cih uh leh, amau’ vantung mihingte in, vantungah a om ka Pa’ maitang amu niloh uh hi. “ Matt. 18:10 a ci hi. Pasian mite cing dinga kiteel vantung mite in Ama maitang va mu den uh ahi hi.

 

Tua bangin tawlnga lo-a vantung mite kepna tawh Pasian mite in ihmu lo-a om khuamial ukpa’ kheemna leh agilo khaate’ galdo na pan suakta thei uh hi. Kisam lo hi leh vilsak lo ding hi. Gilopa sawltakte in khauh tak-in nawk nawk ding uh a hih ciangin Ama mite thupha leh hehpihna tawh keem ding cih Pasian in kamciam hi. Tua agilo sawltakte pen tam mah mah uh a, lungsim khauh leh kuhkal tuah in mi bawlsia uh ahih man-in kiginglo awlmawhlo-a om tawh kisuakta zo lo ding hi.

 

Khaa gilote zong akibawlcil-in tu-a Pasian sawltak asiangtho vantung mite bang mah in mawh baanglo, akizakim, avanglian, aminthang ve ahi uh hi. Ahih hangin mawhna tawh hong puuk uh a, amaute kipawlhon-in Pasian langpang ding leh mihingte kisiat nading hong hanciam uh hi. Satan tawh tualgal bawl-in kikop uh ahih manin amah tawh van pan kinawhkhia khawm uh hi. Kum tampi sung Satan tawh kop in Pasian langdo in na seem uh hi. Laisiangtho in eite kiangah amaute omzia, a gam uk dan uh, akikopzia uh, apilna uh, a khelpilna dan uh, leh mite nopsakna leh galmuannate a suksiat nopzia uh hong hilh hi. Laisiangtho Lui Tangthu in tua gilo-sawltakte thu ong kidawk sak zel hi. Ahih hangin Khrist leitunga hong nuntak sungin tua a gilo khate’ nasepna uang pen hi cih zong hong dawk hi. Mihingte hotkhiat nading vaihawmna tawh Khrist leitungah a hong om lai tak in, Satan in leitung uk cip ding a hanciam hi. Amah in Palestin gam teng lobuang leitung buppi mun (514) citeng ah milim biakna khawng na phut kawi kawi khin hi. Mawhzolpa tunga aki-ap khinlo zek gam khatah Khrist in vantung khuavaak mite tunga puak dingin a hong pai hi. Hi laitak ah tungnungpenna kituh vangliatna nih ong om hi. Jesuh in itna tawh a khut hong vaan a, Ama kiang ah maisakna leh galmuan-nopna ngah dingin hong sam hi. Khuamial ukte in amau ut bang un a ukna aneih zawh loh lam uh kimu uh a, Khrist nasepna hong picing leh amau ukna bei hiau ding cih zong amu uh hi. Satan zong akikhihcip humpinelkai lunghaam bangin heh a, mite pumpi leh khaa susia dingin ama vangliatna a zangh hi.

 

Mihing dawilut cih pen Laisiangtho Thak sungah teltakin kigen hi. Tua banga a bawlsiat mite pumpi cinatna a thuak bek hi lo uh hi. Khrist in tua bang mite teltakin thei a, a tel et ciangin kha gilote lut hi ci-in mukhia pah hi.

 

Gadara-a dawilut adamsakna ah Khrist vangliatna leh migitna hi taleh, dawite a phazah leh a vangliatna uh leh a gitloh nasepna, a kithasaanna te uh Laisiangtho in gen hi. Tua dawi gilote lutna mi kep zawh-in om loin kikhuuk gawp, cilphuan bua gawp-in lunghaam-in kiko vua vua den hi. Amah mah kigimbawl-in a nehkha mi om leh zong lauhuai hi. Tua a pumpi liamna asisan luannate, lungmawka-gamta khawng khuamial kumpipa in muhnopsa-in a lungkim mai hi. Tua dawilutpa in, “Ka min Legian hi, tampi tak hi ung” ci hi. Mk. 5:9.

 

Rome galkapte sung ah legion khat a kicih ciangin galkap tul thum pan tul nga bang pha thei uh hi. Satan galkapte zong alom lom-in kipawl uh a, tua lom khat pen Legion khat sangin tawm zaw lo hi. Jesu sawlna tawh tua khaa gilote tua mipa sung pan taikhia uh hi. Khagilote in a nusiat khit uh ciangin tua pa daai tak-in Honpa khe kiang ah tu hi. Migi-in pilvaang-a thu dik mah mah hi. Ahih hangin vok honkhat tuipi sunga atuak mang sak dingin phalna dawite ki pia hi. (515) Gadara-a teengte in hih supna pen Pasianthupha angahnauh sangin lianzaw sa-in cidamsak Jesu pen a kiang pan-un a paikhia dingin angen uh hi. Tua bang pian vive-in Satan in piang sak nuam hi. Tua supna pen Jesu ngawh-in ahuaiham mi patau sak uh a, Ama thu a kingaihloh theih nadingin dal pah lian uh hi. Satan in Khristiante pen supna piangsakte hi ci-in a ngawh den mah a hi hi. Kamsiatna, leh thuaksiatna tuam tuamte atun ciang in zong apiangsak pen angawh sang sik in Khristiante a lehngawh lai hi.

 

Ahih hangin Khrist vaihawmnate bel kidal zo lo hi. Tua khaa gilote in vokte a suksiat ding pen bel a kiphal mah ahi hi. Bang hang hiam cih leh Jews te in tua a siangtho lo ganhingte khawi-a sum ngah ding a hanciam se se uh a taai na a hi hi. Khrist in dalsak lai zaw hi kei leh a vok bek zong hi loin a vokcingte leh a vokneite nangawn asikhin ding uh ahi hi. Sihna pan a kisiit laiteina zong Ama vangliatna bekmah in adal thei hi zaw lai a, amaute hotkhiat nadingin hehpih a migi taka kithasaan kul lai zaw deep hi. Hih thu apiansakna ah a deihna dang khat om lai hi. Nungzuite in Satan’ khaa gilote mihing sunga a lut theih mah bangin ganhing sungah zong lut thei ahihna a theih ding uh deihna a hi hi. Honpa in Ama nungzuite in galpa nasep zia a tel theih uh a a kibingphuut khakna mun uh hong om ciangin ama ngimna in a kheemzawh loh nading adeihna ahi hi. Tua baan ah, Ama vangliatna in Satan hencipte khahkhia thei ahihna zong tua kuam-a mite in mu le-uh a deihna a hi hi. Jesu a paikhiat khit hangin a nungah mite a suahtak theih na lam dang pen kikum uh a, thupha bawlpa migitna pen gen bel-in anei lai uh hi.

 

Tua bang pian thupiang Laisiangtho-a ki gen gen tampi om lai hi. Syro-Phenicia nupinu’ tanu dawi in a bawlsiat khat zong Jesu in a kam tawh tua dawi a hawlkhiatsak khat om hi. Mk. 7:26-30. “Dawilut mittaw-a a pautheilo khat mah” Matt. 12:22, tua leh “a pau theilo khaa in meikhuk khawng tui sung khawngh puuk saka a suksiat” khangno khat, Mk. 9:17-27. Dawi lut dang khat mah, “dawi nin in a nuai gawp” a, Lk. 4:33-38. Kaperanaum khua kikhopna ah mipi buaisak hi. Tua teng a migi Honpa in A damsak hi. Tua banga (516) a bawlna khempeuh phial ah Khrist in dawi pen pilna neilo bangin hopih-a, mi a bawlsia nawn lo dingin a sawl zel hi. Kapernaum khua-ah biakna pia-a om mite khempeuh in Ama vangliatna “Mi khempeuh in lamdangsa uh a, ‘Hih thu in bang thu ahi hiam? vangliatna tawh, kihhuai dawite thu a piak ciangin amau a pai khia uh hi,’ “ a kici uh hi. Lk. 4:36.

 

Tua dawi lutte a tam pen in cina thuaksiate ahi zel uh hi. Pawlkhatte dawilut ahih lam akithei nai lo pawl zong om hi. Mihing neih ngei loh thu ahih manin deih pong mawkna tawh Satan huzaap a na saang zong pawl khat om hi. Tua bangte pawl pen dawite tawh kido kha lo uh hi. Tuate lak ah dawi ai-siam pawl zong om hi,—Simon Magus cihte, Elymas mitphial lakpa te pawl, Paul leh Silas te Philipi khua dong a zui numeinu te pawl a hi uh hi.

 

Khaa gilote thuzawhna lakah, Laisiangtho lopi-in dawi om lo hi ci-a nial het pawlte din mun sangin alauhuai zaw om lo hi. Amau omzia ih theitello in ih phawk khak loh sung mah in gamlapi na mai nawt khin uh hi. Ami pum neii pen in ama pilna, ama lungsim zanga gamta niloh akisak khak sungin tua khaa gilote geelna bangbanga paipai a na hi zaw kha thei hi. Tua man mah-in hun bei nading naita a Satan in zuaukheemna leh suksiatna dingin a vangliatna zat theih tawp-in a zangh hi. Mun khempeuh ah amah omlo ci-a upna pen mite lak ah a theh kawi kawi hi. Ama omzia maan pen bel iim-in, a sepdan khawng a selsim den mah a ngeina a hi hi.

 

Eite in ama vaihawmna I theih pih khak ding alau zah-in khemdan siampenpa-in launa dang neilo hi. A meel seel-a a ngimna tak a picin theih zawk nadingin khembawlnate a sep ciangin amah leh amah a nuihsat huai lel banga kibawl na sanga a deih a lungkim zawk omlo hi. Amah in nuihzak huai, kihtaak huai dan-a a meel seelsim pen nop sa a, a piangsual—a lang mihing alang ganhing cih bang khawngin kibawl hen la mipil migina-a kiseh pawlkhatte bangin ama min ciamnuih bawlna, nuihzak bawlna-in zang leh zaknop a sa hi.

 

Tua pen amah in a mai a tuamna nam khat a hi hi. Mi a suksiat zawh nading (517) in mite in, “Hi bang peuh mah om thei mawk ding hiam?” khawng ci leh a thusim pen hum zo zaw hi. Laisiangtho genna pawl khat a kitel mah mah lel munte a thukawng heii thei leh biakna taangpi in sang thei zaw a, a nasep picing thei zaw hi. Tua bangin Satan in mihing lungsim uk thei a, amau phawk loh kal in a thuzawh gige na hi kha thei zel cih Pasian inetteh ding tampi hong pia hi. Ama gitloh mi khelbawlnate, a simtham galdonate I mai ah kimu-in a hong nawk gawp loh nadinga kigalginna I suak sak ding hi.

 

Eite in ih buk nading leh suahtak nading in a vanglian zaw ih Topa muta hi kei le hang Satan leh apawlte vaangpi leh mi’ etsatna in hong patau sak lua ding hi. Migilote in ei nuntakna leh ih neihsate hong lawk loh nadingin ih innte tawhbu leh kongkalhnate tawh limtak-in ih kalh thei hi. Ahih hangin a gilo vantung mite in eite hong nawk theih nading uh a zong den uh hi a, ei leh ei ki huu zo lo ihih lam pen ih phawk khol kei thei zel hi. Phal kha hi le hang ih lungsimte lakhia-in ih pumpi hong su lawi gawp-in ih neihsa leh ih nuntakna khawng te bawlzan gawp ding uh hi. Amau in tua buaina leh kisiatna te amuh uh ciang bek-in a lungdam thei uh hi. Pasian cihna nial in Satan mawh zolna mang ding in Pasian nusiatte din mun ding a lau huai mah mah hi. Ahih hangin Khrisit nungzuite pen Ama kepna sungah lungmuang hi. Vantung pan-in ahat phadiak vantung mite amaute keem dingin a kisawl hi. Pasian in A mite a cin’ sakna agilopa in nawklet zo lo hi.

 

78

 


To get the latest update of me and my works

>> <<