Na Lungsim khempeuh Zui-in

“Na lungsim khempeuh tawh hong sam Pa’ Nungzui in”

Thu masa:

Pasian in a telsa mikhempeuh Khasiangtho letsong a tawmpen khat pan a tunglam, pialo cih bang omlo hi. Piangthak mi khatpeuh in Kha pan a ngah kivakna nei hamtang a hih leh, nang bang ki vakna na nei hiam? Tua Khasiangtho piak letsong pen pawlpi cidamna ding, pawlpi mite in phattuamna a ngah na ding, Pasian gamzaina ding, leh Pasian minthanna ding hi a, na hoih tampi semthei ding in hongsam Pasian a hi hi. Tua a hih man in, bang sem ding in Topa in nang hong sam hiam cih, bang sem ding in hong kisam hiam cih a tel mahmah Elisha ki piakzawhna tungtawn in tha la ding in, anuai a bang in kong ki ging hi

Laisiangtho mun: Kumpite Masa 19:19-21

Thulu: “Na lungsim khempeuh tawh hong sam Pa’ Nungzui in”

Elisha’s Background:

Laisiangtho in hong genna ah, Elisha pen Bawngtal kap 12 nei hi ci in hong hilh hi. Bawngtal kap-12 pen bawngtal 24 cihna hi a, mi hau mahmah lokhopa a hi hi.

Bawngtal 24 tawh lo khawhding nei pa pen, lo lian mahmah nei a hih lam zongh ki langh pah hi. A mau hun lai in, mi haute bek in logam (rice field) lian nei zo bek uh hi (gtn in Ruth’ pasal Boaz). Elisha pen mihau logam neipa bek hi lo in, mi tha nuam mahmah, a mah ngiat in tua lokhawh a makaih ngiat a hi hi. Thadah a hau cih pen a om theingei lo phial a hi hi, a om phial zong in a enhuai lua hi ngeilo uh hi. Elisha nu leh pa te pen mihau lokho nam hi kha ding uh hi, bang hang hiam cih leh Elisha in Elijah zui ding in a khensat ding ciang in, a nu leh pa te khiang ah thupha vabawl hi. Mi nuamsa mahmah, thanuam mahmah khat Kamsang nasep semding or Kamsangpa nungzui ding in hong khensat ta hi.

Elisha hunlai a kamsangte omzia: Elisha hunlai tak in, Israel gam ah Kamsang

School na om kawikawi khin hi. Pasian deihna bang a, kamsangte pen kumpi in that mang khin a, a thahnailoh te nangawn thah leh mat ding a zon zon hun a hi hi. Baal kamsangte in a hih leh kumpite deihna dandan in kamsanna gen uh a hih man un, amau te in haksatna thuak lo uh hi. Elisha pen kamsang ding a, sathau a nilhpa pen Elijah hi a, kumpi leh a galkap te in a sun leh zan in mat ding a, a zonzon pen uh a hi hi. A galtai (1 Kings 19) na ah Pasian in Elijah hopih a, Abellmeholah khuami Shaat tapa Elisha sathau nilh sak hi. Aneihsa logamte, bawngtal kapte, nasemte khempeuh nusia a, kumpite in thahding leh matding mai ah galtai kawm a Pasian nasep sem ding khensat ding pen, Elisha maban hong hi petmah ta hi.

Elisha khensatna:

Elijah galtai hong paipai leh Pasian lamlahna tawh bawngtal kap-12 tawh lokho a buai mahmah mi khat mu a, a puan-ak pi lot phei hi. Kam malkhat beek zong gen lo hi na pi in, Elisha in hih puanpi pen khiatna lianpi nei hi cih tel pah hi. Ka innkuan pih te thu va vaikhak pak ning in, tua ciang in na nung kong zuih theihna ding in hong phal ci in Elijah khiang ah a nget leh pai in Elijah in ci hi. Elisha in kamsangpa nungzuiding in a khensat ciang in, ze-etna a piangsak theiding namkhempeuh a nuntakna pan in hemkhia hi. A bawngtal 24 teng go (tulai kampaubang hi leh “lawmthusawi” ) in, a lengkaihna teng tawh huan pah hi. A bawngtal teng nei lai zenzen hi leh, haksatna or lungkiatna khat peuh a phutkhak ciang in, eih! inn ah ciah kik lel ning in ka bawngnung zui kik leng, tha lawp huai zaw in teh ci kha ngei pelmawh ding hi. Anungsang ah bang mahmah a lunghian nawn peuhmah lohna ding in, a neihsa teng a nusia ngam taktak, Elish mihau pa a hi hi. A nungsang lam pen tuisuaksak khin a, kumpite leh galkap te simmawh ding in a maingat kamsang nasep hong manawh ngam zaw hi.

Elisha in Elijah zaa laih: Elisha nungzui nasepna ah ka ngaihsut ciang in, lungkiat huai mun tampi ah tuak zel zel ka sa hi. Elijah in thupha tha khat thu in piapah hetlo hi. Vantung ah a ki lak toh ding Elisha in theisim hi. Elijah mahmah in zongh vantung ah kei hong ki lato ding a hih man in, hong zui nawn kei in ci zawsop hi.

Vantung ah hong ki lak toh ma in, thupha hongpia ning ci ngei peuhmah lo hi. A tawp khakna ah, Elijah in nawngkai sa a hih man in, hi ci liang a nong zuih bang kong piak ding lunggulh na hi hiam ci in Elisha a dot leh, “na lungsim tanh nih hong luahsak in” (2 Kings 2:9) ci hi. Nong nget thu pen a haksa mahmah khat hi ciciat hi, ahi zong in vantung ah hong ki laktoh laitak nong muh leh na ngah ding ci bek mawk hi. Elisha in citak takin Elijah nungzui a, atawpna ngah Elijah kilaktoh laitak mu a hih man in, Elijah puanpi a ngah lel mawk hi.

Elisha in a zahnih (double portion) nalamdang bawl: Kum sawtsim haksatna nuai ah Elijah nung a zui, Elisha in a tawpna ah a lunggulh hong ngah tak pi ta hi.

Nalamdang Elijah in 14 vei bawl a, Elisha in 28 vei bawl lin lian tak pi mawk hi. Double portion hong ngah takpi a, a nunung penpen nalamdang bangpeuhmah lamdang taktak mawk hi. Misi khat vuiding a, khan (han) ah apai pih lai tak un gal te hong pai a hih man in, vui man lo in a luang hawm pen Elisha kivuina ah a lotphei leh Elisha guhte tawh a ki sawhkhak ciang in tua misi pa hong nungta kim mawk zanzan hi.

Thu khupna:

Ei hong SAMPA kua hiam cih ih tel ding kisam a, bang semding in hong sam hiam cih tawh ih telkhopding a thupi penpen a hi hi. Hong sapna ah Ama na ih sep nak leh gual lelhna pan in gualzawhna, thanemna sung ah thakhauhna, a ki galbawl mi sung ah ki lemna, a zawngkhal te tung ah thakhuahna, khangto zuahzuah zokeiphial zong in kiamsuk zawk lohna te hong piang ding hi. Ama hong koihna mun ah ih om kei leh, thathak la a thangah ding sangin thuneihna bek tawh ki tawhilhna hong tamzaw ding hi. Pasian in hong sehna mun ah ih om khak kei leh, ei mahmah in lunggimna tampi ihthuak ban ah ih gei ah a om mikhempeuhte ei hang in kha lungleng ihsuaksak den ding hi. Tua a hih man in, bang sem ding in Pasian in kei hong sam hiam cih tawh tha ih lak kik ding leh ei leh ei Pasian mai ah ih ki ap ciat ding in, Elisha tungtawn in Topa in hong ho pih ta hen. Mi khempeuh Pastor hikim lo ding hi hang, mi khempeuh upa hi kim lo ding hi hang, mi khempeuh kamsang hi kimlo ding hi hang. A hizong in, Pasian in a ma minthanna ding in namtampi,mun tampi ah a mi te koih hi. Gentehna in, pawlkhatte, sum zong ding in, makai semding, pastor ding, upa ding, zindo ding, midang te thungetsak ding, etc. cih bang in, Khasiangtho letsong a tuamtuam in hong pia hi. Upa te thupi zaw or neuzaw, pastor te thupi zaw or neu, mihaute thupi zaw or neuzaw, mizawngte thupizaw or neuzaw cih bang a om kei hi. Ih omna ciat ah Pasian hong sapna thupi lakciat ding in Khasiangtho in na hong sem ta hen. Amen.