Dear Laisimte, SDA Khawmpi vai tawh kisai-a, Ngaihsut dingin ahoih SDA citak mahmah akici Pawlkhatte omzia ihtheih ding hoih kasak pawlkhat ong gelh ing: SDA citak mahmah Pawlkhatte omzia anuai-a bangte ahi hi:
1. Pawlpi it-in panpih napi, Jesus deihna banghiam cih phawk khalo uh hi. Saul akikheelma in Pasian mite a bawlsiat pen Pawlpi hu, Pasian nasem kuhkal in amah-le-amah akiseh dan mah abangte ahi uh hi.
2. SDA Pawlpi it lua-uh ahih manin, Pasian deihna sangin bylaw banglian-a om ding thupi sazaw hi. Tua bang lian in a omlote Satan pawl dingin ngaihsun pah zawzen hi. Bylaw le Pasian akikim in seh hi(Bylaw pen inspire hilo ahihmanin, SDA Christiante in Lai Siangtho bangin sanglo hi).
3. SDA itlua ahihmanin, amah bangin a panpihlo peuhmah, hazaa, gaal muh hi. SDA laibupi sungah min omlo khempeuh vantungah min kikhumlo in sehpah tangtang mai hi.
4. SDA Pawlpi it lua ahihmanin, tua pawlpi sunga kisemlo khem peuh Pasian deihna ahilo dingin seh-a, haza vilvel thei hi. Tua pen Pasian le Pawlpi hutna in ngaih sun kha hi. (Kamsang Elijah le Pasian kihona ah Kamsangpa in Israel gambup-ah Pasian thuciam kipalsat khin-a, amah bek Pasian teltuam acitak, a omlai-in aki ngaihsut laitakin, Pasian in milim mai-ah akunlo, mi 7000 nei lai ing ci hi(1 King 19:18).
Tua mi 7000te pen Kamsangpa in a Church Record laibupi sungah ciamtehlo-a, a bylaw zui-in na ki organize lo ahih manin, auditing bawl thei lo-a, atheihkhakloh hangin, Pasian ciapteh veve mite ahi hi. Jesus hun lai-in zong, nungzuipi pawlkhat in Jesus in khamcip leh a deih nasepna pawlkhat heek (report) uh hi. Jesus in bel khaam kei un,. Tuate ading lampi dongkhakte in an gawina suangtum angawngah khihin, tuipi sungah lut leh hoih zaw ding hi cih beh eksuk lai zaw hi(Mark 9:38-42; Luke 9:49).
Hih atungateng pen SDA sunga khaa mitvaaklohna(Laodicea Pawlpi dinmunte) hi-a, SDA citak bengbang pong helzen Pawlkhatte omzia hi. Christian taktak-te omzia hilo hi.
Gentehna: Khatvei lai-in, Catholic Father khat khualzin hi. Zankim ciangin a motor datsi bei hi. A pawlpimi inn khatah datsi lei dingin, a sawltakpa sawl hi. Inntekte in kong hon nuamlo, datsi zuak nuam lo hi.
Sawltakpa cimawh dongtuak-a, kileh-in Father pa va ko hi. Tua ciangin Father pa vapai-in inntekte kiangah, datsi ong zuak dih un, ava cih leh, inntekpa in, " Eh, Topa lah na hi-a, bang deih nahia .."cisaisai depsam helzen hiau khemawk hi. Father-pa in datsi alei khit ciangin, "YOU ARE A GOOD CATHOLIC, BUT A BAD CHRISTIAN..!" ci in paisan hi. Catholic Pawlpi mi hihna sangin, Christian hihna in gupna ong pia zaw ding hi—Catholic Pawlpi mihoih cihciangin, Pawlpi hu, sihpih ngam, a doctrine le tradition-teng kuhkalin zuihna hi. Christian hihna pen Jesus lungsim nei in a nungzuihna hi.
Tua bang mah in SDA sungah zong Jesus in " a Good SDA, but bad Christian.." a cih ding om hi, cih ka mu hi. Tua bang mite in Pasian deihna bang hiam cih ngaihsut masak sangin Pawlpi ngeina bang hiam cih thupi sak zaw uh hi. Beaurocratic lua in, screw gial zing luate tawh kibang uh hi. Tuate hangin Pasian nasepna masuan tuantual den hi. SDA citak bengbang sangin Christian hihna in gupna ong pia zaw dinghi.
SDA cihtaknate pen Pawlpi hu, sihpih ngam, a doctrine teng, Bylaw le policy, Manual teng, ka neu lai-a kipan ka zuihsa hi aci Jesus huna tangval mihaupa tawh kibang hi. Citak in zui, zatep, voksa nelo napi Khrish lungsim ahi itna, hehpihna, maisakna, cihte neilo hi. "Mihing khat biakinn huang sunga tuikhuk ah kia hi. Hotkhiat ding kisam hi. SDA citak Pawlpi up-pa in amuh ciangin, hihpa in zatep azang hiam, sawm-a-khat Mission tungah apia hiam, MYUM tawh akizom hiam? cihte ban-ah Church Manual, Policy, bylaw, Churchboard, Mission , Union, Division, GC cihte alungsim mitkha-ah kigualto pah detdet khe-helmawk tazen hi. Ahihhangin Pasian bel phawk khak in nei nawnlo zel hi.
Hon khia ding maw honkhia lo ding cih Church Boad meeting lo-in, Voted Number omlo-in, Mission zaksak phot lohin, Union theihlohin, and , and,,,etc.." cih ngaihsun ngel tazen mawk hi: tuateng khit mateng tuikiapa aki hon theilo dingin seh hi: tua banga sepna bek pen Pasian deihna sa kha hi. Tua bang SDA citak pawlkhat Adventist sungah a om hi. Hihbang SDAte in Pasian hihna taktak amutello ahi hi. Pasian pen thu manna(justice), Itna, hehpihna, maisakna, lungduain, khualna tawh kidim hi.
Hihbang SDAte pen in Pasian pen thu man hi cih bek mu in Legalism ah langleekin sawi pai uh hi. Amaute in maisakna, itna, khualna te thumanna tawh lemtuah theilo uh hi. Tua manin Jesus hun-a Judah sunga Pharisess dan lungsim nei uh ahi hi. Jesus in “note in na tanglai ngeinate uh zui-in Pasian Thukham na vaal mawk sak uh hi, ” acih Pharisees dinmun hi. Tua bang mite pen a om den mah hia, A GOOD CATHOLIC, BUT A BAD CHRISTIAN abangte hi uha, A GOOD SDA, BUT A BAD ADVENTIST CHRISTIAN te ahi uh hi.
Tua ahihmanin, tuabang mite ihihloh nadingin Pasian lungsim i sungah Kha in ong guan ta hen. Ngaihsut ding hoih kasakte kong zaksakna hi.
Hong it, sia Khen,
Adventist Christian
