LESSON -12 SEP. 13 – 19
SIHNA LE THAWHKIKNA
SABBATH NITAK: TU KAAL SUNG SIM DING: Jn. 11: 11, 38 – 44; 1: 1-4; 5: 22, 29; Lk. 8: 54 – 55.
KAMNGAH: “ Tua ciangin Jesuh in, “Keimah in a sisa mite thosakin a hingsak thei pa ka hi hi. Kei hong um mi peuhmah a sih hangin nungta ding hi.” John 11: 25.
Sihna kihta lo mihing om lo ding hi. Bang hang hiam cih leh, a nungta ding a Pasian in hong bawl a, a si lo ding ki-ut hi. A taktakin sihna a om lo ding kim lai, sihna in guta bangin a hong buluh siatna nam
khat hi. Nain khua meigongnu’ta si a muh ciangin, Khrih in meigongnu hehpihin, itna nei ahih manin, ama kiangah “ kap kei in,” ci-in hehnem hi (Lk. 7: 13). Lungkia-in a om, kum kua pha khin sihna thuak numei no’pa kiangah Khrih in “ Lau kei in. Kei hong um in,” ci-in lametna guan hi. Khrih in sihna a thuak mi khempeuhte hehpih hi. Khrih in daha a kap mite tawh dahin kap khawm hi.
Khrih in dahin a kap hangin, Amah in sihna zo zo hi. Sihna pan thokik hi. Sihna a zo vangliatna nei hi. Amah a um mi khempeuh in sihna a thuak uh hangin, tawntung nuntakna tawh nungta dingin thokik sak ding hi. Tua kamciam tawh a nungta ihi hi. Na khempeuh ii mong in sihna hi mawk leh, i nuntakna in a mawkna pi suak ding hi.
SUNDAY SEP. 14 MISITE’ OMZIA
Lai Siangthogelhte in, mihing hinna, pumpi le kha cih bang khen lo uh hi; pum khat hi, ci-in hong hilh uh hi. Hebrew kammal ah, taksa (pumpi), hinna (kha) cihte in a kikhen thei lo pumpi hinna pulaak hi. Kammal tuamtuam a kizat hangin, a’ gen thute in mihing’ hinna pulaak hi. Lai Siangtho in limcinna tuamtuam zangin hong hilh hi. Gentehna-in sihna pen ihmu, ci-in kigenteh hi. Job 3: 11 – 13; 14: 12; Late 13: 3, 14; Jer. 51: 39; Dan. 12: 2 cihte en in. Sihna i cih in nunna bei cihna hi. A si mi khat in bangmah mah phawk lo hi. Ngaihsutna, khuaphawkna, cihte a kipan, bangmah sem nawn lo hi.Kuamah tawh kizopna nei lo hi (Thsia. 9: 5, 6, 10; Late 115: 17; 146: 4).
Kumpi tampi lai pek a kipanin a si mi khat in phawk theihna nei hi, cih upna nei uh hi. Pumpi bek si a, hinna (kha) si thei lo hi, cihna upna nei uh hi. Tu hun dongin, mi tampi in hih bang upna nei uh hi.
Khrih in Lazarus a sihna tawh kisai bang pulaak hiam? Jn. 11: 11
__________________________________________________
Khrih in sihna tawh kisai hilhcian napi, mi tampi in mihing in a si thei lo hinna khat nei hi, ci uh hi. “ A man takpi kong cihin-ah: Tuni-in Paradais ah kei tawh na omkhawm ding hi, (Lk. 23: 43)cih thu siksan in mi tampi in, sih ciangin, Paradais kitung pah hi, ci uh hi. Tua ni-in Paradais ah om lo hi. Paradais ah a om ding hun, tua ni-in a genkhol hi zaw hi. Lai Siangtho Thak masa penpen, khut gelhte ah (manuscript) laimal kikhen lo hi. Laimal, khawlna (comma) mun siksanin, sih ciangin Paradais ah om dingin ngaihsun uh hi. Tua banah, gutapa in, tu ni mahin Paradais ah om ding ngen lo hi. Khrih in, mailam huhah thupiang ding kamciam piakna hi zaw hi. Tua khit ni thum khit ciang, Khrih in sihna pan tho-in vantung a kahtohna thu John 20: 17 in hong hilh hi. Sih ciangin vantung kikah to pahpah lo hi.
Sihna in ihmu tawh kibang hi, ci-in a hong kihilh manin, bang hangin sihna pan thawhkikna thupi mahmah hiam?
MONDAY SEP. 15 THAWHKIKNA LAMEN
Mihing a hong kibawlcilin, Pasian in leivui le hinna hu a gawm ciangin nuntakna nei mihing hong piang hi (Pian. 2:7). Tua hinna i sungah a hong kikawm laisiah, mihingte a nungta ihi hi. Ahi zongin tua hinna om kei leh, mihing hihna bei hi pah hi; mihing panin misi suak hi. Pasian in a si dingina hong bawl masak hi lo hi. Mawhna hangin sihna kipelh thei lo hi. Ahi zongin a lungdamhuai mahmah thu in sihna khit ciang hinna, nuntakna ngah kik ding hi.
Jn. 1: 1-4 sim in. Khrih’ vangliatna in sihna pan thawhkikna koi bangin na mu hiam?
___________________________________________________
Khrih in amah le amahin hinna nei hi. Kuama tungah kinga lo hi. Bang hang hiam cih leh, Amah in hinna hi (Jn. 14: 6). Khrih in na khempeuh piangsak hi. A bawl nate tungah ukna nei hi (Jn. 5: 21). Tua hi-in, misite hinna guan kik thei hi; misi tho sak hi.
Bangci bangin misi tho kik hiam? Lk. 8: 54, 55.
____________________________________________________
Sihna langkhatah thawhkikna om hi. Nunna bulpi Pasian kiang panin nunna ngah kik cihna hi. Sihna pan a thokik Jairus’ tanu tungtawnin hih thu kimu thei hi. Kum 12 pha khin numei no si hi, ci-in Khrih kiangah kigen a, numeino omna inn sungah a dah a kap mite kiangah Khrih lutsukin, numeino a ihmu hi, ci-in gen hi. Tua khit ciang, numei no’ khut la-in kaito a, “ka tanu aw, tho in,” ci hi. Tua ciangin numei no in thakhatin hinna ngah kikin hong thoto hi (Lk. 8: 54, 55). Khrih’ thupiakna tawh Pasian kiang pan hong pai hinna tua numei tungah hong tung hi. Greek kammalin tua hinna pen ‘pneuma’ kici a, a khiatna in ‘huih,’ ‘husann,’‘ hinna,’ (kha) cihna hi. Hinna in sih khit ciang, pumpi tawh kikhenkhia-a khua phawk theihna bang mah om lo hi. Hinna (kha) i cih in nuntakna hu cihna ahi hi.
Leitung in sihna tawh kidim ahih manin sihna pen a hi ding mahin i ngaihsun hi. Tua himah taleh, koi bangin Pasian’ hong kamciam tawntung nuntakna lamenin na khamuang thei hiam?
TUESDAY SEP 16 THAWHKIKNA LE THUKHENNA
Thawhkikna thu a kigen ciangin mi tawmno khat bek thokik dingin kingaihsun kha thei zel hi. Ahi zongin Khrih in a genna ah, hankhuk sungah a om misi khempeuh Ama aw za-in hong thokik ding uh hi (Jn. 5: 28, 29). Thu-um mi, thu-um lo mi, midik, migilo, hotkhiatna ngah ding, a mangthang ding, misi khempeuh thokik ding uh hi. Paul ii gen mah bangin “amaute’ up le lamet mah bangin, Pasian in miphate le misiate a kibangin sihna panin hingkiksak khawm ding hi, ci-in umin ka lamen hi (Sawl. 24: 15). A si mi khempeuh hong tho kik ding uh a, khennih pha ding uh hi. A tho kik mite in bang thuak ciat ding uh hiam? Jn. 5: 28, 29.
_______________________________________________________
______________________________________________________
Misi khempeuh hong thawhkik uh hangin, a vekun tawntung nuntakna ngah ding cih bang hi lo hi. “A sisa mi tampite in nuntakna a ngahkik ding uh hi. Pawlkhatte nungta tawntung ding uh a, pawl khatte in a tawntung zumna le minsiatna a ngah ding uh hi (Dan. 12: 2). Lai Siangtho sungah Pasian in mihing khempeuh thu hong khen ding-a, tawntung manthanna ahih kei leh, tawntung nuntakna, khat zaw zaw kitung ding hi (Thkna. 12: 14; Rom. 2: 1 – 11). Leitung i nuntakna a bei ciangin, vanlian Pasian’ khenna bangin tawntung nuntakna ahih kei leh, tawntung sihna a tung pah nai lo hi. Sihna pan a thawhkik khit ciang hipan ding hi.Tua masiah, dikna ngahte hi taleh, siatna ngah ding mite hi taleh, khuaphawk lo, leivui mah hi lai phot uh hi.
Thawhkikna namnih tawh kisai-in i gamtat khuahek a hoih a sia tungtawnin kikhen ding hi. Gamtatna tawh hotkhiatna kingah cihna hi tuan lo hi. Khrih i upna tawh tawntung nuntakna hong kipia hi zaw hi (Jn. 3: 16). Tua ahih leh, bang hangin sepna thupi hiam? Bang hangin gamtatna thupi hiam cih leh, Khrih tungah ki-ap takpi maw, ki-ap lo, upna man maw, upna man lo cih hong theitel sak hi (James 2: 18). I gamtat zia le tong in mawhna sungah om lai maw, Khrih sungah nungta cih hong lak hi (Eph. 2: 1).
I tun nading mun ngaihsun in. Tawntung nuntakna tawh hong kigamla sak na khempeuh bang hangin tu mahmahin hemkhia lo ding na hiam? Tua sangin mannei dang bang om hiam?
WEDNESDAY SEP. 17 KHRIH IN A’ PULAAK HELL THU
Khrih in hell tawh kisai kammal nih pulaak hi: ‘hade,’ ‘gehenna,’ a khiatna in sihna le midiklote’ thuak ding gimna hi. Greek laimal ‘hades’ le Thuciam Lui sungah kizang mun mahmah Hebrew laimal ‘sheol’ ii khiatna kibang hi. Misite’omna, hankhuk cihna hi. “Hades” hankhuk sungah gimna hi taleh nopna hi taleh bangmah thuaknai lo uh hi.
Lai Siangtho sungah ‘hades’ cih kammal le gimthuakna a genna mun khat om hi. Luke 16: 19 – 31 sung sim in. Hih thugentehna in bang thumanpha hong hilh hiam? Thugentehna siksanin, misi khat vantung kahto pah, ahih keileh, hell sung tung pah hi, cih pen upkhialhna hi lo hiam?
_________________________________________________
Hih thugentehna in misite’ omzia a hong hilhna hi lo hi. A taktak hi lo napi, Khrih hun lai-in zong a kigen mun mahmah thugentehna ahi hi. Tu huna i nunzia siksanin mailam i nunzia kilamdang ding hi, cih a hong hilh thugentehna ahi hi. Tu-a a hong kipia thuman thutak zui kei lehang, sih khit ciangin, lametna om lo hi. Hih thugentehna pen a taktak hi, ci lehang, Lai Siangtho’ hong hilh thute tawh kituak thei lo hi. Khrih’ pulaak hih gentehna a huamin en lehang, a piangtaktak hi lo, gentehna bek ahihlam na mu ding hi.
Hell thu tawh kisai bang hilhkholhna nei hiam? Matt. 5: 22, 29, 30; 23: 33
_________________________________________________
Lai Siangtho bu nam tampi om a, pawlkhat in Khrih in ‘hell’ cih kammal 11 vei bang pulaak hi, ci uh hi. Tua munte ah Greek laimal ‘gehena’ cih kammal kizang hi. Hebrew laimalin ‘ Ge Hinnom’ hi-a, ‘ Hinnom Zangkuam” cihna hi. Thuciam Lui sungah hih mun pen Jerusalem khuapi pan saklam gam, Ahaz kumpipa le Manaseh in Molech pasian a piak nadingun naupangnote a thahna mun ahi hi (2Khang. 28: 3; 33: 6). Kumpi Josiah in tua bang biaknate susia hi (2Kum. 23: 10). Tua bang gamtatnate hangin Jeremiah’genkholhna ah Pasian in ‘kithahna kuam’ suak sak ding hi, ci hi (Jer.7: 32, 33; 19: 6). Tua hi-in Jew mite a’dingin tua zangkuam in mawhna kisik lo mite tungah thukhenna, amaute sihna limcing hi. Tua bang mahin Khrih in zong limciinna in a zat hi a, hell i cih pen a tawntung, khawlhun om lo a gimthuakna mun hi lo hi.
THURSDAY SEP. 18 KHRIH IN SIHNA ZO
Khrih in Lazarus sihna pan a thawhkiksak pen, bang hangin Khrih’ nasepna khempeuh lak pan a vanglian pen na lamdangin kiciamteh hiam? Jn. 11: 38 – 44
________________________________________________
Khrih' thawhsak mite tawh kibang lo-in Lazarus a thawhsak pen tuam pha diak hi. Lazarus pen a sih zawh ni li pha khin hi. Jerusalem khua sung pan hong pai mite’ muhin, sunkim laitak mahin, Khrih in hansung pan Lazarus hingkiksak hi. Hih nalamdang kuama nial theih hi lo hi. Ahi zongin tua sangin a vanglian zaw, Khrih, amahmah’ thawhkikna ahi hi. Khrih in nuntakna ahih mah bangin a si mi khat hinkiksak theihna amah in nei a, a thawhsak nop a si mi, thosak thei hi. Ahih hang, ama nuntakna zong pia thei a, hinkik theihna zong nei hi (Jn. 10: 17, 18). Khrih’ thawhkikna in hih thu hong theitel sak hi.
Khrih’ thawhkikna le misite’ thawhkikna bangci kizop hiam? Eite a hong kihotkhiatna dingin banghang in Khrih’ thawhkikna thupi mahmah hiam? 1Kor. 15: 17 – 20.
_________________________________________________
Sihna khol a sutkhia thei Khrih’ vangliatna kuamah in susia zo lo hi. Khrih sungah a si mite a’dingin Khrih in sihna pan a thokik, gahmasa ahi hi. Khrih’ thawhkikna in, amah a um-in a si mite in sihna pan thokik hamtang ding hi. Bang hang hiam cih leh, Khrih in nuntakna tawhtang a khut sungah om hi (Mang. 1: 17, 18). Mawhna hang a tawntung sihna panin Khrih in nuntak tawntung theihna hong pia hi. Khrih in tua nunna a piak nop mi tungah piaktheihna nei hi. Khrih’ khut sungah sih theih nawnlohna om hi. Mihingte a’dingin a nunna hong piak khit ciang hingkik a, a si nawnlo ding nunna hong pia hi. Ellen G. White, The Desire of Ages, 786, 787.
Vladimir Lenin sih khit ciang, nungtak kik thei cih upna nei uh ahih manun, a luang pen tuikhal sungah koih uh hi. Tu ni ciang dong thokik lo hi. Nuntakna bawl Pasian simloh kuamah mahin thawhkikna nei lo hi. Tua hi-in, sihna pan a thokik Khrih’ hong kamciam muan ding bang hangin kisam ihi hiam?
FRIDAY SEP. 19
SIMBEH DING: Ellen G. White, ‘Lazarus, Come Forth” in 524 – 536, “ The Lord is Risen” 779 – 787 in The Desire of Ages.
Pasian’ Tapa in ama midik a si mite’ hankhuk sung pan Ama vangliatna thokik sak ding a, vantung ah paipih ding hi. Leivui a suak khin mite aw, tho un. Tho un. Tho un, ci-in vangliatna aw tawh kisam ding hi. Tua sapna aw in leimong dong khat pan leimong dong khatah thawn gawp ding a, a si mite tho kik ding uh hi. Hankhuk sung pan sih theih nawn lohna puan tawh kituamin hong tho ding uh a, “sihna aw, na’ vangliatna koi ah om hia m? ci-in kiko ding uh hi.1Kor. 15: 55. A hinglai midikte le a thokik misiang khempeuh in aw kikhat in lungdamin gualzawhna tawh Topa’ min phat ziahziah ding uh hi. Ellen G. White,The Great Controvery, 644.
KIKUP DING DOTNATE:
1. Sihna i zo zo kei hi. Sihna in a tawpkhakna tawh kibang hi. Mi tampite mah bangin Pasian um lo, tawntung nuntakna lah ngahlo hi leng, mihing’ nunna i cih in bang hi ding hiam?
Tawmvei sung nungta-in tawl khat khit ciang a mangthang ding nunna in bang hi mawk hiam? Bangci bangin thawhkikna in bang mah lo hihna pan a mannei hong hisak thei hiam?
2. Mihing in a si thei lo hinna (kha) khat nei hi, cih upna hangin a lauhuai bang thute om hiam? Bang hangin Satan in hih bang upna hong guan hiam? Hih bang upna mailam ah koi bangin lauhuai zaw semsem ding hiam? Koi bangin hih bang a lauhuaizia na telthei hiam?
