CONFERENCE PAWI
TALEK KHUA
PAU LAM DAL
Hun bei sa, January 4 – 5, 2013 in, Talek Khua pan, Ka Sin’ Thu; Pasian’ mai leh, ZomiSDA milip tungah, kong taangko hi. Tonzang Circle pawi a (6) vei na Talek Khuata, Zampi’ Uk, Tonzang gam sung ah Jan 3-5, 2013 ni in, kibawl hi.
A thu ala akicing thei pen dingin, leh ka pulak theih bangin, kong pulak hi.
A thu : “A 6 Veina Tonzang Circle SDA© Pawi leh Pa Kap Za Gin & Nu Hau Do Cing
Te’ Kiteen zawh, Kum 35 cin’ Coral Jubilee”
Thu Bulphuh : “It’na ka neih kei leh, A mawk na pi” ICor. 13:3
A Ni : January 3 – 5, 2013
A Mun : Talek
Pawi Laa : Pa Do Za Thang te’ Innkuan, Talek
Nite, kha te, kum te, hun te hong pai to, hong cingto hat hat a, asawt lo-in, Talek Khua ah, Tonzang Circle pawi akibawl ding ahi ta hi. Tua leh, Tonzang Circle Pawi, Talek khua ah hong tung pet mah ta a, a khua khua pan khe tawh, Cycle tawh, hong kitung dem dem, hong kitung diam diam, hong kitung liai liai ta hi. Hong tung nailo pawlkhat zong om in, tua lak ah Kawlpi pan in hong ding khia MUC makai pite zong ahi uh hi. Ko innteek pawlpi pan zong ka pan mun kiseh na ciat ciat vuah, Tavuan cii tak in ka pang diam diam, uh hi.
Hih Talek pawi ah, MUC makai pi te’ mawtaw tawh hong tun’ theih na dingin, Zampi, Talek pan, pawlpi kidei danna om lo in, tangpi tangta te in, Mawtaw lampi; Zampi leh Talek kikal teng ka puah khawm ziah ziah uh hi. Tem tawi thei te in, tem tawi in, tupeek, tuzum, kawbia, tawi thei te in, tawi tek in, khut khat tawi, khe khat khai in, na ka sem khawm uh hi. Pasian’ hehpihna tawh pawi’ hun ma in, lampi ahoih mah mah in, ka puah zo ta uh hi. Tha tang tampi tak zong kibei hi.
A hun hong tun tak ciangin, MUC makai pi’ te Pa KapLian te’ innkuan in Myothit pawlpi te’ apiak motor Jeep Car – Sang Hoih in hong hawl to in, hong ding khia uh a, ko Talek innteek pan Khangno pawl khat in Motor Cycle nih tawh mi guk kipua in, Tupek, tu zum, sik sem, kawbia te tawi kawm in, tui vot, tui
siangtho tawh makai pi te’ dawn dingin, ka kuan uh hi. Pasian’ hong makaih sak na tawh, Tuitangzang te’ khuanawl ah motor tawh ka kituak uh a, tawm vei holim na nei in, ka tui siang puak te uh awm in, Talek lam zuan dingin, ka kithawi leu leu uh hi.
Tua leh, Cidam tak in MUC makai’ pi te Talek khua hong lut ding uh ahita hi. Ko zong khuakhung mualzang ah Warmly Welcome – MUC ci in, Signboard pi khat suang in, tua tengah khua sung pawl sung pan, a mawtaw munuam tawh, MUC makai pi te amunuam adawn nuam tawh, ka pawl cing ngei ngai peuh mah uh hi. Makai’ pi te khua sungah lut sak nailo phot zizen in, khua khung mual ah, ka tawlnga hit hiat sak phot uh hi. Tua leh ko zong Makai’ pi te’ hong tung cianga ka dawn na ding uh ci a, ka sin sin uh Zola Pi awi ding suut dingin, ka kisa geng gang ta uh hi.
@ Sian tawh kop a, Zingvai hawmsiam MUC tongdot te leh; Laizom nih, thum tuang hong tung e.
Lam bang paak ni, lam bang paak ni e lawm!
(A stanza dangte mangngilh ta ing…hong kanlai ning…….)
hih atung a Zola pi, awi awi in, vial ngiat ngiat in, ka sak ngiat ngiat uh hi.
Tua khit tak ciangin, aban aban in kilen in, alungdam’na akhi tui luang tawh bang tawh ka om ngei ngai uh hi. Makai’ pi te Talek khua sung hong lut pet pet ta uh a, ka khua sung uh pen ah kikha lum’ suah mah mah in, a nuam mah mah hi.
Hih bangin MUC makai pi te in hong phak theih manun, ko adiak diak Talek SDA pawlpi te ka khalum tuam mah mah uh hi. Abei sa Dec 16 ni lai in, ka pawlpi mite’ uh inn nih mei in hong kat tum sak na hangin, dah in lungkham in ka om na uh sung pan, ka makai pi te’ uh ka muh uh ciangin ka nuam mah mah pha diak uh hi.
Pasian’ hong makaih na tawh, nuam tak in, A (6) Veina Tonzang Circle pawi ka kipan thei uh hi. A beisa hunkhat lai a, ka bawl uh Sang thum kilawm tatna; NAS, TAS, ZAS pan akihel sangnau pang te bang akimuh tung bang dan uh hong hinawn lo in, hong kimuh kik uh tak ciangin, Social lam hong siam mah mah ta uh hi. Hih sangthum kilawmtatna hangin phattuam na tampi sang naupang te in, aneih na sun nitaang bang in, hong taang si see hi. Hih pawi ah pen, Sang naupang te mah hong thalawp, hong ki maingap uh in, hong gamtang khawm liai liai, kikhawl khawm liai liai in hong om thei ahihman in, pawi pi pen tampi tak hong picing sak mah mah uh hi. Pa Kap Za Gin leh Nu Hau Do Cing te’ nupa suahzawh Coral Jubilee Mualsuang zong pawilaa; a tapa Pa Do Za Thang te innkuan in, Lawital khat tawh, pawi siim mipi te’ anvak in, mualsuang ngiat zong phut sak uh hi.
Hih pawi hun sungah kidem na tuam tuam om a, tua te sung pan khat kong pulak nuam hi. Pawi’ aa kidem’ na dinga ka sin sin sak uh, ka lotngah sak uh, LST kamloh ngah kidem na ah zong ka sangnau pang 17 te ka kihel sak uh hi.
Khangno te LST kamlot ngah cih Korintu Masa 13 sung “It’ na” – abup hi a, tua tengah mi 20 val kidem uh hi. Choir kidem na, thugen kidemna cih te akpi pan, a
Tua bek tham lo in, Talek khua ah pawi hong siim worker khempeuh sum tangin Ks 5000 ta leh Dr Dallian’ kamphen EGWhite’ gelh, “Tuan Pu Pa te leh Kam Sang te” cih laibu letsong in piakhia lai uh hi. Worker te, Talek ah pawi hong sim khempeuh hampha kisa ciat mah mah hi. Ka eng thei mah mah uh hi. Ka neu nung sang tu ciang ciang, pawi kibawlte ka kihelna lak ah, A (6) Veina Tonzang Circle Pawi, Talek khua a kibawl leh atung pawi pen mah nuam kasa pen pen hi. Lah ka buai mah mah a, lah nuam ka sa mah mah hi.
Tua teh Pa Khenno te innkuan mah in, Khe tawh pawi hong siim te zong, lampi ah sunsiah man ding ci in, akhua akhua in ; 10,000, 5000Ks cih bang dan in piakhia hi. A kipiak khiat na te uh etteh huai ka sa mah mah hi. Topa in thupha tampi hong piak sak lai ta hen! Tua bek tham lo in, a gamla pen pan pawi hong siim te, a teek pen aham pen pawi hong siim, angek pen, anaupang pen a pawi hong siim, etc…., cih te letsong piak nate kinei hi.
Hih Talek pawi ah, pawi siim pen zin vek pi 250 val kipha hi. Kawlgam, Vaigam pan khua 30 val pan pawi siim hong kipai hi. Pawi’ siim mimal in tha ngah thei mah mah hi ung. Tua leh kha sungah kha lum in, kibual in ka om laitak kek mah un, ka kikhen ding hun uh hong tung vat ziau hi. Kingai lai pi pi, nuam sa laipi pi, in ka khut te uh kilen in, kinam in, ka kikhen uh hi. A 6 Veina Tonzang Circle pawi hong tung pak hong man pak ziau ta hi.
Makai pi te’ zong hong kithawi lit lit ta uh a, Zampi Pawlpi te’ khohna leh sap na om mah bangin Zampi lam zuan dingin hong kithawi thawi ta uh hi. A ding khiat ding uh teh, pawlpi mite’ a om thei sun teng tawh thunget na nei khawm in, khi tui nap tui, tawh kawt pikpiap pi mah in khut te kilen in, ki kawi in, kinam in, ka zahtak mah mah uh makai pi te uh tawh ka kikhen ta uh hi. Mual ah muah ah, akhup dong uh ka en cii ciai tek uh hi. Makai’ pi te bel Zampi ah zankhat tam uh cih za ing. Tua teng ah Zampi Pawlpi’ bup ai taang in, uPa Langh Khan Zam te’ innkuan in, ama’neih sa Bawngtal lim ci mah mah khat, MUC makaipi te’ gawh in pawlpi miteng tawh tutpih, an nek pih, ompih uh cih za ing.
A 6 Veina Tonzang Cirle Pawi ah, MUC pan Makai’ Hong Kihel Thei Teng;
Sia Kai Za Dal President
Sia Kam Khan Mung Secretary
Gin Khen Kham Treasurer
Khup Ngaih Thang (former Treasurer)
Sia Kham Sian Kim Hostel Dean(MMCC)
Tg Sang Hoih(Driver)
Tg ________(Mawtaw Nungzui)
WARMLY WELCOME
A 7 Veina Tonzang Circle Pawi pan in, leitung bupa om Zomi SDA milip te kong muak, kong sam uh hi. Geel na te Topa in, hong thukim’ pih leh!
A 7 Veina Tonzang Circle SDA© Pawi Pi leh
“Tonzang Biakinn Pi Thak Kong Hon Pawi”
A ni : January, 2014(Kaal nunung)
Thu Bulphuh LST : Genesis 22:14 “ Jehovah-jireh”
