LAY TEN REPRESENTATIVE NEILO
(Working Policy leh Manuel a lenpen Admins Leader ahi hi. Tua Policy leh Manuel te kinawlkhin leh Lammaan tawh bangci piak dingaa, angente in Lammaan tawh bangci ngah ding, ci-in.) UMM in delegate dingin Sia Pau Za Khan (Paupu) kiteel hi. Policy zui a kiteel ahi hi. Tuapen Union in hong saanglo hi. Amau deih U Kan Ngunt veto power zangin koih ziau uh hi. Upper Myannar in Lay-delegate nih nei hi. Khatpen Union aa, khat pen UMM aa, hong suaksak hi.UMM teelpa in VOICE neilo ding cihna hipah hi. Working policy leh Church Manuel palsatin nasep hong kipan pah hi. Ei aa pen limlawm aa hong koihsak bek ahi hi. Upper Myanmar aading Sia Pau Za Khan(Paupu) hanciamna leh deihsakna pen mikhempeuh in itheih tek ahi hi. Ahih hangin Union in Upper Myanmar lu-phong zolo dingin strategy neikhin ahihmanin, bangbang i gen zongin zumtum nawnlo hi. First Victim kahihmanin kuakua pau taleh neucik zong ka kamkum kei hi. Upper Burma C movement khaktan nangaa term-cinglo a kiteelna bawl ahih nungsang, mikhat genzawhthu tawh Union in a strategy dokkik loding cih katel mahmah hi. Agenpa in, UMM tangin lungsim siitlo-in gen ding cih zong kathei hi. Kumnih Union committee sung-a kazak kammalte pen bengkha ah mangthei thu hilo hi. Gamsungte power nangawn tawh hong kivau ahi hi.
Section President (Local Mission President)kiteel
Nomination meeting kipan hi. Section president kiteel hi. Lay representative pa pen bangzah hanciam a, kuateng forward itheihpih kei hi. Ahih hangin hong pusuah ciangin khua-ulneel tawh hul ngingeii-in hong pusuak hi. Pastor Sandy Dee UMM president kipia hi,ci-in hong gen hi. Term cinglo a hih kiteelna pen UMM ngimna bek ahihmanin Section dangte kilaih kikhel omlo hi. Union lungsim telkhin lua kahihmanin kei kapau peuhmah kei hi. Tua dingmah a kiteelna bawl hikhinzo bang paukul ding hiam? Union in amau aading delegate a teelpen palsatna khat, Term cinglo a kiteelna abawl pen palsatna nihna, a ban abanin hong hihto ziahziah hi.
Secratary and Church Ministries Kiteelna.
Session Period nihna kipan kik uh hi. Departmental leader teng kiteel hi. Nomination pen lungkim zawdeuh leh kilawm hi. Lawmten nadong pah sesu uh a, Ong hoihhoih lel ding hi, ci hi. Sia Kham Khan Lian (Lianpu) Union Treasurer, keipen Union Church Ministries ah hong koih uh hi. Mungno pen Section lamah hong koih uh hi. Pasian naseem dingaa kipumpiak mikhat aadingin, koikoi-ah a seem zongin lungkim lel uh hi. Thasial tuanlo uh hi.
Conference movement tawh kisai kilomkhatna ahihleh saatpeek khin hita hi. Humpi in a neekding gamsial a honlak panin a tang khenkhiat bangin , makai teng mipi tawh kikhen khinzo hi. Section zumpan a support omlo-in mipi otot pen huihlak aa awng bang hilel hi. Makai khat pen mipitawh kizop kul hi. Union leh UMM zum aa sem khempeuh pen amau kamphen (mouthpiece) kisuak khin hi. Layman taangaa kamkek ngam omlo hi.
Church Ministries pen
Church Ministries nasep pen Lungdamnathu nasiatak a taangkona ding Siamsinna Saang taktak ahi hi. Pa-aan pan kipanin Section khempeuhah Ministry Workshop kabawl uh hi. Division pan hong kisawl pepeuh lawptakin lungsitlo-in kaseem hi. Division uliante tawh kopin sepkhop hunzong tam hi. Pawlpi khantohna leh Pasian gamzai nangbek ngimna hileh hih nasep sangaa nuamzaw omlo ding hi. Ahih hangin, “Kawlmangpathu aakpi’n phiat” cih kammal khanglui ten nanei hi. Picinna khempeuh hong kilungdam pih nahilo hi. Personal Ministries leh ASI leh Family Life hong lensak hi. Global Mission bulphuh laitak ahihmanin hih a khindaisa hong revived kik hi. Division panin Workshop hong bawlpih hi. A active mahmah hongsuak hi. US ah kikhoppi hong sam hi. Kei let ASI leh Family Life munnih panin sapna kangah hi. A painuam bebek kamtuam tawh pau balhbalh uh hi. Tua Department lennuam hong kituhpian sesu uh hi.
Keimin tawh sapna ngahnapi-in
Policy ngeina bangin kalsuan hileh Department director mintawh kisam ahihmanin confirm pah ding ahi hi. Stephen, Tin Tun, kei mithum secret vote la ding ci uh hi. Thal bangaa kasuan Paupu lah Committee tu ngeilo hi. Ama genzawhthu tawh pianglo ahizongin, me tangkhat nuamtuam ding, ci-in hong om theileh ka-ut mahmah hi. Me kikhia leh bel lamet omlo hi. Chairperson nangawn in khiatsawm lailai hi. Inn kikhahkhum aa me kikhia ahi hi. Mipha zah nihvei thumvei kisim kikkik zawzen hi. Me khiat laitakin Paupu hong suak bembam dingin kabawlbawl hi. Hong dawk lo hi. Hong peikhia nuam kisa-in Unionmen teng bang amai 45* sawisakin khe tatkikkik uh hi. Me kikhia a, Stephan hong tawmpen hi. Tin Tun leh kei hong kidemsak leuleu hi. Sia Stephan me teng kangah khit keileh lamet omlo hi. Kakhiat thadah ta hi. Metang kikaikhawm a, kikim hi. Kua in sam! A kisam tangkhat pen kei kahi hi. Zumlo hialin kei leh kei kipia-in me khatin kazo hi. Tin Tun leh Ba khin hong kihuau hi. Ma-tat-nai-bu-le!!!! kici uh hi. Khepi-mai phutna khempeuh hong kithangsiah kawikawi a, nuam cih omlo hi.
Conference mitpaisuak ding Topan phallo
Conference movement nuaicip ding ngimna ahihnakleh, Pasian deihna tawh kituak-kituaklo cihkhawng, policy tawh kituak-kituaklo cih khawng , patau lo hi. Policy tawh kizui-in, zawhloh dingin goal koih phot a, cin keileng tua paulap nuam ahi hi. Gaol khempeuh Acheivement ineih ciangin molhtumtawh vau hong kipan hizaw uh hi. Lammaan cihcih pen tawliakte maikhuhna puan hilel hi. Conference Status pen Union hong piakding ahihleh Lammaan tawh zong piakding ngimna omlo hi. Tua pen Pasian zong hong muhpih thu ahi hi. Conference kammal kizanawnlo hi. Zadeih aa Union maivilna awging bek kizalai hi. Pasian in, Conference mitpaisuak ding phallo hi. Lammaan tawh thukhualtak aa kingen pen piangnawnlo hi. Pasian in mingoltol khat khahto-in, deihsaktak a naseem, Sia Kai Za dal vasawk sak hi. Mipi tawh kizom Church school te vasu sak hi. Sia Kai Za Dal leh Sia Kham Khen makaihna tawh Conference-movement sikhinsa hong thokik ahi hi. Lammaan tawh lakding pianglo ahihnate kei omsungaa kanawkkhak tawh teti pang kahi hi. Kei nungah C makaipite in agen ding tamzaw ding hi. Amau thuakhak khempeuh lammaan tawh ngetna khaktanna hang ahi hi. Biakna makaipite in Jesu entehlo-in Dictator Galkap kumpi ki-ukna entehin hong kalsuan nungsang, sia leh pha kikupna vet omlo hi. SDA Pawlpi ibelh pen Policy leh Doctrines tawh khotak aa ding ahihman aa kibeel ahi hi. Myanmar Union in, guta-damiah ki-ukna hongzat khit ciangin bang hiam i belh ding. Lammaan koi-ah om hiam?
