33. A Masa Bel Kheemna Lianpi

A Masa Bel Kheemna Lianpi

 

 

M I H I N G om cil phet-a ki pan in Satan in hong kheemna kipan pah hi. Vantung pana gal phuangkhia pa in Pasian’ Kumpina langpang huan dingin leitunga teengte zong hong zawn hi. Adam leh Eve in Pasian.

        
Thukham zuihna ah nopsakna kicing ngah uh hi. Tua banga a om laitengun, Pasian Thukham in Ama bawlsa khempeuhte’ nopsak nading teng dal in, gentheihna leh nuainetna thuakna suah hi ci-a vantunga Satan’ langpanna aman lohna uh a lak den uh ahi hi. Tham loin mawhbaang lo nupate inn dinga kipia mun nuam amuh ciangin a hazatna zong hong ultung mah mah hi. Mihingte puuk sak in, Pasian kiang pan kikhenkhia leh kei khut nuai hong tung thei ding uh hi, tua ciangin hih leitung beek ngah in, sangbelpa langpangin ka kumpigam phut leng, ci in khentat hi.

 

 

Satan in ama meel takpi leh agamtatzia dawk sak pah leh, Adam leh Eve tungah tua galpa lauhuai zia teng akihilhsa a hih manin, tha khat-in na thal sawn pah ding uh hi. Ahih hangin Satan in a tupna a tun zawh theih zawk nading in ama ngimna taktak pen sel sim-in khuamial sung ah na seem a hi hi. Ama khutzat dingin ganhing laka mitla pen leh a meel hoih peen gul sung ah kiguanga, “Pasian in, huan sunga sing khat peuh peuh ne lo ding hong ci a hi nam?” ci-in Eve a hopih hi. Piancil 3:1. Eve in mawhzolpa tawh kisel ta dih lo-in kilel sak leh suakta zaw ding hi napi, amah tawh va kinial ngam kha a, galpa deihna bangin apuuk takpi hi. Tu in zong tua bang lim mah tawh (532)mi tampi zo in apuk sak to to lai hi. Pasian sawlnate muang pah lel zo loin lung hiangin taksan lahna lungsim nei zel uh hi. Tua hangin Pasian sawlna sangin mihing thutheihte saang zaw uh ahih manin, Satan in tua mun pan in lam apialpih pah pah hi.

 

“Numei in gul kiang ah, Huan sunga sing gahte ka ne thei ding uh hi; ahih hangin Pasian in, huan lai zang-a om sing gah na ne kei ding uh hi, zong na lawng kei ding uh hi, tua bang hih le uh cin na si ding uh hi hong ci hi” a ci kik hi. “A hih hang in gul in numei kiang ah, Na si kei ding uh hi. Bang hang hiam cih leh tua singgah na nek ciangun na mitte uh ki hong dinga, a pha leh a sia thei in Pasian tawh na ki bat ding lamtak uh Pasian in thei” a hong khaam a hi hi, a ci hi. Piancil 3:2-5. Amah in Pasian tawh kibang dinga hun beisa sangin pil na saang zaw nei-in amihing hihna uh a thupi zaw mun tung ding ci in hilh hi. Eve taksangin na ki-ap a, ama thuzawh sawnna tawh Adam zong mawh sak lai hi. Amau in gul thu na um uh aa, Pasian in hih loh ding acih pen na hih uh hi. Amaute a bawlpa in dinmun sangzaw atun ding uh khaktan nadingin thu a khung bangin Pasian thukham te mukhial uh hi. Tua thukhun palsat in dinmun sangzaw ngah dingin ong lam en ta uh hi.

 

Mawhna hong bawl khit ciangin Adam in, Na nek ni mah un na si ding uh hi acih pen a khiatna a hong bang ci tel theih hiam? Satan gen bang in dimnun sang zaw tung mah-in a ki mu uh hiam? Tua bang hi leh Satan pen mihingte adingin thupha bawlpa hi takpi ding hi. Ahi zongin Pasian in tua bang in sehna nei lo hi cih Adam in a mu hi. Mawhna thaaman daan dingin a kipiansakna lei a suak kik ding in Pasian in, “nangin lei vui na hi hi, lei vui ah na ciah kik ding hi” ci hi. Piancil 3:19. Satan in bel, “Na mitte uh ki hong ding hi” a cih pen tu-a ciang bek ah a maan ding hong bang sawn sawn hi. Adam leh Eve in Pasian thu a nial uh ciangin a mit uh vaak (ciim, ki hong) mah ngei a, amaute haina mu pah uh hi. Thusia lasia thei uh a thupalsatna gau a thuak uh hi.

 

Eden huan laizang ah nuntakna singkung khat zong po a, tua sing gah in nuntakk sak tawngtungna vaang a nei hi. Adam in Pasian thu na mang paisuak hi leh hih singgah a duh duh-in (533) ne thei dinga nungta den ding ahi hi. Ahih hangin a hong mawh ciangin hih nuntakna sing gah a nek ding ki phal nawn lo a, sihna thuak ding hong hi ta hi. Pasian gen bangin “Lei...tawh hong ki piangsak a, nang in leivui na hi hi, leivui-ah na ciah kik ding hi “ cih pen in nuntakna omzia hong kawk ta hi.

 

Thu mang-in om uh hi leh a ngah ding uh-a kikamciam sa nuntak tawntung pen thukham palsatna hangin a taan uh ahi ta hi. Adam in nuntak tawntungna neilo ahih manin a suan a khakte tungah tua nuntakna pen go-gil bangin pia theilo hi. Pasian in A Tapa hong piakna tawh a puuksa mite’ bat zawh dingin nuntak tawntungna hong puak suk hi kei leh mihingte adingin lam-et a bei ta a hi hi. “Mi khempeuh mawhna leh sihtheihlohna hong puak hi.” Rom. 5:12; 2Tim. 1:10. Tua hi a, Khrist tung tawn bek-in sihtheihlohna ki ngah thei bek hong suak hi. Jesu in “Tapa a um mi in a tawntung nuntakna nei a, Tapa a um lo mi in nuntakna a mu kei ding hi” ci hi. John 3:36. Mi khempeuh in tua sawlna bang hong man’ uh leh man piak loh thupha hong nei thei ding uh a hi hi. “Lungduai takin minthanna, zahtakna leh sihtheihlohna a zong mi in a tawntung nuntakna ngah ding hi.” Rom. 2:7.

 

Sawlmang lo pi pi mah in nuntakna ngah ve-ve dingci-a Adam kiang ah a khaam pen zuaukhem makai pa bek mah a hi hi. Eden huan a Eve kiang ah, “Na si kei ding uh hi” a cih kammal pen mihing in asitheilo khaa nei hi cih zuauthu a hilh na sermon masa pen a hi hi. Hih thu akipatna pen Satan kiang pan hi a, ahih hangin tu-in Khristiante’ thuhilhna pulpit pan na ngawn-in tua zuau thu kitangko ngit nget hi. I  

nu leh I pa masate saan’ bangin mi khempeuh dektak in um-in saang uh hi. Pasian in, “A mawh mi (khaa) pen si ding hi” Ezek. 18:20 a cih kim lai, “si lo-in a tawntung nungta ve ve ding” cih sak hiau mawk uh hi.

 

Pasian gen bang um nuam lo-a Satan kamkhum, vangngaih huai kamzuau pen mite in um zaw hiau mawk uh a, lam dang ih cih ding longal, lawh theih a om kei hi.

 

Mihing in mawhna sungah apuk khit un nuntakna singgah va ne mawk leh si thei lo in, mawhna tawh nungta tawntung ding uh hi. Tua ahih manin Adam innkuan sung pana khat peuh in tua nuntakna singgah a va nek khak loh nadingun meikuang (534) namsau leh Cherubim te in “nuntakna singkung kiang paina lampi” vilin, daltan sak hi. Tua ahih ciangin a sih theihlohna anei mawhnei mi om lo hi.

 

Mawhna alut khit nangawnin mihing te in asitheilo kha khat nei lai-a, gentheihna sung tawntung gawtmunah genthei pipi in gimna thuak ding uh hi cih a um sak uh hi. Tua bang in a upsak manin Pasian pen a gilo, amah alungkim saklo te athukkikna dingin hell adenna pah pah, phulak nuam asa Pasian bang asuak sak hi.

 

Tua bangin dawi mangpa in ama pianzia teng tawh mihingte piangsakpa leh thupha apia Pa meel leh mai belmang nuh bangin a vom sak hi. Gitlohna bel Satan’ aa hi. Pasian bel ki-itna hi. A bawlsa na khempeuhte siangtho-a it huai-in lang pang lianpa in mawhna hong lut sak matengin kician in kip hi. A thangzaak tawh mihingte a mawh zol khit ciangin, a susia mihingte galpa pen Satan tek mah ahi zaw hi. Tua bangin mite man in a suksiat zawh pen kisial lai hi. Pasian vangliatna in na dal zen zen lo in, ki phal hi leh Adam suan leh khak mihing akici khempeuh a ngeen sung ah luak khin hiau ding a, khat zong suakta lo ding uh hi.

 

Thutheihna tawh akiphut Piangsakpa ukna leh a thukhunte’ thuman-na a muang zolo ding in Satan in ih nu masa le pa masa te a na zol-zol a, a khem mah bang in tu hun a mite zong tua mah tawh a khem hi. Mihingte agentheih sakna leh Pasian a langdonate uh amelh theih nadingin Pasian pen amaute sang a gilo zaw leh a suuksia zaw-in Satan leh ama thu a akhutzat mite in dawk sak ding a han ciam uh hi. Mi khem lianpa in ama gitloh gamtatnate teng pen vantunga I Pa ngawh ding a han ciam hi. A thutang lopi-a a Uk mipa khutnuai ah a maan lopi in kipia nuam lo tei tei se ka hih manin van pan nawh khiatna ka thuak pen kei’ khialhna hi mah hi, cih bang pian-in mawhsakna a dawk sak se hi. Ama nung zui le (535) uh Jehovah thukhun nuai-a thong kia banga a om tentan uh sangin awngthawl zaw, suakta zaw, leh nopsa zaw tham ding uh hi ci-in leitungte kiangah a gen hi. Tua banga khimm na tawh Pasian thu a zuihna pan-un mite a lam pial sak hi.

 

Leitung nuntak tomno sunga a bawl khak uh mawhna thaman dingin migilote in tawntung gawtmun ah, Pasian nuntak tanvei, kat leh meikuang thuak den hel ding uh hi cih phuahtawm thuhilhna pen Pasian migitna, hong itna, leh a thutangna tawh a kilehbulh mah mah ahi hi. Tua zah-a thu-leh-luan upna pen, Khristian tuam tuam tampi te in upna guikip-in nei uh a, ki nak hilh mah mah saan lai uh hi. Doctor of Divin-ity pilna nei siapa khat in a genna ah, “Hell-a thuaksiatnate a muh uh ciangin misiangtho te lungdamna khang san ding hi. A pianpih, a khanpih uh a lawmte gimna sung ah kia-a a om laitak un amaute pen ki teel khia-a hotna ngah cih a muh uh ciangin amau lungdamna kibeh lap tuam mah mah ding hi,” ci hi. A dang khat leu leu in hi bangin ci hi: “Thukkikna thuakk mite thuak hun ding thu a piak khiat ciangin, amaute thuaksiatna meikhu a tawntungin kahto dinga, thupha ngah mite in mu den ding uh hi. Tua ciangin misiangthote in Amen, Helelujah! Pasian phat un! ci ding uh hi,” ci hi.

 

Pasian laibu Laisiangtho akoi mun ah hi bangin kigelh hi mawk hiam? Hotkhiatna ngah mite in vantung a tun uh ciangin a lungsim neih ngei uh ahi, hehpih theihna, khasiat theihna, a lungsim ngei teng man suah khin ding uh a hi mawk hiam? Amaute in sia leh pha lah thei lo-a hai keei ding uh hi mawk ve maw? Ahih kei leh, vantung a tun’ uh

81

ciangin gilo-in haangsan keei ding uh hi mawk ve maw? Hih thu pen Pasian Laisiangtho hilh tawh a kituak het lopi khat ahi hi. Hih a tunga thu-leh-luan upna ahilhte in Laisiangtho thuman mun ah lungsim khelpilna leh gamtatna thu aguan sawm leitung mipil te ahi uh hiam? Tua bang mite ahi kei uh hi. Hih mite in laithei mipil leh lungsim kawi neilo ahih teeii hangun Satan khemna zom sawn-a a muut beh te a hi uh hi. Laisiangtho genna tawh ki lehbulh-a, a uang zaw a gen sak mik mek uh hi bek hi. PiangsakPa lungsim leh pianzia tak-tak hi lo zaw-in ama ngaihsut tawm tawh a muh dan a genkhia kha mawk mawk uh ahi hi. “Kei mah in a nungta Topa Pasian ka hih bang mah in mawh nei mi khat a si ka muh ciang in nuam ka sa het kei hi. A mawh gamtatna khawl in a nuntak ding ka deih hi zaw hi...Bang hangin si nuam sese na hi uh hiam? “ Topa Pasian in hong ci zaw hi. Ezek. 33:11

 

Tawntung gawtmunah tawlnga lo-a gimna thuakte a muh muh ciangin Pasian in muh nopsa hi ci-a (536) upna ih neih manin Pasian adingin bang phat-tuamna om mawk ahi hiam? Thum thum, tau tau-a kap-a awng keek A bawlsa te Hell meikuang sungaa A hencipna manin Pasian kipahtawi tuam ding ahi hiam? Mong neilo itna nei Pasian bil ah cimawh-a kahna awte in bangci bang in langaih kisa bang hi thei ding hiam? Mi mawhte gim thuakna in a tawntungin tawp hun nei lo hi cih thu pen van leh lei bup a siatsuah mawhna Pasian in a mudah zia lahnopna in alet uh hangin, Pasian gensiatna hi zaw lel hi! Tua bang hi mawk leh Pasian in mawhna mudah lo in mu den nuam zaw cihna hi zaw mawk ding hi! Hehpihna om lo, gimbawlna kizomsuak den hi cih a hilh Theol-ogy laisiamte hilhna thu in mite hai sak in, heh uh suak in Pasian gensia zaw ding uh hi. Thamlo in a khialhna vangikpi pan suahtak sak sangin kidiahcip sak zaw ding uh hi. Tua bang upna hangin, khang tawntungin, mawhna kibehlap zaw-a, Pasian min adai sak a suak zaw hi.

 

 

Tawntung gawtmun-ah daanthuak ding cih upkhialhna pen bang zah-a haksa gimna hi ding hiam cih mihing ngaihsutna in baan zo lo hi. Itna, migitna, leh hoihna namkim anei, Laisiangtho hilh biakna man teng pen upmawh motphuah thu teng leh akihtak huai thu tengin tuamcip in lauhuai suah sak hi. Migi-a it huai meel apua kim lai, Satan in ahi lopi a Topa’ meel a zutvom ngaihsun in Topa pen kihtaak muh pah in, alau huai, a muhdah huai-in I mu kha thei pah mawk kha nam? Pulpit pana thuhilhnate hangin Pasian pen sahang kihtaak-a kihtakna lungsim in leitung bup zel hi. Tua in mi a tul then tampite’ lungsim sungah Pasian muanlahna leh uplahna a piang sak hi. Tawntung gawtmun daan thuakna thu pen Babylon in mi khem peuh a dawnsak upkhialhna leenggahzu nam khat a hi hi. Mang. 14:8; 17:2. Khrist naseemte in hih upkhialhna len-in siangtho pulpitte pan a tangko khak mawk ding uh a dah huai pi khat a hi hi. Tua thu pen Rome te kiang pan a Sabbath maan lo aluah suk mah bangin a ki ngah khawm a hi hi. Man tak in gen le’ng, ei ngah bang khuavak amaute in ngah nai lo uh ahih manin, ulian pipi leh migina pi-pi te mah in zong tua thu hilh mawk uh hi. Hih tawh kisai in amau hun-a khuavak bangin sep ding nei uh a, ei zong ei hun-a khuavak bangin hong ki saang ding ahi hi. Eite in ei hun-a ih muh Pasian thumaan khuavaak nusia in, thuman amu nailo I pate hilh pau-lap in thukhial pen va lehsaan kik le’ng Babylon’ mawhna leenggahzu teng (537) a va dawn pihte I suak ding hi.

 

Tawntung gawtmunah daan thuak ding cih thu a um lo-a mihon pawl khat a om hi. Tuate in Laisiangtho sung ah Pasian pen ki-itna leh migitna tawh kidim ci ahih manin A bawlsate tawntung meikuang sung ah khul ding hi cih pen um thei lo uh hi. Ahih hangin mihing in asitheilo pianpih khaa nei hi cih upna nei uh ahih ciangin, atawpna ah mi khempeuh in hotna ngah ding hi, ci-in um leu-leu zel uh hi. Laisiangtho hong taainate pen mihingte thu mang le uh deihna-a hong khalau sakna bek hi-a, a gen bang lian lian-a hong tung takpi ding hi lo hi, ci-in ngaihsun uh hi. Tua bangin mawhneimi in ama nopsak bangin gamta in Pasian deih ngetnate awlmawh lo in a om hangin, a tawpna ah Pasian’ pahtaakte suak ve ve ding uh hi ci-in lam en uh hi. Tua bang upna in Pasian migitna bek suang-in A thutan(g)na don lo ahih manin migilote amawh bawlna uh ah a leii-haang sak leu leu uh hi.  

Leitung buppi in Pasian in hotkhiatna ngahsak ding hi cih upna anei mi pawlkhat om hi. Tuate in amau’ gupna a siasak ding upna alet nadingun Laisiangtho mun pawlkhat a siksan uh hi. Tua Laisiangtho mah tawh amau gen thute akhialhna lak kik-a hilhcian ding a hi hi. Biakna meel neilo khangno khat tuahsia-in si-a a kivui ciangin, leitung bup-in hotkhiat ngah ngawn ding cih upna a hilh siapa khat in a Laisiangtho siksan dingin David genna mun khat teel in, “Amnon si khin a muh ciangin a lung nuam hi” (2 Samuel 13:39) cih thu a sim hi.

 

Hih thugenpa in, “zu kham-a si peuh, khut khialhna sisan baang a sawp lo-a si peuh, leh mawhna nei-a a si, hih khangnopa banga, biakna a nei ngei se khol lo te khawng asih teh bang a ci ding uh hiam cih hong ki dong thi the hi. Laisiangtho in tua dotna a dawn kik nate lungkim huai mah mah lel hi. Amnon pen a sih laitak in mawhna tawh aki dim mi hi-a, zong ki sik bek lo-in, zu ki tulhkham in, a kham laitak-a ki that ahi hi. David pen Pasian kamsang ahi hi. Hong tung ding leitung ah Amnon in gupna ngah ding maw, ngahlo ding cih thei peuh mah ding hi. A lung sim sunga om thu bang teng pulak khia ahi hiam? ‘Tua ciangin kumpipa in Absalom ngai-in hong mah mah hi; bang hang hiam cih leh amah si hi, ci-in thei khin ahih manin Amnon thu-ah kiheh nem hi “ (2 Samuel 13:39).

 

(538) “Hih kam kipau sung pan bang I mu khia thei hiam? Si lah silo hing lah hinglo in gawtmun ah tawntung hell thuak ding hilhna kihel lo hi lo hiam? I tua ci muh hi; hih mun in a lungkim huai mah mah nopsak nading leh kilem in leitungbup ong zel ding ahihna thu ong mu sak hi. Atapa asi amuh ciang in amah bang hang in lung nuam zaw sop hiam? A tapa in hong tung ding zia-etna khempeuh leh mawhna kolpan suakta in, siatna tawh a ki pelh ban ah, minthanna leh sianthona ngah in, van mihonte lak ah ki tual-bual sak ta hi cih kamsang mit tang tawh a muh ciang in amah aki hehnem zo ahi hi. A tapa in mawhna adim pumpi pan suakta in Khasiangtho tawh a kidim khit ciangin lungsim sung khuamial teng theng in aki sia theinawnlo itna leh sianthona tawh van nunnuam luah khin hi cih thu in a mah a lung nuam sak pen hi. “Hih thu teng hangin vantung hotkhiatna ah hih nuntak sunga ei sepsa I suan’ ding om lo hi; tu mah mah-a I lungsim kikhelna peuh, I upna leh I biakna peuh pau lap ding piang thei lo hi,” ci in a gen hi.

 

Khrist’ nasem a kici pa in Eden-a gul’ gen thu zuau, “Na si takpi kei ding uh hi... Na nek ni-un na mit uh hong vaak dinga pasiante na bang ding uh hi” a cih pen mah a gen kik kik a hi hi. Mi that, guta, khuaval-a mawhnei a suukpen nangawn zong a sih nung ciangin lungnop tawntungna a lut ding a hi ve ve hi, ci hi.

 

Laisiangtho hi banga alumlet gawppa in bang siksan ahi ding hiam? David in Pasian vaihawmna a muan na thu a gen kammal kimlai siksan dinga ala hi lel zen hi. ‘Tua ciangin kumpipa in Absalom ngai-in hong mah mah hi; bang hang hiam cih leh amah si hi, ci-in thei khin ahih manin Amnon thu-ah kiheh nem hi ‘ (539) A khasiat luatna pen a hong sawt ciangin hong thuak nop zaw deuh-in a si sa ngaihsun sun nawn loin a hing lai pen hong ngaih sun zaw a, a thusia-bawl athuak lawh ding a lau man-a a taai khia pen a phawk hi. A sanggamnu tunga paktat, zu kham Amnon pen a sih phet-in lungnop na mun ah ki puak pah hi, tua mun ah mawhpeng van mite tawh kithuah thei dingin kisiansuah in ki puah siang zo hi!, a cih ciangin, zak nop nong a, mihing lunggulh theih te nam hi lua zen a, zong ki um tek peuh mah. A hi zongin hih pen Satan’ hilh thugui upna ahi hi. Hih bang mah hang in siatna a khang hi hoh lo ding a hia?

 

Hih zuau gen Siapa khat’ hilh dan pan in mi dang tampite hilh dan zong ki mu theih pah hi. Laisiangtho kammal khat lak lak in, (aki tua cihna tampi om hi) a cih nop pen tawh kilehbulh a khiatna la thei tek uh hi. Tua bangin a kizom lopipi te Pasian thu a hi lo doctrince hilhna-in zang mawk uh hi. Zu kham Amnon vantung ah om hi cih pen deih kaih a bulh tawm hi lel a, Laisiangtho in zukhamte Pasian gam sung tung lo ding a cih sit set tawh a ki lehbulh a hilhna a hi hi. A umlahte, thu umlote, leh biakna thumungphuh a saang zolote in tua bangin thumaan pen zuauthu suah uh hi. Amau thukhel-pilna in mi a honpipi-in khimm-in ihmu cip sak hi.

 

Mihingte a sih phet-in akhaa vantungah tung pah takpi ahih mawk taak in hin sangin sih I ut zaw mah kei ding maw. Lungkham, cihmawh, lungkiat ciangin a ngot hinna khau bottat ziau-a kumtawn nun nopna mun zuan in leen toh mah zong baih zaw lel mah ding hi. Nuntakna sangin sih baih hoih zaw cih tua upna a pom man-un mitampi tak in tua ding in hanciam uh hi.

 

Pasian in A Thukham palsat te daan pia ding cih pen ama kammal Laisiangtho sungah tel tak-in a gen sa ahi hi. Pasian pen migi mah mah-a mawhneite tung ah athutangna zangin thukhen ding ahi kei hi ci-in phuahtawm mawk upna nei in, amau leh amau aki pah tawi tawmte in (540) Kalvary Singlamteh a et ding a kisam a hi hi. Tua hi leh, mawhbaang lo Pasian Tapa sihna in Pasian thukhaam palsatte thuk kikna ahi “mawhna thaman in sihna hi,” cih thu a tangtunna tecii ahih zia amu ding uh hi. Mihingte adingin mawhneilo Khrist pen mawhna bangin hong kibawl hi. Amah in palsatna thaman teng pua in, a pa maitang pan ki liah-a, lungsim kitamkham-in a nuntakna ki meek lum hi. Tua in mawhneite suahtakna dinga a thuaksiat kithoihna a hi hi. A hangin, mawhna daan pan-in mihingte suakta-a a kikhahkhiat theih nading lampi dang omlo ahih man a hi hi. Tua a kipia hotkhiatna a nial mi peuhmah in a palsat mawhna daan pen ama pumpi mah tawh a thuak kik ding ahi hi.

A ki sik nuam lo, a hoih gamta nuam lo mite nangawn in vantungah gupna ngah ve-ve ding hi cih upna alen, leitungbup gupna ngah dinga aseh te hilh zia Laisiangtho tawh ih enkak lai ding hi.

 

“Tui duh mite nuntakna ciktui man nei loin ka pia ding hi”, Mang. 21: 6, 7 ci hi. Hih a khapna pen a dangtaak mi teng bek tunga a khap ahi hi. Hih nuntakna tui lunggulh manin na dang teng a nusia ngam teng bek mah kipia ding ahi hi. “A zomi in hih nate luah in, kei in ama Pasian ka hi dinga, amah in ka ta ahi ding hi” ci hi. Mang. 21:6,7. Hih mun ah zong na khempeuh luah theih nadingin a mihingte in ih mawhnate a nial in, a zo mi I hih ding akisam ahi lam tak ong lak hi.

 

Topa in kamsangpa Isaiah a et sak na ah, “Amaute tungah thu hoih ding hi, ci-in thuman mite kiangah gen un, bang hang hiam cih leh amaute in amau gamtatna hih a gah ne ding uh hi. Migilo in gimna ngah ta hen!Ama khut in ahihsate ama tung mah ah thukkik ding ahih manin ama tungah thu sia ding hi.” Isa. 3:10,11. “Mawhnei khat in za vei dong siatna bawl napi-in, a khan’ sau veve hi. Ahi zongin, ‘Pasian a zahtakte’ adingin, thukhempeuh nuam dinga,..migilo ahih leh nuamsa lo ding hi.” Thuhilhsia 8:12, 13. Paul in, “Mawhnei mi in Pasian in thu mantaka a khen ni, mi khempeuh amau gamtatna ciat bang a athuk kik ni, hehna kilat ni ciang adingin amau mah tunga kibuak kik ding hehna a khol khol uh ahi hi...a gamtatsia mi khem peuh in gimna leh lungkhamna thuak ding uh hi.” Rom. 2:5, 6, 9.

 

(541) “Numei tawh akhial mi ahi zongin, mi kihhuai mi ahi zongin, milim bia mi ahi huaiham mi khat beek in Khris leh Pasian’ gam sungah luahna a ngah kei ding hi ci-in na thei uh hi.” Efesa 5:5. “Mi khempeuh tawh kileminnopsakna ahi zongin, a siangtho gamtatna ahi zongin na phak matengun delh un. Tua siangtho gamtatna a om kei leh, kuamah in Pasian amu thei kei ding hi.” Heb. 12:14. “Nuntakna singkung neih theih nading le kongpite tawn-a khuapi sunga lut nading thu neih thei nadinga puantual uh a sawpsiangte thupha ngah ahi uh hi. Apua lamah ahi leh, uite, dawi-ai tawite, numei le pasal paktatte, tualthatte, milim biate, le zuauphuak nuamsa a, zuauthu gente peuhmah a om ding uh hi.” Mang. 22:14, 15.(ZIV).

 

Pasian in Ama gamtatzia leh mawhnate bang ci lampi tawh len hiam cih mihingte theih dingin a lak hi. “Topa Pasian mite-in hehpihna nei-in a dik Pasian, lungduai-in itna kip leh thutakn tawh adim, mi tul tampite adingin itna kip anei, mawhna, thu palsatna leh khialhna mai sakin,

 

82

ahih hangin bangbang hita leh mawhna a siangsak ngei lo,” Paikhiatna 34: 6, 7. “Amah in gilo mi susia ding hi.” A palsat mite kisia hon ding hi. Mi gilote kibeimang sak ding hi.” Late 145:20; 37:28. Pasian in a Kumpi vanglian tawh langdona teng beisak ding hi. Ahih hangin Pasian pen migitna, lungduaina leh thupha piaPa ahihna a dawk sak ban ah thukkikna ah zong thutang mah mah ahihna kilangsak ding hi.

 

Pasian in mite’ utna leh khentatna te ah zawh thawh thu zang tei tei lo hi. Amah in aana lel-a sila banga sawl manna lel pen a deih ahi kei hi. Ithuai ahih manin a piansak mihingte in Amah it thuk leh a deih hi bek hi. Amah pilna tawh dima, thutang leh cingh ahihna phawk-in Ama thu mang le uh a deih ahi hi. Thute a tangtaka saang thei mi in Ama hong bawlna phat huai ahihna mu-in Amah it ding uh hi.

 

 

Khrist in eite etteh dinga migitna, itna, thusiamna hong hilhte pen Pasian deihna leh Ama omzia a hong lahna a hi hi. Khrist in A Pa kiang pana a ngah thu ahilo thu dang dang bang mah a hong hilh ngei lo hi. Pasian ukna zia ahi thukhunbulpi khempeuhte in “Na galte na it in:” a cih Honpa thupiak pen tawh kithuhual sisek a hi hi. Pasian in migilote tunga a thukhennate pen thukhenna thuakte leh van leh lei buppi ading in phattuam zawk nading vive a hi hi. Ama gamtatna ah thutangna leh A Ukna thukham bangin om le uh nopsakna a pia ding ahi hi. Pasian in amaute a itna mutheih ding nate vive tawh kiim uum hi. A thukhun te a theih nading un zong hun pha pia-in Ama (542)migitna tawh zong a nungzuih hi. Ahih hangin amaute in Pasian itna te simmawh-in A thukhamte peel uha, A migitnate a nolh uh hi. Ama thuphate saang niloh napi-in apiaPa a zahtak kei uh hi. A mawhnate uh kih huai sa hi cih thei uh ahih manin Pasian a mudah zaw mawk uh hi. Topa in amau palauhnate a thuak thuak hi. Ahih hangin a tawpna ah amaute masuan uh a kikhentat nading thukhen hun hong tung ding hi. Tua hun ciangin hih langpangte Pasian in Ama lam mah ah a leen ten tan ding hiam? Ahih kei leh, Ama deihna bang seem tei-tei dingin Pasian in zawh thawh bawl-in a sawl lai ding hiam?  

Amau makai ding-in Satan teel-a tua’ ukna sunga a om mite in Pasian kiang zuan dingin ki pan nuam lo uh hi. Kisaktheihna, zuautheihna, huukna lanna, gitlohnate tawh a gamta uh hi. Leitung a a sim mawh luat uh mite tawh a tawntung a teeng khawm dingin vantung ah lut khawm nuam mawk ding uh hiam? Thumaan pen zuauphuahna tawh kilem thei ngei lo dinga, lungneemna in kiphatsakna leh kiliatsaknate lungkimsak zo lo mawk ding hi. Sianthona zong a niin mite in sang zo lo ding uh hi. Angsung bek akhual te adingin angsungthu nusia a midang khual ding lawp thei lo ding uh hi. Angsung ading leh leitung bek a lungulh mite nop sak na khat beek vantungah om lo hi.Pasian langpanna in anuntakna azang mite vantung ki puak in, van nunzia va mu leh, lungnopna, itna, Pasian Tuuno phatna la asa mite leh, tokhom tunga tupa vaangtang aleng maitangte tawh Pasian leh thuman a langdona lungsim vom niloh te, a ava gualnuam thei mawk ding uh hiam? Vantung mihon lak ah va bual-in tua late a va sak pik theih pah ngap khol ding uh hiam? Amau in Pasian leh Tuuno minthanna thuak zo mawk ding uh ahi hiam? Thuak zolo ding uh hi. Amaute in vantung omzia leh luhin zia te ah nuamsa in a zongsat theih nadingun hun saupi kipia napi a lungsim uh leh a kampaute uh vantung’ deih bangin sek nuam ngei lo uh (543)a hih man un, tu-in bel a ze kai lua zota ahi hi. Pasian langdote nuntakna vantung tawh kilawm kituak zo lo hi. Vantung sianthona, citakna, lungmuannate pen amaute adingin gawtbawlna bang hi ding hi. Pasian vangliatna pen amaute a haltum ding meikuang bang hi ding hi. Tua ahih manin amaute in tua sianthona munpanin manlaangin a taimang pak nuam zaw ding uh hi. Mai mang pak zaw in Honpa maitang pan kiselmang pak zaw le uh a ut ding uh hi. Mi gilote beina a mong in amau mah teel ahi zaw hi. Pasian pen thumaan in hehpihna tawh dim hi napi, vantunga a lut loh uh zong amau deih zawk-a a teel uh a hi hi.

 

Tua nilian ni-a meikuang in tui tampi vunga alet ziah ziah bangin Pasian thumaanna lak ding hi. Ahih hangin migilote ki huu zolo ding uh hi. Ahangin Topa sung ah buk nading mun a nei kei uh hi. Amaute ut bangin langpang khin zo uh a, a lungsim uh aleh lam panga kheel vat nadingin nuntkna bei ta a, zong ahun om nawn lo hi. Palsatna pan sawlmanna, muhdahna pan ki-itna ah kheel nading ahun zekai khin ta hi.

 

Tualthatpa Kain pen nuntakna hun kipia lai tadih hi. Mawhneite a ki hin khawi lai ciangin kamkaih vawh lo-a khahkhong mawk bangin a gamhtatzia uh leitung buppi in a muh nading deihna in Pasian in hun apiak lai ahi hi. Kain-ii lamkaihna tawh ama suan leh khak mi honpi in mawhna sung ah hong lut uh hi. “Leitung mihing’ gitlohna aliatna leh mihing lungsim ngaihsutna peuh mah asia ahih ngitngetna thu Topa in mu hi.” “Tu in Pasian’ muhna ah leitung sia a, leitung in ngongtatna tawh ki dim hi. “ Piancil 6:5,11. Pasian in leitung a khua ngaih luat manin Noah khangin migilote na zung bawh in, Sodom-a mi gilo te susia hi. Satan khemna hangin gitloh nasem te in khuatuahna leh pahtakna ngah uh hi. Tua hang in langpang ding in midangte ama kaih uh ahi hi. Kain hun leh Noah hun in tua bangin a kalsuan uh mah bangin tu hun in zong a kalsuan uh hi. Khuavan-nuai akhuangaih luat manin Pasian in ama hehpihna a nolhte a susia cip ding a hi zaw hi.

 

“Mawhna thaman in sihna ahi hi. Ahih hangin eite Topa Khris Jesu hanga nuntak tawntungna in man kipia lo Pasian’ letsong ahi hi.” Rom 6:23. (544) Midikte in nuntakna a ngah ding uh a, mi gilote in sihna ngah ding uh hi. Moses in Israelte tung ah, “Na teel ding un note mai-ah nuntakna leh a hoih na, sihna leh siatna ka koih khin zo hi” na ci hi. Thuhilhkikna 30:15. Hih sihna pen Adam tunga kigen sihna pen hi lo-in mawhneite thuak ding thupalsatna thaman sihna daan pen a hi hi. Nuntak tawntungnatawh aki leh bulh Laisiangtho’ gen “nihna sihna” pen a hi hi.

 

Adam mawhna hangin mihing akici khempeuh sihna in nawk-a, hansung tung ciat uh hi. Hotkhiat-kikna ki vaihawm ahih manin amaute han pan in ki lakhia kik ding hi. “Midik leh midiklote khempeuh in sihna pan ahing kik ding hi.” Sawltak 24:15. Adam sungah mi khempeuh asih uh mah bangin Khrist sungah mi khempeuh a nungta uh hi.”

 

1 Kor. 15:22. A hong thokik pawl nihte kikhen dinguh hi. “Hansunga om khempeuhte in Ama aw za uh a, a hong pusuah hun uh hong tung ding hi. Gamtat pha a bawlte in nuntakna ngah dingin hong thokik ding uh a; a gilo gamtatna a bawlte in thukhenna thuak dingin hong thokik ding uh hi.” Johan 5:28, 29. Nuntakna ngah dinga hong thote pen “Thamcing” cihna ngah uh hi a, “thupha saang, a siangthote” a hi uh hi. “Tua mite tungah nihna sihna in neukha beek uk kha lo ding hi.” Mang. 20:6. Ahih hangin kisik kikna leh upna a neilo mite in maisakna ngah lo in, a palsatna thaman uh saang ding uh hi., — “Mawhna thaman in sihna ahi hi.” Amaute daan thuakna kibang kimlo dinga, ahun sawtna leh anasiatna kilamdang tek ding hi. “A gamtatna bang” ciat uh hi ding hi. A tawpna ah bel nihna sihna mah hi ve ve ding hi. Pasian in Ama migitna leh thutangna in mawhneite a mawhbaangpi mah in saang thei lo ahih man-in, Thamcinglo hi, cih a ngahte pen a mawhna tawh beikhawm sak hi. Kha Siangtho humopna tawh a kigelh lai sungah, “Tawl khat sung in mi gilopa om nawn lo dinga, ama omna mun na lim zon’ hangin, tua lai-ah amah na om lo ding” a, “...a piang ngeilo mah a bang ding uh hi.” ci hi. Late 37:10; Obediah 16. A min uh beitaa-in lam et om nawn lo, atawntunga kimangngilh ding a hi ta ding uh hi.

 

(545) Mawhna pen ama piansak gimna le siatna teng tawh tua bangin bei khawm hi. Laphuakpa in, “Mi namte na tai a, mi gilote na susia hi; a tawntunga mangthang dingin amau min na phiat hi. Siat denna sungah galte bei mang hi” ci hi. Late 9:5, 6. Mangmuhna sung ah Johan in atawntung hun ding na mu khol hi. Van leh lei vekpi in aw kihual in phatna lapi sa uh hi. Tua lapi sakna ah a kituk kalh sak ding aw-thelno khat nangawn omlo hi. Van leh lei-a mi om khempeuh in Pasian minthanna a pahtawina uh kiza ta hi. Mang. 5:13. Tua hun ciangin gim thuak-a kithasaan van van peuh leh, Pasian gensia-a ki ko ko aw cih bang kiza nawn lo ding hi. Tawntung Hell sung pana thuaksiate kahna otkeekna aw-gingte peuh hotkhiat mite phatna lapi aw-gingte tawh kiza khawm khawm den cih bang om lo ding hi.

 

Tawntung gawtmun, mihing in sih ciangin a khua thei khaa nei hi cih upna, pen Pianpih in a sihtheihlo khaa khat mihing in nei hi cih lampial upna pan-a hong piang a hi hi. A tawntung gawtmun ah daan thuakin kap kap hi ci-a upna pen Laisiangatho hilhna tawh aki lehbulh, mihing upmawh phuah tawm mawk a hi hi. Mi tampite upna bangin, vantunga hotkhiatna ngahsate in a nusiat alawm hinglaite uh tawh hong kithuza thei in, leitung thu hong sailai thei uh hi cih upna nei uh hi. Tua bang in asisate in, hotna ah nopsa ding hi hial mah ta leh a hinglaite buaina teng mu den ding uh a, tua vai tawh lung himawh ding uh hi. Mawhna a bawl beh beh lai khawngte thei uh hen la dahna cihmawhna a thuakte, a lungkham nate khawng uh, mu den mawk le uh, abang zong nopsak om thei mawk ding hiam? A lawmte uh vil-a a lung hi mawh dente in vantung nopsakna bang lemlawh man ding uh a hi hiam? A kisik kik lo mimawhte bang, a pumpi pan a huu nu nung pen a bei lian leh thakhat-in meikuang ah a khaa kikhul pah hi ci-a up ngiau mawk pen a lian mah mah langpanna hi mawk lo maw! Hotna ngah mi khat in a it a lawmte khat kiging lo sa-in han ah lut a a khaa pen tawntung gimna ah kikhul pah cih mu mawk leh, naa sak pih ngel mawk lo ding hiam! Tua upna maan lo ah mi tampi kihawl lut hiau mawk uh a, a hai lawh uh hi.

 

Laisiangtho in hi thu bangci gen ahi hiam? David in Mihing a sih ciangin bang mah phawk thei nawn lo hi cih a genna ah, “A husan’na a bei ciangin amah lei-ah ciah kik a, tua ni mah in ama ngaihsutnate beita hi” ci hi. Late 146:4. Solomon in zong tua bang mah in, “A hing laite in a si ding ahih lam uh thei thei uh a, a site in bang mah thei (546)nawnlo uh hi” “amau adingin itna, muhdahna, hanciamna cihte om nawnlo a, leitunga om nate, khat beek thei kha kik nawn lo ding uh hi” ci hi. Thuhilhsia 9:5, 6, 10. Hezekiah in a thu ngetna ngah in a nuntakna kum 15 a ki khan sak ciangin amah lungdam in Pasian migitna a la a phuahna ah, “Sihna ah nangmah phawk theihna omlo ahih manin, leinuai pan in kua in nang hong phat thei ding hiam? “Leinuai-a om mite in nang tungah lungdamna hong ko thei lo a, asite in nang hong phat thei lo uh hi; gum sunga a pai sukte in nangma thumanna hong muang theilo uh hi. Tu ni a keima bawl bangin, a hing mi bekin nang tungah lungdamn hong ko thei hi” ci hi. Isaiah 38: 18, 19. Mi tampite upna hilhnate ah, midik asite in vantung ah lut pah uh a, a muatthei nawnlo leii tawh Pasian phat uh hi, ci uh hi. Ahih hangin Hezekiah in sihna ah tua bang muatheihlohna a nei minthanna mu thei lo hi. Laphuakpa in teci a pan pih na hi: “Sihna ah Nang hong kiphawk thei nawn lo a, han panin kua in Na tungah lungdam thei nawn ding hiam?” “Misite ahi a, gamdaihna sung a pai peuh peuh in ahi zongin Topa phat nawn lo uh hi.” ci hi. Late 6:5; 115:17.

 

Peter in Pentecost ni-in pupi David “si a, ki vuina han in tu ni dongin eite kiang ah a om hi.” “David in vantung ah a kahto kei hi” ci hi. Sawltak 2:29, 32. David zong a hansunga thawhkik ni ngaka a om lai pen in midikte a sih phet leh van ah kah pah lo ahihna hong lak hi. Thawhkiknathu a om man leh Khrist a thawhkikna hang bek mah in David zong tho kik dinga, a tawpna ah Pasian ziat lam ah tu thei ding hi phing zaw hi.

 

Paul in: “Misite a tho kik lo hi leh, Khrist zong a tho kik kei ding hi. Khrist tho kik lo hi leh, na upna uh a mawkna ahi hi; mawhna khialhna sungah a om lai na hi uh hi.” 1 Kor. 15:16-18, ci hi. Kum tul li bang midikte a sih phet in vantung na tung pah pah uh hi leh bang hangin Paul in Thawhkikna om lo hi leh, “Khrist thu um-a site in kisiatna ah tung zo uh hi” ci lai lai mawk ding hiam? Tua bang (547) hi leh thawhkikna zong a kul nawn lo ding hi zaw mawk ding hi.

 

A kithat Tyndale in misite omzia a genna ah: “Khrist leh Pasian vantung mite tawh minthang tak-in maang khawm ta ding uh hi cih pen ka um kei hi. Ka upna thubulpi lak ah zong ka hel thei kei hi. Tua bang hi mawkk leh pumpi thawhkikna I hilh thute a mawkna suak ding a hi hi” ci hi. Tyndale, Wm., Preface to “ New Testament” (ed. 1534). Re-printed in “British Reformers - Tindal, Frith, Arnes,” p. 349 (ed. 1830).

 

Sih phet in tawntung nuntakna ki ngah pah hi cih upna pen nial theih loh zah ding dongin ki zel mah mah ahih man in Laisiangtho sunga thawhkikna thu nangawn kitel muhsak thei nawn lo hi. Hih vai Dr. Adam Clark in a genna ah, “Thawhkikna thu tu hun sangin Khristian masate lak ah a ki nakk gen zaw hi! A bangci dan hiam? Sawltakte in tua thu hilh den uh a, Pasian a umte kizen ding, sawl mang ding, maitai ding ci uh hi. Amau a zomto tulaii mite in tua bang meel gen nawn lo mai uh hi! Sawltakte’n hilh in, Khristian masa te’n a up uh hi. Ei zong hilh in, I hilh a za te in zong um uh. Gospel sung ah tua thu zah-a kitel hilh dang khat zong om lo hi. Tu hun thuhilhna ah tua zah-a ki thusimlo upna thugui dang om lo hi!” ci hi. –( Commentary on the New Testa-ment, Vol. II, general comments on 1 Corinthians 15, par. 3.)

 

Hih thu in Khristiante lak ah thawhkikna thu mialsak hi. Thumaan mu sak zo nawn lo hi. Biakna makai khat in 1 Thess. 4:13-18 sunga Paul kammalte abehlapsak-a agelhna khat ah, “ Ki hehnepna khem peuh lak ah, Topa nihveina a hong pai ciangin midikte in sihtheih nawn lohna ngah pan ding hi cih ving veng pen ka lung kim zawh loh khat ahi hi. Sih ciangin a si pen adingin Topa hong pai hi pah lel hi. Tua pen mah ih ngah ih vil thu a hi hi. Misite in minthanna ngah khin uh hi. Amau in amaute thu kikhen nadingin thukhenna pengkul tum ging ngak nawn lo uh hi” ci ngiau hi.

 

Ahih hangin Jesu in a nungzuite a nusiat ding lai-in asi masa peuh in Ama kiang hong (548) zuan pah dingin gen lo hi. “Kei pai in note om nading uh ka bawlding hi,” “Pai-in na om nading uh mun ka bawl leh ka hong paii kik dinga ka omna ah na om theih nadingun ka hong la ding hi” ci phing zaw hi. Johan 14:2, 3. Paul hong hilhna ah, “Topa mah mah vantung pan aw ngaihpi tawh hong kumsuk dinga, vantung mi makaipa aw tawh, Pasian pengkul aw tawh, hong tuak suk ding hi. Tua ciangin Khrist um-a a si mite hong tho masa in, a hinglai eite tawh meii tung ah puak toh khawmna ih ngah ding hi. Huih lak ah Topa va dawn-in Topa tawh I om khawm tawntung ta ding hi.” “Hih thu tawh khat leh khat na kihehnem un” ci hi. 1Thess. 4:16-18. Hih hehnemna leh den-a ih gen Universalist siapa genna bang zah in ki leh bulh hiam! Misi pen bang zah-in mawhnanei hi ta leh a sih phet in vantung mite lak ah lut pah ding hi ci in hehnemna khat in a hilh hi. Paul in bel, Topa hong pai ciangin Khrist thu um misisate kolbulhna pan kiphelkhia-in nuntak tawntungna ngah dingin han pan tho kik ding hi, ci zaw hi.

 

Mi khempeuh in thupha inn sung a lut ma-un ama vai khempeuh kisit tel phot dinga, ama gamtatnate avek-in Pasian mai ah kilak phot ding hi. Mi vekpi laibu sunga kigelh bangin thu kikhensak phot dinga, a gamtat na uh tawh ki tuak in thaman saang ding uh hi. Tua thukhenna pen sih ciangin kinei hi lo hi. Paul kammal ciamteh in: “Bang hang hiam na cih uh leh, amah in a koihpa tawh leitung mite thuman tawh thukhen na ding ni a gen khol zo hi. Tua pa sihna pan ahin’ kik ciangin a kitel zo hi ci in mi khempeuh a theisak zo hi. “ Sawltak 17:31. Hih laitak ah sawltakpa in leitung te thu khen ding ni khat ki seh khia khin zo a, tua pen mai lam hun hi lai hi, cih thu teltakin agen hi.

 

Jude in hih hun mah a genna ah: “Tua ciangin, a thuneihna kemcing lo a, a inn uh a taisan vansawltakte khuamial sungah khumcipin nithupi Ni a thukhen dingin tawntung sikkhainiang tawh a khih hi.” ci hi. Enoch genna-sa man in a gen sawn lai na ah, “En un Topa, a misiangthote tul mun tul tampi tawh hong pai in, mikhempeuh tungah thu khen ding” ci hi. Jude 6, 14, 15(ZIV). Johan in zong, “Tua laitakin a si mi a neu a liante in tua kumpi tokhom mai-ah dinga om uh ka mu hi. Laibute zong kiphen uh hi...Tua a sim mite in a gamtatnate bang laibu sungah a kigelh mah bangin thukhenna a thuak uh hi” ci hi. Mang. 20:12. (549) Misisate in vantung nopna ngah khin in, mawhnei asi mite gawtmun Hell atung khin uh hi mawk leh mai lam ah thu khen lai lai ding bangci kul nawn mawk ding ahi hiam? Hih thu tawh kisai Laisiangtho Pasian kammal hilhna ah akicianlo leh a ki leh bulh dingin bangmah omlo in, mi khempeuh teltheih dingin siangtak in hong hilh tel zaw hi. Lungsim kician nei te adingin tulai thu hilhnate pen thumaan leh ciimna hi ih ci ngam pah mawk ding hiam? Midik te bang hoh amaute gamtatna teng kidawptel siang phot a thu a ki khen khitciangin, “Thuman midiktat naseempa aw, a pha hi... Na topa tawh lungdam khawm in.” (Matt. 25:21, 41) a ci ding hi mawk ahih manin, Ama kianga sawt veipi a teeng khinsa mah tua a ci ngau ngau ve ve ding suak ve! Migilote ta leu leu, daan thuakna mun tungin a thuak thuak khinsa ngawn pen, thu khenna ah samkhia kik phot-in, “Ciamsiatna athuak mite aw, dawimangpa leh ama nungzuite ading a ki bawl mei kuang tawntung sungah kei kiang pan in pai khia un” ci pha kik leu leu ding suakk ve! Matt. 25: 21, 41. Ah! zaw zen aw. Mulkim huai, zum huai mawk lo ding maw! Pasian pilna leh thutangna nopneh lua mah si hang maw!

 

Hih khaa sitheihlo cih upna pen Rome pana ki ngah upna lampialna khat ahi hi. Tua pen lawki upna pana hong kila to, Khristian upna sunga hong lut upna a hi hi. Martin Luther in tua thu pen” Rome te gitlohna thukhun-ii tawphah phuahtawm sikha tangthu” hi ci-in gen hi. Misite in bang mah thei lo hi ci-a Solomon in Thuhilhsia laibu sungah a cih thu pen Puahphapa in, “Misite in bang mah phawk lo uh hi. Panmun zong nei lo, pilna leh theihna nei lo, ciimna nei lo-a omna mun ahi hi. Misite in ihmu hi. Bang mah phawk lo hi Solomon in ci hi. Misite lumcip uh a, kum leh ni zong sim lo tuat thei lo uh hi. A thawhkik uh ciangin asih hun sung uh minit khat khawng a ihmu lel bang mah hi ding uh hi,” ci hi. — Luther’s “ Exposition of Solomon’ Book Called

 

Eccelesiates,” p. 152 (ed. 1573, London).

 

Laisiangtho sung peuh mah ah mite a sih phet leh midik in a noptuam saang dingin kahto pah a, mimawh in a daan thuak nading mun ah ki khia pah hi cih pen a genna (550) om het lo hi. Khanglui pupite leh kamsangte in zong tua bang a genna om ngeilo hi. Khrist leh a sawltakte in zong heem gen ngei beek lo lai uh hi. Laisiangtho in, misite thakhat in vantung ah pai pah lo-in, thawhkikna ni mateng han ah ihmu uh hi, (1 Thess. 4:14) ci in teltak in gen zaw hi. A sih ni mah in, ngun meivaakna khau kitat in, ih kham meivak kia-in kitam dinga, I tuikhaina beel kitam pah in(Thuhilhsia 12:6) amah maimang pah (Job 14:21) in, mihingte lungsim bei-a bangmah phawk nawnlo hi (Job 14:10-12). Han sunga paite pen gam daai uh hi. Vanpi nuai-a ki seem peuh mah bang mah theih pih lo uh hi. Midik a gimte tawl ngak hamphatna hi! Hun saupi ahi zongin amau adingin mitphiat kal bang hi bek ding hi. Amaute a ihmu uh a hi hi. Sihtheih nawn lohna silh dingin Pasian pengkul mut ging in amaute a phong ding hi. “Tua peengkul a mut ding a, misite in muat thei nawnlo dingin hong tho kik ding uh hi...Bang hang hiam na cih uh leh, hih a muat theite in muat theilohna a silh ding hi. Hih a muat theina in muat theih lohna silh a, hih sih theihna in sih theih lohna a silh ciangin, ‘Zawhna sungah sihna kivalh tum zo hi’ ci-a Laisiangtho sungah a kigelhsa thu in a tung ding hi” 1 Kor. 15: 52-55. Ihmut nuam mah mah pan amaute a ki phot ciangin a sih ma-a a khua-phawk tawpna pan-in a khua phawkna le ngaihsut kizom kik ding hi. A hin lai uh a, a theih nu nung pen uh in sihna limnuai ah gual-lel in si dinga nat a thuak uh hi dinga, han pan a hong thawh khiat kik uh ciangin a zak masak pen uh aw in” Han aw na zawhna koi lai ah om hiam? Sihna aw na gu koi lai ah a om hiam? “ ci in phu-tun hanla sa-a zawhna aw-ging hi ta ding hi.

83