LESSON -11
SEP. 6 – 12
SABBATH
SABBATH NITAK: TU KAAL SUNG SIM DING: Jn. 1: 1 – 3; 5: 16, 17;2 Matt. 12: 1 – 5: 20; Lk. 4: 16 – 21.
KAMNGAH: Sabbath ni, mihingte’ phattuam nadingin a kibawl hi a, mihing pen Sabbath ni a phattuam nadingin a kibawl hi lo hi. Mark 2: 27.
Khrih in a nasepna khempeuhah Sabbath tawh kisai-in biakna makaite’ thudotna thuak den hi. Tua bangin a kimawhsak ciangin, Khrih in Sabbath tungah ama thuneihna pulaakzel
hi (Matt. 12: 8; Mk. 2: 28;Lk. 6: 5). Khrih in Sabbath zatzia ding
zong lak hi. Tu hun ciangin, Sabbath tawh kisai buaina tuamtuam a om banah, Sunday ni zong zat ding i tuak kha hi. Lai Siangtho in Sunday ni zat ding hong hilh lo hi. Lai Siangtho sungah Sabbath zat zia ding bek hong hilh hi. Khrih a nuntak lai hi taleh, sihna pan a thawh khit hi taleh, Sabbath bei hi, cihna om lo hi.
SUNDAY SEP 7
KHRIH, SABBATH A PIANGSAK PA
Koi bangin Khrih le piansakna kizom hiam? Hih thu in, Sabbath kipatcilna tawh kisai-in, bang hangin thupi mahmah hiam? Jn. 1: 1 – 3; Kol. 1: 16; Heb. 1: 1,2.
_________________________________________________
John in a pulaak masak pen thu in: A kipat cilin Thu na om a, tua Thu, Pasian tawh na omkhawm a, tua Thu, Pasian ahi hi. Pasian in tua Thu tawh na khempeuh piangsak a, a kipiangsak na khempeuh, Thu tawh lo-in a kipiangsak khat beek om lo hi (Jn. 1: 1). Hih thu, Paul in zong hong hilh hi.Pasian in Khrih mahmahzangin na khempeuh piangsak hi (Kol. 1: 16). Khrih zangin Pa Pasian in ni, kha, aksi khempeuh, singkung lopa a kipan na khempeuh piangsak hi. Tua piangsak Pa mah eite’ Honpa ahi hi. Na khempeuh a bawl khit ciangin, tawlngak ni bawl hi. Sabbath in Topa a’ hi. Mihing in piansakna thu a phawk nadingin Sabbath hong kipia hi. Ellen G. White, The Desire of Ages, 288.
Na khempeuh a piangsak Pa Pasian in tawlngak hun a hong piak mah bangin tawlngakzia ding zong hong lak hi.Ni guk sung nasemin, gimna, tawlna pan pumpi taksa tawlnga dingin thu hong pia hi. Na khempeuh a bawl khit ciangin, Piangsak Pasian tawlnga hi. Gimin, tawl a tawlnga hi lo hi. A bawlsa na khempeuhte thupha pia nuam ahih manin, Pasian tawlnga hi. Sabbath ni tawlnga-in siangthosak hi. Tua dingin ei zong thu hong pia hi. Mawhnei mite a hong tatkhiat nading nasep a zawh ciangin, singlamteh tungah tawlnga hi. Tawlngak kisam ahih manin a tawlnga hi lo-in, Sabbath a kipsakzia a hong lah nadingin tawlnga hi. Vangik a pua mi khempeuh, Ama kiangah tawlnga dingin hong sam hi (Matt. 11: 28, 29).
Sabbath in, na khempeuh kipatcilna, piansak tawh hong kizom sak hi. Bang hangin Pasian in hong piangsak ahi hiam cih ei le ei kisittel ding, hun hoih Sabbath ni hong piak, bang zahin manpha hiam?
MONDAY SEP. 8 KHRIH, SABBATH’ UKPA
Matt. 12: 1, 2 sim in. Bang thu piang kigen hiam? Bang hangin Farisi mite in thukham palsat hi, ci uh hiam?
_______________________________________________________
Thkna. 23: 25 ah “ na vengpa’ ankung dinglaite lakah na pai uh ciangin na khut uh tawh a vuite na zut thei ding uh a, ahih hangin phiaukawi tawh na vengpa’ ankung dinglaite na at kei ding uh hi,” ci-in thukhun om hi. Thukham hilhsiate in Sabbath ni-in bang mah sem lo ding, angawi theilo ding, anvui zut thei lo ding, cih thukhun tuamtuam koih uh hi. A kung tung pan anvui zut khia, khut ah gawi cih pen Farisi mite muhna ah mawhna lian mahmah hi. Khrih in tua bangin Farisi mite’ mawhsakna a dawnkik nadingin a zat thugentehna in, tua thubuai hong theitel sak hiam? Matt. 12: 3 – 5.
_________________________________________________
Siampi simloh kuama nek loh ding anlum, David a nekna thu (1Sam. 21: 1- 6; Siam. 24: 9) Khrih in pulaak hi. David in tua anlum a nek manin mawhpuak nei ding hi napi, mawh hi, ci-in kiciamteh lo hi. A nihna ah: nisim biakpiaknate sangin a zah nih, Sabbath ni-a gangawh biakpiakna ah kizang hi.( Matt 12: 5; Gam. 28: 9, 10). Sabbath ni-in nidang sangin nasep tamzaw cihna hi. Ahi zongin tua nasepna hangin thukham palsat hi lo uh hi. Hih thute a gen khit ciang, Khrih in thu nih gentuah hi. Farisi mite’ thukhun hangin Sabbath ni, vangik bangin ngaihsun uh ahih manin, “Sabbath ni, mihingte’ phattuam nadingin a kibawl hi a, mihing pen Sabbath ni a phattuam nadingin a kibawl hi lo hi,” ci-in hilh hi. Hih laimunah Khrih in Eden huan pan a kipan Sabbath thu pulaak hi. Mihing le Sabbath, koi thupi zaw cih thu le Sabbath’ deihna pulaak hi. Mihingte’ phattuam nadingin Sabbath kikoih hi zaw hi. Sabbath in mihingte a’ding Pasian hong piak letsong hi. Nihna ah: Mihing Tapa pen Sabbath a ukpa hi (Mark 2: 28). Khrih in Sabbath piangsak Pa, Sabbath nei Pa hi. Tua hi-in, mihing’ bawl tawm thukham tuamtuamte pan suahtakna pia thei vangliatna zong a nei Pa hi.
Biakna makaite in Sabbath tungah ukna nei Pa, Sabbath a siangthosak Pa, Sabbath thupha a pia Pa’ nasepte langpan uh hi. Biakna makaite’ khialna panin bang thu manpha na mu hiam?
TUESDAY SEP. 9
KHRIH BANG MAHIN
Lk. 4: 16 in, Sabbath tawh kisai Khrih’ lungsim puak bang pulaak hiam? Bang hangin, tu hun a dingin thupi hiam? Jn. 14: 15; 1Pet. 2: 21.
__________________________________________
Aneu 6 ah, Luke in ‘ngeina’ cih kammal a zatna munah, Greek laimal in a khiatna in tatsat lo-a gamtatnate pulaakna a kizang kammal ahi hi. Cihnopna ah, Khrih in Sabbath ni sialin biakna pia den hi, cih i thei hi. Luke in ama laigelhna sungah li vei bang pulaak hi (Lk. 4: 16, 31; 6: 6; 13: 10). Ni sagih kaal khat lakah a ni sagih ni citektek hi (Lk. 23: 54 – 24: 1). Khrih in ni sagih ni Sabbath manmanin zang ahih leh, Sabbath beilo hi. Amah a um mi khempeuh’ etteh dingin, Sabbath zatzia ding hong lak khin hi.
Khrih in biakbukah Sabbath ni-in bang thu pulaak hiam? Tua thu bang hangin thupi hiam? Lk. 4: 16 – 21.
_____________________________________________
A kituiphum khit kum khat bang pai khin a, Khrih in a a lettama nasep nusia-in Nazareth khua ah a pai masakna le kum 30 sung bang a omna khua ah Sabbath simin biakbukah pai den hi. Nazareth ah a omma-in zong Sabbath zang den hi. Khrih in a neu a kipan Sabbath simin biakbukah pai-in Lai Siangtho sim den hi. A zak ngei thute uh za kikkik uh a, thuman khuavak in mite lungsim lawng hi. Ellen G. White, The Desire of Ages, 74.
Khrih in Isaiah kamsangpa’ gelh (Isa. 61: 1,2) “ Topa in a mite a hotkhiat ding kum a pulak dingin kei hong sawl hi, ci thu pulaak hi. Sabbath ni, tawlngak ni-in, a mite honkhia ding, a mite tawldamna pia ding le suahtakna pia dingin Amah mah Messiah, Honpa ahihna tangko hi.
Sabbath nisimin Khrih sungah tawldamna i ngah takpi hi. Sabbath tawlngakna in tua ding ahi hi.
WEDNESDAY SEP. 10 SABBATH NI-A NA LAMDANGTE
Khrih in Sabbath ni-in, nalamdang tampi bawl hi. Cina, dawivei, mittaw te damsak hi. Khrih in Sabbath ni-a a’nalamdang bawlte ngaihsun lehang, Sabbath ni hi lote ah damsak thei napi, Sabbath ni mah tel sese hi. Khrih in, Sabbath ni-in tua bangin damsaknate in Sabbath palsat ahih lohzia pulaak hi.
Matt. 12: 10 – 12; Lk. 13: 15, 16; Jn. 5: 16, 17 in thubuai bang gen hiam?
_______________________________________________________
Sabbath ni-in nisim nasep ngeinate pan tawlngak kul hi (Pai. 20: 9; Isa. 58: 13) Tawlnga cihin thadahte bangin bangmah sem lo ding cihna hi lo hi. Farisi mite tawh a kinialna ah Khrih in Sabbath ni-in na hoih, thupha bawl ding hanthawn hi(Matt. 12:12). Tua hun lai-in, Sabbath ni hi mah taleh, cina gim khat in noptuamna a ngah theih nading Sabbath ni in sem thei hi, ci-in zang uh hi. Tua mah bangin Sabbath ni –in tuu, bawng khat peuh dum sungah kia leh, honkhia uh hi. Tua bang thukham nei napi uh, Khrih in Sabbath ni-in cina a damsak ciangin Sabbath palsat hi, ci-in mawk sak uh hi. Ganhing sangin mihing manpha zaw pek hi lo hiam? Ahi zongin Khrih a’langpangte in ganhing khat gim a thuak hehpih huai sa uh a, mihing thuak ding phamawhsa lo uh hi. Gimna thuak ganhing hotkhia uh a, gimthuak mihing hotkhia ding kin lo uh hi. Mihingte hotkhiat ding tawh kisai-in Khrih amaute kiangah, “ Ka Pa in tuni dongin na sem tawntung ahih manin kei zong ka sep ding mah ahi hi,” a ci hi (Jn. 5: 17). Sabbath ni-in zong nuntakna tawh kisai nasep khawl tuan lo hi (Heb. 1: 2,3). Thukham’ deihna tel lo-in, thukham (laimal) bek zui dingin, Khrih in hong hilh lo hi. Sabbath ni tawlnga cih thupiak in sepna pan tawlnga cihna hi. Tua bana thukham zuihna tawh dikna ngah ding hanciamna pan tawlnga, cihna hi (Heb. 4:10). Thukham tawh dikna ngah ding cih pen a piang thei ngei lo thu hi. Satan in Sabbath zuihna tawh dikna ngah ding cih upna hong guan hi. Hih bangin a’ngimna a tangtun loh manin, thukham zuihna tawh midik hi, cih lungsim hong guan hi.
Sabbath thupi takin ngaihsun napi, a dang thukhamte a awlmawh lo mi om tham hi. Sabbath thupi takin ngaihsut mah bangin, koi bangin a dang thupiakte zong thupi ngaihsut ding na hiam? Mite’ Sabbath zatzia mawhsak khak loh ding kisam hi lo hiam?
THURSDAY SEP. 11
THAWHKIK KHIT SABBATH
Mi tampi in siksan le paulap tuamtuam zangin Saturday Sabbath sangin Sunday zang zaw uh hi. A tam zaw in Khrih thawhkik ni ahih manin kizang hi. Sunday ni, Khrih thawhkik ni ahih manin, tua ni Sabbathin zang uh hi. Lai Siangtho sungah thawhkik ni, Sunday, Sabbath ni-in zat ding hong hilh lo hi.
Matt. 24: 30 ah Sabbath tawh kisai bang hong hilh hiam?
____________________________________________________________________________________________________________
____________________________________________________________________________________________________________
____________________________________________________________________________________________________________
____________________________________________________________________________________________________________
Sabbath ni –in galtai, launa, gimna tuamtuamte tawh ei le ei kigimsak ding hi lo hi.Khrih in sihna pan a thawh khit ciang in zong Sabbath manphatna pulaak kawikawi hi. Sawltak Paul in zong Sabbath sialin Jew mite kiangah thuhilh ding banah, Sabbath siangtho takin a zang dingin biakbukah pai-in thuhilh hi(Sawl. 17: 2). Gentile mite kiangah nasem ahih hangin, upna tawh diktanna kingah thei bek hi, ci-in tangko hi. Tua bangin Sabbath ni khat thuhilh a zawh khit ciang, thuhilh suak lai dingin Gentile mite in kholai uh hi. Sunday ni-in a thugen zom suak lai hileh kilawm napi, kaal khat khit, Sabbath kik ciang dong ngakin, Sabbath ni mahin thuhilh hi. “ A Sabbath ni kik ciangin Pasian’ thu a ngai dingin a khuazang phialun hong kikhawm uh hi” (Sawl. 13: 44). Hih thu in bang hong hilh hiam cih leh, Sawltakte in zong, ni masa Sunday ni tawlnga lo-in, ni sagih ni, Sabbath ni-in tawlnga uh hi, cih kimu hi.
Ni sagiah ni in Sabbath hi, cih i thei hi. Koi ni pen Sabbath cih i tel ding thupi hi. Ahi zongin, koi bangin Sabbath in itna, hehpihna hong nei sak hiam?
FRIDAY SEP. 12. SIMBEH DING: Ellen G. White, “The Sabbath,” in The Desire of Ages, 281 – 289.
Tua hi-in Topa in Sabbath ukpa hi. Hih kammal in lungmuanna hong pia hi. Sabbath zatzia ding zong hong hilh hi. Khrih in Piangsak Pa, hong Siangthosak Pa hi, ci-in Sabbath in hong hilh hi. Khrih in na khempeuh a bawl pa, ama hangin na khempeuh kipin, pawlpi’ lutang in Khrih hi Ama vangliatna tawh Pasian’ ta suahtheihna hong pia hi, ci-in Sabbath thuman in hong hilh hi. “Topa ahi keimah in amaute pen mi siangtho-in ka bawlna thu a phawk nadingun kote’ kikalah thukimna limin Sabbath zat’ ding thu ka pia hi,” Eze. 20: 12. Sabbath in a hong siangthosak Khrih’ vangliatna pulaak hi. Khrih ii sianthosak mi khempeuh a’dingin Sabbath kipia hi. A hong siangthosak’ lim ahih manin, Pasian’ innkuan sungah om mi khempeuh tungah Sabbath thupiak kiptakin om hi. Ellen G. White, The Desire of Ages, 288.
KIKUP DING DOTNATE:
1. Khrih in hong bawl Pa, hong Honpa ahih manin, Ama a’ ihi hi. Bangci bangin Sabbath thuman in hih thu hong theitel sak hiam?
2. Sabbath zuihna tawh midik hi ding hanciamna in bang khialhna nei hiam? Ahi zongin Sabbath zuih kul veve a, Sabbath in midik ihih lohzia na thei tel hiam? Koi bangin Sabbath zuihna in thupha hi thei hiam?
3. Bang hangin Sabbath tawlngakna in, thukham zuihna tawh hotkhiatna kingah lo a, Khrih’ dikna bekin midik hong hi sak thei hi, ci-in pulaak hiam?
4. Bangci bangin Sabbath ni in Topa tawh kizopna kip, a kicing nuntakna hong nei thei sak hiam?
5. Koi bangin, Sabbath ni-a Khrih’ cina damsaknate Sabbath zatzia ding na mu thei hiam? Bangci bangin tua thute in Sabbath’ deihna hong theitel sak hiam?
6. “Sabbath ni a siangtho-in zang ding,” cih thupiak in, Sabbath ni-a na gamtatzia ding na thei hiam? Koi bangin Sabbath ni-a na gamtatnate siangtho hiam?
