MUC

Print Friendly and PDF

Friday, September 12, 2014

LESSON - 13 SEP. 20 – 26 KHRIH A NIHVEINA HONG PAI KIK DING

LESSON - 13 SEP. 20 – 26

KHRIH A NIHVEINA HONG PAI KIK DING


SABBATH NITAK: TU KAAL SUNG SIM DING: Jn. 14: 1 – 3; Matt. 16: 27; 24: 3 – 14, 42, 44; 1Thess. 4: 13 – 18.

KAMNGAH: “Tua ciangin Jesuh in a nungzuite kiangah, “Note lunghimawh kei un. Pasian um unla, kei zong hong um un. Note’ om nading mun a bawlkhol dingin a pai ding ka hi hi. Ka Pa’ inn sungah om nading mun tampi om hi. A om lo ding hileh hih bang thu ka hong gen kei ding hi. Kei va pai-in note’ om nading mun ka va bawlkholh khit ciangin keima omna munah note na hong om theih nadingun note a hong la dingin ka hong pai kik ding hi. Jn. 14: 1-3.


Thuciam Thak sungah Khrih hong pai kik ding thu 300 vei bang kigelh hi. Tua thu mah in eite upna laigil hi. Seventh-day Adventist thu-um mi khat ihihna zong a kilangsak hi. I pawlpi’ min, i tangko

thu in zong, Khrih hong pai kik ding hi, cih thu mah ahi hi.



Khrih hong pai kik lo ding hi leh, i upna in a mawkna suak ding hi. Tu ciang dong Khrih hong pai nailoh manin a’ kamciamte muanlah ding om lo hi. Eite in i lamet, a lian Pasian le eite hong Hon Khrih a vangliatna hong kilatkik ding hun ngakin i nungta hi (Titus 2: 13).

SUNDAY SEP. 21

A’ HONG KAMCIAM

Khrih in a nungzuite tawh a nunung pen nitak an a nek khit uh ciangin, Khrih in amaute kiangah, tu-in ka pai nading mun ah na hong pai thei kei ding uh hi, ci-in gen hi (Jn. 13: 33) A Topa uh tawh kikhen ding hi ta ahih manin nungzuite dah le lau thuah uh hi. Peter in, “Topa aw, nang koi ah pai ding na hiam? Bang hangin ko hong zui thei lo ding ka hi uh hiam?, ci-in Khrih dong hi (Jn. 13: 36, 37). Khrih in amaute’ lunglen khuangaihna thei ahih manin, amau tawh kikhen ding hun tawmno khat sung hi ding hi, ci-in hilh hi.

Khrih hong pai kik ding kamciam, Jn. 14: 1- 3 sim in. Bang hangin nang a’dingin man nei hiam?
_________________________________________________


“Ka hong pai taktak ta ding hi,” cih kamciam in pello-in Khrih hong pai taktak ding hi cih pulaak hi. "Ka hong pai mai thei hi," cih bang hi lo hi. Bang zahin hanciamin lawpin i mapan hang, i kamciam pawl khat i tangtun loh om hi. Khrih in a hong kamciamte ahih leh, tua bang hi lo hi. Khrih’ kamciamte muanhuai takpi hi. Khrih in mihingin a hong nuntakzia ding David tungtawnin ‘ ka hong pai ding hi, ci-in genkhol hi (Late 40: 7, 13). Tua mah bangin hong pai takpi hi. Khat vei hong pai khin ahih manin a nihveina hong pai takpi ding hi.Khrih in hih leitungah a hong nuntak lai-in a lungkham Jairus kiangah lunghimawh kei in. Na tanu hong hing kik hi, ci-in thapia hi (Lk. 8: 50). A si khinlian Jairus’ tanu thokik takpi hi.


A sih khit ni thum ciangin a thawhkik ding Khrih in genkhol hi. Thokik takpi hi. A nungzuite tungah Kha Siangtho ngah ding kamciam hi. A hun a cin tak ciang, Kha Siangtho ngah takpi uh hi. Mite’ muhna pan a piangthei lo ding a bat hang, Khrih in a’ kamciam bangin tangtungsak ahih manin mailam ah zong a’ kamciam om bangin hong pai kik takpi ding hi.

Bangci bangin Khrih hongpai kik ding lawp den ding na hiam?


MONDAY SEP. 22


KHRIH NIHVEINA A HONG PAI DING’ NGIMNA


Khrih nihveina a hong pai ciangin, mawhnei mite a hong tatkhiat i mit tawh muh taktak hun hi ding hi. Khrih hong kum lo ding hi leh, mihingin a hong pianna, sihna pan a thawhkikna cihte in a hong kihotkhiatna dingin mannei lo suak ding hi.


Bang hangin Khrih hong pai kik ding hiam? Matt. 16: 27.

___________________________________________________

Leitung ah thuman lohna tampi om hi. A manlopi a kibawlna, gim piakna cihte i thuak kha thei zel hi. Mi thumante in gimthuak, genthei-in, mi gilote ahih leh, gimthuak lo uh hi. Amau ngah ding a kilawm ngah lo uh hi. Ahi zongin siatna le mawhna in a tawntungin a om den ding hi lo hi. Khrih in mimal sepna bang ciat pia dingin hong pai ding hi (Mang. 22: 12). Khrih hong pai ma-in thukhenna om hi. Khrih hong pai ciangin, Pasian’ thukhenna bangin mi khempeuh in thaman ngah ciat ding hi. Hih thu, Khrih in mopawi tawh gentehin, hong hilh hi (Matt. 22: 11 -13). I gamtatna in hong honkhia thei lo hi. Tua hi taleh, Pasian in i gamtatna tungtawnin thu hong khen ding hi. Hotkhiatna pen Pasian’ hehpih man hi a, kei a’ ding hi, ci-in upna tawh i sang hi. I gamtatna in i upna kilangsak hi (Mark 16:16; Jn. 1: 12).

Matt. 16: 27 ah Pasian in thuman thutak tawh thu hong khen ding hi, ci-in hong hilh hi. Tua hun i ngak ding ihi hi. Khrih a hong pai ciangin, ama sungah a si mite hong thokik ding uh hi. I gensa mah bangin sihna pen ihmu tawh kibang hi-a, Khrih hong pai ciangin amaute hong thokik ding uh hi, cih kamciam ei a’dingin manpha mahmah hi. Leipumpi kiling gawp ding a, khuaphia-in vanging ding a, Pasian’ Tapa Khrih in a si misiangthote sam ding hi. Ka midikte hong tho un, ci-in sam ding a, vangliatna tawh amaute in vankim lai-ah laktohna ngah ding uh hi. Khrih in amaute a sapna aw leimong khat pan leimong dongah kizelin, mi namcininte hong tho ding uh hi. Sihna hankhuk sung panin a si nawn lo dingin hong tho ding uh hi. Sihna aw na’gu koi ah om hiam ci-in kiko ding uh hi (1Kor. 15: 55). A hinglai midikte le sihna pan a tho a' midikte in lungdam kipakin Ama’ min phat tawntung ding uh hi. Ellen G. White, The Great Controversy, 644.


TUESDAY SEP. 23


KOI BANGIN KHRIH HONG PAI DING HIAM?


Khrih a hong pai kuan ciangin upkhialhna om ding hi, ci-in Khrih mahmah in genkholh khin zo hi. A nungzuite kiangah, “keimah in Khrih ka hi hi, ci-in a kineihkhem zuau kamsang hong pai ding uh hi, ci-in hong hilh zo hi (Matt. 24: 5, 23, 16). Eite in khem a tuak ding , Khrih in deih lo hi.Tua ahih manin Khrih in ama hong paizia ding kiciantakin hong hilh khol hi.

Koi bangin Khrih hong pai kik ding hiam? Matt. 24: 27.

_______________________________________________

_______________________________________________

Guahzuk ding ciangin khuaphia a dal zo om lo hi. Mit nei khempeuh in mu kha lo cih bang om lo hi. Tua mah bangin Khrih hong pai ciangin mit nei khempeuh in mu ciat ding hi. Na mu kha uh hiam, ci-in kuamah kidot kul lo-in, midik, mi gilo, nuntakna ngah ding, a mangthang ding mimal khat ciat in mu ding hi. Khrih singlamteh tungah teipi tawh a pang a sun galkapte in zong mu ding uh hi (Matt. 26: 64; Mang. 1:7).


1Thess. 4: 13 – 18 in Khrih hong pai kikzia bang tawh kibang ding hi, ci-in koi bangin hong theitel sak hiam?
________________________________________________

________________________________________________

Mi khempeuh in Khrih in kumpite’ Kumpi, topate’ Topa hi, ci-in mu ding uh hi. Khrih a hong pai masak lai-in vangliatna tawh hong pai lo hi. Mite’ deih theih ding lim le mel pua lo hi (Isa. 53: 2). Ahi zongin a hong pai kik ciangin vangliatna, minthanna, vantungmi khempeuh in pengkul tumin hong pai ding uh hi (Matt. 25: 31). A si mi siangthote a si nawnlo dingin hong tho kik ding uh hi.


Khrih hong pai kik ding hi, cih kamciam a muangngam na hih leh, nisim i nuntakna ah zong amah muangngam ding hi lo hiam?


WEDNESDAY SEP. 24


BANG HUNIN KHRIH HONG PAI DING HIAM?


Khrih in Jerusalem biakinnpi kisiat ding a genkholhna ah suang khat tungah suang a kiciang om lo zah dongin kisia ding hi, ci-in a gen thu, Nungzuite in lamdangsa uh hi (Matt. 24: 2). Tua ahih leh, bang hunin tuate hong tung ding hiam? ci-in dong uh hi. Amau ngaihsutna ah, biakinnpi kisiat ciangin leitung beina hi ding hi, ci-in um uh hi. Khrih in ama pilna tawh a piang ding thu nih genkhol hi. Jerusalem kisiat ding le Ama hong pai ding a hilhkholhzia i phawk thei hi. Nungzuite in hih nihte’ kibatlohzia theithei lo uh hi. Khrih gen mah bangin AD 70 kumin Jerusalem biakinnpi kisia takpi hi. A piang ding Khrih’ genkholh thute in ngimna nei hi. Khrih hong pai kik ding a kum le nite i theih nading-a Khrih in hong hilh hi lo hi. Bang hang hiam cih leh, Ama hong pai ding ni kuamah in thei lo hi. Vantungmite nangawn in thei lo hi. Pa Pasian bekin thei hi (Matt. 24: 36). Ahi zongin tua genkholhnate in Amah hong paibaih kuan ta ding ahih manin, thu-um mite kiginkholh theih nading hi zaw hi. Khrih hong pai ding kum le nite i theih loh hangin, bang hun sungah nungta i hiam cih i phawk ding kisam mahmah hi.


Matt. 24: 3 – 14, 21 – 26, 29, 37 – 39; Mark 13; Lk. 21 sim in. Thupiang ding bang kigenkhol hiam? Bang hun sungah a nungta ihi hiam?

_________________________________________________

Khrih in a hong hilhnop thu in a hong pai kik ding hun nai mahmah ta hi. Nungzuite in ama’ hun sung mahin Khrih hong pai dingin lamen uh hi (Matt. 24: 32, 33, 42). A taktakin mimal a’dingin, i leitung nunna bei leh, ei a’ding hun a bei hi pah lel hi. I sih khit nungah kum khat, kum 100, kum 1000, bang tan hun sawt om lai taleh, a si mite a’dingin bangmah kilamdanna om lo hi. A hingkik ding Khrih’ sapna aw a ngak hi bek uh hi. Mimal in sihna tawh i kinaih mah tawh kibang, Khrih hong pai hun ding zong hong nai hi. Khrih hong pai ding bangzahin hong nai hiam?


THURSDAY SEP. 25


VIL, NGAKIN KIGING DEN IN.


Bang hangin Khrih hong pai ding ngakin kiging den ding kisam hiam? Matt. 24: 42, 44.

____________________________________________________________

____________________________________________________________

Khrih’ hong hilhkholhna ah kiging tawntung ding, kisakhol den dingin hong hanthawn hi. Thadah mite bangin hun awngsak lo-in thanuam le lawpna tawh, inn nei pa in mi gilote guta a vil bang ding ihi hi (Matt. 24: 43). Vilin i ngak kawmin, a citak nasem mi in a kipia nasep ding maban a tutzawh mah bangin masuan sep hong kipia hi (Matt. 24: 45; Mark 13: 34 – 37).

Khrih hong pai ding a ngak thu-um mite in koi bang lungsim puak nei loh ding kisam hiam? Matt. 24: 48 – 51; Lk. 21: 34, 35. Tua bang lungsimpuak tawh kipelh ding na hiam? Kikem lo hi leng, bang hangin tua bang ngaihsutna nei pahpah i hiam?

__________________________________________________________________

__________________________________________________________________

FRIDAY SEP 26

SIMBEH DING: Ellen G. White, “On the Mount of Olives” in The Desire of Ages, 627 – 629; “Herald of the Morning” in The Great Controversy, 299 – 316.


Tua ciangin nisuahna lampanin khuttum cia a pha meivom neu khat hong kilang hi. Tua in Khrih le vantungmi honpi hi-in, a gamla panin meivom tawh kibang hi. Pasian’ tate in tua meivom pen Mihing Tapa hong kum ahih lam theithei ding uh hi. Amaute in tua meivom en uh a, tua meivom hong gol semsemin, Mihing Tapa a mel in kimu-in, ama thuciam om bangin a tangtun nading hi ta hi. Tua meivom kimah sakhituihup in tuamin leitung tawh hong kinai zaw semsemin, a vangtang lianpi kimu hi. Vantungmite in gualzawhna lapi sa-in Pa Pasian’ min phat ziahziah uh hi. A vangliatna mihing in pulaak khia thei lo hi.

KIKUP DING DOTNATE:

1.      Khrih hong kum kik hun ding naii mahmah ta, ama hong pai kik ding zong kiging den ding kisam mahmah hi. Ahi zongin Khrih hong kum ding thu tawh kisai a khengval a up khak ding zong kidop huai hi. Khrih hong kum baih ta ding cih umin nasepsep kul nawnlo cihte a kipan, tua bang up khialhna a neite in zong a upkhialhlam uh kiphawk kha lo uh hi.


2.      Khrih hong kum kik ding naii mahmah hi. Mihing in a nunna bei leh, ama a dingin hehpihna kong kikhak hi a, Khrih tawh kizop kik theih nading lampi dang om lo hi. 

To get the latest update of me and my works

>> <<