Na upna bangin
na thuakding om thei ding hi.
Hih leitung ong
kibawl cil lai-in Eden huan sungpan in Mawhna ong kipan a Mimawh vetlo pipi
tampi takte bawlsiatna, thongsungah khumna tuamtuam te leh sisan naisan luangin
a tawpna ah sihna te tampi tak ih mu thei hi. Tua banah mawhna neilo ganhing
ithuai mahmah te mihingte mawhna hangin ki that, ki go a sisan luanna tampi tak
ong piang toto hi.
Tua mah bangin Pasian tungah citak in Pasian thumaan a len
mite in bawlsiatna a khangkhang in ong thuak toto uh hi. Abel in Pasian cihna leh sawlna te thupi sim
in Pasian deihna ong zuih takteh a ma biakpiakna kisang in Pasian a ma tungah
lungkim mahmah hi.
Tua leh a ma upna hangin a man bangteng na thuak hiam, a mah
a it penpen ding a sanggampa in ong thatlum mawk hi. Leitungah ongit pen ding a
ih ngaihsut ih pawlpi makaite, siate leh ih sanggam u leh nau te khawngin ong
bawlsiat a thongsung ong khum zongin ahi ding mah hi cih ih phawk ding kisam
hi. Ahizongin kum 6000 sung kiimbang sungin Abel upna hangin sisan luanna in,
Pasian thu a tang koko na hi veve a, mawkna hetlo hi (Heb 11:4). Isaac nuntak
leuleu ah a mah “Kamciam naungek” ciding hiam a ma sungpan suan leh khak tampi
piangding cih ong hi hel zen hi.
Tua leh a ma nuntakna bang piang hiam, a mah a
it ding penpen ahi a sanggam pa Ishmael in na bawlsia tawntung mawkzen hi (Gal
4:29). Tua bangin bawlsiatna thuakte a guallel maw leh, hi zenzen lo hi, a mau
aadingin tawntung nuntakna ki koih sak khol zo hi. Joseph leuleu zong a mah pen
a lungsim hoih a thu mang mahmah leh a pa it mahmah khat ahi zen ve leh.
A mah
e leh bangteng ong tuak pialpual ahia le, a it a kem asai ding a sanggam a U
neih tengin bawlsiat cihtak in ong bawlsia, dum sung khia, sal dingin a u ten
ong zuak in ong lungkham mahmah hi. Ahizong tuateng tawh maimawk hiam, mai
zenzen lo hi, mitampi takte gialpi pan in a honkhia agum khia ding leh a U te
khempeuh leh a pa ii lamdang sak mahmah mipa leh a huhpa taktak ong suak hiau
mawk hi.
Elijah e leh, a
mite siatna ding pan in hon khia a, launa gimna tawlna tawh kigim den hi. A
hizongin Kumpipa te kumpinu te a ma gal lian mahmah ong suak uh hi, ahizongin a
ma sepna te pen Pasian in lungkim pih mahmah hi. Jeremaih leuleu zong a nu gil
sungah aom laipek in sapna ngah hi a, a taktak teh Pasian mi a kisa mahmah te
in na langpan mawk hel ta zen uh hi, ahizong atawpna ah a mau aadingin Kamsang
lian penpen cihna na pia uh hi.
Tulai ih pawlpi sungah zong laisiangtho tawh
kituak tak in gamta, kiniam khiattak in Topa mai zongnuam Zomi tei zawdeuh neih
leh lam neih man leh pilman hilo ahanciam nuam te thongsungah khum a susu tuni
ciangdong pen Zomite a thei atel ih sanggam ih beh ih phung ih U ih nau, si
khat sa khatpih ih mipih Zomite mah ahi hi.
Ngaihsun thei leng a na mah hi.
Ahizongin tuateng tawh maimang ding maw, hizenzen lo hi, a gah ong om veve ding
hi tua ni ciangin ihtel ding hi. U leh naute aw na hoih nasep man na thuak leh
a tunga Pasian mite thuak bang hilel hi, na gim na tawla na si zongin a gah om
veve ding hi. Pasian hangin langpan na nathuak leh kipaak takin om in, Pasian
in ong mangngilh zenzen lo hi. Pasian in ih sepna thaman ong piak ni ciangin na
hawmthawh lai ding hi. Peter in, Kei ka Topa bangin nong khailup ding uh kilawm
kei ong lehkhai un a cih bangin ei thuakna te khasiangtho in ong ompih leh
bangmah tham in ih tuat kei ding hi.
Ei ong bawlsia ding pen na theihloh ding
mite in ngaihsun kha kei in, nang ong tel nang thu a thei penpen te hi kha zaw
thei hi. Luke 9:24 ah Jesu in, “ Kei hangin a nuntakna a suplawh te in a
nuntakna a huzo te hi ding uh hi” ci hi.
Khenno
