Atlantic tuipi dunga Mivom Conferencete

ATLANTIC TUIPIDUNGTO-A MIVOMTE         

CONFERENCE NGAHZIA--Part V

Tualsuak Makaite

United Sates ah nasep sumzon(Financial depression in 1929-) ciangin tuipi gal nasep nading sum khak ong hamsa hi. Tua hangin nasem ding tualsauk mi tampi cial ong kisam hi. Tualsuak mite cial na dingin sum tawm bei zaw hi. Amau adingin inn gamlapi ciahkik kullo hi. A lungkim-uh zah ahizo kei zongin gam dang pan-a missionaryte sangin khasum tawm zaw tawh tualsuak mite nasem kicial thei hi. 1930 pan 1936 ciang China ah gamdang missionary kibehlap lo-in tualsuak nasem ahihleh tam semsem zaw in 388 pha hi.

Gaalpi nihna hangin nasep kizom theihlohna ciang ong om hi. Tua in zong makai panmun sangzawte ah tualsuak nasem cial loh pha mawh sak hi. 1941 in General Conference president J. L. McElhany ciaptehna ah, “Ethiopia le Far East (Asia gam nisuahna khanglam) ah pawlpi nasep masuan pen tualsuak nasemte le pawlpite in a tamzaw sem uh hi” ci hi. “Tualsuak nasemte upmawh sangin nasep a siam zawk lam uh kilang khia sak uh hi. Gaalpi sungun buaina tampi a om hangin China-ah tualsuak nasemte makaihna nuai-ah nasep khempeuh meelhemna omlo-in pai khuasuak to zo hi,” ci’n China Division president E. L Longway in 1946 in tel hi.

Gaalpi ma kum 10 lom-a kipan Asia bup-ah namitna lungsim khang hi. Gamdang mi thneih huzap le ukna le angkhualna hangin Christian biakna pen Europe biakna hi cih lungsim piangsak-a, muan mawhna khang sak hi. India le Pakistan in 1947, Indonesia in 1949 in suahtakna a ngah mengmeng ciangin pawlpi nasepna le makaihna zong tualsuak nasemte khut sungah ap mengmeng ding kisam ahihna Adventist makaite in tel uh hi. 1950 kum-in Southern Asia ah gampua pan nasem missionary pen nasem 100 ah 20 sanga tawmzaw bek omta hi. Union 6 le Local mission 27 ah president 15 le departmental secretary tampi tualsuak nasemte vive ahi uh hi. Division zum sungah department lutangpi 4, assistant treasurer, assistant auditor le zum lai-at a tamzaw tualsuak nasemte vive hi uh hi.

China Revolution Pan Theihthak Thute

Communist-te in manlang takin Sengam zel uha, 1949 in a hatpen mun atun uh ciangin, Asia mun tampi- ah Nitumna lamte huzap bei sak hi. Mission phualte ah gamdang missianryte omsak lai ding pen gamsung pawlpi makaite adingin maimialna thamloin a lauhuai ong suah ding patauhna tawh pawlpi makaite in Division panmun pan local conference dong tualsuak Chinese nasemte tungah ap uh hi.

Tua ciang bek tawh phalo hi. Western lang panna le biakna langpanna hanga bawlsiatna le nenniamna in pawlpi sung le kilomkhopna(organization) khempeuh kisia sak hi. Acitak thu-umte a gukin om uh hi. GC le Sengam SDA pawlpi kizopna kitatsat hi(Review, July 19, 1950, pp 164-166; SDA Encyclopedia p. 276).

Lungsim navaak le atei mahmah gamdang nasemte ciahkhit-a China Division Secretary David Lin inChina-a pawlpi a lokgawp tuahsiatna pen a zaknop huailo phial khatin gen hi. Laikhetna, pilna sanglam, le zato lamteng khantoh a deih pawlkhatin makaih uha, kumpi thak tawh kizop ding hanciam uh hi. Nasem sia tampi piangthak lo uh hi. Tua sang le zato lam-a kizang sumte EG White laibute khetna le hawmkhiatna-in kizang zaw leh pawlpi mite upna kip zaw-in kisawhpolhna lungsim tawm zaw ding hi, cih um hi.

Thu nung-etna ah, khuatual pawlpi phungvuh nadingin sum atam zaw zat ding ahi hi, ci-in a ngaihsutna pulaak hi. Gamdang nasemte khualzinna adingin sum tam kizang lua hi. Amaute in colonial lungsim puak dopphah sa in, “Ukpi bangin kingaihsun uh hi,” ci hi. Tua bang mite pen angkhualna tawhmiphatphat-a amaivil(sychophant), a kineih le ordination le promotion ngah nadinga bekamimaivilt(thaau-laisen deihte)te khemsa vive tawh lungkimte ahi uh hi. American missionary-te in tualsuak nasemte khasum a zah guk bang saang uh hi. Talen nei le siam zawkman, thuakna tamzawkman le muibut zawkman hilo-a, pianpih meel le sa hang bek hitanghial helzen sam hi. “Gam pua pan missionary-te in a theihloh uh hangin kiliatsak zawkna lungsim vom gige uh hi. Hih gampua mite patkhiat lungsim pen akipelh theilo zah dingin pawlpi organization nasepna sungah ong luang hi.(David Lin, “Years of Heartbreak: Lessons for Mission by China Insider”; Spectrum, VII(Number 3):22-23;; S. J. Lee, Adventism in China: The Communist Takeover,” Spectrum VII(No 3) 6-22

1)(Burma Union ah Mikang missionaryte omlai-in, Pr. F. C. Wayman in Sia Maung Twa kiangah, “Hey, Sia Maung Twa, ameta be masa neh, nua phit tua me!” ci hi. Sia Maung Twa in zong, “Hey, Pr. Wayman, Arlue gyi be masa neh, arlue phit tua me,” kici uh hi ci. Mikangte adingin sanek pen khantohlohna dan in ngaih sun uh hinteh. Tualai-a Adventist sanete Adventist standard lifestyle hilo dan-in akingaihsut dan. Tua bangmahin, Spicer ah Zomi sangnaupang pawlkhattungah, Vaitesangnaupangte in,”kiphasak kei’n, singhiang tung pan nong tuahsuk zong zandeuh mah hi,” ci’n neu ngaihsut uh ci KK).

2)(“Thau-laisen,” Idiom dan hi. Gawnglua-a thau nuam ahihmanin a thaau theih nadingin zong cihna hi Akhiatna pen panmun, za, khatpeuh ngah nading le uliante maipha muh nadinga uliante maivil-in nungzuihzuihte agen nuam ahi hi. Hih kammal pen 1992 kum Laangzaang, Teddim Circle khawmpi sunga siapawlkhat ciamnuih le cihtak-in Pa Sian Cin Zam, Pa Zam, cihna pan lak ahihi. KK)

David Lin pulaak khiat gamdang mite le tualsuak mi nasemte khasum kikhaihna vai pen Pawlpi makaite in liangko kikim dinmun a tun zawh nading dongin hanciam-a a buaipih thu khat ahi hi. Olsamtak-a puahphat ding baihlo ding hi. Leitung bup pawlpi sumlam a lente in khasum piakzia a khensat nadingin nasem mipa sepna mun le gamte’ sumlutzia(economy) hauhzia a etuh kul ding hi. Khuatual-apawlpi mite sumngah zah average sang a tamlua tham zaw siate khasum in piak ding zong kilawmlo leuleu zel hi.

Gamdang missionary-te in a gamsunguh-a nuntak luhinna ciangbeek ngah suak dingin kilawm veve sam hi. North American le Europe mite in gamkhangtolo zaw munte ah nasem leh, amau gam-a a dinmun sang aniam zawkloh nading ciang hileh, a khasum uh pen tualsuakte-a sangin tamzaw veve lai ding cihna ahi hi.

A gamuh-a, a ngahzah uh tawh teh le’ng a tawm zawk hangin, a nuntak khom dingun pia leng amau tawh kikim tualsuakte-a sangin a khasum-uh tamzaw lai veve ding ahi hi. Kitelkhilalna pen kipelh thei tuanlo ding suak hi.

GC zumpi-a Adventist makaite le gamdang missionaryte in David Lin phawkkhak sanga tamzawChina-a atuah uh thute panin phawk zaw thei mai ding uh hi.

1954 in Far Eastern Division(tu-a SSD) in local mission 32 ah 21, le Secretary-treasurer(nidang a Secretary le Treasurer pen mikhat in len) 27 pen tualsuak nasemte hi ci’n report theita uh hi. Division sunga member tampenna Southern Philippines Union pen tualsuak Filipinos-te bekin makaih hi. Tai 1000 tampi agamlatna nisuahna khanglam-ah gaalhang Kata Rangoso pen Australian Division sungah tualsuak mission president masa pen ong suak hi. Thudam tawh gambup suahtakna angah Southern Asia ah tualsuak mite ading panmun manlang zaw kan hi—Local president, secretary-treasurer le departmental secretary khempeuh tualsuak(Indian)te a hi uh hi.

Tua bang-a kipumpiak le citak tualsuak Jesus galkapte pen SDA sangte ahi Spicer Memorial le Philippine Union College pan khangkhiate ahi uh hi. Spicer sang pen 1915-a South India Training School min tawh nasem sinsakna sang-in kipan hi. Philippine Union College pen 1917-a Tan 10 sang tawh kipan ahi hi.

1950-60 kikaal-in tualsuak Adventist a khangkhangin tua sangte pen pilna ngahna-in nei uh hi. Hih bang khangnote in a kim-uha gamte dongah evangelist-in tung theita uh hi. Enpak leng, 1958 in Filipino nasemte Hong Kong, Indo-China, Thailand, Borneo, Sarawak, Indonesia, le Guam dongah zato nasem le sangsia in panguh hi. Agam sunguh-ah zong makai dinmun buppi tualsuak nasemte in len uh hi.